От Луки 7

Иисусым На̄лъҳускаңа Сотнигым Қыпҳаҳтыңа

1Иисусым алыҳқуныӷмың апыӷӣӷьямики югыт агляқақ Капернаумымун. 2Та̄ўаңуқ сотник қыпҳаҳтыля̄лык, мыгнукумта̄ӷа, ынрақлъю қинуюхлъякақ рыпалъ туқуяҳтуңыстаӷлюни. 3Сотнигым нагақуӷлюку Иисус, кывгақыхкӣ Иудеит сӣванлъыӷит на̄лъҳусяҳтуқӣсқылъюку қыпҳаҳтыля̄ни. 4Иисусымун ка̄сямың наңлъыхсипихлъютың пика̄т: «Сотнигым каюткысюпихта̄тын. Ю̄к та̄на кывгақӣлӷӣ пиниҳлъяхтуқ каюсиӷьяҳқапигӯқ, 5қаюҳлъяк пиниқыпихтӣ юпут, синагогаңлъяқақӣлъюлъю».

6Ынка̄м Иисусым малихтыкӣ. Ка̄сяҳтуӷақутлъю мыңтыӷамун сотнигым илякумта̄ӷминун уңипа̄сяҳтӣсқыхка̄ хўатын: «Атанық, нагныӷнақыхпынаң қаюҳлъяк итагнанӷитуңа лъпынун итыӷвиксяҳқа̄люңа мыңтыӷамнун. 7Тама̄кын апалъюқлъюку хўаңамның такупагниңитамкын. Лыган таўанлъютын на̄лъҳутысқигу қыпҳаҳтыка ынка̄м на̄лъҳулъи. 8Хўаңалъю умӣлылгӯңа қылӷикаюгмың ынка̄м асиңанитуңа умӣлыгма. Пилъюўаҳтынка асимнитут, ата̄сиқ қылъқумкун: “Аӷуляқи” ага аӷуляқылъықуқ. Иляңа пикумкун: “Таги” тагилъықуқ. Қыпҳаҳтыка қылъқумкун: “Уна пӣҳтигу”, ага пилъықа̄».

9Иисусым нагалъюку таўатын пилъҳа, алъя̄ҳлъюўаӷьягутка̄ ынка̄м юлӷутыҳлъягыт малихтилӷӣт лъңаның пикӣ: «Уңипа̄тамси, налъя̄таҳсигатуңа китумың алңунак талўа Израилыми, ӯтун юхтун ухпықилъыҳтуткалӷӣмың».

10Кывгат утыӷниӷлютың сотнигымым мыңтыӷа̄нун ысҳақа̄т қыпҳаҳтыля̄ӷа на̄лъҳутңўа̄ӷлюни.

Иисусым Уңуваҳтыкаңа Угиңиӷам Иӷныӷа

11Уна̄миңани Иисус агляқақ ныҳлъягмун атилъқылӷӣ Наин, малихся̄ҳтыңиталъю, юлӷутыҳлъягытлъю малихтыка̄т. 12Ка̄тақуқлъю итыӷвиганун ныҳлъягым, югыт а̄нутақыфта̄т туқукақ ю̄к лъивыӷналюку. Угиңиӷам кызымаҳа̄фтуқ иӷныӷа, ынка̄м ныҳлъягым юлӷутңан малихлъыӷа̄тақыфта̄т аӷнақ. 13Атанӷым ысҳаӷлюку аӷнақ наңлъыгьягулъюку пика̄: «Қияхпынаң». 14Та̄хкын такулюку ся̄фтыкакык кывгусик ынка̄м кывгистыт аӷулӣқат. Та̄хкын туқукақ пика̄: «Нукалъпигақ, уңипа̄тамкын, уңува̄!» 15Туқукақ ақумлюни акузиңина̄маӷми пикақ ынка̄м Иисусым пыхтыка̄ на̄ңанун. 16Қамахлъютың юлӷутыҳлъягыт талъюӷьюгутыҳлъякат, усюқыхка̄тлъю Кияӷнық, пикат: «Ӯкналиқистыҳлъягым ка̄симилъю!» Хўатынлъю пикат: «Кияӷныӷым каюсиӷьяҳтуӷӣ юни!» 17Та̄на уңипақ миңитка̄т Иудеялъқа̄ӷаӷми, увитаңанилңуӷнунлъю нунанун.

Иоанным Крестителым Кывгақыхкык Югык Иисусымун

18Иоанным малихся̄ҳтыңита лъңанун апыҳтықӣт қамахлъюки Иисусым апыӷӣҳтуқӣ. 19Ынка̄м Иоанным ма̄лӷухӣна̄к малихся̄ҳтыгни тахсиӷлюкык кывгақыхкакык Атаныӷмун, а̄птысқылъюку хўатын: «Лъпыңўа̄ тагинақника̄т, налиӷмың сиӷимакылътыхӯ кина алъя тагияҳқақ?»

