Juan 16

1»Mɨa mãɨ ãarea mãrá jara bɨma mɨne ĩjãa p'anɨ itu bɨpidaemaapa. 2Judiorãpa mãra ãchi ará pedeapataɨ tedepema ãyá jerek'oadaipɨ. Mãɨ awara mãra peadai ewari paipɨ. Mãra peautade ãchia k'ɨ̃risiadaipɨ “Tachi Ak'õrepa k'ɨ̃ria bɨ oo p'anɨane” adait'a. 3Mãɨya oodaipɨ mɨ Ak'õre, mɨ sida atua p'anɨ pẽra. 4Maamina mɨa mãɨ ãarea mãrá jararuma, mãɨ ewari cherude mɨa jarada k'ɨ̃risiadak'ari p'erawẽa p'ananamẽrá.

Tachi Ak'õre Jaorepa ooparí jarada

»Mɨa naena mãrá mãɨ jaraé pasima mãra ome bada pẽra. 5Maamina mɨ, mɨ Peedamá wãipɨ. Maamina abaɨ pida mãranepemapa mɨá mãɨ k'orea ididawẽa p'anɨma. 6Mãɨpari mãra k'ĩra piawẽa p'anɨma mɨ wãi bɨade ada pẽra. 7Mɨa piarã jararuma: mãra pae pia bɨma mɨ wãit'a. Mɨ wãepɨra mãra K'aripaparí cheiwẽma. Maamina mɨ wãipɨra ichi peeipɨ.

8Tachi Ak'õre Jaore cherude nãɨ ĩjũanepemarã́ k'awapiipɨ ãchia k'ai nemietá ooparit'a, k'ai jĩp'a bɨt'a mãɨnepa k'ai nepɨra pará bɨade ait'a. K'awapiipɨ ãchia makɨɨ k'orea piawẽa k'ɨ̃risia p'anɨt'a. 9Tachi Ak'õre Jaorepa ãchiá k'awapiipɨ chi mɨne ĩjãanak'apɨɨrãpa nemietá oopataɨt'a. 10K'awapiipɨ mɨ jĩp'a bɨt'a, mɨ Ak'õremá wãi pẽra. Mãɨne mãrapa mɨ waa ununaiwẽma. 11Mãɨnepa Tachi Ak'õre Jaorepa k'awapiipɨ nãɨ ĩjũanepemarã nepɨra pará p'anɨane ait'a, Tachi Ak'õrepa chi nãɨ ĩjũanepema chipari nepɨra pará bɨade ada pẽra.#Juan 7:21-24; 8:42-47; 12:31.

12»Mɨa wapida ne minachia mãrá jarai uru bɨma. Mãɨ mãrapa nãɨena ãarea p'ue k'awadaiwẽma. 13Maamina Tachi Ak'õre Jaorepa piarã pedea k'awapipari pẽra ichi cherude mãrá jarateaipɨ chi piarã pedea Tachi Ak'õrenepa che bɨt'a jõma k'awadamẽrá. Ichi ara ichi k'ɨ̃risiadepa pedeawẽma, mãɨpari ãarea mɨnepa ũri bɨt'a jaraipɨ. Ichia mãrá k'awapiipɨ mãɨ sãait'a. 14K'awapiipɨ mɨ chi choma bɨt'a, mɨ pedea ũrik'ari ãarea mãrá jarateai pẽra. 15Jõma mɨ Ak'õrené, ichiaba mõrepɨ. Mãɨ k'orea mɨa jarasima Tachi Ak'õre Jaorepa mɨ pedea ũrik'ari mãrá jarateait'a.

K'ĩra piawẽa p'ananak'ari arapá p'aneenaipɨ

16»Tãaraawẽa bɨde mãrapa mɨ ununaiwẽma, maamina mãɨya nak'ari mãicha tãaraawẽa bɨde mɨ ununaipɨ.#16:16 Griego pedeade chi eda waapẽarã k'art'ade bɨ bɨma: mɨ Ak'õremá wãi pẽra.

17Mãɨne chi eda waapẽarã ichi ome p'ɨrrɨapataɨrãpa ara ãchi tuaba idi para beesima:

—¿Mãɨ k'ãre jara bɨma: “Tãaraawẽa bɨde mãrapa mɨ ununaiwẽma. Maamina mãɨya nak'ari mãicha tãaraawẽa bɨde mɨ ununayade aipɨ mɨ Ak'õremá wãi pẽra?” 18Mãɨ pedea “tãaraawẽa bɨde” a bɨt'a ¿k'ãre jara bɨma? Tachia k'awadawẽa p'anɨma k'ãre k'orea mãɨya pedea bɨt'a.

