От Луки 8

Аӷнат Малигулъҳӣт Иисусымун

1Мулюхпынани Иисус иглыҳтыкақ ныҳлъягнунлъю, ныңӣҳаӷнунлъю. Уңипақикақ Пинилӷӣның Уңипаның Атаныҳпагулъҳаның Кияӷныӷым аюқылӷӣмың. Қуля ма̄лӷук сӣпнықлъюку малиҳся̄ҳтыңита малихтыка̄т, 2иляңилъю аӷнат малигуткат. Аӷнаның а̄нысқуқақыхкаңи туӷныӷа̄т, на̄лъҳуқуқақыхкаңилъю ақниӷныӷитның. Та̄куңуфтут Мария Магдалаӷмӣ (лъңаның а̄ныстыкақыхкаңи ма̄ӷраӷвинлык туӷныӷа̄т), 3Ионна, Сусанна, иляңилъю аӷнат. Та̄кут аӷнат пикатуталмыхның каюсӣтақыхкаңит Иисусылъю малихся̄ҳтыкулъҳӣт. (Ионнам угиңа Хуза, афлъыңакистыңуфтуқ Иродым мыңтыӷа̄ның).

Иисусым Уңипаӷа̄ткыхкаңа Пӣтысиӷаҳта

4Ныҳлъягның тамаҳӣтның юлӷутыҳлъягыт тагиляӷа̄ткат Иисусымун. Қырңуӷутыҳлъягьята уңипаӷа̄ткӣ: 5«Пӣтысиӷаҳта пӣтысиӷаӷьяҳтуқақ пӣтысиӷаӷвигминун. Милю̄қуӷьяқминики пӣтутыт иляңи тыкиткат тумытхун ынка̄м югыт тутма̄сҳақыхкӣт; та̄хкын қаўа̄гыт тагилютың ныӷыхкӣт. 6Иляңи пӣтутыт тыкиткат уйӷахтуқакун нагуялӷӣмың палиқат, қаюҳлъяк сюнаңа юкутанъыӷилңуқ. 7Иляңи пӣтутыт тыкиткат сикуҳлъюхтуқакун, сикуҳлъюгыт малигулъютың нагуялӷӣмың пӣтфигиқӣт. 8Ынка̄м иляңи пӣтутыт тыкиткат сюнакыхтакун, пӣтыстикат пинилӷӣның нунивахсыӷаӷның. Тамаҳаӷмың тама̄кут ю̄к талъиматкаҳта̄н пӣтутыңақут». Иисусым акузилъыни та̄қниқӣ: «Сигутылгӯси, нагатык!»

Уңипаӷа̄тыт Апалъӣт

9Малихся̄ҳтыңита а̄птыка̄т Иисус сямың писӣтаңа та̄на уңипаӷа̄н. 10Кӣмсиқӣ: «Кияӷныӷым накмикумӣси лӣгикысқылъюки талюӷңалӷӣт ипапилъҳи Атаныҳпагулъыӷми. Иўырңа иляңитни югни уңипаӷа̄тңина̄ўақут. Ынка̄м ысҳа̄тыӷңа̄ӷмың ысҳа̄сигатут, нагатыӷңа̄ӷмың лӣгикигатут».

