Juanasiup Aglangit 10

Paiqsijiup Ajjiutitauninga

1“Sulijumik uqautivassi, nalliat itiqtarvikkut itinngittuq siipikkuvingmut asiagulli isiqtarviunngittukkut avalu majurlugu isiqtuq tigliktiulluni tiguuraijiuvuq piginngitaminik. 2Itiqtarvikkulli itiqtuq taanna siipiit paiqsijigivaa. 3Taanna itiqtarviup kamajingata ukkuirutivaa; siipiit nipinga tusaqpaat siipiqutiminik qaiqujilirmat atingit taillugit tavvanngallu sivulirluni aniqatigivait. 4Aniqatigijariiramigit sivuliqpait, sipiillu malikpaat, nipinga ilitariumagamijjuk. 5Qaujimanngitamingnigli malingnianngilat; qimaangaaqpulli taassumanngat, qaujimanngitami nipinganik ilitaqsinnginnamik.”

6Ajjiujumik tamatuminga Jiisusiup uqarvigivait, tukisinngilalli qanuq tukilingmik uqaujjaungmangaarmik.

Jiisusi Paiqsijitsianguvuq

7Tavva Jiisusiup uqarvigikkanniliqpait, “Sulijumik uqautivassi, uvanga siipiit itiqtarvigivaanga. 8Sivuninni tikilauqtut tigliktiullutiglu tiguuraijiulauqput; siipiit naalalaunngilait. 9Itiqtarviuvunga; nalliat uvakkut itituq, taanna piulijauniaqpuq, itirluni anilunilu niqiksalingmik nanisiniaqpuq. 10Tiglikti qaivakpuq tigligariaqturumalluni tuquraijumallunilu; uvangali tikippunga, inuusirmiglu ajuqsarnanngittumik piqaliqullungit.

11“Uvanga paiqsijitsianguvunga. Paiqsijitsiaq inuusirminik tunisivuq siipiit pillugit. 12Tilijausimatuinnaqturli paiqsijiunngittuq, nangminiqanngitturlu siipinik, amarurmik qailiqtumik takugami siipiit qimainnarlugit qimaavuq; amaruup siipiit angullugit siammaktippait. 13Tilijausimatuinnaqtuq qimaavuq tilijausimatuinnarami siipinik annirusunnginnami. 14Uvanga paiqsijitsianguvunga; nangminikka ilitarivakka ilitarijaullungalu taakkununga. 15Suurlu Ataataup ilitaringmanga uvangalu Ataata ilitarigakku; inuusiralu tunivara siipiit pillugit. 16Asinginnik suli siipiqutiqaqpunga, tavvanngat siipikkuvingmik pisimanngittunik; taakkuattauq tavvunga itiqtitsariaqaqpakka; nipinnik tusarumaaqput. Atausiuqatigiigumaaqput, atausirmiglu paiqsijiqarlutik.

17“Tamanna pillugu Ataataup nagligivaanga, inuusinnik tunisininnut, amma utiqtitsijunnaqullunga inuusinnik. 18Inuusinnik aqsaaqtaujunnanngilanga kinamulluunniit, nangminirli isumaqsurlunga tunirrutigivara. Pijunnarniqaqpunga tunirrutigilugu, pijunnarniqarivungalu amma utiqtillugu; tamatuminga taimaak Ataatama piqulauqpaanga pinasuaqullunga.”

19Tavva Juutit angiqatigiigunniirivut uqausiit tamakkua pillugit. 20Amisut tavvaniittut uqaqput, “Anirnirlungmik ilummiqtausimagami, isumairutisimavuq; sungmanuna naalakpisiuk?”

21Asingit uqaqput, “Anirnirlungmik ilummiqtausimajuq taimaak uqallagunnanngilaq. Qanuq anirnirluk tautunngittunik tautuliqtitsijunnaqpaa?”

Jiisusiup Narrugijauninga Juutinit

22Ukiungulauqpuq Tuksiarvigjuap atuqtaujunnarningata ukkuiqtauningani nalliunniqsiutillugit Jiruusalimmi; 23Jiisusi pisuktillugu Tuksiarvigjuarmi, Suulumuuniup Tuqsuunganik taijaujukkut. 24Juutit Jiisusi avaluvaat uqautillugu, “Qanuq akuniutigijuq uvattinnut uqaqtailimaniaqpit? Uqautitsialauqtigut sulitsiarlutit Christuusiungmangaaqpit.”

25Jiisusiup kiuvait, “Uqautilauqpassi, ukpilaunngilasili. Piniarniit piniarnirijakka Ataatama atingani, tamakkua nalunaiqsivut uvannik; 26ukpinngilasili, siipiqutinnut ilagijaunnginnassi. 27Siipiqutima nipiga tusaqpaat, qaujimagakkit, malikpaanga. 28Inuusirmik nungusuittumik tunisivigivakka, asiujuqarnianngilat, nalliannigluunniit aqsaaqtaunianngilanga taakkuninga pisimajanni. 29Ataataga tunisisimajuq uvannut taamakuninga, tamainnit anginiqpauvuq, kinamulluunniit Ataataga aqsaaqtaujunnanngilaq taakkuninga tigumiarninganik. 30Uvangalu Ataatalu atausiuvuguk.”

31Tavva Juutit ujaqqanik tigusigivut Jiisusi millurumallugu. 32Jiisusiup uqautivait, “Piniatsiarnirnik amisunik ilissinnut pinasualauqpunga Ataatamit pijunik; piniarniit tamakkua nalliat pillugit millurumavisinnga?”

33Juutit kiuvaat, “Piniatsiarnirilauqtatit pillugit millurumanngilattigit Guutimigli uqarnirluutiqarniit pillugu; inutuinnaullutit, ilingnik Guutinnguqtinnavit.”

34Jiisusiup kiuvait, “Piqujassinni titiraqsimajuqaqpuq, ‘Uqautivassi, ilissi Guutiuvusi.’ 35Guutiup inuit tailauqpagit guutinik inungnut uqallaktillugu taissumani, qaujimavugut aglait akiraqtuqtaujunnanngimmata, 36Guutiup ijjurnaitilauqtanganut tililauqtanganullu nunarjuarmut uqarunnaqpisi ‘Guutimik uqarnirluutiqaqputit,’ uqalaurnira pillugu, ‘Guutiup Irnirivaanga’? 37Ataatama piniaqtauqujanginnik pinasuanngikkuma, ukpirittailisinnga; 38pinasuarukkilli, ukpirinngikkaluarussinnga, piniarniit ukpirisigik, ilitaqsiliqullusi qaujilirlusilu Ataata uvanniimmat uvangalu Ataatanniinnama.”

39Tavva Jiisusi tigunasuaraluaqpaat, qimaksivurli taakkunanngat.

40Utilirivuq Juartaniup Kuungata akianut Juanasiup paaptitsivigiqattalauqtanganut, tavvaniilirluni. 41Amisut upakpaat; uqarlutik, “Juanasi nalunaikkutarnik pinasualaunngilaq, uqausirilauqtalimaangilli taanna pillugu sulitsiaqput.” 42Tavvaniittut amisut Jiisusimut ukpiliqput.

Currently Selected:

Juanasiup Aglangit 10: EAIBR

Highlight

Copy