От Матфея 26

Туқусюкаңат Иисус

1Иисусым та̄қсямики апыҳтӯсяқныӷмың тама̄кут, малихся̄ҳтыни пикӣ: 2«Лӣсимакаҳси ма̄лӷук аӷныӷык атуӷлюкык Нықынӷаҳқылъыҳқа̄ Пасхам пинақңӯқ. Ынка̄м Иӷныӷа Югым тӯнылъықа̄т қақӯрӣсқылъюку».

3Таўани аӷныӷми, первосвященнигытлъю, сӣванлъыӷытлъю қырңуӷуткат дворңани Первосвященнигым, Каиафам. 4Агӷиткыхка̄т Иисус аксяқлъюклъю тугулюку, туқунъалюку. 5Иўырңа пикат: «Нықынӷаҳқымъи пина̄нӷитаҳпут, лю̄рақ югыт сыӷлылӣҳқӣҳлъягнаюката».

Вифаниями Аӷнам Иисус Тыпыңлъяҳқыхкаңа

6Иисус Вифаниямытақңами Симонынкуниткақ проказалгуялӷӣми. 7Аӷнам такука̄ Иисус, тугумӣқлъюкык алавастрык ақимлыӷутак ималгык акитупихлъыҳӣмың тыпыңлъя̄симың. Ныӷумалюку на̄сқўакун кӯвыхкакык тыпыңлъя̄сик. 8Иўырңа малихся̄ҳтыт ысҳаӷлюку таўатын пилӷӣ, угумиягутка̄т хўатын пимаӷмың: «Сяңан сякусӣқакык? 9Акикыхкақсяқумикык тыпыңлъя̄сик маниңуткыҳлъяглюкык аклъюмалӷӣнун тунқуӷнаяӷа̄!»

10Иисусым лӣсимаклъюки сямың пикатаңи пикӣ: «Сяңан сыӷлықӯӷыстыху аӷнақ? Пинӣпихтуқ хўаңамнун таўатын пилъҳа. 11Аклъюмалӷӣт қӯнпың тама̄нсяҳқа̄гут, иўырңа хўаңа қӯнпың лъпысининъа̄нӷитуңа. 12Тыпыңлъяҳқылъыӷмикун югусиқа ята̄ҳқыңъўа̄ лъивылъыҳқамнун. 13Ипа уңипа̄тамси, нунатаҳа̄ни тамаҳа̄ни нани алңунак уна Пинилӷӣ Уңипақ уңипақныӷмыхтыху, аӷнам таўатын пилъҳа а̄пҳақылъықа̄т югнун нықамикысқылъюку».

Иудам Увыҳпагусюкаңа Иисус

14Та̄хкын Иуда Искариот иляңат қуля ма̄лӷук сӣпнықлъюку малихся̄ҳтыт, первосвященнигнун пилюни, 15а̄птыкӣ: «Сямың тӯнылъықыстыңъа Иисус лъпысинун тӯныхкумкун?» Ынка̄м кыстулъюку ю̄к қуля сӣпнықлъюку серебромың манимың лъивикыхка̄т. 16Та̄хкын кынлыклъюку Иуда пилъыҳқаңнақыхкақ увыҳпагунъалюку Иисус.

Ята̄ҳқылъық Пасхам Нықынӷаҳқылъҳанун

17Сивулиӷми аӷныӷани Нықынӷаҳқылъҳан Закваскалилъҳилъңӯм Нықыкшаңлъям, малихся̄ҳтыт Иисус такулюку а̄птыка̄т: «Нани ята̄ҳқутысюхсин хўаңкунъун Пасхам Нықынӷаҳқылъҳаның ныӷысқылъютын?»

18Иисусым кӣмсиқӣ: «Иерусалимымун пикатык. Ю̄к тама̄нтуқ; уңипа̄нъакыси: “Апыҳтуӷиста пӣқ, Пилъыҳқақа ка̄нъақуқ. Малихся̄ҳтыкулъҳӣни ныӷнақаҳпут Пасхам Нықынӷаҳқылъҳа лъпысини”».

19Малихся̄ҳтыт Иисусым писқылъҳатун пикат, Пасхам Нықынӷаҳқылъҳа ята̄ҳқыхка̄т.

20Иӷивгаӷьягу Иисусылъю қуля ма̄лӷук сӣпнықлъюку малихся̄ҳтыкулъҳӣт қаюӷвигитңи ақумӯткат ныӷналютың. 21Ныӷӯсималюки, Иисусым пикӣ: «Ипа пӣмси, налиҳпыси увыҳпагунъақңўа̄ңа».

