От Луки 1
1
1-2Аңылъымни Феофил Углялӷӣм югым игақуқақӣт таўатын пилъҳыт акулымнъи. Игақуқӣт та̄куңӯт ата̄сит нагақуқапут ысҳапаканың таўатын пилъҳистун има пӣнлилъҳитның. Лъңиталъю қыпҳа̄ткақа̄т Кияӷнық уңипақылъыӷмыхтыхун уңипақ Христосымың аюқылӷӣ. 3Нагаткақанка апылъҳит, атиҳтуӷўа̄қақанкалъю игақулъҳит пӣнлилъҳитның. Ынка̄м игақуӷьюганка лъпынун таўатытңўа̄ӷлюки пилъҳистун. 4Таўатын лӣсимакылъықатын ипаңутаңи тама̄кут апыҳтӯткат лъпынун.
Иоанным Крестителым Алъхылъҳан Апылъҳа
5Ирод умӣлъкыңъулюку Иудеям, тама̄нтыфтуқ священник, а̄тҳа Захария. Қыпҳалгуткыхкаңи священнигыт атилъқылӷӣт Авия священнигыт. Нулиҳан а̄тҳа Елизаветаңӯқ, Аароным киңунӷан священнигым панига. 6Кияӷныӷмун ылъқуӷутңалютык кияҳта̄ӷык. Қа̄ткыпихтыкаңик Атанӷым қылӷусӣлъю, Лӣлиҳтӯсӣлъю, авутңинъалютык. 7Та̄ўаңинақ таӷнуҳӣлңӯк, қаюҳлъяк Елизавета қумиңыпагниңилңуқ, таўавыклъю қамахлъютык сӣванлъыӷуҳтыкак.
8Ата̄сими аӷныӷми, Захария, қыпҳа̄малӷӣ Храмыми, қаюҳлъяк Авиям священнигыт қыпҳалъыҳқа̄т ка̄лъҳӣ. 9Наңаӷныӷмың пилъҳистун священнигыт атыҳтӣра̄лъыҳқун накмикыхка̄т Захария. Ынка̄м итыӷлюни Атанӷым Храмыңанун паныӷрыӷақақ фимиамымың. 10Таўани афлъюңани фимиамымың паныӷрыӷалъҳым, қакма юлӷутыҳлъягыт юӷа̄тыт. 11Таўани Атанӷым яқулган алӣӷвикыхка̄ ныкывӷаӷми аӷынқигныӷанилъюни аҳқыфиган фимиамым. 12Захария упуқақ ысҳаӷьямигу яқулык, алиңрӯҳлъякақлъю. 13Иўырңа яқулгым пика̄: «Алиңыхпынаң Захария, юӷаҳтын нагақулъыңума̄т. Нулӣҳпык Елизаветам иӷныңунъақңўа̄тын, атиҳлъықан Иоаннымың. 14Ынка̄м қуяҳлъяхлъықутын, углямлъю қуякылъықа̄т алъхылъҳа, 15қаюҳлъяк лъңа қыпҳаҳтыкыҳлъяхлъықа̄ Атанӷым. Мыӷьяҳқа̄нӷитуқ виномың, налиӷмың сю̄мналӷӣмың ақимлымың, имиӷңаяҳқа̄гуқлъю Аглыӷналӷӣгның Таӷныӷагның талўа алъхылъҳилъюни. 16Израилыӷмӣлӷутытлъю утыҳтысқуҳлъықӣ Атаныӷмун Кияӷныӷитнун. 17Лъңа сивуклъюни қыпҳаҳлъықуқ, та̄хкын Атанық қыпҳаҳлъықуқ. Лъңа ата̄сигның таӷныӷалгулъықуқлъю, аҳтуӷьяҳқа̄нӷилъылгулъықуқлъю ӯкналиқистытун Илиятун. Атанун сюмыҳтаӷа̄ткысягутыслъықӣ авақутӣт, қа̄ткусигалңӯтлъю налъҳусяӷнақңўӣ пыҳқинылъыӷмун Кияӷныӷым ылъқуӷутңалъҳанун. Ынка̄м ята̄ҳқылъықӣ югыт Атанӷым тагилъыҳқа̄нун».
