От Марка 4

Иисусым Уңипаӷа̄ткыхкаңа Пӣтысӣӷаҳта

1Та̄кўаниңани Иисус апыҳтуӷиля̄тақақ На̄йвам Галилеям ысныңани. Ынңа̄талъ угляпихлъыҳӣ ю̄к тагиляӷа̄тыҳлъякақ лъңанун, рыпалъ аңьямун ӯхлъюни ақумыхкақ, лъя̄ӷанхўа юлӷутыт на̄йвам ысныңаниткат. 2Уңипаӷа̄тытхун алъя̄ҳӣнаӷмың апыҳтуқӣ. Апыҳтуӷиткылъюку пикӣ: 3«Нагатык! Пӣтысиӷаҳта агляӷлюни пӣтысӣӷаӷвигминун 4ифкаҳқуқақ пӣтутның. Иляңи пӣтутыт тыкиткат тумытхун, ынка̄м қаўа̄гыт тагилютың ныӷуқӣт. 5Иляңи пӣтутыт тыкиткат уйӷахтуқакун сюнапагилңуҳқун. Таўаниңинақ пӣткат, қаюҳлъяк сюнаңа угмыста̄ҳақ. 6Ынка̄м сиқинық пӣсялӷӣми ма̄тныӷан паныҳтыкӣ пӣнъыҳат, акуңылъҳитутмыхның палиракыхтыкат. 7Иляңи пӣтутыт тыкиткат сикуҳлъюхтуқакун, сикуҳлъюгыт пӣсялӷӣмың пӣтфигиқӣт зернот. 8Нақамалъя тама̄кут тыкиткат сюнакыхтакун пӣтыстиҳлъякат зерномың, иляңи 30, иляңи 60, ынка̄м иляңи 100». 9Иисусым та̄қниқӣ хўатын: «Сигутылгукуфси нагатусиҳқамың, нагатык!»

Уңипаӷа̄тыт Апалъӣт

10Та̄м киңуңаның Иисус лъңина̄ҳсян, қуля ма̄лӷук сӣпнықлъюку малихся̄ҳтыңиталъю, иляңиталъю тама̄кут нагатка̄т а̄птыка̄т уңипаӷа̄ткыхка̄ның. 11Иисусым пикӣ: «Лъпысинун Кияӷныӷым лӣгикыста̄ талюӷңалӷӣ ипапиҳқылъҳа Атаныҳпагулъҳым. Сивунӷани лӣтысимаңисяӷа̄. Иўырңа тама̄кут иқитңалӷӣт Кияӷныӷым Атаныҳпагулъҳаның нагақуӷақут сямың тамаҳа̄ның уңипаӷа̄тытхун. 12Ынка̄м:

“Ысҳа̄нъақақут, ысҳа̄нъақақут ысҳа̄тыхпынатың.

Нагатақут, нагатақут лӣгикыхпынатың.

Пика̄яқуйың қӣвнаяҳтут Кияӷныӷмун,

ынка̄м сыӷывунъаяӷӣ”».

Иисусым А̄пқаңа Уңипаӷа̄ткыхкани Пӣтысӣӷаҳта

13Та̄хкын Иисусым а̄птыкӣ: «Та̄на уңипаӷа̄н пӣтысиӷаҳта лӣгикынӷитыстыхӯ? Натынми лӣгикнақыстыки алңунак уңипаӷа̄тыт? 14Пӣтысиӷаҳта ифкаҳқилӷӣ пӣтутның, Кияӷныӷым акузитаңаның уңипаҳтыңатун аюқуқ. 15Иляңи югыт қылъиҳлъякастун тумыстун аюқут. Пӣтутыт тыкинъыӷата тумытхун қаўа̄гыт ныӷақӣт. Таўатыҳпигақ тама̄кут югыт нагақӯнъыӷата Кияӷныӷым акузитаңаның таўаниңинақ Туӷныӷа̄м пуйгустақӣ. 16Иляңи югыт уйӷахтуқастун сюнастун аюқут. Акут уйӷахтуқамылңӯт асивапагигатут. Тама̄кут югыт нагақӯнъыӷмыхни Кияӷныӷым акузитаңаның таўаниңинақ тугуклъиӷақӣт қуякусиқлъюки. 17Иўырңа ухпықңўа̄ӷигалъкаңит акузитаңи ынка̄м ухпылъҳит мулюңигатут. Сыӷлылӣныӷмыхни, налиӷмың амью̄ткылъыңныӷмыхни апалъюқлъюку ухпықилъыҳтың Кияӷныӷым акузитаңаның таўаниңинақ ухпықинаниӷақут. 18Иляңи югыт сикуҳлъюхтуқастун сюнастун аюқут. Пӣтутыт сикуҳлъюхтуқакун тыкиткат нагуңигатут, қаюҳлъяк сикуҳлъюгыт пӣтфигиӷақыхкаңит. Тама̄кут югыт нагақуныӷмыхтыки Кияӷныӷым акузитаңи қа̄ткигатӣт, 19қаюҳлъяк уна уңувалъық нулъқа̄вӣӷуткақа̄т, тыҳўа̄ӷӣткақа̄тлъю аклъюңи, сямыңлъю ўата алъхыӷутаӷаӷьюгақут. Таўатыҳпигақ сикуҳлъюгыт пӣтфигилъҳистун пӣтутыт, тама̄кут югыт пиюкылъҳита пуйгустақӣт Кияӷныӷым акузитаңи. 20Иўырңа иляңи югыт пинилӷӣстун сюнастун аюқут. Пӣтутыт тыкиткат пинилӷӣкун сюнакун ынңа̄талъ наўа̄қут. Иляңи пӣтыстӣқут 30, иляңи 60, иляңи 100. Таўатыҳпигақ тама̄кут югыт нагақуныӷмыхтыки Кияӷныӷым акузитаңи қа̄ткақӣт, ынка̄м ынңа̄талъ қыпҳаӷақут Кияӷныӷмун. Иляңи ўатақа̄ӷақ қыпҳаӷата̄ӷаӷақут илямыхның».

