От Луки 2

Алъхылъҳа Иисусым

1Киңуңаның Иоанным алъхылъҳан, тама̄ни пилъыӷни Римым Умӣлыхпига̄н Августым, қылъқа̄ ю̄к қамахтыңъўа̄ӷлюку, а̄тҳит игақыстысяҳтӣсқылъюки игалӷутмикун. Таўатын пистыкӣ кысналюки югыт угляҳталяңит иглыӷуткаминилңӯт нунани. 2Та̄на сивулиҳпига̄лӷӣ югмың кыстилъық, Квириний правителкыңъулюку Сириям. 3Қамахтыңъўа̄ӷлютың югыт лъмың катам алъхыӷвигмыхнун агляҳтӯткат атытың игақысқылъюки.

4Назаретымың, Галилеямылңуӷмың, Иосифылъю аӷуляқыхкақ Вифлеемымун, Иудеямылңуӷмун, умӣлгым Давидым алъхыӷвиганун. Тама̄вык пика̄лӷӣ қаюҳлъяк киңунқыхкаңа Давидым. 5Иосифым атыни игақыстысяҳтуқа̄, нулӣҳқани Мария кылъқылъюку, ақсялӣҳлъюни аюқылӷӣ. 6Тама̄нсималюкык иӷнияҳқа̄ҳтыкақ. 7А̄нтыка̄ иӷнықсюхўа̄ни, ынка̄м қӣпаӷаҳқун ю̄ңӣлъюку, аҳсюка̄ ныҳқуситагныкун, қаюҳлъяк ныкаҳқӣлңӯк ақылъқалӷутами.

Пынъӣӷнӣҳтытлъю, Яқулгытлъю

8Унугми таўани, нунивагми пынъӣӷнӣҳтыт афлъыңакиңулӷӣт пынъӣӷмыхның. 9Атанӷым яқулган алӣӷвикыхкӣ, ниӷуҳқылъҳанлъю Атанӷым кукыхтыкӣ, ынка̄м алиңрӯӷутыҳлъякат. 10Яқулгым пикӣ: «Алиңыхпынаси нагатаҳтык, пинилӷӣмың уңипа̄мың тагитақамси қуянапихлъыҳӣмың югнун тамаҳа̄нун. 11Аӷныӷми хўани лъпысинун алъхыӷақуқ Югулиӷиста, ныҳлъягани Давидым, Христосыңӯқ Атанық. 12Хўатын лӣсимакылъықаҳси; ысҳаҳлъықаҳси таӷнуҳақ қӣпаӷаҳқун ю̄ңӣлъюни, аҳсюгңа̄қ ныҳқуситагныкун».

13Нӯскаган илятқаҳта̄ткат яқулыгмун қилягым пилъюўаҳтылӷутыҳлъяги яқулылӷутыт, усюқыхка̄т Кияӷнық, пикат:

14«Усюқнаҳалык Кияӷныӷмун,

қилягым ӯсқалъыҳпига̄нилңуӷмун,

ныкыхмылъылгулитлъю нунамылңӯт ыфқуқыхкӣ!»

15Яқулгыт маюҳтӯсята қилягмун, пынъӣӷнӣҳтыт лъңитның пикат: «Вифлеемымун ысҳаӷьяҳтӯлътыху таӷнуҳақ алъхылӷӣ, Атанӷым лӣсимакыстыкаңа хўаңкунъун». 16Ынка̄м аглярахкӣӷлютың ысҳақӣт Мариялъю, Иосифылъю, таӷнуҳақлъю аҳсюгңалӷӣ ныҳқуситагни. 17Пынъӣӷнӣҳтыт ысҳаӷьямыхтыху таӷнуҳақ, тамаңанун а̄пқа̄т тама̄на яқулгым апылъҳа лъмыхнун. 18Пынъӣӷнӣҳтыт уңипақылъҳитның нагақӯлъҳӣт қамахлъютың алъя̄ҳлъюхўаӷьюкат. 19Иўырңа Мариям қа̄лъкаҳпынани илюмикыхкӣ тама̄кут пилъҳыт, аўын сюмыҳтаӷа̄ткақыхкаңи. 20Пынъӣӷнӣҳтыт утыӷниқат усюқума̄н, қӯлвама̄н Кияӷнық, қаюҳлъяк нагақуқа̄тлъю ысҳақа̄тлъю яқулгым апылъҳатун аюқыхкақ.

