Hecho 7
7
Estebanpa pedeada
1Mãɨne chi p'aare minachia k'awa bɨpa Estebaná idisima:
—¿Ãchia jara p'anɨt'a piarãk'ãra?
2Estebanpa nãɨya p'anoosima:
—Mɨ ũpẽarã judiorã mãɨnepa ak'õrerã, mɨ chichupuria mɨ pedea ũrit'ɨ. Tachi chõarãenapema Abrahán mãɨ wapida Mesopotamia tuade baside Harán p'uurude bade wãi naena Tachi Ak'õre chi Pia bɨ ichimá unupisima. 3Tachi Ak'õrepa ichiá jarasima: “Pɨ tua mãɨnepa pɨ ẽpẽerã ameek'ari ãyá wãse. Mɨa pɨá tua unupiipɨ mãmá wãmẽrá”.#Génesi 12:1. 4Mãɨne Abrahán caldeorã tuadepema wãk'ari Harane bade wãsima. Abrahán ak'õre k'ĩrawẽak'ari Tachi Ak'õrepa Abrahán nãɨ tuadea enemeesima, chi mãra idiapae p'anɨmá.#Génesi 11:31—12:9. 5Maamina Tachi Ak'õrepa Abrahaná nãɨ tuade ĩjũa mi ãpia pida teaé pasima. Mãɨpari piarãnepa jarasima ichiá mãɨnepa chi ichidepa cheutarã́ nãɨ tua teait'a.#Génesi 12:7; 13:15; 15:17-18; 17:8. Tachi Ak'õrepa mãɨya jarasima Abrahanpa waidi warra unuwẽa baside. 6Mãɨnepa Tachi Ak'õrepa Abrahaná jarasima chi ichidepa cheutarã chĩara tuade p'ananait'a, mãma chĩara pae pari mimiapataɨrã p'aneenait'a mãɨnepa mãɨ ẽpẽerãpa ãchi ãyo k'ak'o cuatrociento mĩa uru p'ananait'a. 7Maamina Tachi Ak'õrepa Abrahaná nãɨya jarasima: “Mɨa chi ãchi mĩapi uru p'anɨ p'uuru ɨtɨaipɨ. Mãɨya nak'ari chi pɨdepa cheutarã jãɨ tuadepema ãyá wãnak'ari nãɨ tuade mɨá pia pedeadaipɨ”.#Génesi 15:13-16.
8»Maapae Tachi Ak'õrepa Abrahán ome pedea ausidama, chi ichidepa cheutarã k'ak'ua tauchaadamẽrá, Tachi Ak'õrené k'awapidai k'orea. Mãɨpuru ichi warra Isá t'õk'ari ewari k'ak'o ocho pa bɨde chi warra k'ak'ua tauchaasima.#Génesi 21:3-4. Mãɨya bak'ari, Isapa ichi warra Jacobo ara mãɨya abarik'a oosima. Mãɨya bak'ari Jacopa chi warrarã doce p'anɨrã sida ara mãɨya abarik'a oosima.
9»Mãɨya nak'ari Jacobo warrarãpa ãchi ũpẽa José sõk'achia p'anɨnepa ichi netosidama Egito tuade chi chipari pae pari mimiaparí bamẽrá.#7:9 Tachi Ak'õrepa José israel ĩjũanepemarã k'aripai k'orea jɨrɨ atasimina ãchia ichi itu bɨsidama. Ara mãɨ jĩra Jesú mãɨnepa Tachi Ak'õre pari pedeapataɨrã itu bɨsidama. Génesi 37:26-28. Maamina mãma Tachi Ak'õre ichi ome basima. 10Mãɨpuru ãarea chi ichi nepɨrade bɨdepema Tachi Ak'õrepa k'aripasima. Ichiá k'ɨ̃risia teasima, p'araón chi Egitodepema poro jũra jɨ̃parí jɨ̃ bɨpa mãɨ pia unumẽrá. Mãɨpuru chi mãɨ tuadepema poro chaarea bɨ bɨsima, mãɨnepa chi poro jũra jɨ̃parí jɨ̃ bɨ mãɨ tedepema chi poro chaarea bɨ bɨsima.#Génesi 41:37-46.
