От Матфея 25

Иисусым Уңипаӷа̄ткыхкаңи Қуляӷьягыт Аӷнаӷа̄т

1«Таўани пилъыӷми Атаныҳпагулъҳа Қилягым успусяҳқа̄гуқ қуляӷьягнун аӷнаӷаӷнун кылъқылъюки кынылӷутатың па̄йӷилӷӣт нулиҳтуӷнақылӷӣмың. 2Талъимат налъю̄қат талъимат пыҳқинылӷӣт. 3Налъю̄қат кылъқыхкӣт кынылӷутатың уқуҳқаңунаки, 4иўырңа пыҳқинылӷӣт кылъқыхкӣт кынылӷутатың уқуҳқалиӷлюки. 5Нулиҳтуӷнақылӷӣ мулю̄қақ, қынўат аӷнаӷа̄т қаваӷникат ынка̄м қаватҳуткат.

6Унугым қука̄ни кина акилӷӯкақ хўатын: “Ука тагӣқуқ нулиҳтуӷьяҳқақ! А̄нлюси пайыҳтыху!” 7Аӷнаӷа̄т таҳтуӷаҳта̄лъютың кынылӷутатың кынӷит налъҳусяқӣт. 8Та̄хкын налъю̄қат пикат пыҳқинылӷӣнун: “Уқуҳқалитаҳтикут, кынылӷутапут қа̄мнақут”. 9Пыҳқинылъҳита пикӣт: “Сыӷлыҳалык тамаҳамнъун уқуҳқапагитукут, акилъпыгаҳтынун тукфиӷияҳтуҳтык”. 10Ынка̄м налъю̄қат уқуҳқаңьяҳтӯткат. Авӣсималюки нулиҳтуӷнақылӷӣ ка̄ткақ. Та̄кут ята̄ҳқыңъалӷӣт итылгусиқа̄т ныңуӷутым нықынӷаҳқылъҳанун, ынка̄м амик ӯмка̄т.

11Киңуңаның налъю̄қат аӷнаӷа̄т ка̄лъютың, акилӷӯкат: “Атанық, Атанық! Қылъпыӷутаҳтикут!” 12Иўырңа нулиҳтуӷнақылӷӣм кӣмсиқӣ: “Ипа уңипа̄тамси, налъюкамси кинкуңустык”».

13Иисусым уңипаӷа̄тни та̄қниқа̄ хўатын: «Ынка̄ңам кылыңатык, қаюҳлъяк налъюкаҳси натуңутаңа аӷнық налиӷмың натуңутаңа афлъю Иӷныӷан Югым тагилъыҳқа̄».

Иисусым Уңипаӷа̄ткыхкаңи Пиңают Қыпҳаҳтыт

14«Атаныҳпагулъҳа Қилягым успусяҳқа̄гуқ хўавык уңипаӷа̄тмун: Та̄ўаңуқ ю̄к иглыӷанақылӷӣ навык уяванун. Туқлъюқӣ қыпҳаҳтыни авӣлъыӷмини афлъыңакистыңулюки сяӷьяминун. 15Ата̄симун 5,000 манит тӯныхкӣ, иляңанун 2,000, киңулиӷмун 1,000. Тамаҳӣта тунқуқӣ пилъыхтулңистун. Та̄хкын аӷуляқыхкақ. 16Ю̄к та̄на 5,000ныңыхкақ, таўаниңинақ аӷуляқлъюни акиксяҳқамың тукфиҳтуқақ. Ынка̄м алъя 5,000 алъхыҳтыка̄. 17Та̄налъю 2,000ныңыхкақ, алъхыӷуткақ алъя 2,000мың. 18Иўырңа та̄на 1,000ныңыхкақ а̄нлюни ля̄гулъюки ӣқӣ умӣлыгми маниңи.

19Мулю̄ҳлъяглюни қыпҳаҳтыт умӣлгат утыӷниӷьями уңипаҳсюқӣ сяматаңи манини. 205,000ныңыхкам ыснываӷлюни пика̄: “Умӣлымни, тагивақақатын 5,000 манит. Та̄ўа алъя 5,000 алъхыҳсима̄қа̄”. 21Умӣлган пика̄: “Сыӷлыҳалык итагнапихтутын, пиниҳтутын ата̄сӣӷмылңуқ қыпҳаҳта! Ата̄сӣӷмытка̄тыхпының паляҳаӷнун афлъыңакистыңуҳтыснақамкын углялӷӣнун. Ӣтҳи қуялгусиӷьяҳтуӷңа!” 22Та̄хкын 2,000ныңыхкам ыснываӷлюни пика̄: “Умӣлымни, тагивақақатын 2,000 манит. Та̄ўа алъя 2,000 алъхыҳсима̄қа”. 23Умӣлган пика̄: “Сыӷлыҳалык итагнапихтутын, пиниҳтутын ата̄сӣӷмылңуқ қыпҳаҳта! Ата̄сӣӷмытка̄тыхпының паляҳаӷнун афлъыңакистыңуҳтыснақамкын углялӷӣнун. Ӣтҳи қуялгусиӷьяҳтуӷңа!” 24Та̄хкын 1,000ныңыхкам ыснываӷлюни пика̄: “Умӣлымни, лӣсимакамкын лъпык а̄ҳсяҳқа̄нӷитутын. Унатаӷақутын пӣтысиӷақақынӷилъкыхпының. Қырңуҳтақатын пӣткат пӣтутңит ифкаҳқуқақынӷилъкытың. 25Ынка̄м алиңлюңа ля̄гулъюки манитын ӣқақанка. Аң, та̄ўа лъпык пин”. 26Иўырңа умӣлган пика̄: “Уюқ сыӷлық, иҳсяниталӷӣ қыпҳаҳта! Лъпык пӣҳпыңа унатаӷақнилюңа пӣтысиӷақақынӷилъкымның, қырңуҳтӣқнилюңалъю пӣтканың пӣтутңит ифкаҳқуқақынӷилъкымның. 27Сяңанңам маника канаҳнаниҳсигу снамун? Таўатын пикақсяқувгу, утыӷнилъымни выҳнаяӷақа алъхыӷнылиӷлюку”. 28Та̄хкын умӣлгым қыпҳаҳтыни пикӣ: “Тугулюку 1,000 маниңа, тӯнитыхӯ та̄мун 10,000нылыгмун. 29Тама̄кут пилгыт тӯнатаӷаӷьяҳқа̄гут ынка̄м сӣптӣлъықут. Иўырңа та̄на аваңилңуқ пилъха̄яӷңа̄н иқисяҳқақӣт лъңаның”. 30Та̄хкын умӣлгым пикӣ: “А̄ныстыху та̄на сятңунӷилңуқ қыпҳаҳта қагавык мамлыхлъягмун. Таўани югыт қия̄ӷўаҳлъяхлъықут, хутытыңлъю тышқита̄хта̄мӣта”».

