Juan 10

Mɨ oveja ak'ɨparí chi pia bɨpɨ

1Mãɨ ewaride Jesupa jarasima:

«Mɨa piarã jararuma: chi abaɨ oveja k'ãipataɨ ɨari eda wãepɨra, mãɨpari awaraɨ ɨari eda wãsira, mãɨ ẽpẽra mẽapemarã jĩra bɨpɨ mãɨnepa nechɨaparipɨ. 2Maamina chi k'ãipataɨde eda wãpataɨmá eda wãparit'a chi oveja ak'ɨparipɨ. 3Mãɨ pae k'ãipataɨ ak'ɨparipa chi eda wãpataɨ ewaparima. Ovejapa ãchi ak'ɨparí pedea k'awa p'anɨma. Ãchicha t'ɨ̃k'oak'ari tajatá ateewãparima.#Ezequiel 34:11-31. 4Jõma tajatá ateewãk'ari ãchi naa wãparima. Oveja ichi k'aade wãpatama ichi pedea k'awa p'anɨ pẽra. 5Maamina ãchia chi ununak'at'a k'aade wãnak'ama, mãɨpari mĩrupatama mãɨ pedea atua p'anɨ pẽra».

6Jesú ne jara bɨdepa mãɨya pedeasima maamina judiorãpa k'awadaé pasima k'ãre jara bɨt'a. 7Mãɨpuru Jesupa nãɨya jarasima: «Mɨa piarã jararuma, chi oveja eda wãpataɨ mɨpɨ. 8Mɨ chei naena chok'ará nechɨapataɨrã jĩra mãɨnepa mẽapemarã jĩra chepachidama. Maamina chi ovejarãpa ãchi pedea ĩjãanaé pasima.

9»Mɨ chi eda wãpataɨpɨ. Chi mɨnepa eda wãru nemietaadepema k'aripaipɨ. Ne k'ɨ̃risiawẽa baipɨ, mãɨ ichia newẽa bɨ Tachi Ak'õrepa teai pẽra.#10:9 Griego pedeade nãɨya bɨ bɨma: Ichi eda wãipɨ, tajatá wãipɨ mãɨnepa p'ũajãra unuipɨ. 10Chi nechɨaparí cheparima oveja chɨai k'orea, peai k'orea mãɨnepa atuapii k'orea. Maamina mɨ chesima ẽpẽerãpa chok'ae bai ara minachia uru p'ananamẽrá.

11»Mɨ oveja ak'ɨparí chi pia bɨpɨ. Chi oveja ak'ɨparí pia ichi oveja k'orea piui bɨma. 12Maamina abaɨpa erreara k'orea oveja ak'ɨ baipɨra, usa k'achia cherude chi oveja ameek'oak'ari ãyá mĩruwãipɨ. Oveja ichidiwẽ pẽra pia ak'ɨk'ama. Mãɨne usa k'achiapa oveja aba jitade cherude waapẽarã jĩichoapatama. 13Mãɨ ẽpẽra mĩruwãparima abapuru erreara k'oreapuru oveja ak'ɨpari pẽra. Ichia k'ɨ̃risiak'ama oveja pia p'ananamẽrá.

14»Mɨ oveja ak'ɨpari chi pia bɨpɨ. Mɨchidirã k'awa bɨma chi oveja ak'ɨparipa ichi oveja k'awa bɨ jĩra. Mãɨnepa mɨchidirãpa mɨ k'awa p'anɨma. 15Ara mãɨ jĩra mɨ Ak'õrepa mɨ k'awa bɨma mãɨnepa mɨa mɨ Ak'õre k'awa bɨma. Mɨ mɨchi oveja k'orea piui bɨma. 16Mɨa uru bɨma waapẽarã oveja nãɨ k'ãipataɨde p'anɨwẽ.#10:16 Mɨa uru bɨma waapẽarã oveja nãɨ k'ãipataɨde p'anɨwẽ. Mãɨ pedeadepa Jesupa jara basima judiorãwẽ pida ichi ĩjãanai k'orea. Mãɨrã sida mɨa eda ateewãipɨ. Ãchia mɨ pedea ĩjãanaipɨ. Mãɨya ãareaɨrã ará p'ananaipɨ. Mãɨne ãchi ak'ɨparí aba bɨ baipɨ.

17»Mɨ Ak'õrepa mɨ k'ɨ̃ria bɨma, ara mɨ itu peapii bɨ pẽra. Maapae mɨ mãicha chok'ae beeipɨ. 18Mɨa mɨ itu itarpiepɨra mi ãpia pida mɨ p'ue peadaiwẽma, maamina mɨ piuipɨ ara mɨchia mãɨya k'ɨ̃ria bɨ pẽra. Mɨ piuk'ari ya mãicha chok'ae p'irabariipɨ. Mãɨ mɨ Ak'õrepa mɨá mãɨya oopisima».

19Mãɨ pedea ũriutade judiorã mãicha ara ãchi awara awará pedea para p'aneesidama. 20Chok'araɨrãpa jarasidama: «Jãɨ ẽpẽrapa jaore mietá uru bɨma. Ichi k'ĩra piawẽa bɨma. ¿K'ãre k'orea ichi pedea ũrinaima?»

21Maamina waapẽarãpa jarasidama: «¡Chi ẽpẽra jaore mietá uru bɨpa mãɨya pedeak'ama! ¿Jaore mietapa tau p'ãrio bea pia unupiparik'ãra?»

