Mark 8

Jesus‑em Neghestillgha 4,000 Siipngalghiineng Yugneng

1Taam kingungiighhaaneng yulghuteghllak qerngughullaataqaq. Neghyaghqaqraggiighusata Jesus‑em maligsaaghteni tagsighluki pikii, 2“Ukut nangllegyagutepigtanka. Whangamninnaqneghmeng pingayuni aghneghni neghyaghqiighutut. 3Nengitnun aglaghtestekumki neghestegpenaki tumemi taakwani ulleghaallequt, qayughllak ilangi uyavaneng tagilaghaatkaagut.” 4Maligsaaghtengita aaptekaat, “Maani paaghqituq naken neqengnaqesta whaten uglaghqakalghiinun naamayaghqameng?” 5Jesus‑em aaptekii, “Naten uglaghqakaan neqekrangllalgutsi?” Kiimsiqaat, “Maaghraghvinleguut neqekrangllat.”

6Enkaam Jesus‑em yulghuteghllaget qelqii aqumuutesqelluki nunakun. Taagken tuguluki taakut maaghraghvinlek neqekrangllat Kiyaghneq iqamsiqayugvikluku, kagimlluki tuunegkii maligsaaghteminun uyegtesqelluki. Enkaam maligsaaghtengi uyegtekat. 7Qafsinkuuraghhaghnengllu amsakalghiineng iqallulget. Jesus‑em iqamsiqayugvikluku Kiyaghneq, taakutlu maligsaaghteminun uyegtesqegkii. 8-9Entaqun 4,000‑nguut yuget kepsuulluteng neghuutkat. Taagken maligsaaghtet qerngughsaqmegteggu siipneq, maaghraghvinlek pasketet imiqiit esleqaghaghlluki. 10Jesus‑em yulghuteghllaget aghulaquutesluki, enkaam maligsaaghtekullghiit angyamun uuglluteng aghulaqnginaamaghmeng pikat Dalmanutha‑mun.

Pharisees‑et Allaaghlluwhaghtitesqelghiit

11Tamaanlenguut Pharisees‑et takuluku Jesus aaghtiiraaqaat. Pikaat, “Allaaghlluwhaghtighllagi, enkaam ugpeqelleqaghput aghtughyaghqaanghillghen Kiyaghneghmeng pingutanga.” Tawaten pikaat anagniilqavigighnaluku. 12Jesus‑em aneghpagluni pikii, “Sangameng maaten aghneghem yugi allaaghlluwhaghtilleghmeng tungsighaqat? Ipa ungipaatamsi, allaaghlluwhaghtinnaanghitamsi.” 13Taagken unilluki, angyamun uuglluni inglunganun naayvam aghviqat.

Jesus‑em Kelengasaaqangi Maligsaaghteni

14Maligsaaghtet puygumalghiit neqekrangllameng kelqegpenateng, ataasighhaaftuq kelqegkaat angyamelnguq. 15Jesus‑em kelengasaaqii, “Kelengangwaaghlusi yeast‑atangitneng Pharisees‑et, yeast‑atanganengllu Herod‑em.” 16Taagken ellmeggneng aleghquutkat, “Tawaten piinkut qayughllak neqekranglliilnguukut.” 17Jesus‑em akuzitkengngukangi apeghtuusiit Pharisees‑et, apeghtuusiillu Herod‑em. Liisimakegkangi maligsaaghtengan liigikenghilkangat akuzitkegkaa enkaam aaptekii, “Sangan neqekranglliinnilusi pitsi? Paninang nallukaqetsilluu, liigikigatetsilluu? Umughtakii umyugasi? 18Iyelgulghiisi, esghiigatsii? Sigutelguusi, nagaquusigatsii? Neqamikenghistekii 19tallimat neqekrangllat kagimtekanka 5,000‑enun? Qafsinat pasketet siipneghmeng imighesteki?” Kiimsiqaat, “Qula maalghuk.” 20Jesus‑em aaptekii, “Maaghraghvinlek neqekrangllat kagimtaqngamki 4,000‑enun, qafsinat pasketet siipneghmeng imighesteki?” Kiimsiqaat, “Maaghraghvinlek.” 21Aaplaataqii, “Sangafsi paninang liigikigatsi?”