Иисус Атӣткаңат

21Пиңаюның иңлюлык аӷнық атуӷлюку, таӷнуҳақ обрезаниян атиқа̄т, Иисусымың. Яқулгым тӯныхка̄ атық Мариямун сялин қумиңылъҳилъюку.

Мариям, Иосифым Агля̄скаңак Иисус Храмымун

22Моисейем Лӣлиҳтӯся̄н қылылъҳатун пылюңиҳсялъыҳқа̄к ка̄ткақ. Ынка̄м Иерусалимымун агля̄тка̄к таӷнуҳақ Атаныӷмун тӯналюку. 23Лӣлиҳтӯся̄ни Атанӷым игақңа̄қ: «Тамаҳаӷми аӷнам иӷнықсюхўа̄ӷа а̄фсяҳқа̄гуқ Атаныӷмун». 24Атанӷым Лӣлиҳтӯся̄н қылӷутылъҳатун аҳқуткысяҳқа̄лӷӣк: «ма̄лӷук горлицык, налиӷмың ма̄лӷук голубыңиӷа̄к».

25Иерусалимымытыфтуқ ю̄к, а̄тҳа Симеон. Қа̄ткутңалӷӣлъю, манигӯткаюклъю Кияӷныӷмун. Утақӣңулӷӣ Кияӷныӷмун югулисқылъюки Израилыӷмӣт. Аглыӷналӷӣк Таӷныӷак лъңанилңӯк. 26Аглыӷналӷӣм Таӷныӷам акықыхка̄ туқуна̄нӷинъилюку кынляңа ысҳалъыҳқа̄нун Мессия Атанӷым акықусяқыхка̄. 27Таӷныӷам маӷьяҳқулъҳакун итыӷьяҳтуқақ Храмымун. Лӣлиҳтӯсят писқылъҳистун аңаюқахкынка таӷнуҳақ Иисус итҳутка̄к Храмымун. 28Симеоным тугулюку таӷнуҳақ игамсиқаюгвикыхка̄ Кияӷнық, пикақ:

29-30«Атанық, йықай ма̄тын қыпҳаҳтын аӷуляқыстигу ныкыхмылъюку,

қаюҳлъяк акықылъыҳпытун,

хўаңа катам ийыгымның ысҳаӷақа каяхтыкан Югулиӷистыңулюку.

31Ята̄ҳқыхкақан югнун тамаҳа̄нун ысҳӣсқылъюку.

32Ниӷугӯқ язычнигнун лӣгикыстилӷӣ Кияӷныӷмың,

лъңа апалъюқлъюку юхтын Израилыӷмӣт қӯлвалъыңыҳлъяхлъықут».

33Та̄хкын таӷнуҳа̄м атаңанлъю, на̄ңанлъю сяӷӣӷаягутка̄к таўатын акузиткысягу. 34Симеоным Кияӷныӷмун туңсӣткакык қуястысқылъюкык. Ынка̄м на̄ңа Мария пика̄: «Нагатаҳтиңа, уна таӷнуҳақ Кияӷныӷым накмикыхкақа̄. Иляңи Израилыӷмӣлӷутыт нанқихлъықӣ аӷью̄ӷьяҳқа̄люки, иляңи югулияҳқа̄люки. Кияӷныӷым каяхтыңъўа̄ лъңанун уңипаҳтыңулюку, иўырңа юлӷутыт иҳсякылъықа̄т, 35ынка̄м таўатын пилъыӷмыхтыхун лӣтыслъықӣт аксяқңалӷӣт сюмыҳтаӷалъытың. Ынка̄м лъпык Мария, қивӷум кагимлъықа̄к уңувасихкын, катам таўатын сявихпагым ка̄пылъҳатун».

