Juan 11

Lázaro piuda

1-2Mãɨ ewaride ẽpẽra Lázaro apataɨ k'ɨdade basima. Mãɨ Lázaro Betania p'uurudepema pasima. Ara mãɨ p'uurude ichi ũpẽawẽrarã María mãɨnepa Marta sida p'anasidama. Mãɨ Mariapa Tachi Chipari jĩrune k'era weak'ari ichi pudapa p'oapi bada pasima.#Juan 12:3. 3Mãɨne Lázaro ũpẽawẽrarãpa Jesua jara peesidama:

—Tai Chipari, pɨchi ũpẽa jĩra k'ɨ̃ria baparit'a k'ɨdade bɨma.

4Mãɨ pedea ũriside Jesupa jarasima:

—Lázaro piuiwẽma, maamina mãɨ k'ɨdade bɨ, ẽpẽerãpa k'awadamẽrá Tachi Ak'õre mãɨnepa chi Warra ãchi chi chomarãpɨ.

5Jesupa Lázaro mãɨnepa chi ũpẽawẽrarã minachia k'ɨ̃ria basimina, 6Lázaro k'ɨdade bɨ k'awak'ari ewari k'ak'o ume beesima ichi badamá. 7Mãɨya nak'ari ichi ome p'ɨrrɨapataɨrã́ nãɨya jarasima:

—Wãtɨma mãicha Judeadea.

8Mãɨpuru ichi ome p'ɨrrɨapataɨrãpa jarasidama:

—Jarateaparí, tãaraawẽa bɨma Judeadepemarãpa pɨ mawarapa bat'a peada k'ɨ̃ria p'ananat'a. ¿Pɨ mãicha jãmá wãik'ãra?

9Jesupa jarasima:

—¿Ewaripa doce hora uru bɨwẽk'ãra? Chi ãst'á nit'a t'enabarik'ama, ichia chi ewari ɨnaa nãɨ ĩjũanepema uru bɨ pẽra. 10Maamina chi teamasi nit'a tenabariparima, ɨnaa bɨwẽ pẽra.

11Mãɨya jarak'ari Jesupa jarasima:

—Tachi k'õp'ãero Lázaro k'ãi bɨma maamina mɨa ichi ɨ̃ramapiipɨ.

12Mãɨne Jesú ome p'ɨrrɨapataɨrãpa ichiá jarasidama:

—Tai Chipari, ichi k'ãi bɨpɨra jɨpa beeipɨ.

13Jesupa mãɨya jaradadepa Lázaro piuda k'orea pedea basima, maamina ichi ome p'ɨrrɨapataɨrãpa k'ɨ̃risiasidama Lázaro k'ãi bɨ k'orea pedea bɨt'a. 14Maapae Jesupa jĩp'a jarasima:

—Lázaro k'ĩrawẽasima. 15Mãma badawẽ pẽra mɨ arapá bɨma mãɨ k'orea mãrapa mɨne pia ĩjãanai pẽra. Mãicha ichimá wãtɨma.

16Mãɨne Tomá, Mikisu apataɨ basima.#11:16 Mikisu. Griego t'ɨ̃ Dídimo jara bɨma «mikisu». Mãɨpa Jesú ome p'ɨrrɨapataɨrã waapẽarã́ jarasima:

—Judeadea wãtɨma tachi sida peadamẽrá.

Piudaadarã Jesupa chok'ae p'irabaripii k'orea

17Betania p'uurude cheside Jesupa k'awasima Lázaro t'ɨbaridada ewari k'ak'o k'ĩmari pa basit'a. 18Betania p'uuru Jerusalenepa t'ɨmɨawẽa basima.#11:18 T'ɨmɨawẽa basima. Griego pedeade nãɨya bɨ bɨma: quince estadia. Mãɨ kilómetro ũpea bɨma. 19Mãɨpuru chok'ará judiorã chesidama Marta, María ome sõchupuriadai k'orea ãchi ũpẽa piuda pẽra. 20Mãɨya p'anɨne Martapa k'awasima Jesú cherut'a. Ara mãɨne ichiá pia pedeade wãsima. Mãɨne María tiida beesima. 21Martapa Jesú unuside ichiá jarasima:

—Mɨ Chipari, pɨ nãma badapara mɨ ũpẽa piuiwẽ pasima. 22Maamina mɨa k'awa bɨma pɨa ãarea Tachi Ak'õrea idirut'a ichia mãɨ ooit'a.

23Jesupa ichiá jarasima:

—Pɨ ũpẽa chok'ae p'irabariipɨ.