20Югык ка̄лъютык Иисус пика̄т: «Иоанным Крестителым кывгақӣнкуң а̄птысқылъютын хўатын: “Лъпыңўа̄ тагинақника̄т, налиӷмың сиӷимакылътыхӯ кина алъя тагияҳқақ?”»

21Таўани пилъыӷми Иисусым на̄лъҳуқуқӣ юлӷутыт қинуюгитның, ақниӷныӷитның, туӷныӷа̄т югыт илюңитның а̄ныстақлъюки, ая̄катлъю ысҳа̄сягутыстақлъюки. 22Ынка̄м кывгак кӣмсиқакык: «Агляӷлюси Иоаннымун уңипа̄тыху ысҳапакаҳпытыгныңлъю, нагаткаҳпытыгныңлъю. Ая̄кат ысҳа̄сягутут, пиюгигасялӷӣт пиюгьягутут, проказалгуялӷӣт укмаңӣҳтӣ, тӯслъяӷьялӷӣт нагақӯсягутут, туқука̄ялӷӣт уңуваҳтыстут уңувалъыӷмун, аклъюмалӷӣнунлъю Пинилӷӣ Уңипақ уңипақуқ. 23Қуястыка̄гуқ китум алңунак та̄қынӷилъкумиңа ухпықныӷмың!»

24Иоанным кывгакык аӷуляқсягта, Иисусым акузиткыхка̄ Иоанн юлӷутыҳлъягнун: «Килга̄нун пӣқңафси, сяңўа̄ ысҳаӷыстыху? Выга̄қ ануқым уфсюгускаңа̄? 25Сяңўа̄ ысҳаӷьяҳтуқақыстыху? Ю̄к а̄шаӷңалӷӣ? Таўатын а̄шаӷңалӷӣтлъю, аклъюңитыҳлъягытлъю кияҳтақут умӣлгыт ныңитни. 26Сяңўа̄ ысҳаӷьяҳтуқақыстыху? Ӯкналиқиста̄? А̄а, уңипа̄тамси, ысҳақаҳси ӯкналиқистының а̄ңатаӷаҳтуқ. 27Иоанныңӯқ Акузитыт Игақыхкат а̄пқа̄т:

“Кияӷнық пӣқ, Сивухпыни каяхлъықақа уңипаҳтыка ята̄ҳқысқылъюку тӯмкаҳқан”.

28Уңипа̄тамси, югьяхаӷның алъхыӷақылӷӣның Иоанн а̄ңылъыҳпига̄гуқ. Иўырңа кина алңунак укалиҳпигақ Атаныҳпагулъҳани Кияӷныӷым Иоаннымың а̄ңатаӷаҳтуқ».

29(Қамахлъютың тама̄кут югыт, талўа налогмың қырңуҳтистыт, нагасямыхтыки Иисусым апыҳтуӷилъҳи тугуклъиӷӣт Кияӷныӷым қылӷусӣ ылъқуӷутңанилюки. Таўатын пика̄гут қаюҳлъяк сивунӷани тугуклъиқақыхкаңит Иоанным апыҳтуӷилъҳи. Ынка̄м Иоаннымун крестиӷыстыка̄лӷӣт. 30Иўырңа Фарисеитлъю, апыҳтуӷикаюгытлъю Лӣлиҳтӯсяның тугуклъӣмаңитӣт Иоанным апыҳтуӷилъҳи, ынка̄м лъңанун крестиӷысюгумаңитут. Таўатын пилъыӷмыхтыхун иҳсякыхкақа̄т Кияӷныӷым успықылъҳа лъмыхнун.) 31Иисусым пикӣ: «Ма̄тын кияҳлъыҳӣт югыт тугуклъиӷинӷилңӯт апыҳтуӷилъымнун, сямун иңлюнъақсиңи? Натытат? 32Таӷнуҳаӷыстун аюқут ақумӯлъютың акилъпыгаӷвигни, илятың акилӷӯкаңит хўатын:

“Қалӷиҳта̄тамси, тукалыганӷитуси! Қийиқутукут, қийиқынӷитуси!”