22Малихся̄ҳтыт қивӷуҳлъягумаӷмың тӯңлиқутаӷлютың а̄пта̄тақа̄т: «Атанық, хўаңаңўа̄?»

23Иисусым кӣмсиқӣ: «Увыҳпагутияҳқақ та̄наңӯқ нықни ныптыкаңа сягныӷмун хўаңамнун малигулъюни. 24Ипапыста̄қ Иӷныӷа Югым туқуяҳқа̄гуқ Акузитыт Игақыхкат пинақнилъҳистун. Иўырңа сыӷлыӷўа̄ӷунақңӯқ та̄на ю̄к увыҳпагутилӷӣ Иӷныӷаның Югым! Итагнаӷнаяҳтуқ алъхыӷумаңисяқуми!»

25Увыҳпагутистым Иудам а̄птыка̄: «Апыҳтуӷиста, хўаңаңўа̄?»

Иисусым пика̄: «Та̄ўа лъпынун апыҳтутын».

Атанӷым Ныӷыстилъҳа

26Ныӷӯтңулютың Иисусым тугулюку нықыкшаңлъяқ игамсиқаюгвиклъюку Кияӷнық, а̄вгуӷлюку тунқуқӣ малихся̄ҳтыни. Пикӣ: «Тугулюку ныӷитыху, уна югусиқақа».

27Та̄хкын тугулюку қаю̄сиқ виномың ималык игамсиқаюгвиклъюку Кияӷнық тӯныхка̄ лъңитнун. Пикӣ: «Мыӷвика̄таҳтыху қамахлъюси. 28Та̄на а̄кўақа, та̄хун Кияӷныӷым акықуся̄ апыӷӣӷьяҳқа̄гуқ. Туқукума а̄кўа кӯвылъықуқ угляпихлъыҳӣнун югнун сыӷывутусӣлюни сыӷлыҳқылъҳитнун. 29Уңипа̄тамси, виномың алъя мыӷна̄нӷитуңа кынляңа аӷныӷми таўани, виноӷраӷаӷмың мыӷылгусиҳлъықамси Атама Атаныҳпагулъҳани».

30Та̄хкын илягаӷлютың а̄нлютың Елеоным найӷаҳанун пикат.

Иисусым А̄пқаңа Петырымун Налъюнқылъықнилюни

31Та̄хкын Иисусым пикӣ: «Унугми хўани, хўаңа апалъюқлъюңа униқаӷа̄лъықаҳпысиңа, қаюҳлъяк Акузитни Игақыхкани Кияӷнық пика̄гуқ:

“Туқулъықақа пынъӣӷнӣҳта ынка̄м пынъӣӷыт миңиқылъықут”.

32Иўырңа уңуваҳтыстыкаңаңа туқулъыӷмың сивухпысини агляҳлъықуңа Галилеямун».

33Петырым пика̄ Иисус: «Апалъюқлъютын лъпык қайўа иляма униқаӷа̄тыӷңа̄тын, хўаңа унинъа̄нӷитңўа̄ӷамкын!»

34Иисусым пика̄: «Ипа уңипа̄тамкын, унукун петух қалӷиҳтыстыхпына̄н, пиңаюның кытўылъ налъюнқылъықаҳпыңа».

35Петырым пика̄: «Қайўа туқумалгусиӷьяӷңа̄мкын, налъюнқынъа̄нӷитамкын».

Малихся̄ҳтытлъю қамахлъютың уңипа̄тка̄т таўатын.

Иисус Юӷалӷӣ Гефсиманиями

36Та̄хкын Иисусылъю малихся̄ҳтыкулъҳӣт ка̄ткат таўавык атилъқылӷӣмың Гефсиманиямың. Пикӣ: «Ақумӯтык та̄хун, иңавык юӷаӷьяҳтӯмалюңа». 37Тазиңавык кылъқыхкӣ, Петр, Зеведейемлъю иӷныӷык. Та̄хкын қивӷуҳлъягымлъю, сыӷлылӣӷымлъю ка̄тыкыстақа̄, 38ынка̄м пикӣ: «Қа̄мнака қивӷуҳлъягӯқ, рыпалъ туқуяҳқа̄ҳлъюңа. Таўанлъюси кылыңалгусиҳтыңъа».

39Тазиңапиҳқа̄ӷлюни нунамун сикмӯлъюни юӷақақ: «Атамни, пияҳқа̄кан, мыӷынӷилъяңа хўакын қаю̄симың; иўырңа нака̄н пиюкылъымтун, лъпык пиюкылъыҳпытун пигу».