Иисусым Лӣгикыстыкаңа Уңипаӷа̄тни Пӣтысиӷаҳта

11«Та̄на уңипаӷа̄н хўатын писӣгуқ: Пӣтутыт Кияӷныӷым акузиткӣ. 12Пӣтутыт тыкиткат тумытхун иңлютңа̄т нагатканун Кияӷныӷым акузитаңаның. Та̄хкын Туӷныӷа̄м тагилюни туга̄қӣ акузитыт илюңитның ухпықифқӣталъю, югулилъыңыфқӣталъю писқылъюки. 13Пӣтутыт тыкиткат уйӷахтуқакун успутңа̄т нагатканун Кияӷныӷым акузитаңаның. Нагалъюки акузитыт қуякусиқлъюки тугуклъиӷақӣт, иўырңа қамавырухлъяк илюмыхнун итыҳтысигатӣт. Ухпықӣҳлъютың, иўырңа нанӷӣқулъыңныӷмыхни ухпықинаниӷақут. 14Пӣтутыт тыкиткат сикуҳлъюхтуқакун успутңа̄т нагатканун Кияӷныӷым акузитаңаның. Иўырңа сюмыӷьялилъю, аклъюңилъю, тыӷигна̄нлъю уңувалъҳым пӣтфигиӷақӣ, ынка̄м пӣтыстыкӣт аңтанӣсигатут. 15Ынка̄м пӣтутыт тыкиткат сюнакыхтакун успутңа̄т нагатканун Кияӷныӷым акузитаңаның. Нықамикақӣтлъю пинилӷӣкун ипапиҳқыңъалӷӣкун илюмыхтыхун. Нагныӷақут қа̄ткылъюки акузитаңи ынка̄м пӣтыстыкастун аюқут пӣтысқуҳлъялӷӣт пинилӷӣның».

Сягныӷым Асиңани Кынылӷутак

16«Китум алңунак кынылӷутак кумаҳлъюкык сягныӷым асиңанун лъина̄нӷита̄к, налиӷмың қаваӷвигым асиңанун. Итупилъ қӯлвақун лъилъықа̄к, итылӷӣнун ниӷук ысҳӣсқылъюку. 17Қаюҳлъяк сяңўа̄ алңунак ӣӷңалӷӣ Кияӷныӷым алӣҳсяҳқақа̄, сяңўа̄лъю алңунак ся̄пңалӷӣ қа̄йңанун лъӣҳтыслъықа̄. 18Ынка̄м нагатңўа̄ҳтык. Китум алңунак лӣгикыхкумики апыҳтӯсянка лӣгикылъыңатаӷаҳлъықуқ. Иўырңа китум алңунак лӣгикынӷилъкумики апыҳтӯсянка талўа лӣгикникӣ иқилъықӣт».

Иисусым На̄ңалъю, Аңлыгутаңилъю

19Та̄хкын Иисусым на̄ңанлъю, аңлыгутаңиталъю такука̄т, иўырңа ка̄нъыӷмың аҳтуқа̄т қаюҳлъяк юлӷутыҳлъягыт каңлъюқаҳлъюку аюқыхкаңат. 20Китум уңипа̄тка̄: «На̄нлъю, аңлыгутытынлъю қакма ныкывӷата̄ӷутақут, ысҳаӷьюгақа̄тын».

21Иўырңа пикӣ: «На̄калъю, аңлыгутынкалъю тама̄куңӯт нагалъҳӣт акузитаңаның Кияӷныӷым, қа̄ткыхкаңитлъю».

Иисусым Амсянаҳтыстыкаңа На̄фтыҳлъяк

22Ата̄сими аӷныӷми Иисусым малихся̄ҳтыни пикӣ: «На̄йвам иңлюңанун аӷвӣлъта». Аңьямун ӯҳқӯлъютың аӷуляқыхкат. 23Тыля̄наңамалюки Иисус қавақақ. На̄йвами ануқлъӣтыҳлъякӣ, аңья̄тлъю мыӷым имиӷа̄тақыхка̄ ынка̄м якуӷнӣҳлъякат. 24Малихся̄ҳтыңита такулюку таҳтуҳлъюку пика̄т: «Югунӣқ, Югунӣқ, туқуляӷа̄нъақукут!»

Иисусым макылъюни иныҳтыкӣ ануқалъю, имаҳлъюгытлъю ынка̄м на̄ңыхкат, амсянаҳтыңъина̄маӷми пикақ. 25А̄птыкӣ: «Сяңама ухпықынӷитыстыңъа?» Иўырңа алиңыңулӷӣтлъю, алъяҳлъюхўаӷьюгулӷӣтлъю ынка̄м лъңитның илятың а̄пқуӷа̄ӷуткӣт: «Кинаңа̄ўа уна ю̄к, талўа иныҳтыкаңи ануқалъю, имаҳлъюгытлъю ынка̄м лыган қа̄ткыхкаңат?»

