Juanasiup Aglangit 7
7
Jiisusiup Ukpirijaunginninga Qatanngutiminut
1Tamatuma kingurngagut Jiisusi Galiliakkut ingirravuq; Juutiakkulli ingirrajumanngilaq, Juutit angajuqqaangita tuquttumangmajjuk. 2Juutit Siniktarvingmi Angirraqaqpalaurnirmingnik Nalliunniqsiurvingat qaglilirmat. 3Taimaimmat qatanngutingita, Jiisusi uqautivaat, “Tamaanngat aullarlutit Juutiamualaurit, ilinniaqtitit takuniarmata pinasuarnirijarnik. 4Pinasuaqtamingnik ijiraqtuqtuqarunnanngilaq inungnut qaujijautsiarumajaraangamik. Tamakkuninga pinasuaqattaravit, silarjualimaami ilingnik qaujijautilaurit.” 5Aglaat qatanngutingit ukpilaunngimmata Jiisusimik.
6Jiisusiup uqautivait, “Suli piviksara naammaksinngimmat, ilissili pinasuarviksasi qangalimaaq nalliutisimavuq. 7Silarjuarmiut uumigijunnanngilaasi, uvangali uumigijauvunga piunngittumut aulatauninginnik nalunaiqsiqattarnira pijjutigillugu. 8Nalliunniqsiuriaqtulirissi; uvangali nalliunniqsiuqtunut ainiannginnama, piviksara suli naammaksisimanngimmat.” 9Tamatumingali uqariirami Galiliamit nuulaunngilaq.
Jiisusiup Nalliunniqsiurvingmut Aiqatauninga
10Qatanngutingilli nalliunniqsiuqtunut aingmata, Jiisusittauq maliksarivuq; inungnut saqqijaaluarnani qaujimajaujumannginnami. 11Juutit angajuqqaangita qiniraluaqpaat nalliunniqsiuqtuni, uqarlutik, “Naugli Jiisusi?”
12Inugasait tavvaniittut uqamajautiqarliqput#7:12 Uqaalakaaliqput mangassisutik Jiisusimik, ilangit uqaqput, “Inutsiavaalunginna,” ilangit uqaqput, “Aakkai, inungninginna tamaqtitsiliqtuq.” 13Juutilli angajuqqaanginnik sivuuragamik uqamajautiqarnitik Jiisusimik tusaajautittailivaat.
14Nalliunniqsiurniq aniguliqtillugu Jiisusi Tuksiarvigjuamuaqpuq tavvani ajuriqtuilirluni. 15Juutit angajuqqaangit kamajualuuliqput uqarlutik, “Qanualunguna qaujimajualuuliqpaa ilinniarvingmi ilinnialauqsimanani?”
16Jiisusiup kiuvait, “Ajuriqtuivunga uvannit nangminiq pinngittunik, taassumanngalli tilijinnit pijunik. 17Nalliat Guutiup pijumajanganik pinasuarumajuq, qaujiniaqpuq ajuriqtuijutigijakka Guutimit pingmangaata uvvalu uvannituinnaq uqallangmangaarma. 18Nalliat pijunnarnituinnarmigut uqallaktuq imminik niqtuqtaujjutiksaminik pinasuaqpuq; nallialli tilijiminik niqtuqtautitsinasuaqtuq sulitsiaqpuq, taassumanilu sagluniqtaqarnani. 19Muusisiup piqujanik tunisivigilaunngilaasi? Nallisiluunniit piqujanik maliktuqanngilasi. Sungmat tuqunnasuaqpisinnga?”
20Inugiakturjuat kiuvaat, “Anirnirlungmik ilummiqtausimavutit! Kinamut tuqutaunasuaqpit?”
21Jiisusiup kiuvait, “Pinasuarnirmik atausirmik saqqititsigama, iluunnasi kamaniarutigilauqpasi. 22Muusisiup piqulauqpaasi irnisi kipijauqullugit Muusisi nangminiq pigiaqtitsilaunngikkaluaqpuq, sivulisili pigiaqtitsilauqput, taimaimmat nukappiat kipivakpasi Sapatiutillugu. 23Nukappiarli kipijaukpat Sapatimi, Muusisiup Piqujanginnik siqumitsittailimanirmut, sungmalli taima uumigivisinnga inuup timilimaanganik aaqqiksilaurama Sapatiutillugu? 24Takuksaujutuinnaq maliglugu iqqaqtuiniarasi, naammanaatsiaqtumigli iqqaqtuiqattarissi piniarnillaringa maliglugu.”
Inuit Tukisijumaningat Jiisusi Misaiasiungmangaat
25Taimaimmat Jiruusalimmiut ilangit uqaqput, “Unaa taannaunngilaq angajuqqaujut tuquttumajangat? 26Takuliritsi, inugasagjuanut uqallakpuq, iniqtiqtaunngilarluunniit! Angajuqqaat qaujillariliqpaat Christuusiuninganik? 27Christuusili tikippat, qaujimajuqarnianngilaq nakit pisimangmangaat; unali tamatta qaujimajavut nakit pisimangmangaat.”