24Mãɨne Martapa jarasima:

—Ãjã, mɨa k'awa bɨma nãɨ k'aadepema ewaride, chi piudaadarã chok'ae p'irabariutade, ichi sida chok'ae p'irabaripiipɨ.#Isaía 26:19; Daniel 12:1-3.

25Jesupa jarasima:

—Mɨa chi piudaadarã chok'ae p'irabaripiparima mãɨnepa chok'ae bapiparima. Parituapa mɨne ĩjãaipɨra, piurumina ewaricha Tachi Ak'õre ome chok'ae baipɨ. 26Chi mɨne ĩjãa bɨ, mɨnepa chok'ae bɨ pẽra mãɨ mi ãpia pida piuiwẽma. ¿Pɨa mãɨ ĩjãa bɨk'ãra?

27Mãɨne Martapa p'anoosima:

—Ãjã mɨ Chipari, mɨa ĩjãa bɨma pɨ Tachi Ak'õre Warra, Tachi Ak'õrepa Tachi K'aripaparí teai jarada, chi nãɨ ĩjũane chei bada padat'a.

Jesú Lázaro k'orea jẽana

28Mãɨya jarak'ari Marta wãsima ichi ũpẽawẽramá. Maapae k'ɨɨrɨk'á jarasima:

—Chi Jarateaparí nãma bɨma. Ichia pɨ t'ɨ̃ peesima.

29Mãɨ ũrik'ari María p'irabarik'ari Jesú bɨmá isapea wãsima. 30Jesú p'uurudea wãwẽa basima. Martapa ichi ununamá wapida basima. 31Judiorã María tiida p'anasidama ichi sõpiapidai k'orea. Mãɨne unusidama ichi isapea p'irabarik'ari tajatá wãrut'a. Chi t'ɨbaridaadamá jẽane wãsiade a k'ɨ̃risiadada pẽra, k'aade wãsidama.

32María Jesú bɨmá cheside ichi unuside, ichi jĩru k'ait'a bedabari k'obeesima. Nãɨya jarasima:

—Mɨ Chipari, pɨ nãma badapara, mɨ ũpẽa piuiwẽ pasima.

33Jesupa María jẽaru mãɨnepa judiorã ichi ome chedada sida jẽauta unuside ãchi k'orea minachia sõp'ua nɨbeek'ari k'ĩruu ɨ̃apaasima.#11:33 Ãchi k'orea. Waapẽarãmá Jesupa k'ɨ̃risiasima ãchia ĩjãanaé pasi pẽra ichia Lázaro chok'ae p'irabariit'a. Waapẽarãmá Jesú sõk'achia beesima nãɨ ĩjũane ẽpẽerã piupataɨ, k'ɨdade beapataɨ, mãɨnepa nemietá oopataɨ pẽra. 34Maapae idisima:

—Ichi ¿sãma t'ɨbarisidama?

Ãchia p'anoosidama:

—Tai Chipari, ak'ɨde chese.

35Jesú jẽasima. 36Mãɨya bɨde judiorã arí p'anɨpa jarasidama:

—¡Ak'ɨt'ɨ! Sãɨya Lázaro k'ɨ̃ria bapachit'a.

37Maamina chi eda ãchidepemarãpa jarasidama:

—Nãɨ tau p'ãrio bɨ jɨpa beepidapa ¿k'ãre k'orea p'ue k'aripaé pasima Lázaro piupiemaapa?

Jesupa Lázaro chok'ae p'irabaripida

38Jesú mãicha k'ĩruu ɨ̃apaaside Lázaro p'ẽya uriade t'ɨbaridaadamá chesima. Chi eda wãpataɨ mawarapa jɨ̃a basima. 39Mãɨne Jesupa jarasima:

—Jãɨ mawara ãyá bɨt'ɨ.

Marta, chi piuda ũpẽawẽrapa Jesua jarasima:

—Mɨ Chipari, ichi piuda ewari k'ak'o k'ĩmari pa bɨ pẽra mik'ia bɨma.

40Maamina Jesupa jarasima:

—¿Mɨa jarawẽa basik'ãra pɨa piarã ĩjãaipɨra, Tachi Ak'õre chi choma bɨ unuit'a?

41Mãɨya bɨde ẽpẽerãpa mawara ãyá bɨsidama. Maapae Jesupa ɨt'aa ak'ɨk'ari jarasima:

—Ak'õre, mɨa pɨá pia jaraipɨ mɨa idida ũrina pẽra. 42Mɨa k'awa bɨma pɨa mɨ pedea ũri baparit'a, maamina mɨa mãɨ jarasima nãɨrã ẽpẽerãpa k'awadamẽrá pɨa mɨ peesit'a.