Сягныӷым Асиңани Кынылӷутак

21Иисусым нагныӷуткӣ: «Китум алңунак кынылӷутак итҳулъюкык сягныӷым асиңанун лъина̄нӷита̄к, налиӷмың қаваӷвигым асиңанун. Итупилъ қӯлвақун лъилъықа̄к. 22Сяңўа̄ алңунак ӣқақ қа̄йңанун лъӣӷьяҳқа̄гуқ, сяңўа̄лъю алңунак ся̄пыхкақ ся̄путӣӷьяҳқа̄гуқ. 23Сигутылгукуфси нагатусиҳқамың, нагатык!»

24Хўатынлъю пикӣ: «Нагатңўа̄ҳтыңъа! Тӯнилъыҳпысистуңўа̄қ Кияӷныӷым тӯнылъықӣси, паниның тӯнатаӷаҳлъықӣси. 25Ю̄к сялык тӯнатаӷаӷьяҳқа̄гуқ. Ю̄к сяпахлъягилңуқ сяңӣҳӣ тугуяҳқа̄гут».

Иисусым Уңипаӷа̄ткыхкаңи Нагулӷӣт Пӣтутыт

26Хўатынлъю Иисусым пикӣ: «Атаныҳпагулъҳа Кияӷныӷым хўатытуқ: ю̄к ифкаҳқуӷақуқ пӣтутның пӣтысӣӷаӷвигмини. 27Пӣтутыт пӣлъютың наўа̄қут унухтӯма̄н, аӷныҳтӯма̄н ю̄к қава̄яӷңа̄н, тыҳумаяӷңа̄н, паниның пӣтутыт нагўа̄қут. Югым налъюкақӣ натын наўа̄қутаңи. 28Сюнаңинаҳа̄м каютңунани пӣтутыт нагустақӣ ынка̄м пӣтыстыкаңақут: сивуклъютың сюңаӷьюкыхтаҳа̄т пӣтақут, та̄хкын напа̄зӣңақут қынўатлъю зерноңақут. 29Зернот қигунӷата унатаӷьяҳқа̄ҳтақут, ынка̄м югым кыпуӷақӣ кыпӯсимикун».

Иисусым Уңипаӷа̄ткыхкаңа Горчицам Пӣтутаңа

30Иисусым а̄птыкӣ: «Сямун успунъақыстыху Атаныҳпагулъҳа Кияӷныӷым? Сяңўа̄ уңипаӷа̄ткынъақыстыху лӣгикыстисӣлюку? 31Атаныҳпагулъҳа Кияӷныӷым горчицам пӣтутңатун аюқуқ. Мыкыста̄лъыҳпига̄гуқ пӣтутның нунами хўани иўырңа югым пӣтысиӷаныӷминигу, 32аңлиҳлъягақуқ аңылъыҳпига̄ҳлъюни нунивахсыӷаӷьяхаӷның. Угля̄пихлъыӷӣт аваяӷрухлъяги ынка̄м қаўа̄гыт уңлюсӣқут қуқуңа̄н акулңакун сиқинӷилъҳакун».

33Иисусым атуқлъюки уңипаӷа̄тылӷутыт югнун акузиткыхкақӣ Кияӷныӷым Акузитаңи. А̄пқақӣ югнун лӣгикылъыҳтуляңистун. 34Қӯнпың югыт апыҳтуӷақыхкаңи уңипаӷа̄тытхун, иўырңа малихся̄ҳтыкулъҳӣт лъңина̄ҳныӷмыхни хўатыҳлъюўа̄қ лӣгикыстақыхкаңи сямың писӣтаңи уңипаӷа̄тыт.

Иисусым Амсянаҳтыстыкаңа На̄фтылъыҳлъяк

35,36Та̄м иӷивга̄ни Иисусым аңьямылъюни малихся̄ҳтыни пикӣ: «Аӷвӣлъта на̄йвам иңлюңанун». Ынка̄м малихся̄ҳтыт ӯхлъютың аңьямун униткӣт юлӷутыт. Иляңиталъю аңьят малихтыкӣт. 37Та̄хкын ануқлъиҳлъякақ, рыпалъ имаҳлъюгым имиӷа̄тақыхка̄ аңьяқ қынўат ыслъықсяҳтуқақ. 38Иисус аңьялъими қавақ акисиӷлюни. Малихся̄ҳтыңита таҳтуҳлъюку пика̄т: «Апыҳтуӷиста, туқуяӷңа̄мта̄ пизикӯт?»

39Иисусым таҳтуӷлюни ануқалъю, имаҳлъюгытлъю иныҳтыкӣ: «Ануқа та̄қиңам, имаҳлъюгыт аӷулӣҳтык!» Ынка̄м ылъма̄рагуткылъюку амсянаҳлъюгуҳтыкақ. 40Та̄хкын малихся̄ҳтыни а̄птыкӣ: «Сяңафси алиңыстык? Та̄ўа ухпықигастыңъа̄?» 41Сяӷӣӷаюхлъякат рыпалъ талъюӷьюхлъякат алиңрӯӷумаӷмың, ынка̄м а̄пқуӷа̄ӷуткат лъңитның: «Кинаңа̄ўа уна ю̄к, талўа ануқымлъю, имаҳлъюгытлъю қа̄ткыхкаңат?»

Currently Selected:

От Марка 4: ess2

Highlight

Copy