От Луки 10

Иисусым Каяхтыкаңи Ю̄к Пиңаю Қуля Ма̄лӷук Сӣпнықлъюкуӷьягыт Малихся̄ҳтыт

1Та̄м киңуңаның, Атанӷым малихся̄ҳтыминың накмикыхкӣ ю̄к пиңаю қуля ма̄лӷук сӣпнықлъюкуӷьягыт югыт. Такӯӷаӷьяҳқаминун каяхтыкӣ малӷукаҳтӣта иглыҳтыкыстӣсқылъюки. 2Пикӣ: «Углялӷӣм югым ухпықсюгақӣт Пинилӷӣт Уңипат. Тама̄куңӯт успутңалӷӣт нунивахсыӷанун унатаӷьяқлъыхӣна̄ҳтыкат. Та̄ўаңинақ паляпихтут қыпҳаҳтыт. Ынка̄ңам юӷаҳтык Атанӷанун унатаӷьяҳқат каяхтисқылъюку қыпҳаҳтыкаҳқамың унатаӷьяҳқа̄нун. 3Аӷуляқитык! Та̄ўа каяхтамси пынъӣӷаӷа̄стун аюқлъюси қуңаңитнун ама̄т. 4Кылъқыхпынаси манимың, ақыфтаӷа̄ӷмың, симӣткаҳқамың камыгмың. Тумыни аӷулӣӷлюси кима̄ўисиҳтуҳпынаси алыҳқуӷьяҳқа̄люки югыт. 5Итыныҳпысини мыңтыӷа̄нун, сивуклъюси хўатын пӣқитыки: “Кияӷныӷым ныкыхмылъылисилъи!” 6Мыңтыӷам юган упуӷаскаңиси ныкыхмылъылиӷлюни та̄ўа Кияӷныӷым ныкыхмылъылилъықӣ. Иўырңа упуӷанъыӷилъкаңиси, Кияӷныӷым ныкыхмылъылгусна̄нӷитӣ. 7Таўантақитык ата̄сими мыңтыӷами, ныӷақлъюки сяңўа̄т упуӷатусӣт. Таўатын пӣқитык қаюҳлъяк қыпҳаҳта акилыҳтӯсяңақуқ қыпҳалъыӷминун. Тукуҳпысиның а̄нақлъюси кинкунун нӯхта̄таҳпынаси. 8Ка̄нъыҳпысини нынун, тугуклъиқаңиси упуӷатусӣт нықыт ныӷақитыки. 9На̄лъҳуқуҳтыки қинуюхтӣӷит, хўатынлъю пӣқлъюки: “Атаныҳпагулъҳа Кияӷныӷым хўа̄ ма̄нтуқ”. 10Иўырңа ка̄нъыҳпысини нынун, тугуклъинӷилъкаңиси, тӯмңитнун агляӷлюси юхтуқами хўатын пилӷа̄си: 11“Талўа нунаҳпыси пагуляңа итыгамтыхун нывыхкақ па̄лъхаҳпут. Таўатын пӣқут кылгувикналюки анахулъҳит иҳсякылъыҳпысигун Кияӷныӷым уңипа̄. Иўырңа нықамикитыху Атаныҳпагулъҳа Кияӷныӷым хўа̄ ма̄нтуқ!” 12Уңипа̄тамси, Нанқихтилъҳым Аӷныӷани Содомыӷмӣт аӷью̄лъыҳқыста̄ӷа̄яҳқа̄гут та̄м ным юганың».

Иисусым Кылыңася̄қаңи Ухпықа̄нӷилңӯт

13«Сыӷлыӷўа̄ӷунақңӯси, Хоразиныӷмӣни! Сыӷлыӷўа̄ӷунақңӯси, Вифсаидаӷмӣни! Лъпысини алъя̄ҳлъюўаҳтилъыҳлъягыт апыӷӣқат пика̄яқата Тирымилъю, Сидонымилъю, югит авутыҳқыхка̄наяҳтут сыӷлыҳқынъаниӷнаяҳтут. Тама̄кын апалъюқлъюку а̄лъютың сювиналӷӣмың қӣпаӷаҳқамың ақумнаяҳтут панытылъыҳтыхун. 14Нанқихтилъҳым Аӷныӷани Тирыӷмӣтлъю, Сидоныӷмӣтлъю аӷью̄лъыҳқыста̄ӷа̄яҳқа̄гут лъпысиның. 15Ынка̄м лъпыси, Капернаумыӷмӣни! Қайўа аңлистыҳлъягьяӷңа̄ҳпыси лъпысиның катам, рыпалъ сюмыҳпысини усюқылъыңылъықнилюси қилягми, йыӷлыги укихлъықӣси геенамун!»

