Juanasiup Aglangit 20
20
Iluviup Inuqarunniirninga
Maatiusi 28:1-8; Maakusi 16:1-8; Luukasi 24:1-12
1Ullaamarikkut pinasuarusiup ullungita sivulliqpaangani, suli taaqtillugu, Miari Maaktaliini iluvirmuaqpuq, takullunilu ujaraaluk iluviup paanganit piiqtausimaninganik. 2Tavva ullaksivuq Saimuuni Piitturuusimut ilinniaqtimullu ailluni, Jiisusiup nagligijanganut, uqautillugik, “Ataniq annijjaunnirmat iluvirmit, qaujimanngilavut namunngaqtaunnirmangaat.”
3Tavva Piitturuusi ilinniaqtilu anivuuk, iluvirmut ailirlutik. 4Ullaglutik iluvirmut, ilinniaqtili Piitturuusimit sukkaniqsaugami sivulliulluni iluvirmut tikippuq; 5iluanut ittuarami, takuvuq qallunaaqtanik saattunik tamaaniirrijunik, itiranili iluanut. 6Saimuuni Piitturuusili kingulliulluni tikinnami, katturani iluvirmut itiqpuq; takullunilu qallunaaqtanik saattunik tamaaniirrijunik. 7Qallunaaqtaq Jiisusiup niaquanut immutiulauqtuq, taakkununga qallunaaqtanut immutivinirnut ilagijaunani, immigulli imusimavuq katimajaunani. 8Tavva ilinniaqti, iluvirmut tikiqqaalauqtuq, itirivuq; takullunilu ukpiqpuq; 9aglait suli qaujimannginnamigit uqaqtut, tuqungajunit makittariaqarninganik. 10Tavva ilinniaqtiik utirlutik angirraqpuuk.
Jiisusiup Saqqinninga Miari Maaktaliinimut
Maatiusi 28:9-10; Maakusi 16:9-11
11Miari iluviup silataani nangirluni qiavuq, sulili qialluni, iluvirmut ittuaqpuq. 12Takullunilu aingiliingnik marruungnik qakuqtaangnik annuraaqsimajuungnik, Jiisusiup timingata inigilauqtangani iksivajuungnik, aippaa niaquata nalaaniittuq, aippangalu itigangita nalaaniilluni. 13Taakkuak Miari apirivaak, “Arnaq sungmat qiavit?”
Miari kiuvuq, “Atanira annijjaunnirmat, qaujimanngilangalu namunngaqtaunnirmangaat.”
14Taimaaglu uqariirami tunummut qiviaqpuq; Jiisusi takuvaa nangiqtuq, qaujimanngilaa Jiisusiungmangaat. 15Jiisusiup apirivaa, “Arnaq sungmat qiavit? Kinamiglu qiniqpit?”
Miariup piruqsiivilirijiunasugigamiuk, uqautivaa, “Tavvanngat annisinniruviuk,#20:15 Uvvaluunniit tigullugu anigutinniruviuk uqautilaunnga namunngarnirmangaaqpiuk, ainiarakku.”
16Jiisusiup uqautivaa, “Miari.”
Qiviarluniuglu uqaqpuq Iipruutitut, “Raapunai!” Tukilik: “Ajuriqtuijii!”
17Jiisusiup uqautivaa, “Akturniarnanga, suli tappaunngalaumnginnama Ataatannut; inuuqatikkali upalikkit uqautilugit, tappaunngarniaqpunga Ataatannut Ataatassinnullu, Guutinnut Guutissinnullu.”
18Tavva Miari Maaktaliini utiliqpuq; ilinniaqtiillu uqautivait, “Ataniq takulauqpara”; uqautillugit uqausirilauqtanginnik.
Jiisusi Saqqinninga Ilinniaqtiminut
Maatiusi 28:16-20; Maakusi 16:14-18; Luukasi 24:36-49
19Ullumi tavvani unnuliqtillugu, pinasuarusiup sivulliqpaangani, ilinniaqtiit katimallutik ukkuat attungiqsimalauqput, Juutinik sivuuragamik, Jiisusi saqqippuq akurngannilu nangirluni, uqaqpuq, “Saimaniup ilagilisi.” 20Taimaagli uqariirami, aggani saniranilu takujautippait taakkununga. Ilinniaqtiillu quviasuliqput Ataniq takugamijjuk. 21Jiisusiup uqautikkanniqpait, “Saimaniup ilagilisi. Suurlu Ataataup tililaurmanga, taimaaktauq tiligivassi.” 22Taimaaglu uqariirami, supuurvigivait, uqautillugillu, “Anirniq Ijjurnaittuq pigiliqsiuk. 23Nalliatta ajurningit isumagijunnaiqtasi, taakkua isumagijunnaiqtauvut; nalliattali ajurningit isumagijunnainngitasi, taakkua isumagijunnaiqtaunngilat.”
Jiisusi Tuumasilu
24Tuumasiulli 12 ilangatta, Marruliavinirmik taijaujuup ilagilaunngilait Jiisusi tikitillugu. 25Tavva ilinniaqtiit Tuumasi uqautivaat, “Ataniq takulauqpavut.”
Tuumasiulli uqautivait, “Agganginni kikiaktuqtauningit takunngikkukkit, tikiralu kikiaktuqtauninginnut ilinngikkukku, sanirangalu aktunngikkukku upirusulijjaanngilanga.”
26Ulluit sitamaujuqtut aniguqtillugit, ilinniaqtiit katimalirivut iglumi, Tuumasiup ilagivait. Ukkuat attunngiqsimatillugit, Jiisusi najuqtangannuaqpuq akurnganilu nangirluni uqaqpuq, “Saimaniup ilagilisi.” 27Tavva Tuumasimut uqaqpuq, “Tikiit uvunga iliguk, aggakkalu takulikkit; aggatillu isaglugit sanirara aktuliruk; ukpinngiituujunnarlutit, ukpirilli.”
28Tuumasiup kiuvaa, “Atanira, Guutigalu!”
29Jiisusiup uqautivaa, “Ukpiliqpit takugavinga kisiani? Saimanaqtumiipput takulauratik ukpiqtut.”
Titiraqtaujjutigijangit Taakkua Aglaksimajut
30Ilinniaqtingitali takkuani Jiisusi suli amisunik nalunaikkutarnik pinasuaqattalauqpuq, ukunani aglangni titiraqsimanngittunik. 31Taakkua titiraqsimavut ukpiliqullusi Jiisusi Christuusiungmat, Guutiup Irninga. Ukpirnissigut inuusiqaqullusi taassumuuna.
Currently Selected:
Juanasiup Aglangit 20: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
