От Матфея 20

Уңипаӷа̄ткыхкат Қыпҳаҳтыңи Пӣтысиӷаӷвигым

1Паниның Иисусым пикӣ: «Атаныҳпагулъҳа Қилягым юхтун аюқуқ виноградымың пӣтысиӷаӷвилык. Уна̄ңулюку а̄нлюни тугуля̄сяҳтуқақ қыпҳаҳтыкаҳқамың пӣтысиӷаӷвигминун. 2Аӷныӷмун таўавык итагнақыхкӣ акилыҳтуӷналюки ата̄сикаҳта̄н динарийемың, та̄хкын қыпҳаӷьяҳтыстыкӣ. 3Стаманың иңлюлык кылъя̄гми а̄нықихлъюни ысҳақӣ югыт ныкывӷата̄ӷулъҳӣт сяхпынатың акилъпыгаӷвигми. 4Ынка̄м пикӣ: “Лъпысилъю пӣтысиӷаӷвимнун қыпҳаӷьяҳтык, акилыҳтуӷна̄ӷамси қыпҳалъыҳпысистун”. 5Ынка̄ңам қыпҳаӷья̄ткат. Та̄хкын аӷныӷым қука̄нилъю, пиңаюмилъю кылъя̄гмилъю таўатын пиля̄тақақ. 6Ӣўынлъю талъиматни кылъя̄гми, акилъпыгаӷвигмун пикақ, та̄ўаңуқ паниның югым иляңи ныкывӷата̄ӷақыфтут. А̄птыкӣ: “Сяңафси хўа̄нтақыстык аӷнылъқусиқ сяхпынаси?” 7Кӣмсиқа̄т: “Қаюҳлъяк китум алңунак тугунӷилъкаңилъю қыпҳаҳтыңулюта”. Ынка̄м пикӣ: “Нақам лъпысилъю қыпҳаӷьяҳтык пӣтысиӷаӷвимнун”.

8Иӷивгаӷьягу пӣтысиӷаӷвилгым пика̄ қыпҳаҳтыт на̄сқӯтистыңат: “Қыпҳаҳтыт туқлъюҳтыӷлюки акилыҳтуҳтыҳқи киңулиӷның сивулиӷнун”. 9Талъимами кылъя̄гми қыпҳаӷья̄ткат тагиляӷа̄сямың акилыҳтӯсяңыхкат динарийякаҳта̄н. 10Ынка̄м сивулӣт қыпҳаҳтыт акилыҳтӯсяңатаӷаӷнақнилютың пика̄ялӷӣт, иўырңа тагиляӷа̄сялӷӣмың лъңитлъю акилыҳтӯсяңыхкат динарийкаҳта̄н. 11Акилыҳтӯсяңьямың қивра̄ӷутка̄т пӣтысиӷаӷвигым юга. 12Пика̄т: “Киңулӣлюки тугукаҳтын қыпҳаҳтут ата̄сиҳаӷмун афлъюмун. Хўаңкута уӷлыӷӣҳтукут пуқлъяҳлъягми аӷнылъқусиқ, иўырңа акилыҳтуӷатын хўаңкутыстун аңка̄н”. 13Иўырңа югым пика̄ ата̄сиқ: “Нагатаҳтын, илякумта̄мни, пӯҳныӷитамкын. Итагнақыхкақан қыпҳаӷналютын ата̄сиҳаӷмун динарийемун. 14Ынка̄м тугулюку акилыҳтӯсян агля̄. Акилыҳтуӷьюганка киңулӣт югыт тугуканка акилыҳтӯсяҳпытун аңка̄н. 15Пиюкылъымтун маника атуӷьяҳқақақа. Ақиназӣн иӷлыгитутымның?”»

16Та̄хкын Иисусым пикӣ: «Ынка̄м тама̄кут киңулӣт сивулӣҳсяҳқа̄гут, сивулӣт киңулӣҳсяҳқа̄гут».