11»Mãɨ ewaride Egito tuade mãɨnepa Canaán tuade jarra minachia baesima. Mãɨpa ãareaɨrã mĩapisima. Mãɨpuru Jacobo warrarãpa trigo atadayá oo p'anasidamina ununaé pasima. 12Jacopa Egito tuade trigo bɨade asidaɨ ũriside, ichi warrarã mãmá trigo atade peesima.#Génesi 42:1-3. Mãɨ chi ãchit'u naa barimama wãnana pasima. 13Mãicha wãsidaɨde Josepa ãchiá k'awapisima ichi chi ũpẽat'a.#Génesi 45:1-16. Mãɨya p'araonpa José ẽpẽerã k'awasima. 14Maapae Josepa ichi ak'õre Jacobo mãɨnepa ãarea ichi ẽpẽerã ichi bɨmá ateewãpisima. Ãchi 75 p'anasidama.#Génesi 45:9—47:12. 15Mãɨya Jacobo Egito tuade chesima. Mãma tãaraa bak'ari k'ĩrawẽasima.#Génesi 49:33. Ichi warrarã sida mãma k'ĩrawẽasidama. 16Maapae ãchi bɨɨrɨ Sik'én p'uurudea ateewãsidama. Mãma jãɨrã te uriade t'ɨbarisidama. Mãɨ uria Abrahanpa Jamor warrarã́ atada pasima.#7:16 Mãɨ ĩjũa Sik'én p'uurude basima. Génesi 33:19. Abrahanpa piuda t'ɨbaripataɨ uria Hebrón k'ait'a bɨt'a atasima. Génesi 23:15-18. Jacobo mãɨ uriade t'ɨbarisidama. Génesi 50:13.
Estebanpa Moisé k'orea pia jarada
17»Tachi Ak'õrepa Abrahán ome pedea bɨda tãaraawẽane ooi basima. Mãɨ ewaride israel ĩjũanepemarã Egito tuade minachia ĩo p'anasidama. 18Maamina poro jũra jɨ̃parí jɨ̃ bɨ awaraɨ beesima. Mãɨpa José k'orea ãpia pida atua basima. 19Mãɨpuru tachi p'uuru k'ũraak'ari minachia nemietá oosima. Ãchi warrarã chiwidi t'õna ameepik'oasima mãɨ piudamẽrá.#Éxodo 1:8-22.
20»Mãɨ ewaride Moisé t'õsima. Ichi minachia auk'ará basima.#7:20 Minachia auk'ará basima. Mãɨpa ichiaba jara bɨma «Tachi Ak'õrepa ichi minachia pia unusima». Chi ak'õrerãpa jedek'o k'ak'o ũpea ãarea ak'ɨ p'anasima. 21Maamina chi warra chak'e ichi tuaba bɨsidaɨde p'araón k'aupa unuk'ari ichi warra ara ichidí jĩra taup'ãesima.#Éxodo 2:1-9. 22Egitodepema ne k'awa berãpa Moisea ãchi k'ɨ̃risia k'awa bet'a ãarea jarateasidama. Mãɨya ichi k'ɨ̃risia k'awa bɨdepa pedeapachima mãɨnepa ne waibɨa oopachima.
23»Moisé cuarenta ãyo baside ichi ẽpẽerã israel ĩjũanepemarã ak'ɨde wãi k'ɨ̃risiasima. 24Wãrune unusima Egitodepemapa Israeldepema aba piawẽa oo bɨt'a. Mãɨpuru Moisepa Israeldepema k'aripade wãk'ari, Egitodepema peasima, chi Israeldepema piawẽa oo bada k'orea. 25Moisepa k'ɨ̃risiasima israel ĩjũanepemarãpa k'awadait'a ichidepa Tachi Ak'õrepa ãchi k'aripa bait'a. Maamina mãɨ k'awadaé pasima. 26Norema Moisepa unusima israel ĩjũanepemarã ume k'ĩruu p'anɨt'a. Ãchi nepɨra newẽa pia p'ananamẽrá nãɨya jarasima: “¡Mãra abarik'a tachi p'uurudepemarãpɨ! ¿K'ãre k'orea jãɨya k'ĩruu p'anɨma?” 27Maamina chi naa sĩ badapa Moisé sĩat'aak'ari jarasima: “¿K'aipa pɨ tai chipari bɨsima? ¿K'aipa pɨ tai nepɨra ak'ɨparí bɨsima? 28¿Mɨ sida pea k'ɨ̃ria bɨk'ãra Egitodepema noena peada jĩra?” 29Mãɨ ũriside Moisé mĩruwãsima.#Éxodo 2:11-21. Maapae Madián tuade ichi tua awaraɨdepema jĩra bapachima. Madiane bɨde warra ume unusima.