18Захариям пика̄ яқулык: «Натын лӣсимакылъықсикун апылъҳын? Нанывгаҳлъягума̄ңа, нулиҳқалъю аӷналъқўа̄лӷӣ».
19Яқулгым пика̄: «Гавриилыңӯңа, ныкывӷалӷӣ Кияӷныӷым наю̄тңалъҳани. Лъпынун каяхта̄гуңа, уңипа̄сяҳтӯгамкын хўакын пинилӷӣмың уңипа̄мың. 20Нагатаҳтын, та̄ўа акузинаниӷнақутын кынляңаңын а̄пылъимни лъпынун апыӷӣҳтӯтылъҳитнун, қаюҳлъяк ухпықынӷилъкытын акузитынка, апыӷӣӷьяҳқат пилъыҳқӣт ка̄ската».
21Югыт утақӣлӷӣт Захариямың сюмыҳтаӷақат сяңами мулю̄ҳлъягутаңа Храмыми. 22А̄ньялӷӣми алыҳқуҳпагниңиткӣ, ынка̄м лӣгикыхка̄т ысҳаўа̄ӷуманилюку Храмыми. 23Ынка̄м қыпҳалъыни апыӷӣӷьямигу ныминун агляқақ.
24Мулюнӷитуқ та̄кут аӷныӷыт киңуңитның нулиҳа Елизавета қумиңыхкақ, ынка̄м талъимат танқит а̄наниқақ хўатын пимаӷми: 25«Қынўатлъю Атанӷым наңлъыгьягута̄ңа, иқита̄ кайңусяӷа̄тылъқа таӷнуҳаңынӷитылъымның».
Иисусым Алъхыӷнақылъҳан Апылъҳа
26Аӷвинлӣтаңани танқим Кияӷныӷым каяхтыка̄ яқулык Гавриил Назаретымун, Галилеямылңуӷмун. 27Югмун атуқысимаңилңуӷмун аӷнаӷаӷмун, а̄ңӷутнуқамун Иосифымун, киңунӷанун Давидым. Югмун атуқысимаңилңӯм аӷнаӷа̄м а̄тҳа Марияңуфтуқ. 28Яқулгым такулюку пика̄: «Ныкыхмылъық лъпынилъи! Атанӷым накмикума̄тын аӷнат акулңитның».
29Иўырңа Мариям сыӷлылӣӷуткыҳлъяка̄ нагалъюку таўатын пилъҳа, сюмыҳтаӷа̄ткыхка̄лъю сяңами таўатын қуякутни. 30Яқулгым пика̄: «Алиңыхпынаң Мария, қаюҳлъяк ыфқуӷнаҳтутын Кияӷныӷми. 31Нагатаҳтын, та̄ўа қумиңнақңӯтын, иӷныңылъықутын ынка̄м атиҳлъықан Иисусымың. 32А̄ңылъықуқ, атиӷьяҳқа̄гуқлъю Иӷныӷа Кияӷныҳлъягым; ынка̄м Атанӷым Кияӷныӷым умӣлгуҳтыслъықа̄ сивунӷатун Давидытун. 33Иглыӷутилъықуқ Иаковым киңунӷитның Израилыӷмӣның қӯнпырухлъяк; Атаныҳпагулъҳалъю кынлыңитуқ».
34Мариям пика̄ яқулык: «Натын уна пияҳқа̄ўа югмун атуқысигалңӯңа?»
35Яқулгым пика̄: «Аглыӷналӷӣм Таӷныӷам такулъықа̄тын, ынка̄м Кияӷныӷым аҳтуӷьяҳқа̄нӷилъҳан таӷныӷаңулъҳӣстун алъкўа̄ҳлъықа̄тын. Та̄на апалъюқлъюку таӷнуҳақ аглыӷнаҳлъықуқ а̄тқысяҳқақа̄лъю Кияӷныӷым Иӷныӷа. 36Нагатаҳтын, илякўа̄ӷын Елизавета, аӷналъқўа̄ҳлъяглюни қумиңума̄қ, иӷныңнақңӯқ. Уна хўа̄ аӷвинлӣтка̄ танқиқ, пӣқсяқаңат аваңинъилюку, 37қаюҳлъяк Кияӷныӷми сяңўа̄ қамахлъюни пияқнӣтуқ».
