Mark 3

Yugem Iiggan Inglungi Uniiqat

1Taagken Jesus aglanqigtekaq synagogue‑mun, tawanteftuq yuuk inglungi iiggan uniiqat. 2Ilangita yuget tawanlenguut riirngingwaaqaat Jesus‑em naallghunnayukagu Sabbath‑mi. Naallghuskagu whaten pinaluku, “Anaggututen!” 3Uniiqameng iiggelek yuuk Jesus‑em pikaa, “Tagi whavek.” 4Taagken yuget aaptekii, “Liilightuusamta sasqinkut Sabbath‑mi? Pinitun pisqinkuut, nalighmeng seghletun? Yugulighisqinkuut, nalighmeng tuqutisqinkuut?” Iwernga yuget qallegnanighwaaghutkat. 5Jesus‑em esghapagngaaghmiki ugumiyagutkii, naqam iilqutkumiita pineghllugullghitnengllu waakigatngitnengllu. Taagken Jesus‑em qiivluku yuuk pikaa, “Iiggeten nengugutiki.” Legan nengugutii aga naallghutkat. 6Enkaam Pharisees‑et aanaghesnaghluteng synagogue‑meng, Herod‑em ilapgastengitnun aglaghluteng agghitkegkaat naten tuqutelleghqameng Jesus.

Yulghun Naayvam Esnengani

7-8Jesus‑enkut maligsaaghtekullghiit Naayvamun Galilee‑mun aglaqat. Yulghuteghllaget maligtekiit, qayughllak nagaquqaqegkangit Jesus‑em allaaghllugwhaghtillghi. Tamaana yulghun Galilee‑meng, Judea‑meng, Jerusalem‑emeng, Idumea‑meng, Jordan‑em Kiiwem inglunganilngughneng nunaneng, Tyre‑meng, Sidon‑meng pingulghiit. 9Yuuk uglaghighllagyan Jesus maligsaaghteminun angyameng yataaghqutesqegkaq luuraq ighlleghnayukangatni meghmun. 10Yulghun naallghuquqaqutanganeng qamaglluteng qinuyuget ellnganun kaannaqeghllakat saaftepigesnaghnaluku. 11Tamaakutlu tughneghaat yuget ilungitnilnguut esghaneghmegteggu Jesus, sivungakun ullghaghlluteng akilghuugaqelghiit, “Kiyaghneghem Ighneqaaten!” 12Iwernga Jesus‑em ineghtengngwaaqii tughneghaat kinangutni apefqaan pisqelluku.

Jesus‑em Nakmikegkangi Qula Maalghuk Siipneqluku Apostle‑et

13Taagken Jesus qemimun mayughluni yuget piyukegkani tagsighteqii. Tagilaghaasata 14nakmikegkii qula maalghuk siipneqluku yuget apostle‑nguluki. Taagken pikii, “Whangamnitesqellusi nakmikamsi, kayaglleqamsillu ungipaghyaghtiisqellusi. 15Aghtughyaghqaanghillelgullequsillu tughneghaat aanestesqelluki yugneng.” 16Ukut nakmikegkaqii, Simon, (Jesus‑em ateghiqaa Peter‑meng); 17James‑enkuk John‑enkuk, ighneghqek Zebedee‑m, (Jesus‑em atiqakek Boanerges‑meng, whaten pisimeng, “Ighneghqek Kallugem”); 18Andrew‑nkut, Philip‑enkut, Bartholomew‑nkut, Matthew‑nkut, Thomas‑enkut, James‑llu ighnegha Alphaeus‑em, Thaddaeus‑enkut, Simon‑llu Zealot‑a, 19Judas Iscariot‑lu uveghpagutiyaghqaq Jesus‑meng.

Jesus‑enkuk Beelzebul‑enkuk

20Taagken Jesus tukughminun aglaqaq. Yulghuteghllaget aglaghtuullaataqat ellngitnun, repall Jesus‑enkut maligsaaghtekullghiit neghepagningiitkat. 21Nengllugutangan nagaqughluku tawaten aneghtellgha aqfakaat, qayughllak yuget pikangat nallungughhniluku.

22Ilangi apeghtughikayuget Liilightuusaneng Jerusalem‑emeng tagikat whaten pimaaqelghiit, “Beelzebul Jesus‑em ilunganituq! Enkaam aanesqughaqii tughneghaat yugneng aghtughyaghqaanghillghakun Beelzebul‑em, umiilwaaghitgun tughneghaat.” 23Enkaam Jesus‑em tagsighluki yuget ungipaghaatkii, pikii, “Tughneghaq ellmineng aanesleqaa? 24Ataneghpagulleq aafquuskumi, taana ataneghpagulleq qerngaghmennaanghituq. 25Nengllugutet aafquuskumeng, taakut nengllugutet qerngaghmennaanghitut. 26Tawateghpigaq Tughneghaankut aafquulluteng pilluguskumeng, Tughneghaq nekevghapagningiilluni kenlekaghqaminun kaallequq.

27“Kina alngunak iteghnaanghituq iknaqelghiim yugem mangteghaanun wayaghteghnaluki saghyangi. Sivukluku iknaqelghii yuuk asighqaghlluku, taagken wayaghteghlleqii saghyangi.

28“Ipa ungipaatamsi, yuget seghevutellengyaghqaagut seghleghqellghitneng, seghletunllu akuzitkellghitneng Kiyaghneq. 29Iwernga kitum alngunak seghletun akuzitkegkumikek Agleghnalghiik Taghneghak seghevutellengnaanghituq, qayughllak seghleghqengnguuq Kiyaghneghem seghevusaghqaqenghilkanganeng. Taana seghleghqelleq kenglengilnguuguq.” 30Jesus tawaten akuzikaq qayughllak ilangita pikaqegkangat, “Tughneghalguuq ilumikun.”

Jesus‑em Naangallu Anglegutangillu

31Taagken Jesus‑em naangallu anglegutangillu kaatkat. Manughamelluteng aanesqegkaat esghaghyugniluku. 32Yulghutet aqumuutngalghiit Jesus‑em uvitangani ungipaatkaat, “Qakma naagpeklu anglegutegpeklu esghaghyugaqaaten.” 33Jesus‑em aaptekii, “Kinangaawa naaka? Kinkungaawat anglegutenka?” 34Yugsughaluni aqumgalghiit pikii, “Elpesi naakamsillu, anglegutkamsillu! 35Kitum alngunak atuqegkumigu Kiyaghneghem piyukellgha, anglegutkaqallu naakaqallu.”

Currently Selected:

Mark 3: ess

Highlight

Copy