Иисусым На̄лъҳускаңа Ю̄к Илюмикун Туӷныӷалык

26Та̄хкын ка̄ткат Герасеиӷмӣт нунаңитнун, на̄йвам иңлюңанилңуқ Галилеямың. 27Лыган Иисус қӯтмун ӯхтуқ, налъяқа̄ ю̄к илюмикун туӷныӷаҳтуқақ, нымың пиңуфтуқ. Пилюгугигалңуқ қавңаҳа̄ның, кияҳсигалңуқлъю мыңтыӷани нақам лъивыӷнитақылӷӣ. 28-29Иисусым қылъқа̄ туӷныӷақ лъңаның а̄нысқылъюку. Та̄хкын ю̄к араӷа̄таҳлъяглюни сикмӯткақ мануңакун, манигӯтыпихлъюни игляхтупихлъюни пика̄: «Иисус, Иӷныӷа Қулиҳпигаҳлъягым Кияӷныӷым, сянақсиңа? Манигӯтыпихтуңа икфиқыстыфқа̄ма писқылъюңа». Таўатын пика̄ қаюҳлъяк Иисусым қылъқаңа югмың а̄нысқылъюку туӷныӷақ. (Угляӷңа̄н туӷныӷа̄м тугуҳлъягақыхкаңа. Югыт кылыңакақсяқаңат, қӣпшаӷутныңлъю асиҳтақсяқаңит ӣхилъю, итыгӣлъю, иўырңа сякықуӷақыхкаңи. Ынка̄ңам туӷныӷа̄м килга̄нун аӷуляқыстыка̄.)

30Та̄хкын Иисусым а̄птыка̄: «Кинаңузин?» Кӣмсиқа̄: «А̄тқақа: “Угляҳлъяк!”» қаюҳлъяк туӷныӷалӷутыҳлъягыт итыӷукақыхкаңат. 31Та̄кут туӷныӷа̄т Иисусымун а̄пуқӯсимаңинақат агляҳтыстыфқа̄мың Безднамун писқылъютың. 32Та̄ўа қымим миңлыңани куругалӷутыҳлъягыт ныӷӯтақыфтут. Туӷныӷа̄т а̄пуқӯткат Иисусымун куругаӷнун итыҳтысқылъютың ынка̄м итыӷа̄тыстыкӣ. 33Та̄хкын туӷныӷа̄т югмың а̄нлыӷа̄лъютың итыӷа̄ткат куругаӷнун. Куруга̄т пынъанун паңалгулъютың на̄йвамун ифкақулъютың туқуляӷа̄ткат.

34Куруга̄т афлъыңакистыңита ысҳапаглюку таўатын пилъық, қимагӯлъютың уңипақыхка̄т ныҳлъягми, увитаңанилңуӷнилъю нунани. 35Та̄хкын югыт ысҳаӷьяҳтӯтка̄т сяңўа̄ сяматаңа. Ка̄лъютың Иисусымун ысҳақа̄т ю̄к туӷныӷӣӷулъюни. Ақумгафтуқ Иисусым мануңани пилюгугўа̄ӷлюни, умьюгакыклъю на̄лъҳутңўа̄ӷлютык ынка̄м алиңрӯӷутыҳлъякат. 36Тама̄кут ысҳапакат уңипақыхка̄т ю̄к илюмикун туӷныӷаҳтуҳлъягьялӷӣ натын на̄лъҳутка̄таңа. 37Та̄хкын қамахлъютың югыт Герасеиӷмӣт нунаңитнилңӯт аӷуляқыскыхка̄т Иисус, қаюҳлъяк алиңрӯӷутыҳлъягулӷӣт. Ынка̄м Иисусылъю аңьямун ӯхлъыӷа̄лъютың аӷуляқыхкат. 38Ю̄к туӷныӷаҳтуҳлъягьялӷӣ а̄пуқӯтка̄ялӷӣ Иисусымун малигунъалюни, иўырңа Иисусым аӷуляқысқыхка̄. Пика̄: 39«Утыӷниӷлютын ныхпынун, а̄пҳгу натын аңка̄н Кияӷныӷым апыӷӣлъҳа лъпынун». Ынка̄м лъмыхнун агляӷлюни тамаҳа̄ни ныҳлъягым а̄пқа̄ Иисусым апыӷӣлъҳа лъңанун.