40Та̄хкын Иисусым такуяқминики пиңают малихся̄ҳтыни қава̄фтут. Ынка̄м Петр пика̄: «Кылыңалгусиҳпагниңитыстыңъа̄ ата̄сиқ афлъю? 41Кылыңатык, юӷаҳтык нанӷӣқулъыңынӷитысқылъюси. Ипапыста̄қ таӷныӷак пияҳқа̄ӷңа̄ӷмык, иўырңақун югусиқ кая̄туқ».

42Алъямың Иисус тазиңавык агляӷлюни юӷақақ: «Атамни, мыӷьяҳқақңукумкун уна қаю̄сиқ лъпык пиюкылъыҳпытун апыӷӣӷли». 43Такунқихсяқминики малихся̄ҳтыни, та̄ўа қава̄тңуфтут, қаюҳлъяк қавам сякниқыстыкаңи.

44Иисусым унилъя̄таӷлюки, тазиңани пиңайиқӣ юӷалъыни та̄кут ата̄сит юӷат атуқлъюки. 45Та̄хкын малихся̄ҳтыни такулюки пикӣ: «Та̄ўа қава̄тақыстык, мыӷна̄лӣқыстык? Та̄ўа афлъю ка̄туқ, Иӷныӷа Югым увыҳпагусяҳқа̄ҳтуқ сыӷлыҳқыстынун. 46Ныкывитык, иглыҳтылъта. Ӣи, ука увыҳпагутистыка».

Тугукаңат Иисус

47Иисус паниның акузималюку, Иуда ка̄ткақ, қуля ма̄лӷук сӣпнықлъюку малихся̄ҳтыт иляңат. Юлӷутыт малихтыка̄т, иляңи сявихпалиӷлютың, иляңи анагуталиӷлютың. Первосвященнигытлъю, сӣванлъыӷытлъю каяхтыкӣт малихтысқылъюку Иуда. 48Увыҳпагутистым Иудам ка̄тфагилгамың иляни сялъыҳқаминың уңипа̄ткақыхкаңи: «Ю̄к на̄ӷьяҳқақа лъңаңӯқ пиюкыхкаҳси. Тугунакыси».

49Иудам такўа̄ӷаҳлъюку Иисус пика̄: «Сыӷлыҳалык, Апыҳтуӷиста!» Та̄хкын на̄қа̄.

50Иисусым пика̄: «Илякумта̄мни, ага ся̄қсин пилъыҳқан пигу!»

Та̄хкын такулюку Иисус акуқаӷлюку нуқныҳтықа̄т. 51Таўани налӣта югыт Иисусымылңӯм сявихпани нусюглюку кыпқаҳтыка̄ сигутңа Первосвященнигым қыпҳаҳтыля̄ӷан. 52Та̄хкын Иисусым пика̄: «Сявихпагын канаҳтигу қантанун, қаюҳлъяк қамахлъютың сявихпагмың атуқилӷӣт сявихпахкун туқусяҳқа̄гут. 53Сюмыҳпынӣи Атака̄ каютыңлъяӷна̄нӷинъилюку пизигӯ? А̄птыкумкун таўаниңинақ 72,000ының углялӷӣт яқулылӷутыҳлъягыт пилъюўаҳтыт каяхнаяӷӣ. 54Иўырңа таўатын пина̄нӷитуңа қаюҳлъяк Акузитыт Игақыхкат апыӷӣӷьяҳқа̄лӷӣт игақылъыӷмыгыстун».

55Та̄хкын Иисусым юлӷутыт пикӣ: «Тугуяҳтуӷыстыңъа̄ сявихпахтӯмаҳпыси, анагутаҳтӯмаҳпыси, никимқун ўаяӷнӣҳтыстун аюқлъюңа? Аҳутаңа тамаҳа̄н ақумлюңа апыҳтуӷӣқуңа Храмыми тугуңигатаҳпысиңа. 56Иўырңа қамахлъютың тама̄кут таўатын пиңӯт, апыӷӣӷналюки ӯкналиқистыт игақыхкӣт Акузитни Игақыхкани».

Та̄хкын қамахлъютың малихся̄ҳтыт унилъюку қимагӯткат.

