От Матфея 22
22
Иисусым Уңипаӷа̄ткыхкаңа Ныңуҳнақылӷӣм Нықынӷаҳқылъҳа
1Та̄хкын Иисусым апыҳтуӷля̄тақӣ та̄кут югыт уңипаӷа̄тытхун. Пикақ: 2«Атаныҳпагулъҳа Қилягым хўатытуқ, умӣлгым иӷныни ныңуҳнақылӷӣ ята̄ҳқутка̄ нықынӷаҳқунъалюку. 3Қыпҳаҳтыни каяхтыкӣ уңипа̄сяҳтӣсқылъюки тахсиқлъиқат ныңуӷутым нықынӷаҳқылъҳанун тагиляӷа̄тысқылъюки, иўырңа тагиюнӷиткат. 4Та̄хкын умӣлгым пикӣ иляңи қыпҳаҳтыни: “Уңипа̄сяҳтуҳтыки тахсиқлъиқанка нықынӷаҳқылъымнун, ныӷьяҳқанңуқ апыӷӣҳтут. Туқутӣҳтысима̄нка юхта̄ныӷның тыӷикусяның, қуўинталӷӣныңлъю нуӷаӷның. Ынка̄м сяңўа̄ қамахлъюни апыӷӣҳтуқ. Тагилинңуқ ныңуӷутым нықынӷаҳқылъҳанун!” 5Иўырңа ақылъқаҳқат тахсиқлъиқӣт ўа̄кумаңилңӯт. Йыӷлыги навык сяяҳтӯткат, ата̄сиқ пӣтысиӷаӷвигминун пикақ, иляңа акилъпыгаӷвигмун, 6умӣлгым қыпҳаҳтыңи иляңита акуқаӷлюки сякусӣқлъюки туқуқуқӣт. 7Умӣлык сякшитыҳлъякақ ынка̄м пилъюўаҳтыни каяхтыкӣ. Туқуқуқӣт юхтақат, кумаҳтыка̄тлъю ныңат. 8Та̄хкын қыпҳаҳтыни пикӣ: “Ныңуҳнақым нықынӷаҳқусиҳқӣ апыӷӣҳтут. Ақылъқаңлъяқақсяқынка сыӷлытун пика̄тмыхның тагипагниңитут. 9Ынка̄ңам а̄нлюси тумынун налъяқаси қамахлъюки югыт нықынӷаҳқысяҳтӣсқитыки”. 10Қыпҳаҳтыт а̄нлютың тумыни қамахлъюки налъяқатың сыӷлыӷуяӷңа̄та, пиниӷьяӷңа̄та ныӷьяҳтӣсқыхкӣт, ынка̄м ныңуӷутфик ыслъықаӷаҳтыкақ.
11Умӣлгым ысҳаӷьяҳтуӷьяқминики ақылъқат, ысҳақа̄ ю̄к а̄симаңилңуқ ныңуҳнақылӷӣм а̄тка̄мың. 12Ынка̄м а̄птыка̄: “Илякумта̄мни, натын итыҳсин ныңуҳнақылӷӣм а̄тка̄мың а̄тыхпынаң?” Югым кӣмсиҳпагниңитка̄. 13Та̄хкын умӣлгым қыпҳаҳтыт пикӣ: “Ӣхилъю, итыгӣлъю асиҳлъюки қагавык мамлыгмун милю̄тыху, таўани югыт қиялъықут хутытыңлъю тышқита̄хтаҳлъықӣт”».
14Иисусым та̄қниқӣ акузилъыни хўатын: «Угляпыста̄қ тахсиқлъиқа̄ӷңа̄н, иўырңа паляҳа̄гут накмикыхка̄т».
А̄пқуӷўа̄лъық Налогмың
15Та̄хкын Фарисеит унилъюку Иисус агӷиткат натын анагнӣлъқавигиӷналюку Иисус акузилъҳакун. 16Ынка̄м каяхтыкӣт иляңи малихся̄ҳтытын, иляңилъю Иродианыт Иисусымун. Хўатын пика̄т: «Апыҳтуӷиста, лӣсимакамкын акузӣқутын ипаңулюку. Апыҳтӯсянлъю натын Кияӷныӷым кияҳтысқысюлъҳа ипаңӯқ. А̄ңўа̄ӷуяӷңа̄та, укавансяӷңа̄та паниның апыҳтуӷақатын таўатыҳпигақ. 17Ынка̄м уңипа̄таҳтикут натын сюмыҳтаӷалъыҳпының. Кияӷныӷым Лӣлиҳтӯся̄ни ылъқуӷутңа̄ лъивикилъыҳқаҳпут налогмың Кесарымун? Лъивикилъта̄а налиӷмың пинӷитылъта?»
18Иисусым лӣсимакыхкӣ сыӷлытун пиюгукаңат, ынка̄м пикӣ: «Пинӣюгныӷни лъпыси! Сяңама анагнӣлъқавигиӷнақуткыстыңъа? 19Кылгувикитыңъа манимың налогмун лъивикисиҳқамың».
Ынка̄м тагитка̄т манимың. 20Та̄хкын а̄птыкӣ: «Китум хинақагу уна? Китум а̄тқагу уна?»
21Кӣмсиқа̄т: «Кесарым».