Аӷнаӷа̄млъю Уңуваҳтылъҳа, Аӷна̄млъю На̄лъҳутылъҳа

40Иисус утыӷниӷьян юлӷутыҳлъягыт упуӷатка̄т қаюҳлъяк утақаңукаңат. 41Та̄хкын ю̄к атылык Иаирымың тагикақ, иглыӷутистыңа синагогам. Иисусым мануңакун нӣнӷулъюни манигӯткақ лъмыхнун пӣҳтысқылъюку, 42қаюҳлъяк кызымаҳақ панига, қуля ма̄лӷук сӣпнықлъюку уксюҳтуткалӷӣ, туқунақңуфтуқ.

Агля̄малюку юлӷутыҳлъягыт каңлъюқаҳтыка̄т Иисус. 43Акулңитнитыфтуқ аӷнақ а̄хтуқа̄та̄фтуқ қуля ма̄лӷук сӣпңа̄н аюмиқулъыӷни. Маниңӣткақ лъивикӯсяқныӷмың аӷалъыхтанун, нақамлъю китум алңунак на̄лъҳутыпагниңитка̄. 44Тунутаңаның Иисус такулюку аткуя̄ӷан кынӣн ысныңакун ся̄фтыка̄, ынка̄м кӣтңина̄маӷми пикақ. 45Иисусым а̄птыкӣ: «Китум ся̄фтаңа?» Қамахлъютың мысиӷаӷьята, Петырым пика̄: «Югунӣқ, юлӷутыҳлъягыт каңлъюқаҳлъютын аюқа̄тын». 46Иўырңа Иисусым пикӣ: «Китум ся̄фта̄ңа, қаюҳлъяк лъпыкақа аҳтуӷьяҳқа̄нӷилъық а̄нылӷӣ хўаңамның». 47Аӷнақ пиялӷӣми аксяқфигитыфтуқ ынка̄м уңылыхсимаӷми тагикақ. Иисусым сивуңакун нӣнӷулъюни, юлӷутыт нагасиманӷитни уңипа̄тка̄ сяңан ся̄фтылъыӷминың, таўаниңинақлъю на̄лъҳутылъыӷминың. 48Иисусым пика̄: «Панимни, ухпықилъыҳпык на̄лъҳутыста̄тын, агля̄ ныкыхмылъылиӷлютын».

49Сялин Иисус акузималюку, иглыӷутистынкуның ю̄к тагилюни Иаир пика̄: «Панигын туқума̄қ, Апыҳтуӷиста қинуюхтыхпына̄нңам».

50Иўырңа Иисусым нагалъюку, пика̄ Иаир: «Алиңыхпынаң. Та̄ўаңинаҳақ ухпыӷи, пинӣҳна̄ӷа̄».

51Иисус мыңтыӷамун ка̄сями китумун алңунак итылгусиҳтысимаңилңуқ. Иўырңақун итыҳтыстыкӣ Петырылъю, Иоаннылъю, Иаковылъю, таӷнуҳа̄млъю атаңа, на̄ңалъю. 52Қамахлъютың югыт қия̄ӷӯатыҳлъягулӷӣт аӷнаӷаҳаӷмун туқулӷӣмун. Иўырңа Иисусым пикӣ: «Қияхпынаси қаюҳлъяк туқулъҳитуқ, қаваӷақуқ».

53Ныңляқыхка̄т лӣсимаклъюку туқука̄таңа. 54Иўырңа тугулюку ӣхакун туқлъю̄ма̄н пика̄: «Таӷнуҳақ, макытын». 55Аӷнаӷаҳақ уңуваӷлюни, ныкывыхкақ. Иисусым каягутка̄ сямың ныӷыстысқылъюку. 56Аңаюқакык сяӷӣӷаюкак, иўырңа иныҳтыкакык кина алңунак уңипа̄тыфқа̄н писқылъюку таўатын пилъыӷмың.

Currently Selected:

От Луки 8: ess2

Highlight

Copy