16Малихся̄ҳтыни Иисусым пикӣ: «Китум алңунак нагаскумиси, нагалъықа̄тңа хўаңа. Китум алңунак иҳсякыхкумиси, иҳсякылъықа̄тңа хўаңа, ынка̄м китум алңунак иҳсякыхкумиңа, иҳсякылъықа̄т каяхтистыка».

Утыӷнилъҳат Ю̄к Пиңаю Қуля Ма̄лӷук Сӣпнықлъюкуӷьягыт Малихся̄ҳтыт

17Тахталми та̄кўани ю̄к пиңаю қуля ма̄лӷук сӣпнықлъюкуӷьягыт малихся̄ҳтыт утыӷниқат қуяҳлъягумаӷмың. Иисус пика̄т: «Атанық, талўа туӷныӷа̄т қа̄ткақӣлъю атыҳпыгун қылынымтыки!»

18Иисусым пикӣ: «А̄а, ысҳа̄ма̄қа Туӷныӷақ, қилягмың ифкалӷӣ ниӷухпахтастун. 19Нагатык! Аҳтуӷьяҳқа̄нӷилъылисима̄мси тӯтысқылъюки нымыӷьят, скорпионыт, кая̄лъқысқылъюкилъю қамахлъюки аҳтуӷьяҳқа̄нӷилъҳи аңуягым. Ынка̄м ся̄м алңунак ақниҳна̄нӷитӣси. 20Итагналӷӣңӯқ қуялӷӣси қаюҳлъяк туӷныӷа̄т қа̄ткыхкаңиси, иўырңа қуя̄ӷатаӷаҳтык қаюҳлъяк атыси игақылӷӣт қилягми».

Иисус Қуяҳлъялӷӣ

21Таўани пилъыӷми Аглыӷналӷӣм Таӷныӷам Иисус қуястыка̄. Пикақ: «Ата̄й, Атанӷа қилягымлъю нунамлъю, игамсиқаюгвикамкын! Лъпык тама̄кут талюҳтатын пыҳқинылӷӣныңлъю, лӣтканыңлъю, нақам лӣтыстатын таӷнуҳаӷыстун аюқылӷӣнун. А̄а, Ата̄й, та̄наңӯқ пиюкылъҳын».

22Та̄хкын Иисусым пикӣ югыт: «Атама тӯнума̄ңа сямың тамаҳа̄ның. Китум алңунак налъюка̄ Иӷнық кинаңутаңа, иўырңақун Атам. Китум алңунак налъюка̄ Ата кинаңутаңа, иўырңақун Иӷныӷым. Иӷныӷымлъю лӣтыслъықа̄ Ата китумун алңунак накмикыхкаминун». 23Та̄хкын қӣвлюки малихся̄ҳтыни, лъңинӣт пикӣ: «Қуястыка̄гуси ысҳа̄лъҳӣси сямың ысҳақаҳпысиның! 24Уңипа̄тамси, ӯкналиқистылӷутытлъю, умӣлгытлъю ысҳаӷьюкӣт ысҳаӷаси, ысҳа̄маңилъкаңит. Нагақуӷьюкӣт нагақуӷаси, нагақӯмаңилъкаңит».

Уңипаӷа̄н Наңлъыхталӷӣ Самарияӷмӣ

25Апыҳтуӷикаюгым Лӣлиҳтӯсяның такулюку анагвигиӷналюку а̄птыка̄: «Апыҳтуӷиста, натын сялюңа алъхыҳнаяҳсикун кынлыңилңуқ уңувалъық?»

26Иисусым кӣмсиқа̄: «Сяңўа̄ Лӣлиҳтӯсяни игақңа̄? Натын лӣгикақсики атиҳтуныҳпыки?»

