От Матфея 21

Иисусым Ка̄тылъҳа Иерусалимымун

1Иисусылъю малихся̄ҳтыкулъҳӣт туӷа̄ӷьялӷӣмың Иерусалимымун, ка̄тка̄т Виффагиямун Елеоным найӷаҳанун. Таўани каяхтыкакык ма̄лӷук малихся̄ҳтыгни иглыҳтыкыстӣсқылъюкык. 2Хўатын пики: «Иңавык нынун агляӷлютык таўаниңинақ ысҳаҳлъықаҳтык пытугңалӷӣ осёл нуӷалык. Итымлъюкык тагинъакыхси хўаңамнун. 3Китум алңунак сямың пикаңистык, хўатын пинакыси: “Атанӷым аклъюка̄к”. Таўаниңинақ тагитыслъықа̄к хўаңамнун».

4Хўатын пика̄фтуқ апыӷӣӷналюку ӯкналиқистым пилъҳа:

5«Уңипа̄сяҳтуҳқи, Сионыӷмӣт:

“Ысҳақаҳтыхуқун, умӣлыхпыси такўа̄қӣси.

Қусывыгңа̄қ осёлыкун иглыҳтақуқ,

осёлым нуӷа̄кун”».

6Ынка̄м малихся̄ҳтык иглыҳтыкыстаӷлютык сивуңитни, Иисусым писқылъҳатун пикак. 7Осёл нуӷаҳтӯма̄н тагитка̄к Иисусымун. Қа̄слъӣт а̄ткатың матаҳлъюки тыӷикусяк қа̄йңитхун лъикӣт. Та̄хкын Иисус ақумыхкақ. 8Юлӷутыҳлъягым тумытхун а̄ткатың ся̄хтыкӣт, ынка̄м иляңи уқфигым авая̄ның икутақлъютың тумыт лъиляҳтуӷвикыхкӣт. 9Юлӷутыӷлягыт Иисусым сивуңанилңӯтлъю, киңуңанилңӯтлъю акилӷӯткат:

«Усюқнаҳалык Иӷныӷа Давидым!

Кияӷныӷым қуяслъигу тагилӷӣ а̄тҳакун Атанӷым!

Усюқилъық қилягмылңуӷмун!»

10Иисус итыӷьян Иерусалимымун, қамахлъютың Иерусалимыӷмӣт кагайгунъықыхся̄ткат хўатын пимаӷмың: «Кинаңа̄ўа уна ю̄к?»

11Иисусым малихтыстыңита юлӷутыҳлъягыт кӣмсиқӣт: «Иисусыңӯқ, ӯкналиқиста, Назаретымың Галилеямылңуӷмың пиңӯқ».

Иисус Храмымун Пилӷӣ

12Иисус Храмымун итыӷлюни а̄нысқуқӣ қамахлъюки тукфиҳтулӷӣтлъю, акикулӷӣтлъю. Та̄хкын манимың навыҳқуҳтытлъю қаюӷвигит улъыҳқуқӣ, ақумутӣтлъю қаўа̄гмың акилъпыгаҳтыт. 13Ынка̄м пикӣ:

«Игақңа̄қ Акузитни Игақыхкани:

“Мыңтыӷама атилъқысяҳқақа̄, Юӷаӷвик”.

Иўырңа лъпыси ӣӷаӷвигуҳтаҳси тыглыгнӣҳтынун!»

14Та̄хкын ая̄катлъю, иӷулъюгмылңӯтлъю такука̄т Иисус Храмымун, ынка̄м на̄лъҳуқуқӣ. 15Первосвященнигытлъю, апыҳтуӷикаюгытлъю Лӣлиҳтӯсяның ысҳапаглюки алъя̄ҳлъюхўаҳтилъҳи Иисусым, нагалъюкилъю таӷнуҳа̄т Храмыми акилӷӯлӷӣт хўатын: «Усюқилъық Иӷныӷанун Давидым!» ынңа̄талъ угумиюкат.

16Ынка̄м Иисус а̄птыка̄т: «Наганъыӷисикӣ таӷнуҳа̄т сямың пикатаңи?»

Иисусым кӣмсиқӣ: «А̄а, нагатанка. Атиҳтӣгастыхӯ Акузитыт Игақыхкат пилъҳит:

“Қа̄нӷитхун таӷнуҳа̄тлъю, алъхынҳаҳа̄тлъю ята̄ҳқыхкақан усюқилъық лъпынун катам?”»