28Jiisusi Tuksiarvigjuarmi ajuriqtuilluni, nipiqquqtulluni uqaqpuq, “Qaujimallarikpisinnga? Qaujimallarikkaluaqpisi nakit pisimangmangaarma? Uvannik tikitisimannginnama; uvannik tilisijuq sulitsiaqtuuvuq, taanna qaujimanngitasi. 29Uvangali qaujimavara, taassumanngat pilaurama, taassumalu tililaurmanga.”
30Tavva tigunasuaraluaqpaat; aktuqtaunngilarluunniit, suli pijauviksanga nalliutisimanngimmat. 31Inuit amisut ukpirusuliqput taassuminga; uqarlutik, “Christuusi tikikkuni nalunaikkutarnik pinasuarniqsaugajaqpaa taassumanngat?”
Tuksiarvigjuap Qaujisaqtingit Tigusijaqtuqujauvut Jiisusimik
32Paarisilli tusaramik inugasagjuat immingnut taimaak uqausiqaqtillugit Jiisusimik, Paarisit tunirrusiqtitsijiillu angajuqqaangit tuksiarvigjuap qaujisaqtinginnik tilisivut Jiisusi tigujauqullugu. 33Jiisusili uqaqpuq, “Maanna suli akuniunngittuq najurniaqpassi, kinguningagullu tilijinnut ainiaqpunga; 34qinirumaaqpassinnga naninangalu; aiviginiaqtannut tikittunnannginnassi.”
35Juutilli angajuqqaangit immingnut uqaqatigiiliqput, “Namunngauniaramiuna uvattinnut nanijaujunnailliniarniraqpa? Una Guriikit nunanginnuarumaliqtuq Guriikinik ajuriqtuijaqturumalluni? 36Uqarmat, ‘Qinirumaaqpassinnga naninangalu, aiviginiaqtannut tikittunnannginnassi.’ Qanurngunaa tukilingnik uqallaliqtuq?”
Imiq Kuuktuq Inuusiqtaarnaqtumik
37Nalliunniqsiurviup ullungita kingulliqpaanganni, pivigjuanguniqpauliqtillugu, Jiisusi nikuvippuq nipiqquqtulluni uqaqpuq, “Imiruktuqaqpat, uvannut qailirli imirniarmat. 38Uvannut ukpiqtuq, suurlu aglangni uqausiusimangmat, ‘Imiit inuusitaarnaqtumik kuuktut uummatinganit kuulirumaaqput.’” 39Jiisusili tamatuminga uqaqpuq Anirnirmik Ijjurnaittumik uqausiqarluni, taassumunga ukpiqtunut tunijaujumaaqtumik; taissumani suli Guutiup Anirninga tunijaulaunngimmat, Jiisusi suli niqturnaqsititauviksaminut tikiutisimalaunngimmat.
Inuit Ajjigiinngittumik Isumaqarningat Jiisusimik
40Inuilli ilangit uqausirnik tamakkuninga tusaqtut uqaqput, “Una Nalauttaijullariuvuq.”
41Ilangilli uqaqput, “Una Christuusiuvuq.”
Ilangilli uqarivut, “Christuusi Galiliamit tikittuksauva? 42Aglait uqaqsimavut, Christuusiguuq Taivitiup kinguvaarilaaqpaa, irniangulaarlunilu Pitliami, Taivitiup nunaviningani.” 43Taimaimmat inugasagjuat aviksimalilauqput Jiisusi pijjutigillugu. 44Ilangita Jiisusi tigujumagaluaqpaat, aktuijuqanngilarli taassuminga.
Juutit Angajuqqaangita Ukpinnginningat
45Tuksiarvigjualli qaujisaqtingit utirmata, tunirrusiqtitsijiit angajuqqaangita Paarisillu apirivait, “Sungmat qaijjutinngippisiuk?”
46Tuksiarvigjuap qaujisaqtingit kiuvut, “Taassutunaq uqallagunnaqtigijumik pitaqanngilaq!”
47Tavva Paarisit kiuvut, “Taassumungattauq silairrijaugivisi? 48Juutit angajuqqaangita ilanginnik, Paarisinigluunniit ukpiqtuqaqpaa taassumunga? 49Ukua inugasagjuat, Piqujanik qaujimanngittut, asiruqtaujumaaqput.”
50Nikutimuusili Paarisit ilangat tavvaniittuq, taannatsainnaq Jiisusimik takujaqtulauqtuq, uqaqpuq, 51“Piqujavut maliglugit inungmik sugiaqtauqujijunnanngilagut, tusalauqqaarata qaujisalauqqaaratalu inuup piniarnirisimajanganik.”
52Taakkua kiuvut, “Galiliamiunguqataugivit? Tukisinasulaurit, tavva qaujiniaqputit nalauttaijumik Galiliamit pijuqalauqsimanngimmat.”
53Tamarmik atuni nangminiq angirramingnut angirraqput.
Currently Selected:
Juanasiup Aglangit 7: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
