От Марка 3

Югым Ӣхан Иңлюңи Унӣқат

1Та̄хкын Иисус аглянқихтыкақ синагогамун, таўантыфтуқ ю̄к иңлюңи ӣхан унӣқат. 2Иляңита югыт таўанлыңӯт рӣрңиңўа̄қа̄т Иисусым на̄лъҳунъаюкагу Субботами. На̄лъҳускагу хўатын пиналюку: «Анахутутын!» 3Унӣқамың ӣхылык ю̄к Иисусым пика̄: «Таги хўавык». 4Та̄хкын югыт а̄птыкӣ: «Лӣлиҳтӯсямта сясқилъю Субботами? Пинитун писқинкӯт, налиӷмың сыӷлытун? Югулиӷисқинкӯт, налиӷмың туқутисқинкӯт?» Иўырңа югыт қалъыгнаниӷўа̄ӷуткат. 5Иисусым ысҳапагңа̄ӷмики угумиягуткӣ, нақам ӣлъқуткумӣта пиныҳлъюгулъҳитныңлъю ўа̄кигатңитныңлъю. Та̄хкын Иисусым қӣвлюку ю̄к пика̄: «Ӣхытын ныңугутики». Лыган ныңугутӣ ага на̄лъҳуткат. 6Ынка̄м Фарисеит а̄наӷыснаӷлютың синагогамың, Иродым иляпхастыңитнун агляӷлютың агӷиткыхка̄т натын туқутылъыҳқамың Иисус.

Юлӷун На̄йвам Ысныңани

7-8Иисусылъю малихся̄ҳтыкулъҳӣт На̄йвамун Галилеямун агляқат. Юлӷутыҳлъягыт малихтыкӣт, қаюҳлъяк нагақуқақыхкаңит Иисусым алъя̄ҳлъюххуаҳтилъҳи. Тама̄на юлӷун Галилеямың, Иудеямың, Иерусалимымың, Идумеямың, Иорданым Кӣўым иңлюңанилңуӷның нунаның, Тирымың, Сидонымың пиңулӷӣт. 9Ю̄к угляӷиҳлъягьян Иисус малихся̄ҳтыминун аңьямың ята̄ҳқутысқыхкақ лю̄рақ иҳлъыӷнаюкаңатни мыӷмун. 10Юлӷун на̄лъҳуқуқақутаңаның қамахлъютың қинуюгыт лъңанун ка̄нъақыҳлъякат ся̄фтыпигыснаӷналюку. 11Тама̄кутлъю туӷныӷа̄т югыт илюңитнилңӯт ысҳаныӷмыхтыху Иисус, сивуңакун улъҳаҳлъютың акилӷӯгақылӷӣт: «Кияӷныӷым Иӷнықа̄тын!» 12Иўырңа Иисусым иныҳтыңъўа̄қӣ туӷныӷа̄т кинаңутни апыфқа̄н писқылъюку.

Иисусым Накмикыхкаңи Қуля Ма̄лӷук Сӣпнықлъюку Апостолыт

13Та̄хкын Иисус қымимун маюӷлюни югыт пиюкыхкани тахсиҳтықӣ. Тагиляӷа̄сята 14накмикыхкӣ қуля ма̄лӷук сӣпнықлъюку югыт апостолыңулюки. Та̄хкын пикӣ: «Хўаңамнитысқылъюси накмикамси, каяхлъықамсилъю уңипаӷьяҳтӣсқылъюси. 15Аҳтуӷьяҳқа̄нӷилъылгулъықусилъю туӷныӷа̄т а̄ныстысқылъюки югның». 16Укут накмикыхкақӣ, Симон, (Иисусым атиқа̄ Петырымың); 17Иаковлъю, Иоаннылъю, иӷныӷык Зеведейем, (Иисусым атиқакык Воанергесымың, хўатын писимың: «Иӷныӷык Калъюгым»); 18Андрейялъю, Филиппылъю, Варфоломейелъю, Матфейелъю, Фомалъю, Иаковылъю иӷныӷа Алфейем, Фаддейялъю, Симонлъю Зилот, 19Иуда Искариотлъю увыҳпагутияҳқақ Иисусымың.