38Мариям пика̄: «Та̄ўа хўаңа, Атанӷым қыпҳаҳтыка̄ңа; лыган таўатын пинақнилъыҳпытун апыӷӣҳа̄қ». Та̄хкын яқулгым унитка̄.
Мария Ля̄лиҳлъыҳӣ Елизаветамун
39Мулюнӷитуқ Мария, ята̄ҳқылъюни та̄юҳқымъың агляқақ ныҳлъягмун, акулңитнилңуӷнун қымилӷутңан Иудеям. 40Мария ка̄лъюни Захариянкунун итыӷлюни қуякыхка̄ Елизавета. 41Лыган Елизаветам нагақуӷа̄ Мариям қуякилъҳа, таӷнуҳақ қумига қапшагаҳтыкақ, Аглыӷналӷӣмлъю Таӷныӷам имиқа̄ Елизавета, 42игляхтулюни пикақ: «Қуястыка̄гутын акулңитни аӷнат, қуястыка̄гуқлъю таӷнуҳақ иӷнияҳқан! 43Қӯлвалъыңыпыста̄ҳтуңа қаюҳлъяк Атаныӷма на̄ңан ля̄лиҳфикыхкаңаңа! 44Лыган қуякилъҳын нагақуӷақа, таӷнуҳақ қама қуям қапшагаҳтуқ. 45Қуянаҳалык Атанӷым акузитаңа ухпықыхкын апыӷӣҳлъықнилюку лъпынун!»
Мария Иляга̄ткун Усюқилӷӣ
46Мария пикақ:
«Уңувасигма усюқа̄ Атанық,
47таӷныӷахкалъю қуяҳлъягӯк Кияӷныӷми, Югулиӷистымни,
48қаюҳлъяк лъңан ысҳаӷлюңа накмика̄ңа,
укалиҳпигақ қыпҳаҳтыни.
Хўакын кынлыклъюку югым киңулӣӷа̄м қамахлъюни атиӷьяҳқақа̄ңа қуястыка̄люңа,
49қаюҳлъяк Аҳтуӷьяҳқа̄нӷитыҳлъягым Кияӷныӷым апыӷӣӷутыҳлъяга̄ңа. А̄тҳа аглыӷнаҳтуқ.
50Наңлъыкақа̄ ю̄к қамахтыңъўа̄ӷлюку лъңаның талъюқилӷӣ, киңулӣӷаӷның тӯңлиҳӣтнун.
51Икнақыпихлъыӷӣкун аҳтуӷьяҳқа̄нӷилъыӷмикун кая̄лъқақӣ қука̄юхлъыҳӣт сюмыҳтаӷалъыӷмыхтыхун.
52Умӣлыхлъягыт атыҳтақӣ ақумутӣтның, ынка̄м қӯлваӷақӣ укалиҳпига̄т.
53Ияталӷӣт нықнилӷӣмың кыпсюҳтақӣ, ынка̄м аклъюңилңӯт аӷуляқыстақӣ аваңунаки.
54Каюсиӷақӣ қыпҳаҳтыни Израилыӷмӣт, қаюҳлъяк наңлъыхталӷӣ,
55Авраамымунлъю, киңунӷанунлъю қӯнпырухлъяк акықылъыӷмитун сивуныпут».
56Мариям наюқыхка̄ Елизавета пиңают танқит, та̄хкын ныминун агляқақ.
Алъхылъҳа Иоанным Крестителым
57Елизаветам иӷнилъыҳқа̄ ка̄лъюни, иӷныңыхкақ. 58Увилиӷныӷиталъю, налъықлъӣталъю нагақуӷлюку Атанӷым наңлъыкыҳлъялъҳа Елизавета, қуякусяҳтуқа̄т. 59Пиңаюның иңлюлык аӷнық атуӷлюку югыт тагиляӷа̄ткат обрезаналюку таӷнуҳақ, атиӷнақсяӷа̄тлъю Захариямың, атаңан а̄тҳаның. 60Иўырңа на̄ңан пикӣ: «Нака̄, а̄тҳа Иоанныңӯқ».
