От Луки 4

Туӷныӷа̄м Сыӷлыҳқыснақуткыхкаңа Иисус

1Та̄хкын Иисус, Аглыӷналӷӣгның Таӷныӷагның ыслъықңалӷӣ, утыӷниқақ Кӣўыгның Иорданыгның, ынка̄м Таӷныӷам аӷуляқутка̄ килга̄нун. 2Туӷныӷа̄м сыӷлыҳқыснақуткыхка̄ югык мальӷугык аӷнық. Тама̄ни аӷныӷни Иисус ныӷумаңилңуқ. Та̄кут аӷныӷыт киңуңитның игатаҳлъякақ.

3Туӷныӷа̄м пика̄: «Кияӷныӷым Иӷнықңукаңатын, уна уйӷак нықнъуҳтыстигу».

4Иисусым пика̄: «Акузитыт Игақыхкат пика̄гут: “Ю̄к кияҳна̄нӷитуқ нықңинаҳаҳқун”».

5Та̄хкын Туӷныӷа̄м маю̄тка̄ ӯсқапихлъыҳӣмун, натыңӣҳақ кылгувикыхка̄ нунам атаныҳпагулъҳитның. 6Пика̄: «Лъпынун тӯнылъықанка қамахлъюки тама̄кут атаныҳпагулъҳыт, аҳтуӷьяҳқа̄нӷилъҳытлъю. Қамахлъютың хўаңамнун тагивақа̄гут ынка̄м китумун алңунак тӯнъюкыхкамнун тӯнылъықанка. 7Манигуӷьяқувңа қамахлъюки лъпык пина̄яӷатын».

8Иисусым пика̄: «Акузитыт Игақыхкат пика̄гут:

“Манигуӷьяҳқақан Атанық Кияӷныӷын,

лъңина̄гуқлъю қыпҳа̄сяҳқан”».

9Та̄хкын Туӷныӷа̄м агля̄тка̄ Иерусалимымун, ныкывыстыка̄ Храмым ӯсқалӷакун. Пика̄: «Кияӷныӷым Иӷнықңукаңатын, қытхыӷи тысямавык, 10қаюҳлъяк Акузитыт Игақыхкат пика̄гут:

“Кияӷныӷымңуқ яқулыгминун пақнасиҳтысяҳтуҳлъықа̄тын!”

11Пика̄гутлъю:

“Ӣхмыхның нуқнықылъықа̄тын,

лю̄рақ итыгаҳтын уйгаҳқӯнъаюката”».

12Иисусым пика̄: «Акузитыт Игақыхкат пика̄гут:

“Атанық Кияӷныӷын нанӷӣқухпына̄н сясқылъюку лъңан пиюкылъқынӷилъкаңаның”».

13Та̄хкын Туӷныӷа̄м апыӷӣӷьямики сыӷлыҳқыстинақуткылъыни Иисусымун, унитка̄ кынляңа алъя пилъыҳқаңылъыҳқаминун.

Иисусым Пӣнлиқаңа Уңипақилъыни Галилеями

14Та̄хкын Иисус утыӷниқақ Галилеямун аҳтуӷьяҳқа̄нӷилъылиӷлюни Аглыӷналӷӣгныкун Таӷныӷагныкун. Тамаҳа̄ни нунани югыт уңипақыхка̄т. 15Апыҳтуӷӣқылӷӣлъю синагогаңитни, қамахлъютыңлъю югыт усюқыхка̄т.

Назаретыӷмӣт Иҳсякыхкаңат Иисус

16Та̄хкын Иисус аңливигминун Назаретымун пикақ. Субботаңуҳсягу пӣқылъыӷмитун синагогамун агляқақ. Ныкывыхкақ атиҳтуӷналюни Акузитның Игақыхканың. 17Тӯныхка̄т ӯкналиқистым Исаиям ига̄ның. Қылъпыҳтыкӣ хўатын игақңалӷӣмун:

18«Атанӷым Таӷныӷакык хўаңамнитуқ,

қаюҳлъяк накмикыхкақа̄ңа Пинилӷӣның Уңипаның уңипақисқылъюңа аклъюмалӷӣнун.

Каяхта̄ңа анусимиңлъяӷат итымутысқылъюки,

ая̄катлъю ысҳа̄сягутысқылъюки,

амьюқыта̄ткысилӷӣтлъю итымутысқылъюки амьюқыта̄ткистыңитның.

19Апыӷьяҳтӣсқа̄лъю аюмиқулъық ка̄нъилюку Атанӷым югулиӷилъыҳқа̄лъю қуястилъыҳқа̄лъю югның».

20Атиҳтуныӷмың апыӷӣӷьямики игат тӯныхкӣ афлъыңакистымун та̄хкын ақумыхкақ. Синагогамылңӯт қамахлъютың ысҳапахтӯтка̄т сямың пилъыҳқа̄ның. 21Пикӣ: «Аӷныӷми хўани, нагасимаҳси укут Акузитыт Игақыхкат а̄пқа̄т апыӷӣҳтуқ».

22Акузиныӷмың та̄қсян қамахлъютың нагалъҳӣт ыфқуқыхкӣт акузилъҳи, сяӷӣӷаягуткӣтлъю акузитаңи наңлъыхталъылгунилюки. А̄пқуӷа̄ӷуткат: «Уна Иосифым иӷнықынӷитагӯ?»