17Та̄хкын Иисусым унилъюки, Иерусалимымың Вифанияткақ қаваӷналюни тама̄ни.

Иисусым Палиҳтыстыкаңа Уқфик

18Иисус уна̄ңулюку утыӷнӣткылъюку Иерусалимымун игатақақ. 19Тумыт ся̄ӷўитни ысҳақа̄ смоквам уқфига. Такулюку пияқминигу қуқуңара̄ӷина̄фтуқ смокваңунани. Ынка̄м уқфик таўавык пика̄: «Алъямыңлъю пӣтыстина̄нӷитутын». Таўаниңинақ уқфик палиқақ.

20Малихся̄ҳтыт таўатын пилӷӣ ысҳапаглюку, сяӷӣӷаюгуткылъюку а̄птыка̄т: «Натын уқфик сюкатыпихлъюни палиҳта?»

21Иисусым кӣмсиқӣ: «Ипа пӣмси, малӷуклъилъңуна̄н ухпықилъылгукуфси, хўаңамтун пилъықуси, ысҳапалъыҳпысистун смоквам уқфига. Таўатыңинақ пина̄нӷитуси талўа уна на̄йӷақ каяхтыкуфсигу: “Ӣклъютын лъпынун мыӷмун милю̄тын”, лыган пилъықуқ. 22Сямың алңунак а̄птыкуфси юӷакун ухпықилъылгукуфси алъхыӷусяҳқа̄гуси».

Иглыӷутистыт А̄пқуӷа̄қаңат Иисус

23Иисус ка̄лъюни Иерусалимымун Храмымун ӣтқақ. Апыҳтуӷималюку, первосвященнигытлъю, сӣванлъыӷытлъю такулюку а̄птыка̄т: «Уңипа̄тикут китум қылыҳтатын таўатын писқылъютын, налиӷмың китум қылылъҳакун таўатын пиңузин?»

24Иисусым кӣмсиқӣ: «Хўаңалъю а̄пнақамси. Кӣмсиқуфсиңа хўаңалъю уңипа̄лъықамси китумун қылӷуматка. 25Китум қылыҳтагу Иоанн крестиӷаӷисқылъюку? Кияӷныҳта̄ўа̄ налиӷмың югмың пиңўа̄?»

Та̄хкын лъңитның акузимҳуткат: «Сямың пинақыстыху? Кӣмсиқумтыху Кияӷныӷмың пиңунилюку, хўатын пилъықӣлъю: “Сяңанңам ухпықынӷистыху Иоанн?” 26Иўырңа: “Югмың пиңуникумтыху”, қымалъ юлӷутыт сялъықӣлъю, қаюҳлъяк қамахлъютың ухпықыхка̄т Иоанн ӯкналиқистыңунилюку». 27Ынка̄м кӣмсиқа̄т Иисус: «Налъюкаҳпут».

Иисусым пикӣ: «Хўаңалъю уңипа̄нъа̄нӷитамси китумун қылылъыңыхка̄тка таўатын пилъымнун».

Иисусым Уңипаӷа̄ткыхкык Югым Иӷныӷык

28Та̄хкын Иисусым а̄птыкӣ: «Натын уна сюмыҳтаӷа̄ткылъықыстыху? Югңуқ та̄ўа ма̄лӷугыгның иӷнылык. Сивулиӷмун пилюни пика̄: “Иӷнымни, аӷныӷми хўани виноградымың пӣтысиӷаӷвимнун қыпҳаӷьяҳа̄тын!” 29Иӷныӷан пика̄: “Ўӣн пиюнӷитуңа”. Иўырңа аӷныӷми та̄кўани авутыҳқылъюни қыпҳаӷьяқақ. 30Та̄хкын тӯңлиҳа̄нун иӷныӷми пилюни, таўатыҳпигақ пика̄. Иӷныӷан пика̄: “А̄а, пилъықуңа”, иўырңа пимаңилңуқ». 31Иисусым а̄птыкӣ: «Налӣм иӷныӷан қа̄ткыхкақагу атани?»

Кӣмсиқа̄т: «Сивулӣм».

Ынка̄м Иисусым пикӣ: «Уңипа̄тамси налогмың қырңуҳтыстытлъю, аӷнатлъю акикикаюгыт югусимыхның сивухпысини итыӷа̄тңӯт Атаныҳпагулъҳанун Кияӷныӷым. 32Иоанным Крестителым уңипа̄сяҳтуқақӣси натын кияҳтылъыҳқамың Кияӷныӷым пиюкылъҳатун, иўырңа ухпықумаңитаҳси. Нақам налогмың қырңуҳтистытлъю, аӷнатлъю акикикаюгыт югусимыхның ухпықыхкақа̄т. Талўа киңуңаның ысҳапакақыӷңа̄ҳпысики ухпықыхкаңат Иоанн, паниның лъпыси авутыҳқылъюсилъю сыӷлыҳқынъанилъҳитуси, ухпықумаңитаҳсилъю».

