Mark 5

Jesus‑em Naallghuskanga Yuuk Ilumikun Tughneghaghtuqaq

1Naayvam inglunganun kaatkat Jesus‑enkut maligsaaghtekullghiit, nunangitnun Gerasa‑ghmiit. 2Legan Jesus angyameng quutmun uugtuq yuuk aanluni sufliitneng llivghet, paasqaa. 3-4Taana yuuk ilumikun tughneghaghtuqaq lliveghnitaqelghii. Awen qiipraghutneng asightaqsaqangat iiggitgunllu itegiitgunllu iwernga sakeqaqegkangi qiipraghutet, kagimtaqegkangillu savikenghaaghet itegaminilnguut. Kitum alngunak asighqepagningitkaallu aghuliightepagningitkaallu, qayughllak iknaqepiglleghhii. 5Unugtuumaan, aghneghtuumaan igleghtaqelghii lliivghet qungangitnillu qeminillu, quunpeng araghaataamaghmi, uyghagteggun kiitiqumaghmi ellmineng.

6Jesus esghaghyamigu uyavaqaanlluku ketanqusnaq takuluku segesqughfikluku maniguqaa. 7,8Taagken Jesus‑em yugem ilunganilnguq tughneghaq pikaa, “Uyuq seghleq tughneghaq, aani yugmeng!” Tughneghaam araghaataqaa, “Jesus, Ighnegha Kiyaghneghem, sanaqsinga? Akeqi Kiyaghneghmun ikfiqestesaghqaafqaama pisqellunga!” 9Jesus‑em aaptekaa, “Kinanguzin?” Yugem kiimsiqaa, “Aatqaqa ‘Uglaghllak’ qayughllak uglaghllagtukut!” 10Elngaatall Jesus‑mun aapuquutkii tughneghaat aghulaqestefqiita pisqelluki taagken nunameng.

11Taawanguq qemim minglengani kurugalghuteghllaget, neghuullghiit. 12Tughneghaat aapuquutkat Jesus‑mun, “Kurugaghnun kayagtikut, ellngitnun iteghtestikut.” 13Enkaam angeghqumakegkii. Tughneghaat yugmeng aanaghesnaghluteng kurugaghnun iteghaatkat. Entaqun 2,000‑nguut kurugaat, pennaneng asitmun pangalgulluteng naayvamun ateghaatkat enkaam tuqulaghaatkat.

14Kurugaat aflengakistengit qimaguutkat neghllagmunllu uvitanganilngughnunllu nunanun. Tamaani ungipaqegkiit ilumikun tughneghaghtuqaqlu, kurugaatlu. Enkaam yuget esghaghyaghtuutkiit samatangi. 15Jesus‑mun kaalluteng esghaqaat yuuk tughneghaghtughllagyalghii ilumikun. Taawanguq aqumgaftuq piluguwaaghluni, umyugakeklu naallghullutek enkaam alingruuqat. 16Tamaakut esghapakat aapqaat naallghusimaniluku yuuk tughneghaghtughllagyalghii, aapqiitlu kurugaat samatangi. 17Taagken yulghutet maniguutepiglluteng Jesus aghulaqesqegkaat nunameggneng.

18Jesus uugtaquqlu angyamun, yugem tughneghaghtuyalghiim maniguutepiglluni aaptekaa, “Maligllaken?” 19Iwernga Jesus‑em ighsakluku pikaa, “Nengllugutegpenunllu, ilakumtaaghpenunllu aglaghluten apeghnaken Atanghem nangllekepiglluten apeghiillgha elpenun.” 20Enkaam yuuk aghulaqegkaq. Tamaani nunami aatqelghiimi, Qula Neghllaget, ungipaqegkaa Jesus‑em apeghiillgha ellminun, tamaakut nagaquutkat allaaghlluwhaghyukat.