Jesus‑em Naallghuskanga Ayaakaq Yuuk Bethsaida‑mi

22Bethsaida‑mun kaasata ilangita yuget Jesus‑mun tagitkaat ayaakaq yuuk, saaftaghtesqelluku. 23Jesus‑em ayaakaq tasluqluku aghulaqutkaa nemeng. Taagken qesighlukek iiskek saaflukek aaptekaa, “Sameng esghaanneghisiin?” 24Yugem sivuglluni yugsughaluni pikaa, “Aa‑a, esghaghanka yuget, iwernga esghaqaaluteng llangaqa uqfiget piyugullghiit.” 25Jesus‑em allameng saaftekakek yugem iiskek. Maatenllaam yuuk esghaannaqeghllagyalghiimi, qemall esghaasagunneqigtuq whateghlluwaaq. 26Jesus‑em agliisqegkaa nenganun, pikaallu, “Aghuliifqaavek taakwani nemi.”

Peter‑em Jesus Christ‑angunikanga

27Taagken Jesus‑enkut maligsaaghtekullghiit aghulaqegkat nenun tunganganilngughnun Caesarea Philippi‑em. Tumemi taakwani maligsaaghteni aaptekii, “Kinangunilunga yuget piiqatnga?” 28Kiimsiqaat, “Ilangita piiqaaten John‑nguniluten Paaptaayesta, ilangita Elijah‑nguniiqaaten, enkaam ilangita naliqniluten uuknaliqistet.” 29Aaptekii, “Elpesi kinganguniiqestengnga?” Peter‑em pikaa, “Christ‑anguuten.” 30Taagken Jesus‑em ineghtengngwaaqii, “Kitumun alngunak apeghpenanga.”

Jesus‑em Aapqanga Ikfiqluni Tuqulleghqani

31Taagken Jesus‑em apeghtuqestaqii maligsaaghteni, “Ighnegha Yugem elngaatall ikfiqepestaaghyaghqaaguq, ighsaksaghqaqaatlu siivanlleghet, chief priest‑et, apeghtughikayugetlu Liilightuusaneng. Taagken tuqulleqaat iwernga pingayiitangani aghneghem unguvaghllequq.” 32Whateghlluwaaq ungipaatkii. Peter‑em iqitulluku aghyuuqaa. 33Iwernga Jesus‑em qiivluni esghaqii maligsaaghteni taagken Peter aghyuuqaa. Pikaa, “Awiiten whangamneng, Tughneghaq. Sumeghtaghalleghten yugem sumeghtaghalqii, Kiyaghneghem sumeghtaghalqenghitii!”

34Taagken Jesus‑em yulghuteghllagetlu maligsaaghtenillu tagsighteghluki pikii, “Kitum alngunak maligsukuminga, ellmineng katam piyukelleni peglluki, qaquurani uyamigluku maligllinga. 35Kitum alngunak yuguliyukumigu unguvalleni iflayaghqaqaa. Iwernga kitum alngunak iflakumigu unguvalleni whanga apalluqlunga, Pinilghiitlu Ungipat apalluqluki yuguliyaghqaqaa. 36Sangwaangam yugem pinighqusiqelleqagu piliilluku nunaghllak, iflakumikek unguvasigni? 37Samengꞌngam yuuk veghtusiqelleqa unguvasigminun? 38Maaten aghneghem yugi ataasiighmenneghitut Kiyaghneghmun, seghleghqumanguutlu. Maani aghneghni kitum alngunak kaynguyaguskanganga, apeghtuusankallu, whangallu Ighneghani Yugem kaynguyagulleqaqa tagikuma aghtughyaghqaanghillelighlunga Atamneng kelqelluki agleghnalghiit yaqulget.”

Currently Selected:

Mark 8: ess

Highlight

Copy