Ынка̄ңам Иисусым пикӣ: «Тӯнитыки Кесарымун тама̄кут Кесарым пиңи, тӯнитыки Кияӷныӷмун тама̄кут Кияӷныӷым пиңи».
22Нагасямыхтыху сяӷӣӷаюкат та̄хкын унилъюку аӷуляқыхкат.
Саддукеит Анагнӣлъқавигиӷнақуткыхкаңат Иисус
23Таўани аӷныӷми Саддукеит а̄псяҳтуқа̄т Иисус. Тама̄куңӯт ухпықиңигалңӯт туқукат уңуваҳтыкаюгутаңи. 24Пика̄т: «Апыҳтуӷиста, Моисейем Лӣлиҳтӯсӣ пика̄гут: “Ю̄к нулиҳтуӷлюни туқукан авақутихпынани, аңлыгутаңан тугуяҳқақа̄ угиңиӷақ авақутинъалюку аңлыгутни туқукақ”. 25Ма̄нсяҳтут ма̄ӷраӷвинлык югыт аңлыгуткулъҳӣт. Нуйыклъиқ нулиҳтуӷлюни авақутихпынани туқука̄гуқ. Ынка̄м нулиҳа аңлыгутаңан тугука̄. 26Тӯңлиҳа̄лъю аңлыгутаңа туқӯқ авақутихпынани. Ынка̄м пиңая̄н аңлыгутаңан туга̄ та̄на аӷнақ. Қамахлъютың туга̄қлъюку туқуляӷа̄тут авақутихпынатың. 27Киңулӣлюни аӷнақ туқука̄гуқ. 28Уңипа̄таҳтикут, уңуваҳтӯтылъҳым аӷныӷани китум аӷнақ нулиҳқылъықагу, қамахлъютыңқун тугукақыхкаңат?»
29Иисусым кӣмсиқӣ: «Анахутңа̄си қаюҳлъяк лӣгикигатаси Акузитыт Игақыхкат, талўа аҳтуӷьяҳқа̄нӷилъҳа Кияӷныӷым. 30Туқукат уңуваҳтӯскумың ныңуӷусяҳқа̄нӷитут, яқулгыстун қилягмылңуӷыстун. 31Атиҳтӣгастыхӯ Кияӷныӷым апылъҳа лъпысинун туқукат уңуваҳтӯтылъыҳқӣтның? Хўатын пика̄гуқ:
32“Кияӷнықа̄ңа Авраамым, Кияӷнықа̄ңа Исаакым, Кияӷнықа̄ңалъю Иаковым”.
Кияӷнық Кияӷнықа̄т уңувалӷӣт, нака̄н туқукат».
33Иисусым апыҳтуӷилъҳа юлӷутыҳлъягыт нагалъюку, сяӷӣӷаягутыҳлъяка̄т.
Аңылъыҳпигақ Лӣлиҳтӯсяқ
34Фарисеит нагақуӷьямыхтыки Саддукеит Иисусымун ныпӣҳқўа̄нилюки қырңуӷуткат. 35Ата̄сим Фарисеим апыҳтуӷистыңан Лӣлиҳтӯсят а̄пқуӷа̄қа̄ Иисус анагнӣлъқавигиӷналюку. 36Хўатын а̄птыка̄: «Апыҳтуӷиста, натуңа̄ўа аңылъыҳпигақ Лӣлиҳтӯсяни?»
37Иисусым кӣмсиқа̄: «“Атаным Кияӷныӷа пиниқсяҳқақан қамахлъюку илюхпыгун, қамахлъюку уңувасиҳпыгун, қамахлъюку умьюгаҳпыгун”. 38Та̄на аңылъыҳпига̄гуқлъю, мыгнуналъыҳпига̄гуқлъю Лӣлиҳтӯсяқ. 39Тӯңлиҳа̄ аңылъыҳпигақ Лӣлиҳтӯсяқ сивулиҳтун аюқуқ: “Пиниқсяҳқақатын юлгутытын пиниқылъыҳпытун лъпынун катам”. 40Та̄кук Лӣлиҳтӯсяк туныма̄гук тамаҳӣтнун Лӣлиҳтӯсянунлъю, апыҳтӯсӣтнунлъю ӯкналиқистыт».
А̄пқуӷўа̄лъық Христосымың
41Та̄хкын Иисусым а̄птыкӣ Фарисеит қырңуӷутңамалюки: 42«Натын сюмыҳтаӷа̄ткақыстыху Христос? Китум иӷнықагу?»
Кӣмсиқа̄т: «Иӷнықа̄ Давидым».
43Иисусым а̄птыкӣ: «Сяңанңам Давидым акузӣқңами Аглыӷналӷӣгныкун Таӷныӷагныкун атиҳтагу: “Атаныӷмың”? Хўатын пика̄лӷӣ:
44“Атанӷым пӣ Атанқа, Ақуми аӷынқигнымкун,
кынляңа аңуяхтын итыгаҳпык асиңанун лъӣҳтылъымнун”.
45Давидым атӣмакагу: “Атаныӷмың” натын иӷнықагу?»
46Налиҳӣнӣта̄ Фарисеит кӣмсиҳпагниңитка̄т Иисус. Та̄хкын кынлыклъюку китум алңунак тытугьягутка̄т а̄пныӷмың.
Currently Selected:
От Матфея 22: ess2
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