61Югыт пика̄т: «Налиҳӣт налъықлъиҳатын та̄хкын а̄тҳитут». 62Та̄хкын апақумың атаңа а̄птыка̄т китумың атиӷнақутаңа.
63Захария игаӷьяҳқамың туңсиӷлюни, игақыхка̄: «А̄тҳа Иоанныңӯқ». Таўанлыңӯт қамахлъютың алъя̄ҳлъюхўаӷьюкат. 64Таўаниңинақ Захария акузияқлъыгуҳтыкақ, усюқыхка̄лъю Кияӷнық. 65Қамахлъютың увилиӷныӷит талъюӷьюкат. Иудеями уңипақ миңитка̄т югнун тама̄ни кияҳлъыҳӣнун акулңитни қымит. 66Қамахлъютың нагақӯткат таўатын пилъыӷның сюмыҳтаӷа̄ткылъюки пикат: «Таӷнуҳақ уна сястыңунақңўа̄туқ аңликуми?» Қаюҳлъяк ипа налъюнӣтка̄лӷӣ Атанӷым аҳтуӷьяҳқа̄нӷилъҳа лъңанилңуқ.
Захариям Ӯкналиқылъҳа
67Иоанным атаңа Захария, Алыӷналӷӣм Таӷныӷам имиӷлюку ӯкналиқыхкақ:
68«Йықай усюқылътыху Атанық Кияӷныӷа Израилым, қаюҳлъяк итымусяҳтуӷӣ юни.
69Ята̄ҳқутӣлъю Югулиӷистыҳлъягмың, қыпҳаҳтыми Давидым киңунӷаның.
70Таўатын ныӷиӷлюку акықика̄гуқ аглыӷналӷӣтхун ӯкналиқистымикун,
71югулияҳқа̄люта аңуямнъың, тамаҳӣтныңлъю угумикистымнъың.
72Нагныӷуткақа̄ наңлъыхталъыни сивунымнъун, апыӷӣҳлъықнилюкулъю аглыӷналӷӣ акықусяни.
73Акықусяңлъяқа̄гуқ сивунымнъун Авраамымун.
74Акықӣлъю югулилъықнилюта аңуямнъың, ынка̄м қыпҳа̄лъықаҳпут алиңыхпына̄мта аңуямнъың,
75тӯнңўа̄ӷлюта лъңанун, қа̄ткулъюталъю пиюкылъҳанун уңувалъыҳпут қамахтӣлюку.
76Ынка̄м лъпык таӷнуӷамни, атиӷьяҳқа̄гутын ӯкналиқистыңа А̄ңыпихлъыҳӣм Кияӷныҳлъягым.
Каяхнақңўа̄тын сивутҳулъюку Атанық ята̄ҳқысқылъюки югыт тугуклъӣсқылъюку тагикан.
77Уңипа̄лъықа̄тын Кияӷныӷым юги югулилъыӷмың сыӷывутилъҳакун сыӷлыҳқылъҳитның,
78қаюҳлъяк Кияӷныҳпут наңлъыхтаҳлъяхтуқ.
Каяхлъықа̄ Югуӷлиӷиста, лъңа сиқинӷым пӣтыкысталъҳатун аюқсяҳқа̄гуқ
79қилягмың кукыхналюки тама̄кут кияҳлъыҳӣт таӷныӷаңутылъҳанилңӯт туқулъҳым,
маӷьяҳқуӷналюта тӯмңанун ныкыхмылъҳым».
80Таӷнуҳақ аңликақ, икнақуҳтыкақлъю таӷныӷамикун. Килга̄ниткақ кынляңа уңипаӷьяҳтулъыӷминун Израилыӷмӣнун.
Currently Selected:
От Луки 1: ess2
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