30»Cuarenta ãyo padak'ari ewariaba Moisé ĩjũa pania newẽa bɨde, Sinaí eya k'ait'a basima. Mãɨne Tachi Ak'õrepa ɨt'aripa peeda pak'uru jeeda bɨde ichimá unupisima.#7:30 Tachi Ak'õrepa ɨt'aripa peeda. Chi Napema K'art'a bɨdaadade Tachi Ak'õre parude edaɨde bɨ bɨma nãɨya bɨ bɨma: Tachi Ak'õrepa ɨt'aripa peeda. 31Moisepa mãɨ unuside k'awa k'ɨ̃risiaé pasima. Mãɨpuru ará orrobarisima pia ak'ɨi k'orea. Mãɨne Tachi Chipari pedea ũrisima. 32Tachi Ak'õrepa ichiá nãɨya jarasima: “Mɨ chi pɨ chõarãenapemarã Ak'õrepɨ, Abrahán Pajãnepema Ak'õrepɨ, Isá Pajãnepema Ak'õrepɨ mãɨnepa Jacobo Pajãnepema Ak'õrepɨ”.#7:32 Sinaí eya ichiaba Horeb apatama. Éxodo 3:1-6. Mãɨ ũriside Moisé ne wap'eapa ore nɨbeesima. Mãɨpuru ará ak'ɨi wap'ea basima. 33Mãɨne Tachi Chiparipa Moisea jarasima: “Nãɨ eyade pɨ mɨ k'ĩrari bɨ pẽra pɨ jĩrune jɨ̃ bɨ ẽrase. 34Mɨa unu bɨma mɨ ẽpẽerã Egito tuade minachia mĩa p'anɨt'a. Mãɨnepa mɨa ãchi sõp'ua pedea p'anɨt'a ũri bɨma. Mãɨpuru mɨ che bɨma ãchi k'aripai k'orea. Mɨa pɨ Egitodea peeipɨ”.#Éxodo 3:7-10.
Judiorãpa Moisé itu bɨdada
35»Israel ĩjũanepemarãpa Moisé itu bɨsidama. Ichiá nãɨya jarasidama: “¿K'aipa pɨ tai chipari bɨsima? ¿K'aipa pɨ tai nepɨra ak'ɨparí bɨsima?”#7:35 Mãɨya jararude Estebanpa jara basima israel ĩjũanepemarãpa Moisé itu bɨdada jĩra Jesú mãɨnepa Tachi Ak'õre pari pedeapataɨrã itu bɨsidat'a. Maamina ara mãɨ Moisé Tachi Ak'õrepa Egitodea peesima israel ĩjũanepemarã chi minachia k'awa bɨ bamẽrá mãɨnepa ãchi mãmãɨpa ateewãmẽrá. Moisepa Tachi Ak'õrepa ɨt'aripa peeda chi mãɨ pak'uru jeeda bɨde bada jua chaareadepa mãɨya oosima. 36Moisepa minachia ẽpẽerãpa ne p'ue oodak'apɨ́ oo bɨdepa tachi chõarãenapemarã Egitodepa ateewãsima. P'usa P'urea bɨde ẽpẽerãpa ne p'ue oodak'apɨ́ oosima. Ichiaba cuarenta ãyo ĩjũa pania newẽa bɨde ẽpẽerãpa ne p'ue oodak'apɨ́ oopachima.#Éxodo 7:3; 14:21-22; Número 14:32-33. 37Ara mãɨ Moisepa israel ĩjũanepemarã́ jarasima: “Tachi Ak'õrepa mɨ peeda jĩra chi ichi pari pedeaparí aba mãramá peeipɨ. Mãɨ ẽpẽra ara mãra p'uurudepema paipɨ. Ichia jararut'a ãarea ĩjãat'ɨ”.#7:37 Ichia jararut'a ãarea ĩjãat'ɨ. Mãɨ griego pedeade chi eda waapẽarã k'art'ade newẽma. Deuteronomio 18:15,18. 38Mãɨnepa Moisé ĩjũa pania newẽa bɨde ãarea israel ĩjũanepemarã ome basima. Mãma Sinaí eyade Tachi Ak'õrepa ɨt'aripa peeda ome pedeasima. Mãɨ tachi sãmaasã́ pia p'ananai pedea ũrik'ari, tachi chõarãenapemarã́ mãɨ jarasima.
