Juan 9

Jesupa ẽpẽra tau p'ãrio t'õna jɨpa beepida

1Wãrune Jesupa unusima ẽpẽra ichi t'õnaenapema tau p'ãrio bɨt'a. 2Mãɨne Jesú ome p'ɨrrɨapataɨrãpa idisidama:

—Jarateaparí, ¿k'aipa nemietá oodadepa nãɨ ẽpẽra jãɨya tau p'ãrio t'õsima? ¿Ichi ak'õre mãɨnepa chi naepa nemietá oodaadadepa, wa ichia nemietá oodadepa?

3Jesupa p'anoosima:

—Ichia nemietá oodadepa wa chi ak'õrerãpa nemietá oodaadadepa jãɨya t'õé pasima. Mãɨpari chi tau p'ãrio t'õsima ichidepa Tachi Ak'õrepa ne oorut'a ẽpẽerãpa ununamẽrá. 4Mãɨpuru ara ãst'á bɨeda, chi mɨ Peedapa oopi bɨt'a mɨa ãarea ooi bɨma. Mãɨ k'iuk'ari abaɨ pida p'ue mimiak'ama. 5Maamina nãɨ ĩjũane bɨde mɨ ẽpẽerã pae ɨnaa bɨ jĩra bɨma mɨ Ak'õre k'orea k'awadamẽrá.

6Mãɨya jarak'ari Jesupa ĩjũane iduk'ari yooro susua ook'ari, chi tau p'ãrio bɨ taude p'ɨrɨsima. 7Maapae Jesupa ichiá jarasima:

—K'uipataɨ Siloé apataɨmá sɨɨde wãse. (Mãɨ t'ɨ̃ jara bɨma “peeda”).#Génesi 49:10; Isaía 8:5-8.

Ara mãɨne chi tau p'ãrio bɨ wãk'ari ichi tau sɨɨk'ari unu beesima. Maapae ichi tiidá wãsima. 8Ichi te k'ait'a berãpa mãɨnepa chi ichia erreara idipachit'a unupachidaɨrãpa jarapachidama: «¿Nãɨ chi erreara idi suak'abari bapachiwẽk'ãra?»

9Chi eda waapẽarãpa ichiade apachidama. Waapẽarãpa ichi jĩra bɨmina ichiwẽane apachidama. Maamina chi tau p'ãrio badapa jarasima: «Piarã mɨpɨ».

10Mãɨne ichiá idisidama:

—¿Sãmaasã́ pɨa unu beesima?

11Ichia p'anoosima:

—Ẽpẽra Jesú apataɨpa yooro susua ook'ari mɨ taucha p'ɨrɨsima. Maapae ichia jarasima: “K'uipataɨ Siloé apataɨmá sɨɨde wãse”. Wãk'ari mɨ tau sɨɨside unu beesima.

12Mãɨne ãchia idisidama:

—Mãɨ ẽpẽra ¿sãma bɨma?

Ichia p'anoosima:

—Mɨa atuapɨ.

P'ariseorãpa tau p'ãrio badá minachia idi p'anana

13-14Jesupa yooro susua ook'ari tau p'ãrio bɨ jɨpa beepida ewari, mãɨ chi mimianak'apɨ́ ewari pasima. Mãɨpuru chi tau p'ãrio bada waapẽarãpa p'ariseorãmá ateewãsidama. 15Maapae p'ariseorã pida mãɨ ẽpẽrá idisidama sãmaasã́ pɨ tau pia beesit'a. Mãɨne ichia jarasima:

—Ichia yooro susua ook'ari mɨ taucha p'ɨrɨsima. Maapae mɨa paniapa sɨɨside unu beesima.

16Chi waapẽarã p'ariseorãpa jarasidama: «Mãɨ ẽpẽra Tachi Ak'õrenepa chewẽa bɨma, mimianak'apɨ́ ewaride chi tachia ne oodaiwẽa p'anɨne mãɨya ooda pẽra».

Maamina waapẽarãpa jarasidama: «¿Sãmaasã́ nemietá ooparí ẽpẽrapa mãɨ ẽpẽerãpa ne p'ue oodak'apɨ́ p'ue oosima?»

Mãɨya ara ãchi paara ne wawaria pedea p'aneesidama. 17Mãɨya p'anɨne mãicha chi tau p'ãrio badá idisidama:

—Mãɨ ẽpẽra, chi pɨ tau jɨpa beepida, pɨmá ¿k'ai mãɨya bɨma?

Chi tau p'ãrio badapa p'anoosima:

—Mɨmá ichi Tachi Ak'õre pari pedeaparipɨ.

18Maamina judiorã chi chaarearãpa ĩjãanak'a pasima mãɨ ẽpẽra naena tau p'ãrio basit'a. Mãɨpuru chi ak'õre chi nae ome t'ɨ̃ peesidama. 19Maapae ãchiá idisidama:

—¿Nãɨ mãra warra tau p'ãrio t'õna padat'a? ¿Sãmaasã́ idiapae ichia unu bɨma?

20Ãchia p'anoosidama:

—Taipa k'awa p'anɨma nãɨ tai warra tau p'ãrio t'õ badat'a. 21Maamina atua p'anɨma sãmaasã́ idiapae unu beesit'a, mãɨnepa atua p'anɨma k'aipa ichi jɨpa beepisit'a. Ichi chõa pẽra ichiá idit'ɨ. Ara ichi pari pedeaipɨ.