Иисусынкук, Веельзевулынкук

20Та̄хкын Иисус тукуӷминун агляқақ. Юлӷутыҳлъягыт агляҳтӯлъя̄тақат лъңитнун, рыпалъ Иисусылъю малихся̄ҳтыкулъҳӣт ныӷыпагниңӣткат. 21Ныңлъюгутаңан нагақуӷлюку таўатын аныҳтылъҳа ақфака̄т, қаюҳлъяк югыт пикаңат налъюңуҳнилюку.

22Иляңи апыҳтуӷикаюгыт Лӣлиҳтӯсяның Иерусалимымың тагикат хўатын пима̄қылӷӣт: «Веельзевул Иисусым илюңанитуқ! Ынка̄м а̄нысқуӷақӣ туӷныӷа̄т югның аҳтуӷьяҳқа̄нӷилъҳакун Веельзевулым, умӣлўа̄ӷитхун туӷныӷа̄т». 23Ынка̄м Иисусым тахсиӷлюки югыт уңипаӷа̄ткӣ, пикӣ: «Туӷныӷақ лъңаның а̄ныслъықа̄? 24Атаныҳпагулъық а̄фқӯскуми, та̄на атаныҳпагулъық қырңаӷмынъа̄нӷитуқ. 25Ныңлъюгутыт а̄фқӯскумың, та̄кут ныңлъюгутыт қырңаӷмынъа̄нӷитут. 26Таўатыҳпигақ Туӷныӷа̄лъю а̄фқӯлъютың пилъюгускумың, Туӷныӷақ ныкывӷапагниңӣлъюни кынлыкаҳқаминун ка̄лъықуқ.

27Кина алңунак итыӷна̄нӷитуқ икнақылӷӣм югым мыңтыӷа̄нун ўаяҳтыӷналюки сяӷьяңи. Сивуклъюку икнақылӷӣ ю̄к асиҳқаҳлъюку, та̄хкын ўаяҳтыҳлъықӣ сяӷьяңи.

28Ипа уңипа̄тамси, югыт сыӷывутылъыңьяҳқа̄гут сыӷлыҳқылъҳитның, сыӷлытунлъю акузиткылъҳитның Кияӷнық. 29Иўырңа китум алңунак сыӷлытун акузиткыхкумикык Аглыӷналӷӣк Таӷныӷак сыӷывутылъыңна̄нӷитуқ, қаюҳлъяк сыӷлыҳқыңъӯқ Кияӷныӷым сыӷывусяҳқақынӷилъкаңаның. Та̄на сыӷлыҳқылъық кыңлыңилңӯгуқ». 30Иисус таўатын акузикақ қаюҳлъяк иляңита пикақыхкаңат: «Туӷныӷалгӯқ илюмикун».

Иисусым На̄ңалъю, Аңлыгутаңилъю

31Та̄хкын Иисусым на̄ңалъю, аңлыгутаңилъю ка̄ткат. Мануӷамылъютың а̄нысқыхка̄т ысҳаӷьюгнилюку. 32Юлӷутыт ақумӯтңалӷӣт Иисусым увитаңани уңипа̄тка̄т: «Қакма на̄выклъю, аңлыгутыхпыклъю ысҳаӷьюгақа̄тын». 33Иисусым а̄птыкӣ: «Кинаңа̄ўа на̄ка? Кинкуңа̄ўат аңлыгутынка?» 34Юхсюӷалюни ақумгалӷӣт пикӣ: «Лъпыси на̄камсилъю, аңлыгуткамсилъю! 35Китум алңунак атуқыхкумигу Кияӷныӷым пиюкылъҳа, аңлыгуткақалъю, на̄кақалъю».

Currently Selected:

От Марка 3: ess2

Highlight

Copy