39»Maamina Moisepa jarada tachi chõarãenapemarãpa ĩjãanai k'ɨ̃rianaé pasima, mãɨpari ichi itu bɨsidama. Egito tuadea jĩitea wã k'ɨ̃ria p'anasidama. 40Moisé eyade baside ãchia Aaroná jarasidama: “Jãɨ Moisepa tai Egitodepa ateewãsima. Maamina ichi k'ãasãasit'a k'awadawẽma. Mãɨpuru sãdo taiyá tease, mãɨ taipa ateewãnai k'orea”.#Éxodo 32:1. 41Ara mãɨne ãchia sãdo p'ak'a chak'e jĩra oosidama. Mãɨa ãnimara paateasidama. Mãɨne ãchi juapa oodada k'orea arapaapataɨ ewari oosidama.#Éxodo 32:2-6. 42Mãɨpuru Tachi Ak'õrepa ãchi itu bɨk'ari chi pajãnepema sãdo minachia p'anɨne itu ĩjãapisima. Mãɨne ãchia mãɨrã́ pia pedea p'aneesidama. Mãɨ k'orea chi Tachi Ak'õre pari pedeapataɨrã k'art'ade nãɨya bɨ bɨma:
“Israel ĩjũanepemarã, mãra cuarenta ãyo ĩjũa pania newẽa bɨde tuanasidaɨde ¿ãnimara mɨá paateapachidak'ãra?
43¡Mãɨyawẽma! Mãɨpari sãdo Moloc apataɨ p'aru te jira ateewãpachidama mãɨnepa mãra nee oodada sãdo Rep'án apataɨ k'ãk'ãi ooda ateewãpachidama.
Mãɨ ara machi juapa oosidama, jãɨrã́ pia pedeadai k'orea. Mãɨpuru mɨa mãra Babilonia tuadea jeret'aipɨ”.#Amó 5:25-27.
Tachi Ak'õre ẽpẽrapa te oodade bak'a k'orea jarada
44»Ĩjũa pania newẽa bɨde tachi chõarãenapemarãpa Tachi Ak'õre te ãnimara e oodada ãchi ome uru p'anapachima. Mãɨpa k'awapisima Tachi Ak'õre ãchi ome bɨt'a. Tachi Ak'õrepa Moisea mãɨ te oopisima ichiá unupida jĩra. 45Mãɨya nak'ari chi ãchidepa ununaanarãpa chi Tachi Ak'õre te ãnimara e oo uru p'anasidama. Josué ãchi minachia k'awa bɨ paside mãɨ te ãnimara e oodada nãɨ tuadea enemeesidama. Mãɨ ewaride Tachi Ak'õrepa waapẽarã p'uuru nãɨ tuade berã tachi chõarãenapemarã k'ĩrari ãyá jerek'oasima. Mãɨya nãɨ tua ãarea ẽemarisidama.#Josué 21:43-45. Daví ewaride Tachi Ak'õre te ãnimara e oodada wapida nãɨ tuade basima. 46Mãɨ Daví Tachi Ak'õrepa pia unusima. Mãɨpuru ichia Tachi Ak'õrea idisima te aba pia oopimẽrá, chi Jacopa chi k'ɨ̃ria bɨ Pajãnepema Ak'õre pae.#2 Samuel 7:1-16. 47Mãɨ te ichi warra Salomonpa oosima.#2 Crónica 3:1-2. 48Maamina Tachi Ak'õre chi Atepe Bɨ ẽpẽra juapa ooda tede bak'ama. Tachi Ak'õre pari pedeaparipa k'art'ade nãɨya bɨsima:
49“Tachi Chiparipa nãɨya jarasima: Mɨ suak'a beeparí auk'ará bɨ pajãpɨ. Nãɨ ĩjũa mɨ jĩru bɨparipɨ.