22Chi ak'õrepa mãɨnepa chi naepa mãɨya jarasidama judiorã chaarearã wap'ea p'anɨ pẽra. Piarã mãɨ judiorãpa jarasidama parituapa Jesú Tachi Ak'õrepa Tachi K'aripaparí teai jaradaade aipɨra, mãɨ chi judiorã ará pedeapataɨ tedepema ãyá jeret'aadayade asidama. 23Mãɨpuru ak'õrerãpa jarasidama: «Ichi chõa pẽra ichiá idit'ɨ».

24Mãɨpuru judiorã chi mãɨrã chaarearãpa chi tau p'ãrio badá mãicha t'ɨ̃nak'ari jarasidama:

—Tachi Ak'õre k'ĩrari taiyá jãɨ ẽpẽra k'orea piarã jarase.#9:24 Griego pedeade nãɨya bɨ bɨma: Tachi Ak'õrea pia pedease. Taipa k'awa p'anɨma ichi nemietá ooparipɨ.

25Tau p'ãrio badapa jarasima:

—Mɨa atua bɨma ichia nemietá ooparit'a wa ook'apɨ́. Abapuru k'awa bɨma mɨ tau p'ãrio basit'a maamina naapae unu bɨt'a.

26Mãɨne ãchia mãicha ichiá idisidama:

—Ichia ¿sãmaasã́ oosima? ¿K'ãre oosima pɨ tau jɨpa beepi k'orea?

27Ichia p'anoosima:

—Mɨa mãrá jarasima maamina ĩjãanaé pasima. Mãɨ ¿k'ãre k'orea mãicha ũri k'ɨ̃ria p'anɨma? ¿Mãra sida ichi ome p'ɨrrɨa k'ɨ̃ria p'anɨk'ãra?

28Mãɨpuru ãchia ichi nãɨya ɨtɨasidama:

—Pɨ jãɨ ẽpẽra ome p'ɨrrɨaparipɨ, maamina tai Moisepa bɨdadepa nipapatama. 29Taipa k'awa p'anɨma Tachi Ak'õrepa Moisea pedeasit'a,#Éxodo 33:11. maamina jãɨ ẽpẽra sãmapemat'a atua p'anɨma.

30Mãɨne tau p'ãrio badapa jarasima:

—¿K'ãre k'orea mãrapa ichi sãmapemat'a atua p'anɨane a p'anɨma? ¿Ichia mɨ tau jɨpa beepié pasik'ãra? 31Tachia k'awa p'anɨma nemietá oopataɨrãpa idiuta Tachi Ak'õrepa pia ũrik'at'a. Mãɨ awara k'awa p'anɨma parituapa Tachi Ak'õre wap'ea bɨpɨra mãɨnepa ichia k'ɨ̃ria bɨt'a oo bɨpɨra, chi mãɨpa idirut'a Tachi Ak'õrepa pia ũriparit'a.#Salmo 66:18; Proverbio 15:29. 32Ewariaba pida tachia tau p'ãrio t'õna jɨpa beepisit'a ũrinak'ama. 33Nãɨ ẽpẽra Tachi Ak'õrenepa chedawẽpara mi ãpia pida p'ue ne ooiwẽ pasima.

34Mãɨne judiorã chi chaarearãpa ichi ɨtɨasidama:

—Pɨ t'õnanepa nemietá ooparima. ¿Sãmaasã́ taiyá ne jarateaima?

Mãɨ k'orea ichi chi judiorã ará pedeapataɨ tedepema ãyá jeret'aasidama.

Chi piarã tau p'ãrio be

35Jesupa ũrisima tau p'ãrio bada ãyá jeret'aasidat'a. Mãɨ k'orea ichi jɨrɨde wãsima. Unuk'ari idisima:

—¿Pɨa chi Ẽpẽra Warrade piarã ĩjãa bɨk'ãra?#9:35 Ẽpẽra Warra. Griego pedeade chi eda waapẽarã k'art'ade bɨ bɨma: Tachi Ak'õre Warra.

36Ichia jarasima:

—¿Mãɨ k'aima? Mɨá jarase mɨa ichide piarã ĩjãai k'orea.

37Jesupa p'anoosima:

—Pɨa ichi unu bɨma. Mɨ, chi pɨ ome pedea bɨt'a mãɨpɨ.

38Ara mãɨne Jesú k'ĩrari sĩraporode k'obeek'ari jarasima:

—Mɨ Chipari, mɨa ĩjãa bɨma.

39Mãɨne Jesupa jarasima:

—Mɨ nãɨ ĩjũanea chesima ẽpẽerã nepɨra ak'ɨi k'orea. Mãɨya chi tau p'ãrio be jĩra bepa ununaipɨ mãɨnepa chi unu p'anɨane a p'anɨ tau p'ãrio be jĩra p'aneenaipɨ.

40Waapẽarã p'ariseorã Jesú k'ait'a p'anɨpa mãɨ pedea ũrisidaɨde idisidama:

—Pɨa ¿k'ãre k'orea mãɨya jara bɨma? ¿Tai tau p'ãrio p'anɨk'ãra?

41Jesupa p'anoosima:

—Mãra piarã tau p'ãrio p'ananapara, nemietá oopataɨ k'orea nepɨra pará p'anɨane adaiwẽ pasima. Maamina mãrapa unu p'anɨane a p'anɨ pẽra nemietaade p'anɨma.

Currently Selected:

Juan 9: tdc

Highlight

Copy