43Mãɨya jarak'ari Jesupa jĩk'ua jarasima:

—¡Lázaro, tajatá chese!

44Ara mãɨne Lázaro piu bada tajatá chesima. Ichi jua mãɨnepa jĩru wapida p'arupa pɨra basima. Mãɨnepa ichi k'ĩra p'arupa pɨra basima. Mãɨne Jesupa jarasima:

—Ichi ẽranak'ari, itu peet'ɨ.

Jesú peadai k'orea pedea audada

Mateo 26:1-5; Marco 14:1-2; Luca 22:1-2

45Chok'ará judiorã María ak'ɨde wãnaanarãpa Jesupa ooda unusidama. Mãɨpuru ãchia ichide ĩjãasidama. 46Maamina chi eda waapẽarã p'ariseorãmá Jesupa ooda jarade wãsidama. 47Mãɨpuru p'ariseorã mãɨnepa p'aarerã chi chaarearãpa ara ãchi paara t'ɨ̃ peedak'ari, pedea ausidama.#11:47 Ara ãchi paara t'ɨ̃ peedak'ari, pedea ausidama. K'ãp'ũra pedeade bɨ bɨma: Concilio wa Consejo. Nãɨya jarasidama:

—Tachia ¿k'ãre oodaima? Mãɨ ẽpẽrapa ne p'ue oodak'apɨ́ minachia oo bɨma. 48Ichi itu bɨdaipɨra ãareaɨrãpa ichide ĩjãanaipɨ. Ichi k'aade wãnaipɨra Romanepemarã papaká berã chedak'ari ãchia Tachi Ak'õre te minachia bɨ ãrinaipɨ mãɨnepa tachi judiorã k'enanaipɨ.

49Mãma aba basima Caip'á apataɨt'a. Mãɨ ãyone ichi p'aare minachia k'awa bɨ pasima. Mãɨ Caip'apa jarasima:

—¡Mãra ãpia pida atuama! 50Romanepemarãpa ãarea tachi judiorã peadai k'aepẽra pia bɨma ẽpẽra aba judiorã ãareaɨrã k'orea piuit'a.

51Caip'apa ara ichi k'ɨ̃risiadepa mãɨya jaraé pasima. Mãɨpari ichi mãɨ ãyone chi p'aare minachia k'awa bɨ bada pẽra Tachi Ak'õrepuru ichiá jarapisima Jesú piui bɨt'a ãarea judiorã k'orea. 52Maamina abapuru judiorã k'orea piuiwẽ pasima, mãɨpari ãarea Tachi Ak'õre warrarã nãɨ ĩjũane awara awará be p'uuru aba bɨi k'orea.#Isaía 11:12; Jeremia 23:3; Mik'ea 2:12. 53Mãɨya mãɨ ewaridepa pedea ausidama Jesú peadai k'orea.

54Mãɨpuru Jesú judiorã t'ãena nipak'a pasima, mãɨpari Judeadepema ãyá wãsima. Ep'raín p'uurude ichi ome p'ɨrrɨapataɨrã ome bade wãsima. Mãɨ p'uuru ĩjũa pania newẽa bɨ k'ait'a bɨma.#11:54 Ep'raín p'uuru Jerusalenepa ewari aba basima.

55Judiorã Egitodepa wãnana k'ɨ̃risiapataɨ ewari k'ait'a basima. Mãɨ arapaapataɨ ewari pẽra p'uuruchadepemarã Jerusalenea wãsidama ãchia ne oopataɨ oo p'anɨnepa Tachi Ak'õre k'ĩrari pia p'ananai k'orea.#11:55 Arapaapataɨ ewari oodai naena judiorãpa ne oopachidama Tachi Ak'õre k'ĩrari pia p'ananai k'orea. Abaɨpa ẽpẽra piuda t'õmariipɨra, ewari siete Tachi Ak'õre k'ĩrari piawẽa beepachima. Mãɨ k'orea ne ooi basima. Mãɨya oowẽpɨra arapaapataɨ ewari ook'a pasima. Número 19:16-22; 2 Crónica 30:13-21. 56Mãɨ ewaride ẽpẽerãpa Jesú jɨrɨ nipasidama. Tachi Ak'õre te eda tausia p'anɨne idipachidama: «Mãramá ¿ichi nãɨ arapá oopataɨ ewaridea cheik'ãra?»

57Maamina p'aarerã chi mãɨrã chaarearãpa mãɨnepa p'ariseorãpa jarasidama parituapa Jesú unusira jarai bɨma ichi jitadamẽrá.

Currently Selected:

Juan 11: tdc

Highlight

Copy