Judiorãpa Jesú itu bɨdada

22Mãɨ k'õresã́ ewari parude judiorãpa Jerusalene arapaapataɨ ewari oo p'anasidama. Mãɨya oopachidama Tachi Ak'õre Te ichi pae awara bɨdada k'ɨ̃risiadai k'orea.#10:22 Judiorãpa mãɨ ewari Januk'á apatama. Ãyocha diciembrede oopatama. K'ɨ̃risiapatama Juda Macabeo apataɨpa Tachi Ak'õre te minachia bɨ mãicha pia bɨdat'a. Mãɨyasima ãyo 164de Jesú t'õi naena. 23Tachi Ak'õre te ãpɨtea p'ɨrrɨapataɨde Jesú p'ɨrrɨa basima. Mãɨ p'ɨrrɨapataɨ Salomoneane apachidama. 24Mãɨya bɨde judiorãpa Jesú jũranak'ari idisidama:

—Waa ¿sãapae pɨa taiyá pɨ k'orea k'ɨ̃risia k'awapiwẽa uru baima? Pɨ Tachi Ak'õrepa Tachi K'aripaparí teai jaradapɨra, taiyá jĩp'a jarase.

25Jesupa p'anoosima:

—Mɨa mãrá jarasima maamina ĩjãanawẽa p'anɨma. Jõma chi mɨ Ak'õre t'ɨ̃ne oo bɨpa mɨ k'orea pia k'awapi bɨma. 26Maamina mãrapa ĩjãanak'ama, mɨ ovejarãwẽ pẽra. 27Mɨ ovejarãpa mɨ pedea k'awa p'anɨma. Mɨa ãchi k'awa bɨma. Mãɨpuru ãchi mɨ k'aade wãpatama. 28Mɨa ãchi Tachi Ak'õre ome ewaricha chok'ae bapiparima. Ãchi atuadaiwẽma mãɨnepa mi ãpia pida mɨ juadepema p'ue ẽemarinaiwẽma. 29Mɨ Ak'õrepa ãchi mɨá teasima. Ichi ãareaɨrã k'aepẽra chi choma bɨma.#10:29 Mãɨ griego pedeade pia tachia pia ũrinawẽma. Waapẽarãmá nãɨya jara bɨma: «Mɨ Ak'õrepa mɨá teada ne ãarea k'aepẽra chi choma bɨma». Abaɨ pida ãchi mɨ Ak'õre juadepema p'ue ẽemarinaiwẽma. 30Mɨ, mɨ Ak'õre ome aba p'anɨma.

31Mãɨpuru judiorãpa mãicha mawara jitasidama ichi bat'a peadai k'orea. 32Mãɨne Jesupa jarasima:

—Mɨ Ak'õrenepa minachia nepia mãrá unupisima. ¿Chi sãkɨɨ nepia ooda k'orea mɨ mawarapa bat'a peadaima?

33Judiorãpa p'anoosidama:

—Taipa pɨ mawarapa bat'adaiwẽma nepia oo bɨ k'orea, mãɨpari bat'adaipɨ pɨ ẽpẽrat'u bɨmina, mãɨ Tachi Ak'õreane a bɨ k'orea. Mãɨpa pɨa Tachi Ak'õrenepema k'achia pedea bɨma.#Levítico 24:14-16.

34Jesupa jarasima:

—Mãra Moisepa bɨdade nãɨya bɨ bɨma: “Mɨa jarasima mãra tachi ak'õrerãpɨ”.#Salmo 82:6. 35Tachia k'awa p'anɨma Tachi Ak'õre pedea ewaricha piarãt'a. Tachi Ak'õrepa mãɨ ẽpẽerã́ “Mãra tachi ak'õrerãane” asira, 36¿k'ãre k'orea jara p'anɨma mɨa ichidepema k'achia jarasiade a p'anɨma, mɨa abapuru ichi Warraade a bɨẽra? Tachi Ak'õrepa mɨ ara ichi pae bɨsima mãɨnepa nãɨ ĩjũanea peesima. 37Mɨ Ak'õrepa oo bɨt'a mɨa oowẽa bɨpɨra, mɨ pedea ĩjãarãt'ɨ. 38Maamina ichia oo bɨt'a mɨa oo bɨpɨra, mɨa jara bɨ k'orea mãrapa ĩjãanawẽa p'anɨmina mɨa oo bɨt'a k'orea ĩjãat'ɨ. Mãɨya mãrapa piarã k'awadaipɨ mɨ Ak'õre mɨ ome bɨ mãɨnepa chi mɨ Ak'õre mɨ ome bɨt'a.

39Mãɨne ãchia mãicha Jesú jita k'ɨ̃ria p'anasidama, maamina wãsima.

40Mãɨya nak'ari Jesú mãicha Jordán k'ĩrari wãsima Juan chi Porochoaparipa naa ẽpẽerã porochoa badamá.#Juan 1:28. Jesú mãma beesima. 41Mãɨya bɨde chok'ará ẽpẽerã ichimá wãpachidama. Ãchi tuaba nãɨya jarapachidama: «Juanpa ẽpẽerãpa ne p'ue oodak'apɨ́ ooé pasima maamina ãarea ichia nãɨ Jesú k'orea jarada piarãpɨ».

42Mãma chok'araɨrãpa Jesude ĩjãasidama.

Currently Selected:

Juan 10: tdc

Highlight

Copy