От Луки 9
9
Иисусым Каяхтыкаңи Қуля Ма̄лӷук Сӣпнықлъюку Малихся̄ҳтыни
1Иисусым туқлъюқӣ қуля ма̄лӷук сӣпнықлъюку малихся̄ҳтыни. Қырңуӷусята аҳтуӷьяҳқа̄нӷилъылиқуқӣлъю, пилъыҳқалиқуқӣлъю югның а̄ныстысқылъюки қамахлъюки туӷныӷа̄т, на̄лъҳутысқылъюкилъю ақниӷныӷыт. 2Та̄хкын уңипақияҳтӣсқыхкӣ Атаныҳпагулъҳаның Кияӷныӷым, на̄лъҳуқӣсқылъюкилъю қинуюлӷӣт. 3Пикӣ: «Иглыӷалъыҳпысинун сямың алңунак кылъқыхпынаси. Аявӣңунаси, ақыфтаӷа̄ңунаси, нықңунаси, маниңунаси, талўа кылъқыфқа̄фси симӣткаҳқамың ха̄тмың. 4Кинкунун алңунак итыӷлюси упуӷаскаңиси таўанлъыҳа̄си кынляңа аӷуляқылъыҳқаҳпысинун. 5Ынка̄м килъю упуӷанъыӷилъкаңиси, аӷуляқныҳпысини нымың та̄хкын, тука̄тақитыки пагуляңи итыгаҳпыси. Таўатын пикуфси лӣсимакылъықа̄т кылыңася̄ӷилъыҳси Кияӷныӷым аӷью̄лъыҳқа̄ның».
6Малихся̄ҳтыт аӷуляқлъютың ныңӣҳа̄т такӯкақӣт, уңипақикат Пинилӷӣның Уңипаның, на̄лъҳуқуқатлъю тамаҳӣтни.
Иродым Кукшагьягускаңа Иисус
7Иродым иглыӷутистыңан Галилеям, нагақуӷлюки Иисусым алъя̄ҳлъюхўаҳтилъҳи тыхылъҳӣқақ, қаюҳлъяк иляңита югыт пикаңат Иоанн Креститель уңува̄манилюку туқулъыӷмың. 8Паниның иляңита пика̄т Илияңунилюку, ынка̄м иляңита пика̄т налиқ аюмиҳтақ ӯкналиқиста уңува̄манилюку. 9Ирод пикақ: «Иоанн на̄сқўиҳтыстыкақақа, иўырңа кинаңа̄ўақа ю̄к нагақуӷақыхкыхка таўатын пӣқылӷӣ?» Ынка̄м Иродым ысҳаӷьюка̄ Иисус.
Иисусым Ныӷыстилъҳа 5,000ның Сӣпңалӷӣның Югның
10Апостолыт утыӷниӷлютың, Иисус уңипа̄тка̄т апыӷӣӷутылъыӷмыхның. Аӷуляқуткӣ ныҳлъягмун Вифсаидамун лъңина̄налютың. 11Юлӷутыт на̄нтуляңа лӣгиксямыхтыху малихтыка̄т. Ка̄сята қуяклъюки лъңитнун акузиткыхка̄ Атаныҳпагулъҳа Кияӷныӷым, на̄лъҳутысюлӷӣтлъю на̄лъҳуқуқӣ.
12Хўаникуягу, қуля ма̄лӷук сӣпнықлъюку малихся̄ҳтыңита такулюку пика̄т: «Ма̄на па̄ҳқитуқ ынка̄м юлӷутыт агляҳтӯтысқики қантаӷанлыңуӷнун ныңӣҳаӷнунлъю, пӣтысиӷаҳтынунлъю. Тама̄ни тукуҳқаңнаяҳтутлъю, ныӷьяҳқаңнаяҳтутлъю».
13Иўырңа Иисусым пикӣ: «Лъпыси сямың ныӷьяҳқалитыки».
