Juan 15

Jesú chi uva bɨɨrɨ piarãpẽapɨ

1»Mɨ chi uva bɨɨrɨ piarãpẽapɨ.#15:1 Chi Napema K'art'a bɨdaadade jara bɨma Tachi Ak'õrepa Israel ĩjũa uva jɨ̃k'ara jĩra uusit'a, maamina ichia k'ɨ̃ria bada jĩra ãchia oodaé pasima. Ak'ɨse Salmo 80:8-16; Isaía 5:1-7; Jeremia 2:21; Ezequiel 15:1-8; 19:10-14; Osea 10:1. Maamina nãɨ Juan 15:1de jara bɨma Jesupa oo bɨ Tachi Ak'õrepa k'ɨ̃ria bɨ jĩra. Mãɨ k'orea jara bɨma «uva jɨ̃k'ara chi ara». Mɨ Ak'õre chi uva uuda ak'ɨparipɨ. 2Mɨ pak'uru jua chaudak'aɨ ichia mãɨ t'ɨat'uparima, maamina chi chaupataɨ pak'uru jua mãɨ t'ɨat'uparima atepe chaudamẽrá. 3Mɨ pedea ĩjãa p'anɨ pẽra mãra pak'uru jua jĩrak'aua t'ɨat'uda jĩra pia p'anɨrãpɨ.#Juan 13:10. 4Mɨ ome ará p'anat'ɨ mɨ mãra ome ará bɨ jĩra. Pak'uru jua chi bɨɨrɨ ome ará baepɨra, ara ichit'u p'ue chauk'ama. Ara mãɨ jĩra mãra ara mɨ ome p'ananaepɨra p'ue chaudaiwẽma.

5»Mɨ chi uva bɨɨrɨ chi piarãpẽapɨ. Mãra chi pak'uru juapɨ. Chi mɨ ome ará be minachia chaupatama, mɨ mãra ome ará bɨ pẽra. Mãrapa mɨwẽa mi ãpia pida Tachi Ak'õre pae p'ue oodaiwẽma. 6Chi mɨ ome ará bɨwẽt'a, mãɨ mɨ Ak'õrepa awara bɨipɨ pak'uru jua chauk'apɨ́ jĩra. Mãɨ pak'uru jua p'urpak'ari tachia ará jɨrɨp'edak'ari t'ɨpɨde paapatama.

7»Mãra mɨ ome ará p'ananaipɨra, mɨ pedea oo p'ananaipɨra, ɨt'aa chiidit'ɨ jõma mãrapa k'ɨ̃riautat'a. Mãɨ mɨa teaipɨ. 8Mãra pia chaudaipɨra unupidaipɨ piarã mɨ ome p'ɨrrɨapataɨrãt'a. Mãɨya unupidaipɨ mɨ Ak'õre chi choma bɨt'a.

9Mɨa mãra k'ɨ̃ria bɨma mɨ Ak'õrepa mɨ k'ɨ̃ria bɨ jĩra. Mãɨpuru mɨa mãra k'ɨ̃rianepa p'anat'ɨ. 10Mɨa oopi bɨ pedea oodaipɨra, piarã mɨa k'ɨ̃rianepa p'ananaipɨ. Ara mãɨ jĩra mɨ Ak'õrepa jara bɨeda oo bɨ pẽra ichia k'ɨ̃rianepa baparima.

11»Mãɨ ãarea mɨa jara bɨma mãra mɨ ome minachia arapá p'ananamẽrá. 12Mɨa oopi bɨ pedea nãɨpɨ: mãra chi k'ɨ̃ria p'anat'ɨ mɨa mãra k'ɨ̃ria bɨ jĩra. 13Ẽpẽra minachia k'ɨ̃ria bɨdepa ichi k'õp'ãero k'orea piui bɨma. Mãɨ k'aepẽra p'ue chi ẽpẽra atepe k'ɨ̃riai bɨt'a newẽma. 14Mɨa jara bɨeda mãrapa oodaipɨra mãra mɨ chi k'õp'ãerorãpɨ. 15Mɨa mãra waa mɨ pae pari mimiapataɨrãane awẽma. Chi chipari pae pari mimiaparipa ichi chiparipa ooi k'ɨ̃risia bɨ atua bɨma. Naapae mãra mɨ chi k'õp'ãerorãpɨ. Mɨa mãrá k'awapisima ne ãarea mɨ Ak'õrenepa ũrinat'a. 16Mãrapa mɨ jɨrɨ atadaé pasima. Mɨapuru mãra jɨrɨ atasima. Pak'uru bɨɨrɨ nejõ beraak'aɨ chaupari jĩra, mɨa mãra bɨsima wãnak'ari nepia chaudamẽrá. Mɨa mãra jɨrɨ atada pẽra mãrapa mɨ Ak'õrea mɨ t'ɨ̃nepa ne idiutat'a ichia teaipɨ. 17Mãicha mɨa mãrá jararuma: abarik'a chi k'ɨ̃riat'ɨ.

Nãɨ ĩjũanepemarãpa Jesude ĩjãa be unuemaapatama

18»Nãɨ ĩjũanepemarãpa mãra unuemaa p'anɨpɨra, k'ɨ̃risiat'ɨ ãchia naa mɨ unuemaasidama. 19Nãɨ ĩjũanepema padapara ãchia mãra k'ɨ̃rianai pasima, ãchidepema pẽra. Maamina mɨa mãra nãɨ ĩjũanepema ateewãsima ãchi awara p'ananamẽrá. Mãɨpuru mãra unuemaapatama. 20K'ɨ̃risiat'ɨ mɨa nãɨ jarada: “Abaɨ pida ichi chipari pae pari mimiaparí ichi chipari k'aepẽra atepe bɨwẽma”.#Juan 13:16. Mãɨpa jara bɨma ẽpẽerãpa mɨ pedea oo p'anɨpɨra, mãra pedea sida oodaipɨ. Maamina ãchia mɨ ẽp'ẽ p'anɨpɨra, mãra sida ẽp'ẽnaipɨ. 21Mãra mɨ k'orea mãɨya oodaipɨ ãchia chi mɨ Peeda atua p'anɨ pẽra.

22»Mɨa ãchiá jarateade chedawẽpara ãchia nemietá oodada k'orea nepɨrade p'aneenaiwẽ pasima. Maamina naapae mɨ pedea ũrinana pẽra p'ue jaradaiwẽma ãchia nemietá oodada k'orea “mãɨ atua p'anasiade” adait'a. 23Abaɨpa mɨ unuemaa uru bɨpɨra, mɨ Ak'õre sida unuemaa uru bɨma. 24Mɨa ãchi k'ĩrari ẽpẽerãpa ne p'ue oodak'apɨ́ oodaépara, ãchia nemietá oodada k'orea nepɨrade p'aneenaiwẽ pasima. Maamina mɨa ooda ãchia unusidamina mɨ, mɨ Ak'õre sida unuemaa uru p'anɨma. 25Mãɨya p'anɨma ara ãchi Moisepa bɨdade jara bɨ jĩra. Nãɨya jara bɨma: “Mɨ nepɨra newẽa bɨt'a unuemaasidama”.#Salmo 35:19; 69:4.

26»Tachi Ak'õre Jaore, chi mãra K'aripaparí cheipɨ. Ichia piarã pedea jaraparima. Mɨa ichi mɨ Ak'õremãɨpa peerude ichia mɨ k'orea mãrá pedeaipɨ. 27Mãra pida mɨ k'orea pedeadaipɨ, mãra naenapema mɨ ome p'anɨ pẽra.

Currently Selected:

Juan 15: tdc

Highlight

Copy