Mark 4

Jesus‑em Ungipaghaatkegkanga Piitesiighaghta

1Taakwaningani Jesus apeghtughilaataqaq Naayvam Galilee‑m esnengani. Elngaatall uglapiglleghhii yuuk tagilaghaateghllakaq ellnganun, repall angyamun uuglluni aqumegkaq, llaaghanwha yulghutet naayvam esnenganitkat. 2Ungipaghaatetgun allaaghiinaghmeng apeghtuqii. Apeghtughitkelluku pikii, 3“Nagatek! Piitesighaghta aglaghluni piitesiighaghvigminun 4ifkaghquqaq piitutneng. Ilangi piitutet tekitkat tumetgun, enkaam qawaaget tagiluteng neghuqiit. 5Ilangi piitutet tekitkat uyghagtuqakun sunapagilngughqun. Tawaninginaq piitkat, qayughllak sunanga ugmestaaghhaq. 6Enkaam siqineq piisalghiimi maatneghan paneghtekii piinneghhat, akungellghitutmeggneng palirakegtekat. 7Ilangi piitutet tekitkat sikughllugtuqakun, sikughlluget piisalghiimeng piitfigiqiit grain‑et. 8Naqamalla tamaakut tekitkat sunakegtakun piitestighllakat grain‑meng, ilangi 30, ilangi 60, enkaam ilangi 100.” 9Jesus‑em taaqniqii whaten, “Sigutelgukufsi nagatusighqameng, nagatek!”

Ungipaghaatet Apalliit

10Taam kingunganeng Jesus ellnginaaghsan, qula maalghuk siipneqluku maligsaaghtengitallu ilangitallu tamaakut nagatkat aaptekaat ungipaghaatkegkaaneng. 11Jesus‑em pikii, “Elpesinun Kiyaghneghem liigikestaa talughngalghii ipapighqellgha Ataneghpagullghem. Sivunghani liitesimangisaghaa. Iwernga tamaakut iqitngalghiit Kiyaghneghem Ataneghpagullghaneng nagaqughaqut sameng tamaghhaaneng ungipaghaatetgun. 12Enkaam

‘Esghaannaqaqut, esghaannaqaqut esghaategpenateng.

Nagataqut, nagataqut liigikegpenateng.

Pikaayaquyeng qiivnayaghtut Kiyaghneghmun,

enkaam seghevunnayaghii.’”

Jesus‑em Aapqanga Ungipaghaatkegkani Piitesiighaghta

13Taagken Jesus‑em aaptekii, “Taana ungipaghaan piitesighaghta liigikenghitestegguu? Natenmi liigiknaqesteki alngunak ungipaghaatet? 14Piitesighaghta ifkaghqilghii piitutneng, Kiyaghneghem akuzitanganeng ungipaghtengatun ayuquq. 15Ilangi yuget qellighllakastun tumestun ayuqut. Piitutet tekinneghata tumetgun qawaaget neghaqiit. Tawateghpigaq tamaakut yuget nagaquunneghata Kiyaghneghem akuzitanganeng tawaninginaq Tughneghaam puygustaqii. 16Ilangi yuget uyghagtuqastun sunastun ayuqut. Akut uyghagtuqamelnguut asivapagigatut. Tamaakut yuget nagaquunneghmeggni Kiyaghneghem akuzitanganeng tawaninginaq tuguklighaqiit quyakusiqluki. 17Iwernga ugpeqngwaaghigalkangit akuzitangi enkaam ugpellghit mulungigatut. Seghleliineghmeggni, nalighmeng amyuutkellengneghmeggni apalluqluku ugpeqilleghteng Kiyaghneghem akuzitanganeng tawaninginaq ugpeqinanighaqut. 18Ilangi yuget sikughllugtuqastun sunastun ayuqut. Piitutet sikughllugtuqakun tekitkat nagungigatut, qayughllak sikughlluget piitfigighaqegkangit. Tamaakut yuget nagaquneghmegteki Kiyaghneghem akuzitangi qaatkigatiit, 19qayughllak una unguvalleq nulqaaviighutkaqaat, teghhwaaghiitkaqaatlu aklungi, samengllu wata allgeghutaghaghyugaqut. Tawateghpigaq sikughlluget piitfigillghistun piitutet, tamaakut yuget piyukellghita puygustaqiit Kiyaghneghem akuzitangi. 20Iwernga ilangi yuget pinilghiistun sunastun ayuqut. Piitutet tekitkat pinilghiikun sunakun elngaatall nawaaqut. Ilangi piitestiiqut 30, ilangi 60, ilangi 100. Tawateghpigaq tamaakut yuget nagaquneghmegteki Kiyaghneghem akuzitangi qaatkaqiit, enkaam elngaatall qepghaghaqut Kiyaghneghmun. Ilangi wataqaaghaq qepghaghataaghaghaqut ilameggneng.”