Пика̄т: «Лыган та̄ўа талъимат нықыкшагыт, иқалъюгыклъю на̄мапагниңитут хўатын угляҳқакалӷӣнун югнун. Ўыткуқун навык нықыңьяҳтуҳтысюкуфкут та̄ўа ныҳқынъаяӷапут қамахлъюки». 14Таўанлыңӯт ынтақун 5,000ңӯт югыт, кысюткыхпынаки аӷнатлъю, таӷнуҳа̄тлъю. Малихся̄ҳтыни пикӣ: «Ақумӯтысқитыки қырңақаҳтӣта, югык маӷук қуля сипнықлъюкуңўа̄қлъюки». 15Малихся̄ҳтыт писқылъыӷмыгыстун қамахлъюки ақумӯтыстыкӣт. 16Та̄хкын Иисусым тугулюки талъимат нықыкшагыт, иқалъюгыклъю қилягмун сивухлъюни, игамсиқаюгвикыхка̄ Кияӷнық. Та̄хкын ӣхминың а̄вӷуӷлюки тӯныхкӣ малихся̄ҳтыминун уйыхтысқылъюки югнун. 17Қамахлъютың ныӷӯткат кыпсю̄лъютың. Малихся̄ҳтыт тугуляӷлюки сӣпныӷит имиҳтуқӣт қуля ма̄лӷук сӣпнықлъюку корзинат.
Петырым Иисус Христосыңуникаңа
18Ата̄сими аӷныӷми Иисус лъңинаӷми юӷалӷӣ. Малихся̄ҳтыңи қантаӷанлыңӯт ынка̄м а̄птыкӣ: «Югыт кинаңунилюңа пӣқатңа?» 19Кӣмсиқа̄т: «Иоанныңунӣқа̄тын Крестителым, иўырңа иляңита Илияңунӣқа̄тын. Ынка̄м иляңита пӣқа̄тын налӣт аюмиҳтақ ӯкналиқиста уңувақақ».
20А̄птыкӣ: «Лъпысими кинаңунӣқыстыңъа?» Петырым кӣмсиқа̄: «Христосыка̄тын Кияӷныӷым».
Иисусым Акузиткыхкаңа Икфиқылъыҳқанилъю, Туқулъыҳқанилъю
21Иўырңа Иисусым иныҳтыңъўа̄қӣ уңипа̄тыфқа̄н кина алңунак писқылъюку. 22Пикӣ: «Иӷныӷа Югым углялӷӣмың икфиқыпыста̄ӷьяҳқа̄гуқ, иҳсяксяҳқақа̄тлъю сӣванлъыӷыт, первосвященнигыт, апыҳтуӷикаюгытлъю Лӣлиҳтӯсяның. Та̄хкын туқулъықа̄т, иўырңа пиңайӣтаңани аӷныӷым уңуваҳлъықуқ».
23Та̄хкын қамахлъюки пикӣ: «Китум алңунак малихсюкумиңа, лъми катам пиюкылъыни пыхлъюки, аҳутаңа тамаҳа̄н тугулюку қақӯрани, малихлъиңа. 24Ынка̄м китум алңунак пыхныӷилъкумигу уңувалъыни, ифлъяяҳқақа̄. Иўырңа китум алңунак пыхтыкумигу уңувалъыни хўаңа апалъюқлъюңа, югулилъықа̄. 25Сяңўа̄ югым алъхыҳлъықагу ӣңуна̄н нуна пилӣлъюку ифлъякумигу налиӷмың на̄фқыхкумигу уңувалъыни? 26Китум алңунак кайңукыхкаңаңа, акузитынкалъю, Иӷныӷан Югым кайңукылъықа̄ тагикуми ниӷуҳқылъыӷмикун, ниӷуҳқыңъалъҳитхунлъю Атам, аглыӷналӷӣтлъю яқулгыт. 27Иўырңа ипа уңипа̄тамси, иляси ныкывӷалъҳӣт хўани туқуяҳқа̄нӷитут кынляңа ысҳалъыӷмыхнун Атаныҳпагулъҳа Кияӷныӷым».