Иисусым Уңипаӷа̄ткыхкаңи Сыӷлыӷыт Пӣтысиӷаҳтыт

33Иисусым пикӣ: «Иляңа уңипаӷа̄н нагатыху. Та̄ўаңуқ ю̄к пӣтысиӷақақ виноградымың нунамикун. Миңлъюлюку, ля̄гуткакык виноградымун қагыҳқӯсик, ныкыфтыка̄лъю ӯсқалӷӣ кылыңакивихкақ. Та̄хкын навӷитка̄ виноградымың пӣтысиӷаӷвини пӣтысиӷаҳтынун афлъыңакысқылъюку. Та̄хкын лъңа иляңанун нунам агляқақ. 34Сяӷнаяҳқа̄ҳсята виноградыт, пӣтысиӷаӷвилгым қыпҳаҳтыни каяхтыкӣ ныңини ақфасқылъюки. 35Иўырңа пӣтысиӷаҳтыт акуқаӷлюки қыпҳаҳтыт, ата̄сиқ анагулыҳта̄ка̄т, иляңа туқутка̄т, пиңая̄т милюҳпага̄таҳӣнақ туқутка̄т. 36Қыпҳаҳтыми иляңи каяхлъя̄тақӣ, сивулиӷның угляӷатаӷаӷлюки, лъңитлъю таўатыңўа̄қ пиля̄тақӣт. 37Қынўат иӷныни каяхтыка̄ лъңитнун, хўатын пимаӷми: “Ипапыста̄қ сӣвакылъықа̄т иӷнықа”. 38Иўырңа пӣтысиӷаҳтыт ысҳаӷлюку пӣтысиӷаӷвилгым иӷныӷа хўатын пикат: “Ӯм иӷныӷан пилӣлъықа̄ уна нуна атани туқукан. Туқускумтыху хўаңкута пилӣлъықаҳпут уна виноградымың пӣтысиӷаӷвик”. 39Ынка̄ңам акуқаӷлюку, пӣтысиӷаӷвигмың милю̄лъюку туқутка̄т».

40Иисусым а̄птыкӣ: «Пӣтысиӷаӷвилгым тагикуми сялъықаки пӣтысиӷаҳтыт?»

41Первосвященнигытлъю, сӣванлъыӷытлъю кӣмсиқа̄т: «Сыӷлыпыста̄тун туқулъықӣ та̄кут сыӷлыӷыт югыт. Та̄хкын навӷилъықа̄ пӣтысиӷаӷвини алъянун пӣтысиӷаҳтынун. Сяӷналъыҳқақ ка̄скан ныңӣлъықа̄т».

42Иисусым пикӣ: «Атиҳтӣгастыкӣ Акузитыт Игақыхкат хўатын пилъҳит?

“Уйӷак та̄на мыңтыӷаңлъяҳтыт иҳсякыхка̄т мыгнуналъыҳпига̄ҳтыка̄гуқ уйӷак.

Та̄на Атанӷым пилъқа̄, ураң пинилъыҳпига̄гуқ хўаңкунъун!”

43Ынка̄ңам уңипа̄тамси, Атаныҳпагулъҳа Кияӷныӷым лъпысиның аўисяҳқа̄гуқ, ынка̄м тӯньяҳқа̄гуқ югнун пӣтыстияҳқанун плодыңаның Атаныҳпагулъҳым». 44«Кина алңунак та̄хун уйӷахкун иқукуми, пылимьяҳқа̄гуқ. Кина алңунак та̄м уйӷагым ифкаӷвикыхкумигу сифта̄ҳқылъықа̄».

45Первосвященнигытлъю, Фарисеитлъю нагалъюки Иисусым уңипаӷа̄таңи лӣгикыхка̄т Иисусымңуқ лъңит акузиткақыфтӣ. 46Ынка̄м тугуюкақсяқаңат, иўырңа алиңыхкат юлӷутыҳлъягның қаюҳлъяк ухпықыхкаңат Иисус ӯкналиқистыңунилюку.

Currently Selected:

От Матфея 21: ess2

Highlight

Copy