Mãrapa ¿k'ãre te mɨ pae oodaima? ¿Sãma mɨ ɨ̃apaapidaima?
50¿Mɨa ara mɨ juapa ne ãarea oosiwẽk'ãra?”
Judiorãpa Estebanpa pedeada ũrinaé pada
51»¡Mãra k'ɨɨrɨwẽa p'anɨma! ¡Sõnepa ĩjãanak'ama!#7:51 Sõnepa ĩjãanak'ama. Griego pedeade nãɨya bɨ bɨma: sõ tauchaawẽa be. Tachi Ak'õre pedea ũrii k'ɨ̃rianak'ama. Tachi Ak'õre Jaorepa jara bɨt'a mãrapa ewaricha itu bɨpatama. Ara machi chõarãenapemarã jĩra p'anɨma. 52Ãchia Tachi Ak'õre pari pedeapataɨrã ãarea mĩapisidama. Chi Ẽpẽra Jĩp'a Bɨ chei k'orea jaradada sida peapachidama.#Isaía 53:11; Jeremia 23:5; 33:15. Ara mãɨ jĩra mãrapa mãɨ Ẽpẽra Jĩp'a Bɨ jitadak'ari peasidama. 53Tachi Ak'õrepa ɨt'aripa peedaɨrãnepa mãrá Moisepa bɨda teadamina ¡mãrapa ĩjãanak'ama!
54»Mãɨ pedea ũrisidaɨde chi judiorã minachia k'awa p'anɨrã Esteban ome minachia k'ĩruutapa ãchi k'ida k'osterrea p'aneesidama. 55Mãɨya p'anɨne Estebanpa Tachi Ak'õre Jaore ichide uru basima. Pajãnea ak'ɨrude Tachi Ak'õre k'ĩrawãrea achiterrea bɨt'a mãɨnepa Jesú Tachi Ak'õre juaraari bai nɨbɨt'a unusima. 56Nãɨya jarasima:
—¡Ak'ɨt'ɨ! ¡Mɨa pajã ewa nɨbɨt'a unu bɨma! ¡Chi Ẽpẽra Warra Tachi Ak'õre juaraari bɨt'a unu bɨma!#7:56 Estebanpa mãɨ pedeadepa jarasima Jesú ara Tachi Ak'õrepɨ. Marco 14:62.
57Mãɨ ũrisidaɨde ãchi minachia bia tuaneenak'ari ãchi k'ɨɨrɨ juapa jɨ̃anak'ari mãɨne ãarea ichi ɨ̃rɨ cheepɨrɨsidama. 58P'uuru ãyá ateewãnak'ari mawarapa bat'a p'aneesidama. Chi ichi k'achia oodayade adaadarãpa ãchia neet'á ɨ̃rɨ jɨ̃pataɨ ẽranak'ari k'ũtã́ k'ait'a bɨa teasidama mãɨ ak'ɨmẽrá. Mãɨ Saulo apachidama.
59Mawarapa bat'a p'anɨne Estebanpa Tachi Ak'õrea nãɨya ɨt'aa chiidisima: «Mɨ Chipari Jesú, mɨ jaore ateewãse».
60Maapae sĩraporode k'obeek'ari jĩk'ua jarasima: «Mɨ Chipari, nãɨ ẽpẽerã nepɨra ak'ɨrãse».
Mãɨya pedeak'ari k'ĩrawẽasima.
Currently Selected:
Hecho 7: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