Иисусым Алъяңуӷныӷа
28Таўатын Иисус акузилюни, пиңаюның иңлюлык аӷныӷыт атуӷлюки, кылъқыхкӣ Петырылъю, Иоаннылъю, Иаковылъю. Маюқат на̄йӷамун юӷаӷналюни. 29Юӷа̄малюку, хина̄ алъяңуҳтыкақ, а̄ткӣлъю қатыракхӯақат ниӷугракыхтун. 30-31Та̄хкын алӣӷаҳтыкак ма̄лӷук югык ниӷугулъютык қилягым ниӷуҳқылъҳакун, Моисейенкуңуфтуқ, Илияңуфтуқ. Алыҳқуӷақыфта̄т Иисус туқулъыҳқа̄ның Иерусалимыми; таўатын туқукуми апыӷӣҳлъықа̄ Кияӷныӷым успықылъҳа. 32Петырым қаванӷа̄тыҳлъякат, иўырңа таҳтуӷлютың ысҳақа̄т Иисусым ниӷуҳқылъҳа, югыклъю ныкывӷалгуткык. 33Югык унитақа̄клъю Иисус, Петырым пика̄: «Югунӣқ, итагнапихтуқ хўа̄нлыңӯкут! Пиңают азигутат ныкыфнақапут: лъпынунлъю, Моисейемунлъю, Илиямунлъю». (Петр акузикақ налъюклъюку сямың пӣқутни.)
34Сялин акузималюку қилягўа̄қ алӣӷлюни ся̄пыхкӣ. Малихся̄ҳтыт алиңыхкат қилягўа̄ӷым ся̄псистың. 35Қилягўа̄ӷмың мым пикӣ: «Уна Иӷнықақа, накмикыхкақа̄! Нагатақитыху!» 36Ма ныпӣӷьялӷӣми Иисус лъңина̄фтуқ. Малихся̄ҳтыт сямың пимаңилңӯт, ысҳақаҳтыңлъю а̄пҳумаңилъкаңат китумун алңунак.
Иисусым На̄лъҳускаңа Мыкылӷӣқ Илюмикун Туӷныӷалык
37Уна̄миңани на̄йӷамың укигьялӷӣмың юлӷутыҳлъягыт Иисус утақа̄қыфта̄т. 38Юлӷутыҳлъягыт акулңитның ю̄к акилӷӯкақ: «Апыҳтуӷиста, манигӯтуңа лъпынун иӷнықа ысҳақӣсқылъюку қаюҳлъяк кызымаҳа̄лӷӣ авақутақа. 39Илюмикун туӷныӷалӷӯқ, тугупихныӷминигу араӷа̄таҳқақа̄, сяюхпахтаҳтысима̄н кынляңа қа̄нӷа пӯхлъӣҳқылъҳанун. Ақниҳқыҳлъягақа̄, унитылъқуңигата̄лъю. 40Малихся̄ҳтыхпынун а̄ныстаҳтысқумаяӷақа иўырңа пипагниңита̄т».
41Иисусым пикӣ: «Кӣ, лъпыси югни ухпылъҳитусилъю, сыӷлыӷўа̄ӷӯсилъю! Натын тахка̄н лъпысининъақсиңа ухпықысқылъюңа?» Та̄хкын ю̄к пика̄: «Иӷныӷын тагитигу хўавык».
42Тагималюку туӷныӷа̄м улъыҳлъюку сяюхпахтаҳтыстыка̄. Иўырңа Иисусым қылъқа̄ туӷныӷақ а̄нысқылъюку, ынка̄м на̄лъҳулъюку мыкылӷӣқ атаңанун тӯныхка̄. 43Қамахлъютың югыт сяӷӣӷаягутка̄т аҳтуӷьяҳқа̄нӷитылъыҳлъяга Кияӷныӷым.
Иисусым Акузиткылъя̄тақаңа Туқулъыҳқани
Паниның югыт сяӷӣӷаюгумалюки тамаҳа̄ның Иисусым апыӷӣлъҳаның, малихся̄ҳтыни пикӣ: 44«Нагатңўа̄ҳтык, пуйгухпына̄н уна: Иӷныӷа Югым увыҳпагутылъыңнақңӯқ та̄хкын югыт тугулъықа̄т». 45Иўырңа лӣгикумаңилъкаңат таўатын пилъҳа қаюҳлъяк умьюгӣт лӣгиксяҳқа̄наниҳқыхка̄лӷӣт. Тытука̄т а̄пныӷмың сяңами таўатын акузилъҳаның.
