Mark 9
9
1Nagneghutkiillu whaten, “Ipa ungipaatamsi, ilasi nekevghallghiit whani tuqunaanghitut kenlanga esghalleghmeggnun Ataneghpagullgha Kiyaghneghem tagikan aghtughyaghqaanghilleghtuumaghmi.”
Jesus‑em Allangughllegha
2Aghvinlek aghneq atughluku, Jesus‑em kelqelluki Peter‑enkut, James‑enkut, John‑enkut, mayuqat uusqalghiimun naayghamun. Ellnginaghhaalghiit tawani Jesus‑em yugusii allangughtekaq esghaamallghitni. 3Aatkii qelmeghtekat qatetun, qaatghataghaghluteng kitum alngunak nunami qateghsaghaqegkanganeng. 4Taagken maligsaaghtet esghapakagket Elijah‑nkuk Moses‑enkuk aliighlutek aleghquqangak Jesus. 5-6Enkaam maligsaaghtet alingruughuteghllakat repall sameng pipagningitkat. Taagken Peter‑em pikaa Jesus, “Apeghtughista, itagnapigtuq whaanlenguukut! Pingayut azigutat nekefnaqaput, elpenunllu Moses‑munllu Elijah‑munllu.” 7Taagken qilawaaq aliighluni saapegkii. Qilawaaghmeng mem pikii, “Unanguuq piniqepigtekegka Ighneqa; nagataqiteggu!” 8Taagken yugsughaaghaghsalghiimeng Moses‑enkuk Elijah‑nkuk aviituk, Jesus‑nginaghhaq tawanteftuq.
9Ukigutkelluku naayghameng Jesus‑em ungipaqesnanighwaaqaa esghaatellghat kenlanga Ighnegha Yugem tuqulleghmeng unguvaghtekan. 10Enkaam ineghsisteng qaatkegkaat, iwernga ellnginaaghhneghmeggni piiqelghiit, “Samengtuq pisiiwa ‘Tuqulleghmeng unguvaghtelleq?’” 11Taagken aaptekaat Jesus, “Sangan apeghtughikayuget Liilightuusaneng piiqatgu Elijah sivukluni tagipestaaghyaghqaaniluku?” 12Kiimsiqii, “Ipanguuq Elijah sivukluni tagipestaaghyaghqaaguq yataaghqennaluku sangwaa tamaghhaan. Aaptaghllamsi, naqam sangan Akuzitet Igaqegkat pikaqatgu, Ighnegha Yugem ikfiqeghllagyaghqaaniluku, sasiinghilngughestunllu kiyaghusaghqaaniluku? 13Iwernga ungipaannaqamsi Elijah tagikaaguq, yuget piyukelleghmegestun pikaqaat katam tawaten Akuzitet Igaqegkat pinaqnillghistun.”
Jesus‑em Naallghuskanga Mekelghiiq Ilumikun Tughneghalek
14Takuyaqmegteki ilangi maligsaaghtet, yulghuteghllak tawantuteftuq. Ilangita apeghtughikayuget Liilightuusaneng aaghtiiraaghaqeftiit maligsaaghtet. 15Legan yuget esghaghluku Jesus saghiighayugllagluteng paayghaghlluku quyakegkaat. 16Jesus‑em maligsaaghteni aaptekii, “Sameng aaghtiiraaghaqesteki apeghtughikayuget Liilightuusaneng?” 17Yulghuteghllaget akulngitneng yugem kiimsiqaa, “Apeghtughista, ighneqa tagisaghaqa elpenun, qayughllak ilumikun tughneghalguuq. Taam tughneghaam akuzisigataa. 18Kaatepiggneghminigu iqustaqaa, qaanghallu nuvaglliighqestaqaa, gguutngi terqitaagtaghtestaqii, teveghqwaastaqaallu. Maligsaaghtegpenun kayagutaghsaghaqa tughneghaq aanestesqelluku iwernga pipagningitaat.” 19Jesus‑em maligsaaghteni pikii, “Elpesi yugni ugpeqillghitusi! Naten tagkaan elpesininnaqsinga ugpeqesqellunga? Mekelghiiq whavek tagiteggu!” 20Enkaam tagitkaat. Legan tughneghaam esghaghluku Jesus, mekelghiiq iqusluku sayugpagtaghtestekaa. Tamaani temngi ullghitaperewaaghtestekaa, qaanghallu nuvaglliightestekaa. 21Jesus‑em aaptekaa atanga, “Qavngaghhaaneng tawateta?” Kiimsiqaa, “Mekestaghhaatmineng ima. 22Uglaghngaan kenghegnunllu meghmunllu iqustaqsaghaa tuqusqelluku. Piyaghqaakuvek nangllegyagullutung kayusiitaghtikung!” 23Jesus‑em pikaa, “Sangavek tawaten pizin, ‘Piyaghqaakuvek’? Kiyaghneghem sangwaa alngunak piyaghqaqaa yugmun ugpelghiimun.” 24Tawaninginaq mekelghiighem atanga iglagtuluni pikaq, “Ugpeghtunga, iwernga ugpelleghtughtaghaqaghnga!”