Киңулиқ Нанқихтылъық

31«Иӷныӷа Югым тагикуми ниӷуҳқылъыӷмикун, яқулыхтӯмаҳлъягми, та̄хкын ақумылъықуқ ниӷуҳқыңъалӷӣгныкун ақумутагмикун. 32Сивуңакун қырңуӷутыслъықӣт қамахтыңъўа̄ӷлюки нунам юги. Та̄хкын авуҳлъықӣ, катам пынъӣӷнӣҳтым авулъҳатун пынъӣӷыт козёлының. 33Пынъӣӷыт аӷынқигныӷминитыслъықӣ, козёлыт сяӷумигныӷмини. 34Та̄хкын Умӣлгым аӷынқигныӷминилңӯт пилъықӣ: “Тагитык, Атама қуястыкӣтни, пилӣтыху Атаныҳпагулъық ята̄ҳқыхка̄қ лъпысинун има нуна улима̄қңан. 35Игатиқңулюңа ныҳқыхкақаҳпысиңа; мықсюгулюңа мыҳсикақаҳпысиңа; алъяныҳта̄люңа упуӷаткақаҳпысиңа. 36Амсикаӷмылъюңа а̄сиҳтуқақаҳпысиңа, қинуюгулюңа ля̄лиҳфикыхкақаҳпысиңа, анусимиңлъяӷа̄люңа ысҳаӷьяҳтуқақаҳпысиңа”. 37Та̄хкын ылъқуӷутңалӷӣт пилъықа̄т: “Атанық, қавңақ игатақңулютын ныӷысикын, налиӷмың мықсюгулютын мыҳсизикын? 38Қавңақ алъяныҳта̄лютын упуӷасикын, налиӷмың амсикаӷмылъютын а̄сиҳтуҳсикын? 39Қавңақ қинуюгулютын, налиӷмың анусимиңлъяӷвигмылъютын ля̄лиҳфиксикын?” 40Умӣлгым кӣмсиҳлъықӣ: “Ипапыста̄қ уңипа̄тамси, сяңўа̄ алңунак пикаҳси укалиҳпигаӷнун аңлыгутымнун, хўаңамнун пӣқаси!”

41Та̄хкын Умӣлгым сяӷумигныӷминилңӯт пилъықӣ: “Лъпысиңӯт Кияӷныӷым аӷью̄ӷьяҳқӣ. Аўӣтык хўаңамның, агляҳтык кынлыңилңӯгнун кынӷыгнун Кияӷныӷым ята̄ҳқыхка̄нун Туӷныӷаӷмунлъю, яқулганунлъю! 42Игатақңулюңа ныӷыстылъҳитаҳпысиңа, мықсюгулюңа мыҳсилъҳитаҳпысиңа, 43алъяныҳта̄люңа упуӷатылъҳитаҳпысиңа, амсикаӷмылъюңа а̄сиҳтӯмаңитаҳпысиңа. Қинуюгулюңалъю, анусимиңлъяӷвигмылъюңалъю ля̄лиҳфикумаңитаҳпысиңа”. 44Та̄хкын пилъықа̄т: “Атанық, қавңақ игатиқңулютын, мықсюгулютын, алъяныҳта̄лютын, амсикаӷмылъютын, қинуюгулютын, налиӷмың анусимиңлъяӷвигмылъютын, каюсӣсимаңисикын?” 45Та̄хкын Умӣлгым кӣмсиҳлъықӣ: “Ипапыста̄қ уңипа̄тамси, таўатын пинӷитылъыҳпысистун налиҳӣнӣтнун укут укалиҳпига̄т, хўаңа пинӷитақаҳпысиңа”. 46Ынка̄м та̄кут агляҳлъықут кынлыңилңуӷмун аӷью̄лъыӷмун, иўырңа ылъқуӷутңалӷӣт агляҳлъықут кынлыңилңуӷмун уңувалъыӷмун».

Currently Selected:

От Матфея 25: ess2

Highlight

Copy