23Иисусым пикӣ: «Налъюнықнаңуна̄н хўаңамнун апыҳлъықаҳси хўатын пилъық: “Аӷалъыхтақ, лъпынун на̄лъҳутын”. Нагақуқақапут Капернаумыми пикаҳтын, ма̄нилъю аңливихпыни тама̄кут пӣҳтики, ынка̄м ухпықылъықамкын Мессияңунилютын». 24Пикӣлъю: «Ипа пӣмси, ӯкналиқиста тугуклъиҳтыңитуқ лъми катам аңливигмини. 25Иўырңа ипа уңипа̄тамси, Израилыми, Илия кияҳтыңъулюку, угиңиӷаҳтӯқ. Тама̄ни пилъыӷни ыслъялъюгуҳныӷитка̄гуқ пиңают аюмиқулъҳыт, аӷвинлык танқит илялъюки, ынка̄м нықаңисяхлъяка̄гуқ тамаҳа̄ни нунаңани Израилым. 26Иўырңа Кияӷныӷым Илиямун каюсиӷьяҳтӣсқылъҳитӣ налиҳӣнӣт угиңиӷат Израилымылңӯт. Йыӷлыги каюсӣсяҳтӣсқыхкақа̄ язычник угиңиӷақ, кияҳлъыҳӣ Сарептами, Сидонымылңуӷми. 27Ынка̄млъю Израилыми прокаженныхтумақ, кияҳтылъҳани ӯкналиқистым Елисейем. Налиҳӣнӣт укмаңилъҳитутлъю, на̄лъҳутылъҳитутлъю, иўырңақун язычник Нееман, Сирияӷмӣ».

28Қамахлъютың синагогамылңӯт сякшитыҳлъякат нагасямыхтыху Иисусым таўатын пилъҳа. 29Та̄хкын ныкывӯлъютың, аягаҳта̄ма̄н ныҳлъягмың а̄нутка̄т. Та̄на ныҳлъягат қымикун ныкыфтыка̄лӷӣ ынка̄м аӷуляқутка̄т қымим қагуӷруганун сӣңналюку тысямавык. 30Иўырңа акулңитхун наӷуҳқуӷлюки аӷуляқыхкақ.

Иисусым А̄ныстыкаңа Туӷныӷақ Югмың

31Та̄хкын Иисус тысямавык Капернаумымун пикақ, ныҳлъягмун Галилеямылңуӷмун. Субботами апыҳтуӷималюку, 32сяӷӣӷаягутка̄т апыҳтуӷилъҳа, қаюҳлъяк апыҳтуӷикақ аҳтуӷьяҳқа̄нӷилъылиӷлюни Кияӷныӷмың. 33Синагогамытыфтуқ ю̄к илюмикун туӷныӷалык. Игляхтупихлъюни акилӷӯмың пикақ: 34«Авылӷаҳқут! Иисус Назаретыӷмӣ, сянақсикут? На̄фқысяҳтӯзикӯт? Лӣсимакамкын кинаңутын, Аглыӷналӷӣка̄тын Кияӷныӷым».

35Иўырңа Иисусым аӷью̄қа̄: «Қалъыхпынаң лъңаның а̄ни!» Туӷныӷа̄м иқуслъюку мануңитхун, ақниҳқыхпына̄н а̄ныхкақ.

36Қамахлъютың югыт сяӷӣӷаюгумаӷмың пикат: «Аҳтуӷьяҳқа̄нӷитаҳалык акузитаңи! Пилъыҳқалиӷлюнилъю аҳтуӷьяҳқа̄нӷилъылиӷлюни қылыӷьяқминики туӷныӷа̄т лыган а̄нлыӷа̄тут!» 37Иисусым таўатын пилъҳа уңипақыхка̄т нани алңунак тама̄ни.

Иисусым На̄лъҳускаңи Юлӷутыт

38Иисус ныкывлюни, синагогамың а̄нлюни, Симонынкунун агляӷлюни ӣтқақ. Симоным сякиңа аӷнақ пуқлъыӷаҳлъяк, ынка̄м на̄лъҳутаҳтысқыхка̄т лъңанун. 39Такулюку қаваӷвиганун ныкывӷаӷми қуляңиӷлюку пуқлъыӷаңа ыфлъықуқа̄ ынка̄м пуқлъыӷаңӣткақ. Таўаниңинақ макылъюни кыпсӣқукӣ.

40Сиқинық тывӣмалюку, Иисусымун югыт тагиқӯткӣт қинуюгңалӷӣт алъя̄ҳӣнаӷның ақниӷныӷның. Қамахлъюки ся̄фтақлъюки на̄лъҳуқуқӣ. 41Туӷныӷа̄тлъю а̄нлыӷа̄ткат югның акилӷӯмаӷмың: «Лъпык Кияӷныӷым Иӷнықа̄тын!» Иўырңа аӷью̄қӣ, акузиснаниқӣлъю қаюҳлъяк лӣсимакыхкаңат лъңа Христосыңулӷӣ.

Иисус Уңипақилӷӣ Синагоганъи

42Аҳсягу Иисус килга̄нун пикақ. Югыт иваӷьяҳтуӷлюку, на̄лъкысямыхтыху аӷуляқыснаниқа̄т. 43Иўырңа пикӣ: «Уңипақыпыста̄ӷьяҳтуӷнақңўа̄қа Атаныҳпагулъҳа Кияӷныӷым иляңитнунлъю ныҳлъягнун, қаюҳлъяк та̄на апалъюқлъюку каяхтыка̄гуңа».

44Ынка̄м уңипақимаңинақақ синагогаңитни Иудеям.

Currently Selected:

От Луки 4: ess2

Highlight

Copy