Hecho 8

Jesude ĩjãapataɨrã mĩruwãnana

1-2Saulopa chi Esteban peadada k'orea pia unusima. Mãɨne waapẽarã Tachi Ak'õre wap'ea berãpa Esteban t'ɨbaridak'ari, ichi k'orea minachia jẽa p'aneesidama.

Mãɨ ewaride ẽpẽerãpa Jerusalene Jesude ĩjãapataɨrã minachia mĩapi p'aneesidama. Mãɨpuru chi Jesude ĩjãapataɨrã ãarea Judea tuadea mãɨnepa Samaria tuadea mĩruwãsidama. Chi Jesupa peedaɨrã Jerusalene p'aneesidama. 3Mãɨne Saulopa Jesude ĩjãapataɨrã piawẽa oopachima waa ĩjãapidaemaapa. Techa wãk'ari ɨmɨk'ĩrarã mãɨnepa wẽrarã sida jitak'oak'ari chi jɨ̃a nɨbɨpataɨ temá jidibari ateewãpachima.

P'elipe Samaria tuadea wãna

4Maamina Jerusalenepa mĩruwãnaanapa ãchi wãutacha chi Jesú k'orea pedea pia jarapachidama. 5P'elipe Samaria tuade p'uuru aba bɨdea wãsima.#8:5 Nãɨ P'elipe t'ɨ̃ jarapachidama «Griegodepema P'elipe» wa «P'elipe, chi pedea pia jaraparí». Jesupa jɨrɨ atadawẽ pasima. Hecho 6:5; 8:4-13; 8:26-40; 21:8-9. Mãma jarateapachima Jesú Tachi Ak'õrepa Tachi K'aripaparí teai jaradat'a. 6P'elipepa jara bɨt'a ũrisidaɨde mãɨnepa ẽpẽerãpa ne p'ue oodak'apɨ́ oo bɨt'a unusidaɨde ãareaɨrãpa pia ũri tuanapachidama. 7Minachia ẽpẽerã jaore mietá pará be jɨpa beepik'oasidama. Mãɨ jaore mietaarã biadak'ari ãchi k'ak'uadepema ãyá wãk'oapachidama. Ichiaba minachia sorek'ea be mãɨnepa jĩru piawẽa be jɨpa beepik'oapachidama. 8Chi ẽpẽerã mãɨ p'uurudepemarã minachia arapá tuanasidama.

9Jaipana Simón apataɨ mãma basima. Ichia chok'aek'oapachima mãɨnepa chi Samariadepemarã́ ichi k'orea ak'ɨɨtuapipachima. Mãɨpuru ara ichi chi waapẽarã k'aepẽra chi atepe bɨ jĩra k'ɨ̃risiapachima. 10Chi ichia jararut'a ẽpẽerã chi ɨbɨa berãpa mãɨnepa chi ɨbɨwẽa berã pida minachia ũripachidama. Ãareaɨrãpa ichi «Tachi Ak'õre Jua Chaarea Bɨade» apachidama. 11Ẽpẽerãpa mãɨ jaipana minachia ĩjãa p'anasidama ichia oo bɨdepa tãaraa sea uru bada pẽra.

12Maamina P'elipepa Jesucristodepa Tachi Ak'õrepa ichidirã ichi juade ua bɨ k'orea ãchiá jaratea bapachima. Mãɨne minachia ɨmɨk'ĩrarãpa mãɨnepa wẽrarãpa chi pedea pia ĩjãanak'ari porochoasidama. 13Simón pida ĩjãasima. Maapae porochoak'ari P'elipe ome p'ɨrrɨade wãsima. P'elipepa ẽpẽerãpa ne p'ue oodak'apɨ́ waibɨa oo bɨt'a Simonpa unurune, k'awa k'ɨ̃risiawẽa beesima.

14Mãɨne chi Jesupa peedaɨrã Jerusalene bepa ũrisidama Samariadepemarãpa Tachi Ak'õre pedea ĩjãasidat'a. Mãɨ k'orea Pedro mãɨnepa Juan ãchimá peesidama. 15Chedak'ari Tachi Ak'õrea ɨt'aa chiidisidama ãchia ichi Jaore jitadamẽrá. 16Mãɨya oosidama Tachi Ak'õre Jaore waidi mãɨ ũpẽarãmá chewẽa bada pẽra. Aba Tachi Chipari Jesú t'ɨ̃neepuru porochoasidama. 17Pedropa Juan pida Tachi Ak'õrea ɨt'aa chiidiutade ãchi jua ũpẽarã ɨ̃rɨ bɨsidama. Ara mãɨne Tachi Ak'õre Jaore jitasidama.

18Mãɨne Simonpa unusima Jesupa peedaɨrãpa ãchi jua ũpẽarã ɨ̃rɨ bɨutade ũpẽarãpa Tachi Ak'õre Jaore jitasidat'a. Mãɨ unuside ãchiá erreara teayade asima. 19Nãɨya jarasima:

—Jãɨ jua chaarea bɨt'a mɨá teat'ɨ, mɨa pida mɨ jua paritua ɨ̃rɨ bɨrude Tachi Ak'õre Jaore jitamẽrá.

20Maamina Pedropa jarasima:

—¿Mãɨyara pɨa k'ɨ̃risia bɨk'ãra Tachi Ak'õrepa pari tea bɨt'a mãɨ netopatat'a? ¡Pɨchi erreara ome t'ɨpɨ urua nɨbɨdea wãse! 21Pɨ sõ Tachi Ak'õre k'ĩrari jĩp'a bɨwẽ pẽra, pɨ tai ome ne ãpia pida ooiwẽma. 22Mãɨ nemietá itu bɨse. Tachi Chiparia k'ĩra chupuria idise. Mãɨ nemietá pɨ sõne bɨt'a ichia k'ɨ̃risia atuai bɨejã. 23Mɨa unu bɨma pɨ taipa oo p'anɨ k'orea minachia sõk'achia bɨt'a. Mãɨ nemietaapa pɨ jɨ̃a uru bɨma.