Aghnaghaam Unguvaghtellghallu Aghnamllu Naallghutellgha

21Jesus angyakun uteghnighyan inglunganun naayvam, esnemi yulghuteghllaget qerngughutkat uvitanganun. 22Taagken ataasiq synagogue‑em umiilwaagha, Jairus‑nguftuq aatgha, tagiluni Jesus‑mun segesqughtekaq manungakun. 23Maniguutepiglluni pikaa, “Paniggaqa qinuyugllaguuq, tuquyaghtungestaamaaq. Takwaaghtigu saafsaghtuqaghhu, enkaam naallghulluni kiyaghlli!” 24Enkaam Jesus‑em maligtekaa. Yulghuteghllagetlu maliglleghaatkaat Jesus, repall kanglluqaghlluku.

25-26Aghnaqlu tawanteftuq aagtuqaataq qula maalghuk siipngaan ayumiqulleghni. Talwa aghallegtalghutet kayusiitaqsaghngaatni naallghusigalnguq, yeghlegi naavnginalghii. Qenwat maniqraggiighutkaq. 27Nagaqughaqegkanga Jesus, enkaam yulghuteghllaget akulangitgun tunutanganeng takukaa. 28Sumeghtaghaqaq, “Aatkii saafteqeghsaqumki naallghunayaghtunga.” 29Legan atkuyaaghqek saaftaak kiitnginaamaghmi pikaq, enkaam elpekegkaa naallghutellgha qaamnami. 30Tawaninginaq Jesus‑em liigikegkaa aghtughyaghqaanghilleq aanelghii ellmineng, enkaam yulghuteghllaget qiivluki aaptekii, “Kitum aatkanka saaftaki?” 31Maligsaaghtengita pikaat, “Yulghuteghllaget qungangitnilnguuten sangan kitumun saafniluten pizin?” 32Iwernga Jesus‑em esghaghnaqegkaa kitumun saaftutni. 33Aghnam liigikluku naallghutelleni alingem ungelegsimaghmi takukaa Jesus. Taagken manungakun segesqughlluni ungipaatkaa salleghmineng. 34Jesus‑em pikaa, “Panimni, ugpeqilleghpek naallghutestaaten. Nekeggmellelighluten aglaa, naallghutngwaaghumaaten.”

35Jesus‑em aleghquumaluku aghnaq, kevgat tagiluteng ungipaatkaat Jairus, “Panigen tuqumaaq, takusqegpenaanꞌngam Apeghtughistemun.” 36Jesus‑em nagateghngaaghmiki avelghaqiinaghluki Jairus pikaa, “Alingegpenang, taawanginaq ugpeghi.” 37Taagken kitumun alngunak maligtesnaniqaq, iwerngaqun kelqegkii Peter‑enkut James‑enkut John‑enkut, anglegutanga James‑em.

38Jesus‑enkut kaasalghiimeng Jairus‑enkunun, yulghuteghllaget elngaatall qiyaaghuuteghllaguftut metuumaghmeng. 39Jesus‑em iteghluni yulghutet pikii, “Sangafsi qiyaaghuuteghllagutsi? Sangafsi nepugtiighllagutsi? Taghnughhaq tuqullghituq, qavaaguq!” 40Iwernga nenglaqegkaat tawaten piyisteng. Qamaglluki aanesamiki angayuqakeklu taakutlu maligsaaghteni itghutkii taghnughhaam nenganun. 41Jesus‑em iiggakun tuguluku aghnaghaghhaq pikaa, “Talitha kum!” (whaten pisiq, “Aghnaghaghhaq, maketesqamken!”)

42Tawaninginaq makelluni piyukaq. (Aghnaghaghhaq qula maalghuk siipngaan uksughtutkaftuq.) Angayuqakeklu maligsaaghtetlu elngaatall saghiighayukat! 43Taagken Jesus‑em ineghtengngwaaqii kitumun alngunak ungipaqefqaan pisqelluku, pikiillu, “Neghyaghqaghhaghmeng tuuniteggu.”

Currently Selected:

Mark 5: ess

Highlight

Copy