Кина Аңылъыҳпига̄ўа?
46Та̄м киңуңаның малихся̄ҳтыт а̄ҳтӣра̄ӷуткат налиҳтың аңылъыҳпига̄яҳқа̄таңа. 47Иўырңа Иисусым лӣсимакыхкӣ сюмыҳтаӷалъҳит. Ынка̄м тугулюку таӷнуҳақ ся̄ӷўмикун ныкывыстыка̄. 48Пикӣ: «Китум алңунак атымкун тугуклъиқумигу уна таӷнуҳақ, тугуклъиҳлъықа̄ңа. Ынка̄м китум алңунак тугуклъиқумиңа, тугуклъиҳлъықа̄ каяхтистыка. Кина алңунак укалиҳпигақ акулыхпысинилңуқ, аңылъыҳпига̄гуқ».
Лъпысинун Кипулъхина̄нӷилңуқ Лъпысинун Аюқуқ
49Иоанным пика̄: «Югунӣқ, ысҳа̄ма̄ҳпут ю̄к атыҳпыгун а̄нысқулӷӣ туӷныӷаӷның. Ынка̄м иныҳсима̄ҳпут қаюҳлъяк хўаңкунъун илятңанӷилңуқ».
50Иисусым пика̄: «Иныҳтыхпына̄н қаюҳлъяк кина алңунак лъпысинун кипулъхига̄лңуқ лъпысинун аюқуқ».
Самарияӷмӣт Тугуклъиӷьюнӷилъкаңат Иисус
51Туӷа̄ӷьян Иисусым қилягмун маюлъыҳқани, қакиқниқыпихтыкақ Иерусалимынъалюни. 52Каяхтыкӣ иляңи уңипаҳтыт иглыҳтыкыстӣсқылъюки сивумини. Самариямун пикат ныкаҳқаңусяҳтуӷналюку. 53Иўырңа Самарияӷмӣт упуӷанъыӷитка̄т қаюҳлъяк Иерусалимымун манигӯсяҳтӯлӷӣ. 54Малихся̄ҳтыхкынка Иаковым, Иоанным ысҳапаглюки югыт иҳсякыхкаңат Иисус, а̄птыка̄т: «Атанық, Кияӷныӷмун туңсӣтылътыкӣ қилягмың укихтысқылъюку кынық паныҳтысқылъюки?»
55Иисусым қӣвлюни аӷью̄қӣ. 56Та̄хкын иляңанун ным агляқат.
Иисусымун Малихся̄ҳтыңуҳсюлӷӣт
57Тумытхун иглыҳсималюки югым Иисус пика̄: «Малихлъықамкын навык алңунак пикувык».
58Иисусым пика̄: «Кавӣӷыт рӣхтылгӯт, қаўа̄гыт уңлютылгӯт, иўырңа Иӷныӷа Югым ныкаҳқӣтуқ». 59Та̄хкын иляңа ю̄к Иисусым пика̄: «Малихтиңа».
Иўырңа югым пика̄: «Атанық, малихлъықамкын иўырңа сивуклъюку атака̄ қуңуӷьяҳтуӷнақақа».
60Иисусым пика̄: «Тама̄кут туқукат қуңуӷлитки туқумастӣӷыт. Иўырңа лъпык, аӷуляқлъютын уңипақсяҳтуҳу Атаныҳпагулъҳа Кияӷныӷым».
61Иляңан югым пика̄: «Атанық, малихлъықамкын иўырңа сивуклъюки нымӣнка уңипа̄сяҳтуқаӷнақанка».
62Иисусым пика̄: «Кина алңунак пӣтысиӷаӷвигмини пыксиҳқималюни нунамың қӣва̄тақуми утыӷмун итагнаӷна̄нӷитуқ Атаныҳпагулъҳанун Кияӷныӷым».
Currently Selected:
От Луки 9: ess2
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