24Mãɨne Simonpa jarasima:

—Mɨ k'orea Tachi Chiparia ɨt'aa chiidit'ɨ mãrapa jaradada mãɨyapiemaapa.

25Pedropa mãɨnepa Juanpa chi pedea Tachi Chipari Jesú k'orea jaradak'ari Jerusalenea jĩitea wãsidama. Wãutade Samaria tuade minachia p'uuru bede mãɨ pedea jarade wãsidama.

P'elipe Etiopiadepema ome pedeada

26Mãɨya nak'ari Tachi Chipari ɨt'aripa peeda aba P'elipemá chek'ari nãɨya jarasima: «¡P'irabarise! Jerusalenepa Gaza p'uurudea wãpataɨ ode wãse». (Mãɨ o ĩjũa pania newẽa bɨde wã bɨma).#8:26 Mãɨ o ĩjũa pania newẽa bɨde wã bɨma. Griego pedeade mãɨ pia ũrinawẽma. Ichiaba jara bɨma: «Idiapae mãɨ ode ẽpẽerã wãnak'ama».

27Ara mãɨne P'elipe wãsima. Ode wãrune ẽpẽra Etiopía tuadepema unusima. Mãɨ ẽpẽra chi Etiopiadepema poro jũra jɨ̃parí jɨ̃ bɨ wẽra pae mimiaparí pasima.#8:27 Chi Etiopiadepema poro jũra jɨ̃parí jɨ̃ bɨ wẽra. Griego pedeade ichiaba nãɨya bɨ bɨma: chi Candace. Mãɨpa chi wẽra erreara ãarea ak'ɨpachima. Ichi Jerusalenea wã basima Tachi Ak'õrea pia pedeai k'orea. 28Ichi tuadea jĩitea wãrune ichi chi mũrapa pɨrabari ateewãparide Tachi Ak'õre pari pedeaparí Isaía k'art'a ak'ɨmaa bɨt'a suak'abari basima.

29Mãɨya bɨde Tachi Ak'õre Jaorepa P'elipea jarasima: «Ará orrobarise jãɨ mũrapa pɨrabari ateewãparimá». 30Ara mãɨne ará p'ira wãk'ari ũrisima mãɨ Etiopiadepema ẽpẽrapa chi Tachi Ak'õre pari pedeaparí Isaía k'art'a eda jara bɨt'a. Mãɨne P'elipepa idisima:

—¿Pɨa eda jara bɨt'a ũri bɨk'ãra?

31Ichia p'anoosima:

—Abaɨpa mɨá jarateawẽpɨra mɨa ¿sãmaasã́ k'awaima?

Mãɨne ichia P'elipea jarasima batook'ari ichi k'ait'a suak'a beemẽrá. 32Ichia Tachi Ak'õre pedeade eda jara bada nãɨ pasima:

«Oveja peapataɨmá ateewãpata jĩra ara mãɨya ichi peade ateewãsidama.

Chi k'ara t'ɨɨrude oveja k'ĩup'ea bapari jĩra, ara mãɨya ichi k'ĩup'ea beesima.

33Ichi piawẽa oo uru p'ananak'ari, ichi nepɨra ak'ɨdaé pasima. Ichi nãɨ ĩjũane peadada pẽra ¿k'aipa ichi warrarã k'orea p'ue nepɨrɨima?»#Isaía 53:7-8.

34Maapae chi Etiopiadepema mimiaparí minachia k'awa bɨpa P'elipea idisima:

—Tachi Ak'õre pari pedeaparipa nãma ¿k'ai k'orea bɨsima? ¿Ara ichi k'orea bɨsima wa abaɨ k'orea bɨsima? Mɨ chichupuria jarase.

35Ara mãɨne P'elipepa mãɨ pedeadepa chi pedea pia Jesú k'orea jaratea beesima. 36Mãɨya wãutade pania bɨmá pasidama. Mãɨne chi Etiopiadepema mimiaparí minachia k'awa bɨpa jarasima:

—Ak'ɨse. Nãma pania bɨma. ¿K'ãarepa mɨ p'ue porochoaiwẽa bɨma?

37P'elipepa jarasima:

—Pɨa Jesú Tachi Ak'õre Warra piarã sõnepa ĩjãa bɨpɨra, porochoai bɨma.

Mãɨne chi Etiopiadepema mimiaparí minachia k'awa bɨpa p'anoosima:

—Mɨa piarã ĩjãa bɨma Jesucristo Tachi Ak'õre Warrapɨ.#8:37 Griego pedeade minachia k'art'ade mãɨ versículo newẽma.

38Ara mãɨne chi mũrapa pɨrabari ateewãparí bari k'obeepisima. Ãchi umea toedá wãnak'ari P'elipepa ichi porochoasima. 39Toedaɨpa ochia cheside Tachi Chipari Jaorepa P'elipe ãyá ateewãsima. Chi Etiopiadepema mimiaparí minachia k'awa bɨpa ichi waa unué pasima, maamina ode arapá wãsima. 40Mãɨne P'elipe Azoto p'uurude pasima. Maapae p'uurucha chi pedea pia Jesú k'orea jarade wãsima Cesarea p'uurude cherudea.

Currently Selected:

Hecho 8: tdc

Highlight

Copy