Иисус Агӷистынун Агля̄скаңат

57Та̄хкын Иисусым тугустыңита агля̄тка̄т Первосвященнигым, Каиафам, мыңтыӷа̄нун. Таўани апыҳтуӷикаюгыт Лӣлиҳтӯсяның, сӣванлъыӷытлъю қырңуӷуткат. 58Уявақа̄нлъюни Петырым малихтыка̄ дворыңанун Первосвященнигым мыңтыӷа̄н. Итыӷлюни ақумылгусиқӣ кылыңакистыт ысҳапагналюку Иисус сяяҳқа̄таңат. 59Первосвященнигытлъю, қамахлъютыңлъю агӷистыт иқлъыңиқуткыстыңнақуткыхкат Иисус туқутыстыпигыснаӷналюку. 60Иўырңа на̄лъкунъыӷмың аҳтуқа̄т. Қайўа углялӷӣм ыснываӷақлъютың а̄пҳа̄таӷьяӷңа̄ӷмыхтыху а̄пқӣт алъякуткат. Қынўатлъю югык ыснываӷлютык 61пикак: «Уна ю̄к хўатын пика̄гуқ: “Храм на̄фқысяқлъыгўа̄қа ынка̄м ныкыфлъықақа пиңая̄ни аӷныӷым”».

62Та̄хкын Первосвященнигым ныкывлюни а̄птыка̄ Иисус: «Сямың пияҳқӣсӣн югык апылъҳыхкынун?» 63Иўырңа Иисус қа̄лъка̄маңилңуқ. Ынка̄м Первосвященнигым а̄плъя̄тақа̄: «А̄тҳакун Уңувалӷӣм Кияӷныӷым қылӷамкын уңипа̄тикут Христосыңузӣн? Иӷнықа̄тын Кияӷныӷым?»

64Иисусым кӣмсиқа̄: «Лъпык пилъыҳпытун аюқуқ. Иўырңа уңипа̄тамси, ӯм киңуңаның ысҳаҳлъықаҳси Иӷныӷа Югым ақумлюни аӷынқигныӷакун Аҳтуӷьяҳқа̄нӷилңӯм, ысҳаҳлъықаҳсилъю тагилӷӣ қиляўа̄ӷитхун қилягам».

65Та̄хкын таўатын пиятни Первосвященнигым а̄ткани пӣгӯмӣта пикақ: «Уна ю̄к Кияӷныӷунилюни пилӷӣ! Алъя лӣсимакистыңисяӷңа̄мта пилъта. Лыган хўа̄ нагатаҳси Кияӷныӷунилӷӣ! 66Натын лъпыси нанқихтыстыху?»

Кӣмсиқа̄т: «Туқусяҳқа̄ҳсима̄қ».

67Та̄хкын хина̄кун қысиқука̄т, тыңлюхпага̄тақа̄тлъю, ынка̄м қасяҳтыстыңита 68пика̄т: «Лъпык Христос ӯкналиқутикут! Китум тыңлюхтатын?»

Петырым Налъюнқыхкаңа Иисус

69Таўатын та̄кут пималюки дворыми Петр ақумгакақ. Қыпҳаҳтым аӷнаӷа̄м такулюку пика̄: «Лъпыклъю Иисусымытка̄гутын, Галилеяӷмӣми».

70Иўырңа Петр мысиӷақақ сивуңитни тама̄кут пика̄: «Налъюкақа̄ сямың пӣқсин». 71А̄ньян дворым итыӷвиганун иляңан қыпҳаҳтым аӷнаӷа̄м ысҳаӷлюку Петр, таўанлыңӯт пикӣ: «Уна ю̄к Иисусымытка̄гуқ Назаретыӷмӣми».

72Петр мысиӷаӷля̄тақақ: «Ипапыста̄қ пӣмси, Кияӷныӷым а̄тҳакун налъюкңўа̄ӷақа ю̄к».

73Мулюнӷитуқ, югыт ныкывӷата̄ӷулъҳӣт тагилютың, Петр пика̄т: «Ипа иляка̄тын Иисусым малиҳся̄ҳтыңита қаюҳлъяк акузилъҳын Галилеяӷмӣстун аюқуқ!»

74Та̄хкын Петырым пикӣ: «Ипапыста̄қ Кияӷныӷым а̄тҳакун уңипа̄тамси налъюкңўа̄ӷақа ю̄к! Иқлъыңиқңукума Кияӷныӷым аӷью̄ӷлиңа!»

Таўаниңинақ петух қалӷиқақ. 75Та̄хкын Петырым нықа̄тка̄ Иисусым пилъҳа: «Петух қалӷиҳтыстыхпына̄н пиңаюның налъюнқылъықаҳпыңа». Ынка̄м а̄нлюни қия̄ӷўаҳлъякақ.

Currently Selected:

От Матфея 26: ess2

Highlight

Copy