Juanasiup Aglangit 9
9
Jiisusiup Tautuliqtitsininga Irniangunirminit Tautunngittumik
1Jiisusi pisugluni, angummik takuvuq irniangunirminit tautunngittumik. 2Ilinniaqtingitalu apirivaat, “Ajuriqtuiji, nalliatta ajuqtulininganut taanna tautungnani irniangusimavaa nangminirluunniit ajuqtulinirminut? Angajuqqaanngitaluunniit ajuqtulininginnut?”
3Jiisusiup kiuvait, “Taassuma tautunnginninga ajuqtulinirminut, angajuqqaangiktaluunniit ajuqtulininginnut pijjutiqanngilaq, tautunngilarli Guutiup ajugaqanginninga taassumuuna saqqiqullugu. 4Ulluuningani tilijima piniarningit piniagaksarivavut; unnuangujumaarmat kialuunniit pinasuarvigijunnanngitanganik. 5Silarjuarmiinninni, silarjuarmiut qaumanirivaanga.”
6Taimaak uqariirami, nunamut uriaqpuq, nuvak marrarlu katillugik akuppaa; tautunngittuup ijingik tamatumunga minguaqpaak, 7uqautillugu, “Irruqturiaqtulirit Sailuap Tasinganut.” (Sailua tukiqaqpuq “Tilijaq,”) Tavvungalu aivuq irruqturluni tautulirlunilu utiqpuq.
8Nunaqqatingit tavva, taassuminga takuqattaqsimajut kiinaujanik tuksiraqtiuvalaurmat, uqaliqput, “Una taannauva iksivalluni tuksiraqtiuvalauqtuq?”
9Ilangit uqaqput, “Taannatsainnarnguna”; ilangit uqarivut, “Taannaunngitturnguna tainnaujaatuinnaqtuq.”
Taannali uqaqpuq, “Taannauvunga.”
10Tavva uqautivaat, “Qanurli maanna tautuliqpiit?”
11Taanna kiuvuq, “Angutiup Jiisusimik atiliup marraq sanalaurlugu ijiikkaglu minguarlugik uqautilauqpaanga, ‘Sailuamuarlutit irruqturiaqtulirit’; tavva ailauqpunga irruqturiiramalu tautulilauqpunga.”
12Taakkua uqautivaat, “Tainnaa naniippa?”
Taanna uqaqpuq, “Qaujimanngilara.”
Paarisit Qaujinasuarningat Aaqqiktaujumik
13Tavva apiqsulauqtut Paarisinuarutivaat taanna tautulaunngittuq. 14Sapatiutillugu Jiisusiup marraq sanalaurmagu tautulaunngitturlu tautuliqtilluniuk. 15Tavva Paarisittauq taanna apiqsulirivaat qanuq tautulilaurmangaat. Taassuma uqautivait, “Marraq taassuma ijinnut minguarutigilauqpaa imirmut irruqturama, tautulilauqpunga.”
16Tavva Paarisit ilangit uqaliqput, “Taanna angut taimailiuqtuq Guutimit pinngilaq, Sapatimi piqujait malinngimmagit.”
Ilangilli uqaqput, “Qanurli inuk ajuqtulijuq taimaak nalunaikkutarmik saqqititsijunnaqpaa?” Tavvaniittullu isumaqatigiigunniiqpuq aviksimalirlutik.
17Tavva Paarisit taanna tautulaunngittuq apirikkanniliqpaat, “Qanurli tanna uqausirijunnaqpiuk ilingnik tautuliqtitsilauqtuq?”
Taassuma kiuvait, “Taanna Nalauttaijuuvuq.”
18Juutilli ukpirinngilaat tautulaunnginninga maannalu tautulirninga, tassuma tautuliqtuup angajuqqaanginnik qaiqujiqqaaratik. 19Qaingmatiglu Juutit apirivut, “Unaa irnirivisikkuk? Tautungnani irniangusimaniraqtasik; qanurliuna maanna tautuliqpa?”