Sagneghem Asingani Kenelghutak

21Jesus‑em nagneghutkii, “Kitum alngunak kenelghutak itghullukek sagneghem asinganun llinaanghitaak, nalighmeng qavaghvigem asinganun. Itupill quulvaqun llilleqaak. 22Sangwaa alngunak iiqaq qaaynganun lliighyaghqaaguq, sangwaallu alngunak saapegkaq saaputiighyaghqaaguq. 23Sigutelgukufsi nagatusighqameng, nagatek!”

24Whatenllu pikii, “Nagatngwaaghtengnga! Tuunilleghpesistungwaaq Kiyaghneghem tuunelleqiisi, paninang tuunataghaghlleqiisi. 25Yuuk salek tuunataghaghyaghqaaguq. Yuuk sapagllagilnguq sangiighhii tuguyaghqaagut.”

Jesus‑em Ungipaghaatkegkangi Nagulghiit Piitutet

26Whatenllu Jesus‑em pikii, “Ataneghpagullgha Kiyaghneghem whatetuq: yuuk ifkaghqughaquq piitutneng piitesiighaghvigmini. 27Piitutet piilluteng nawaaqut unugtuumaan, aghneghtuumaan yuuk qavaayaghngaan, teghhumayaghngaan, paninang piitutet nagwaaqut. Yugem nallukaqii naten nawaaqutangi. 28Sunanginaghhaam kayutngunani piitutet nagustaqii enkaam piitestekangaqut: sivukluteng sungaghyukegtaghhaat piitaqut, taagken napaaziingaqut qenwatlu grain‑engaqut. 29Grain‑et qigunghata unataghyaghqaaghtaqut, enkaam yugem kepughaqii kepuusimikun.”

Jesus‑em Ungipaghaatkegkanga Mustard‑em Piitutanga

30Jesus‑em aaptekii, “Samun uspunnaqesteggu Ataneghpagullgha Kiyaghneghem? Sangwaa ungipaghaatkennaqesteggu liigikestisiiluku? 31Ataneghpagullgha Kiyaghneghem mustard‑em piitutngatun ayuquq. Mekestaalleghpigaaguq piitutneng nunami whani iwernga yugem piitesighaneghminigu, 32anglighllagaquq angelleghpigaaghlluni nunivagseghaghyaggaghneng. Uglaapiglleghhiit avayaghrugllagi enkaam qawaaget unglusiiqut ququngaan akulngakun siqinghillghakun.”

33Jesus‑em atuqluki ungipaghaatelghutet yugnun akuzitkegkaqii Kiyaghneghem Akuzitangi. Aapqaqii yugnun liigikelleghtulangistun. 34Quunpeng yuget apeghtughaqegkangi ungipaghaatetgun, iwernga maligsaaghtekullghiit ellnginaaghhneghmeggni whateghlluwaaq liigikestaqegkangi sameng pisiitangi ungipaghaatet.

Jesus‑em Amsanaghtestekanga Naaftelleghllak

35,36Taam ighivgaani Jesus‑em angyamelluni maligsaaghteni pikii, “Aghviilta naayvam inglunganun.” Enkaam maligsaaghtet uuglluteng angyamun unitkiit yulghutet. Ilangitallu angyat maligtekiit. 37Taagken anuqlighllakaq, repall imaghllugem imighaataqegkaa angyaq qenwat esleqsaghtuqaq. 38Jesus angyallimi qavaq akisighluni. Maligsaaghtengita taghtughlluku pikaat, “Apeghtughista, tuquyaghngaamtaa pizikuut?”

39Jesus‑em taghtughluni anuqallu imaghllugetlu ineghtekii, “Anuqa taaqingam, imaghlluget aghuliightek!” Enkaam ellmaaragutkelluku amsanaghllugughtekaq. 40Taagken maligsaaghteni aaptekii, “Sangafsi alingetsi? Taawa ugpeqigastengngaa?” 41Saghiighayugllakat repall tallughyugllakat alingruughumaghmeng, enkaam aapqughaaghutkat ellmeggneng, “Kinangaawa una yuuk, talwa anuqemllu imaghllugetlu qaatkegkangat?”

Currently Selected:

Mark 4: ess

Highlight

Copy