25Jesus‑em esghaghluki wata yuget tagilaghaallghiit qevuulluku aghyuuqaa tughneghaq, “Uyuq tughneghaq tuuslaghtestilghiillu akuzistingigalnguqlu qelghamken aani mekelghiighmeng, allamengllu itefqaavek ellnganun pilghaaten.” 26Tughneghaam mekelghiiq araghaataghtesteghllagluku, sayugpagtaghtesteghllagluku, aanegkaq. Legan mekelghiiq esghaqaaluni tuqukaq repall esghapalghiit pikat, “Tuqumaaq!” 27Iwernga Jesus‑em iiggakun tuguluku kayusiitkaa nekevesqelluku enkaam nekevegkaq.
28Jesus mangteghamun iteghyan ellnginaghhaaghsameng maligsaaghtengita aaptekaat, “Sangan whangkuta aanesneghmeng aghtughesteggu tughneghaq?” 29Jesus‑em kiimsiqii, “Tawatelnguq tughneghaq yughaghhiinaam aanesaghqaqaa, saam alla pinaanghitaa.”
Jesus‑em Akuzitkellaataqanga Tuqulleghqani
30Taagken nemeng aghulaqluteng nagneqat Galilee‑kun. Jesus‑em kitumun alngunak liisimakesugumangitkaa naantuleni, 31qayughllak apeghtuungukangi maligsaaghteni tuqulleghqamineng. Pikii, “Ighnegha Yugem tuguluku tuunelleqaat yugnun tuqutesqelluku, naqamenraq pingayut aghneghet atughluki unguvaghllequq.” 32Iwernga liigikumangilkangat apeghtuusaa sameng pisiitanga, enkaam aapsugumangilkangat tetugluteng.
Kina Angelleghpigaawa?
33Capernaum‑emun kaalluteng, iteghaasameng Jesus‑em aaptekii, “Igleghutkelluku sangwaa aaghtiiraaghutkaqesteggu?” 34Kiimsighyugumangilkangat, qayughllak igleghutkelluku aaghtiiraaghutkat nalighteng angelleghpigaayaghqaatanga. 35Jesus‑em aqumluni, qula maalghuk siipneqluku maligsaaghteni tuqlughluki pikii, “Kina alngunak sivuliighsukumi nekeglli kinguliiluni, qepghaghtengulillu tamaghhaanun.”
36Taagken taghnughhaq tuguluku nekevestekaa qukiitgun. Qelluku pikii, 37“Kitum alngunak tugukliqumigu taghnughhaghhaq uutun ayuqelghii whanga apalluqlunga, tuguklighaqaanga whanga. Kitum alngunak tugukliquminga, tuguklighlleqaa Ataka kayagtikaq whangamneng.”
Whangkunneng Kipullginaanghilnguq Whangkutestun Ayuquq
38Mulugpenateng John‑em pikaa, “Apeghtughista, yuuk esghaamaaghput ateghpegun aanesqulghii tughneghaghneng. Ineghsimaaghput qayughllak whangkunnun ilatnganghilnguq.” 39Jesus‑em pikii, “Ineghtegpenaan! Qayughllak kina alngunak atemkun allaaghlluwhaghtingukumi seghletun akuzitkelghaghtughnaanghitaanga. 40Kitum alngunak kipullegmun pinghilkanginkut, qepghalgutkaghput. 41Ipa ungipaatamsi, kitum alngunak meghsikangisi whanga pikutemneng, ipapestaaq akileghtuusangyaghqaaguq.”
Seghleghqestilleq
42“Ataasiq taghnughhaq ugpeqingalghii whangamneng, yugem seghleghqestekagu, pinighataghaghnayaghtuq taana yuuk meghmun ateghsaqumi uyaqghwakun qaamqaghfikluku uyghagllagmeng. 43Iiggegpek seghleghqestekangaten kepnaketen. Pinighataghaghnayaghtuten yugusighpek nalighnegha iflakuvgu unguvalleghpek iflalleghqaaneng quunperugllak. Taana pinighataghaghtuq inglugtun iiggelighluten hell‑mun aglalleghqaghpeneng. Tawani kumaghughngalghii keneq qaamyaghqaanghituq. 44Tawani ‘kinguget neghegkayuget yugmeng tuquyaghqaanghitut, kumaghughngalghiillu keneq qaamyaghqaanghituq’. 45Itegaghpek seghleghqestekangaten, iiknaketen! Pinighataghaghnayaghtuten yugusighpek nalighnegha iflakuvgu unguvalleghpek iflalleghqaaneng quunperugllak. Taana pinighataghaghtuq inglugtun itegalighluten hell‑mun miluutelleghqaghpeneng. 46Tawani ‘kinguget neghegkayuget yugmeng tuquyaghqaanghitut, kumaghughngalghiillu keneq qaamyaghqaanghituq’. 47Iyegpek seghleghqestekangaten, ipugnaken! Pinighataghaghnayaghtuten Ataneghpagullghanun Kiyaghneghem iitquvek inglupigaghmeng iiskelluten, inglugtun iyelguluten hell‑mun miluutelleghqaghpeneng. 48Tawani
‘kinguget neghegkayuget yugmeng tuquyaghqaanghitut,
kumaghughngalghiillu keneq qaamyaghqaanghituq’.
49Tamaghhaghmi taghyulighllequq keneghmeng.
50“Taghyuq pinightuq iwernga taghyughningiiskan, naten elpesi taghyughnighllaataghnayaghesteggu? Taghyughningiitegpenasi, nekeggmetullusillu.”
Currently Selected:
Mark 9: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