20Tautuliqtuup angajuqqaangik kiuvuuk, “Qaujimavuguk taanna irnirigattikkuk, qaujimallunuglu tautungnani Irniangusimaninganik; 21qaujimanngilagugli qanuq maanna tautulirmangaat, qaujimannginnivuguglu kinamut tautuliqtitaungmangaat. Apirilauqsiuk; surusiujunniirami imminik kiujunnaqtuq.” 22Angajuqqaangigli taimaak uqaqpuuk Juutit sivuuragigamigit, Juutit angiqatigiiksimalirmata nalliat Christuusiuniraikpat taassuminga, Juutit ukpirnirmut katimavingannut itirunnaillititsijunnarninginnik. 23Taimaimmat angajuqqaangik uqaqpuuk, “Surusiujunniirmat, apiqsuliqsiuk.”
24Tavva kingullirmi tautulaunngittuq qaiqulirivaat, uqautillugulu, “Guuti niqtulauruk; qaujimavugut angut taanna ajuqtulijuungmat.”
25Taassuma kiuvait, “Ajuqtulijuungmangaat qaujimanngilara; atausirmigli qaujimagaluaqpunga, tautulaunnginnama, maannalu tautulirama.”
26Taakkua uqautivaat, “Qanuq pinasuarvigilauqpaatit? Qanurlu tautuliqtippaatit?”
27Taassuma kiuvait, “Uqautijariiqqauvassi, naalagumaqqaunngilasili, sungmat tusakkannirumalirivisi? Taassumunga ilinniaqtiujumalirivisi?”
28Tavva uqarnirlugvigillugu uqautivaat, “Ivvit taassuma ilinniaqtigivaatit, uvagulli Muusisiup ilinniaqtigivaatigut. 29Qaujimavugut Guutiup Muusisi uqaqatigiqattalaurmagu, tainnali angut, qaujimanngilavut nakit pisimangmangaat.”
30Taassuma kiuvait, “Tamanna kamaniarnatsiaqpuq! Qaujimannginnassi taanna nakit pisimangmangaat, taassumalu tautuliqtilauqpaanga. 31Qaujimavugulli Guutiup ajurnirmiittut tusanngimmagit; Guutimigli kamatsiaqtut piqujanganiglu atutsiaqtut, Guutiup tusarmagit. 32Silarjuup pigiarninganit tusaumajuqanngilaq irniangunirminit tautunngittumik tautuliqtitsijuqalauqsimangmangaat. 33Taannali Guutimit pisimanngikkuni, sunamigluunniit pinasuarunnarajanngilaq.”
34Taakkua kiuvaat, “Ajurnirmi irniangusimallutit piruqsajauvigillugulu, uvattinnik ajuriqtuinasuaqpit?” Juutillu ukpirnirmut katimavingannit anitippaat.
Anirnikkut Tautunnginniq
35Jiisusili tusarami anititausimalirninganik, katigamiuglu uqautivaa, “Inuup Irninganut ukpiqpiit?”
36Taassuma kiuvaa, “Nalliangungmangaat uqautilaunnga, taassumunga ukpiliqullunga.”
37Jiisusiup uqautivaa, “Takulauqpat, taannauvurlu uqaqatigijait.”
38Taanna uqaqpuq, “Ataniq ukpiqpunga”; saanganullu siiqquqpuq.
39Jiisusi uqaqpuq, “Iqqaqtuijaqturlunga silarjuarmut tikippunga, tautunngittut tautuliqullugit, tautuktullu tautugunniiqullugit.”
40Paarisilli tavvaniittut ilangit, tamatuminga uqaqtillugu tusaramik uqautivaat, “Tautunnginnivita?”
41Jiisusiup uqautivait, “Tautunngikkussi, pasijaksauniqarajanngilasi; maannali tautunngnirarassi, pasijaksauvusi suli.”
Currently Selected:
Juanasiup Aglangit 9: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