36Та̄ўалъюңуқ ӯкналиқиста аӷнақ, а̄тҳа Анна, Фануилым панига, Асирым рамкыни пи. Аӷналъқўа̄ӷуфтуқ, угилгука̄фтуқ ма̄ӷраӷвинлык аюмиқулъық. 37Та̄хкын угиңӣтылъыӷминың 84ңуҳтыкаңи аюмиқулъҳыт. Аўын тагӣқылӷӣ Храмымун, аӷныӷуяӷңа̄н, унугуяӷңа̄н Кияӷнық манигуӷақыхкаңа, постақлъюнилъю, юӷаӷақлъюнилъю. 38Таўани ата̄сими афлъюми, Аннам такулюки Кияӷнық игамсиқаюгвикыхка̄. Таӷнуҳақ акузиткыхка̄ тамаҳӣтнун утақӣлӷӣнун Мессиямың, лъңанун итымутысқылъюку Иерусалим.

Утыӷнилъық Назаретымун

39Иосифым, Мариямлъю қамахлъюки апыӷӣӷьямыгныки Атанӷым Лӣлиҳтӯсӣта писқылъҳит, утыӷниқак Назаретымун, Галилеямылңуӷмун. 40Таӷнуҳақ аңликақ, икнақуҳтыкақлъю, имиӷңаӷми пыҳқинылъыӷмың; Кияӷныӷым каюсиқа̄лъю, қуястыка̄лъю.

Мыкылӷӣқ Иисус Храмыми

41Аюмиқулъық тамаҳа̄н аңаюқакык Иерусалимтақылӷӣт, нықынӷаҳқылъҳанун Пасхам. 42Иисусым уксюҳтуляңа қуля ма̄лӷугуҳсян, пӣқылъыӷмыгытун нықынӷаҳқылъыӷмун пикак кылъқылъюку Иисус. 43Нықынӷаҳқылъық апыӷӣӷьян утыӷниқак, иўырңа мыкылӷӣқ Иисус уныхтыкақ Иерусалимыми. Аңаюқахкынка налъюкыхкаңак. 44Сюмыӷмыхни иглыӷалгутыгмыгнинъилюку аӷнылъқусиқ иглыҳтыкақ. Та̄хкын ивақа̄т илякўа̄ӷмыгнилъю, илякумта̄ӷмыгнилъю. 45На̄лъкынӷисямыхтыху Иерусалимымун иваӷьяҳтуқа̄к. 46Пиңают аӷныӷыт атуӷлюки на̄лъкыхка̄т увитаңанилъюку Храмым, ақумлюни апыҳтуӷистыт акулңитни, нагатақыфтӣлъю, а̄пқуӷа̄ӷақыфтӣлъю. 47Қамахлъютың нагатулъҳӣт лъңаның сяӷӣӷаягутка̄т лӣгикиңалъҳаныңлъю, кӣмсиҳтуӷилъҳаныңлъю. 48Аңаюқахкынка ысҳаӷлюку сяӷӣӷаягутка̄к. На̄ңан пика̄: «Иӷнымни, ысҳақаҳқуң, сяңан хўатын аныҳсикут? Атахпыклъю, хўаңалъю ынңа̄талъ иванӷӣӷутамкын, рыпалъ пыңгӣлъютын».

49Кӣмсиқакык: «Сяңан иваӷыстына? Налъюкыстыхӯ Атама мыңтыӷа̄нисяҳқапыста̄ӷулӷӣңа?» 50Иўырңа лӣгикумаңилъкаңат сямың таўатын пиңутаңа. 51Та̄хкын малихлъюкык утыӷниқақ Назаретымун, қа̄ткутңака̄лӷӣлъю ылъкыхкынун. На̄ңан тама̄на қамахлъюку умьюгаӷмикыхка̄.

52Иисус аңлиткылъюку пыҳқинӷуҳтыкақ, ыфқуӷнаҳтыңъинақақ Кияӷныӷмилъю, югнилъю.

Currently Selected:

От Луки 2: ess2

Highlight

Copy