19Jesupa k'awasima ãchia mãɨ k'orea idi k'ɨ̃ria p'anɨt'a. Mãɨpuru jarasima:

—Mɨa mãrá jarasima tãaraawẽa bɨde mɨ waa ununaiwẽane asima mãɨnepa mãɨya nak'ari tãaraawẽa bɨde mɨ mãicha ununayade asima. ¿Mãɨ k'orea ara mãra tuaba idi para p'anɨwẽk'ãra? 20Mɨa piarã jararuma: nãɨ ĩjũanepemarã arapá p'anɨmisa, mãra sõp'uapa jẽanaipɨ. Mãra sõk'achia p'ananaipɨ, maamina mãɨ jõk'ari arapaadaipɨ. 21Piarã wẽra warra t'õrune p'uaparima ichi ewari pada pẽra. Maamina warra t'õk'ari mãɨ p'ua bada k'ɨ̃risia atuaparima ichi warra k'orea arapá bɨ pẽra. 22Ara mãɨ jĩra mãra ara nãɨena k'ĩra piawẽa p'anɨma, maamina mɨ mãicha mãra ak'ɨde cheipɨ. Maapae mãra arapá p'ananaipɨ. Abaɨ pida mãɨ arapá p'ue wẽpapiiwẽma.

23Mãɨ ewaride mãrapa mi ãpia pida mɨá waa ne ididaiwẽma. Mɨa piarã jararuma: mãrapa mɨ Ak'õrea mɨ t'ɨ̃nepa ne idiutat'a ichia teaipɨ. 24Mãrapa waidi Tachi Ak'õrea mi ãpia pida mɨ t'ɨ̃nepa ne ididawẽa p'anɨma. Maamina mãɨya ne ididaipɨra mãɨ jitadaipɨ. Mãɨya mãra minachia arapá p'ananaipɨ.

25»Mɨa ne jara bɨdepa mãɨ mãrá jarasima, maamina ewariaba mɨ waa nepɨra bɨdepa pedeaiwẽma. Mãɨpari mɨ Ak'õre k'orea pia jĩp'a jaraipɨ. 26Mãɨ ewaride mãrapa mɨ t'ɨ̃nepa Tachi Ak'õrea ne ididaipɨ. Mɨa mãra pae Tachi Ak'õrea idiiwẽma, 27mɨ Ak'õrepa mãra k'ɨ̃ria bɨ pẽra. Ichia mãra k'ɨ̃ria bɨma, mɨ k'ɨ̃ria p'anɨ pẽra mãɨnepa mɨ Tachi Ak'õrenepa cheda ĩjãa p'anɨ pẽra. 28Mɨ Ak'õremãɨpa nãɨ ĩjũanea chesima. Maamina mɨa nãɨ ĩjũa ameeipɨ mɨ Ak'õremá mãicha wãi k'orea.

29Maapae chi ichi ome p'ɨrrɨapataɨrãpa jarasidama:

—Naapae pɨa jara bɨt'a taimá pia bɨma. Nepɨra bɨdepa pedea bɨwẽma. 30Naapae taipa k'awautama pɨa ne ãarea k'awa bɨt'a. Taipa ne ididai naena pɨa sãmaasã́ p'anooi k'awa bɨma. Mãɨnepa k'awa p'anɨma pɨ Tachi Ak'õrenepa chesit'a.

31Jesupa jarasima:

—¿Naapae mãrapa piarã ĩjãa p'anɨk'ãra? 32Chi ewari chei bada cheruma. Mãra ãarea abaabá jĩichoadak'ari mɨ tuaba ameenaipɨ.#Zak'aria 13:7. Maamina mɨ tuaba baiwẽma mɨ Ak'õre mɨ ome bɨ pẽra. 33Mãɨ ãarea mɨa mãrá jarasima mɨnepa ne k'ɨ̃risiadawẽa p'ananamẽrá. Nãɨ ĩjũane nepɨra pará p'ananaipɨ, maamina ne wap'earãt'ɨ: nãɨ ĩjũanepema mɨa p'uesima.

Currently Selected:

Juan 16: tdc

Highlight

Copy