33Лъпыси ма̄тын кияҳлъыҳӣни та̄кустун таӷнуҳаӷыстун аюқуси. Иоанн Крестителым тагӣқңами нықыкшаңлъяҳтӯмаңитуқлъю, мыӷумаңитуқлъю виномың ынка̄м пика̄гуси: “Туӷныӷалгӯқ”. 34Иӷныӷа Югым тагилюни, ныӷылгусиӷӣқлъю, мыӷылгусиӷӣқлъю югның ынка̄м пика̄гуси: “Ю̄кқун та̄на ысҳақаҳтыху! Ныӷывалъю̄гуқ, мыӷывалъю̄гуқ, илякумта̄қа̄тлъю налогмың қырңуҳтистыт, сыӷлыҳқыстытлъю!” 35Нақамлъю тама̄кут апыҳтӯся̄мның тугуклъиӷилӷӣт кияҳлъықут пинитун. Таўатын пилъҳым ипапиҳқылъықа̄ апыҳтӯткыхкақа Кияӷныӷым пыҳқинылъқа̄!»

Иисус Симонынкунилңуқ Фарисейеми

36Ата̄сим Фарисейем Иисус ныӷьяҳтӣсқыхка̄ лъмыхнун. Ынка̄м Фарисейенкунун агляӷлюни ақумыхкақ ныӷналюни. 37Тама̄нтыфтуқ ныҳлъягми аӷнақ сыӷлыҳқыста. Нагақуӷьямигу Иисус ныӷақнилюку Фарисейенкуни, кылъқыхкакык алавастрык ақимлыӷутак акитупихлъыҳӣмың тыпыңлъя̄симың ималгык. 38Итыӷлюни ныкывыхкақ тунутаңакун Иисусым итыга̄н. Қияткылъюку қуниминың аӷистыкӣ итыгӣ, ынка̄м нуяминың сяңиҳқуқӣ. Та̄хкын на̄ӷақлъюки, аңиҳыхкӣ тыпыңлъя̄симың. 39Ныӷьяҳтӣсқикам Фарисейем ысҳапаглюку сюмыҳтаӷақақ: «Уна ю̄к ӯкналиқистыңуяқуми, лӣсимакнаяӷа̄ аӷнақ кинаңутаңа, сястыңутаңалъю ся̄фқуӷа̄лӷӣ лъңаның, қаюҳлъяк сыӷлыҳқыстыңӯқ».

40Иисусым пика̄: «Симон, уңипа̄таҳсюгамкын сямың». Симоным а̄птыка̄: «Апыҳтуӷиста, сямың?»

41Иисусым пика̄: «Ма̄лӷук югык навӷа̄малӷӣк манимың навӷитикаюгмың. А̄лъҳа навӷақақ ю̄к ма̄лӷук қуля сӣпнықлъюку динарийемың, иляңа ю̄к ма̄лӷук қуля сӣпнықлъюку динарийемың. 42Налиҳӣна̄хкынка лъивикыпагниңитка̄к навӷатын ынка̄м навӷитикам пуйгусқыхкӣ навӷалъҳит. Налихкынка югык пиниқатаӷаҳлъықагу?»

43Симоным кӣмсиқа̄: «Ынтақун а̄ңлюку навӷитка̄н». Иисусым пика̄: «Ылъқуӷаҳтан». 44Та̄хкын қӣвлюку аӷнақ Симон пика̄: «Ысҳаҳсигӯ уна аӷнақ? Ӣтҳақңама хўавык мыӷмың тӯнылъҳитаҳпыңа итыганка уӷвӣсқылъюки. Иўырңа ӯм аӷнам итыганка уӷвуӷӣ қуниминың, сяңихтақлъюки нуяминың. 45Упуӷасимаңитаҳпыңа на̄ӷмың, иўырңа ӣтҳутминың аӷнам аӷулӣӷунъыӷитӣ на̄ӷминыӷмың итыганка. 46На̄сқуқа мысӣӷмың кӯвикылъҳитан, иўырңа лъңан итыганка кӯвикӣ тыпыңлъя̄симың. 47Уңипа̄тамкын, сыӷывутылъыңут сыӷлыҳқылъылӷутыҳлъяги, тама̄кын апалъюқлъюку пиниқылъылыхлъягӯқ. Таўатыҳпигақ кина алңунак сыӷывутылъыңывлыӷақақ пиниқылъывлыӷалъха̄гуқ».

48Та̄хкын Иисусым аӷнақ пика̄: «Сыӷлыҳқылъыҳтын сыӷывутылъыңума̄т».

49Та̄хкын қаюӷвигыгни лъңаның ақумгалгусиӷилӷӣт а̄пқуӷа̄ӷуткат: «Кинаңа̄ўа уна сыӷывутӣқылӷӣ сыӷлыҳқылъыӷның?»

50Иисусым аӷнақ пика̄: «Ухпықилъыҳпык югулилъыңыста̄тын, агля̄ ныкыхмылъылиӷлютын».

Currently Selected:

От Луки 7: ess2

Highlight

Copy