27Югым кӣмсиқа̄: « “Пиниқсяҳқақан Атанық Кияӷныӷын, қамахлъюку илюхпыгун, қамахлъюку уңувасиҳпыгун, қамахлъюку икнақылъыҳпыгун, қамахлъюку умьюгаҳпыгун”. Ынка̄м: “Пиниқсяҳқақан юлгутын лъпынун катам пиниқылъыҳпытун”».

28Иисусым пика̄: «Ылъқуӷаҳтан. Таўатын пи ынка̄м кынлыңилңуӷмың уңувалъыңылъықутын».

29Иўырңа апыҳтуӷикаюк Лӣлиҳтӯсяның лӣгикысюкақ Иисусымун қа̄ткутңўа̄ӷлюни аюқнилюни Лӣлиҳтӯсянун, ынка̄м а̄птыка̄: «Кинаңа̄ўа юлгутка?»

30Иисусым кӣмсиқа̄: «Та̄ўаңуқ ю̄к Иерусалимымың укикақ Иерихонымун. Ўаяӷнӣҳтыт сюӷуглюку, қысюгуӷлюки а̄ткӣ, анагулыӷлюку. Та̄хкын туқутывзиӷлюку унитка̄т. 31Ынрақлъю священник та̄кўагун тумытхун иглыҳтыкақ. Иўырңа ысҳаӷьямигу ю̄к наӷуҳтыка̄ тумыт иңлюңитхун. 32Мулюхпынани Левит ка̄лъюни, ысҳаӷлюку, лъңанлъю наӷуҳтыка̄ тумыт иңлюңитхун. 33Иўырңа Самарияӷмӣ, та̄кўагун тумытхун иглыӷаңулӷӣ. Ка̄лъюку ысҳаӷьямигу наңлыгьягутка̄. 34Такулюку кӣңи мысӣӷмыңлъю, виномыңлъю уӷвуҳтыӷлюки, қантаҳтуқӣ. Та̄хкын осёлыминун қа̄клъюку агля̄тка̄ ақылъқалӷутамун, таўани афлъыңакыхка̄. 35Уна̄миңани тугулюкык ма̄лӷук динарийек, тӯнуткылъюкык ақылъқалӷутам афлъыңакистыңанун пика̄: “Афлъыңакаҳтигу. Каюсӣтаӷа̄макувгу утыӷниқума лъивикылъықамкын”».

36Та̄хкын Иисусым а̄птыка̄: «Сюмыҳпыни та̄куның пиңаюның налӣт юлгутыпӣгуфта югмун ўаяӷнӣҳтыт амью̄ткыхкӣтнун?»

37Апыҳтуӷикаюгым Лӣлиҳтӯсяның кӣмсиқа̄: «Та̄наңӯқ наңлъыкикақ югмун». Иисусым пика̄: «Аӷуляқлъютын, лъпыклъю таўатын пи».

Иисусым Ля̄лиҳфикыхкык Марфанкук, Мариянкук

38Иисусылъю малихся̄ҳтыкулъҳӣт иглыӷуткылъюку ка̄ткат ныңӣҳаӷмун. Тама̄нтыфтуқ аӷнақ, а̄тҳа Марфа, Иисусылъю малихся̄ҳтыкулъҳӣт упуӷаткӣ лъмыхнитысқылъюки. 39Аңлыгутаңан а̄тҳа Марияңуфтуқ; ақумлюни Иисусым итыга̄н мануңакун нагатка̄ апыҳтуӷилӷӣ. 40Иўырңа Марфам ята̄ҳқутыҳлъягукаңи ақылъқани ныӷьяҳқамың, ынка̄м Иисус такулюку пика̄: «Атанық, ўа̄кынӷисигӯ аңлыгутма лъңинаӷма қыпҳаҳтыстыкаңаңа? Каюсӣтысқаҳтиңа!»

41Атанӷым пика̄: «Марфа, Марфа, углялӷӣмың сюмыӷьялӣқутынлъю, сыӷлылӣӷақутынлъю 42иўырңа ата̄сиҳа̄гуқ аклъюналӷӣ. Мариям накмикума̄ та̄на пинилъҳа, лъңаның иқисяҳқа̄нӷитуқ».

Currently Selected:

От Луки 10: ess2

Highlight

Copy