Пиңайӣткун Иисусым А̄пқаңа Туқулъыҳқани

17Иисусым Иерусалимымун маю̄ткылъюку юлӷутның а̄футкӣ қуля ма̄лӷук сӣпнықлъюку малихся̄ҳтыни алыҳқуӷна̄люки. 18Пикӣ: «Нагатык, Иерусалимымун маюӷнақукут. Таўани Иӷныӷа Югым тӯнылъықа̄т первосвященнигынунлъю, апыҳтуӷикаюгнунлъю Лӣлиҳтӯсяның ынка̄м нанқихлъюку туқусяҳқа̄нилъықа̄т. 19Та̄хкын язычнигнун тӯнылъықа̄т. Таўани лыгасӣӷўа̄ткылъықа̄т, кахсягмихлъықа̄т, қақӯраҳлъықа̄тлъю. Иўырңа пиңайӣтаңани аӷныӷым уңуваҳтысяҳқа̄гуқ».

На̄м Туңсилъҳа

20Та̄хкын Зеведейем иӷныӷыхкынка на̄ңат тагикақ Иисусымун иӷныӷыгни кылъқылъюкык. Мануңакун сыгысқуҳтыкақ а̄пфикналюку.

21Иисусым а̄птыка̄: «Сямың пӣқсин?» Аӷнам кӣмсиқа̄: «Акықӣңа Атаныҳпагулъыҳпыни иӷныӷыхка ақумыснакыхкын а̄лъҳа аӷынқигныҳпыгун, иляңа сяӷумигныҳпыгун».

22Иўырңа Иисусым пикӣ: «Лӣгикынӷитаҳси сяңутаңа туңсиқаҳси. Мыӷвикнаяӷыстыхӯ қаю̄сиқ мыӷьяҳқақа?»

Кӣмсиқа̄к: «Пияқлъыгӯкуң».

23Иисусым пики: «Қайўа қаю̄симның мыӷылъықутык, иўырңа хўаңаңунӷитуқ накмӣӷьяҳқақ кимлъю ақумьяҳқа̄ткык аӷынқигнымкунлъю, сяӷумигнымкунлъю. Атама ята̄ҳқыхкақа̄к та̄кук ақумвихкак накмикыхкаминун».

24Та̄кут иляңита қуля малихся̄ҳтыт нагақуӷьямыхтыкык сяматкык аңлыгуткулъҳӣк угумиягуткахкыт. 25Та̄хкын Иисусым туқлъюӷлюки малихся̄ҳтыни, пикӣ: «Лӣсимакаси язычнигыт иглыӷутистыңита атанӷутақӣт ютың, а̄ңўа̄ӷуҳтыкатлъю югита юкыҳқуткақӣт. 26Иўырңа лъпыси таўатысяҳқа̄нӷитуси. Налиҳси иглыӷутистыңуюкуми қыпҳаҳтыңуҳлъи лъпысинун. 27Налиҳси а̄ңылъыҳпига̄юкуми қыпҳаҳтыля̄ӷуҳсяҳқа̄гуқ лъпысинун, 28катам таўатын Иӷныӷан Югым пилъҳатун. Тагимаңитуқ қыпҳа̄тысқылъюни иўырңа тагика̄гуқ қыпҳа̄тиналюни, тӯналюкулъю уңувалъыни навыҳқылъисиқналюку угляпихлъыҳӣнун югнун».

Иисусым На̄лъҳускык Ая̄как Югык

29Иисусылъю малихся̄ҳтыкулъҳӣт Иерихонымың аӷуляқумалюки юлӷутыҳлъягым малихтыка̄т Иисус. 30Та̄ўаңуқ тумыт сяниңитни ая̄как югык ақумлютык. Нагақуӷьямыгныгу Иисус наӷуҳнилюку акилӷӯкак: «Атанық, Иӷныӷани Давидым, наңлъыгьягутаҳтикуң!»

31Юлӷутым иныҳтыкакык, ныпӣӷысқылъюкык. Иўырңа қывӯтаӷалъюку ўата акилӷӯкак: «Атанық, Иӷныӷани Давидым, наңлъыгьягутаҳтикуң!»

32Ынка̄м Иисусым аӷулӣӷлюни туқлъюӷлюкык а̄птыкакык: «Сясқылъютык пӣқыстык хўаңамнун?»

33Кӣмсиқа̄к: «Атанық, ийыпут ысҳаҳтыстаҳтики!»

34Иисусым наңлъыгьягулъюкык ӣйңит ся̄фтыкӣ. Таўаниңинақ ысҳа̄сягуткак ынка̄м малихтыка̄т.

Currently Selected:

От Матфея 20: ess2

Highlight

Copy