Luke 8

Aghnat Maligullghiit Jesus‑mun

1Mulugpenani Jesus ighleghtekaq neghllagnunllu nengiighhaghnunllu. Ungipaqikaq Pinilghiineng Ungipaneng Ataneghpagullghaneng Kiyaghneghem ayuqelghiimeng. Qula maalghuk siipneqluku malighsaaghtengita maligtekaat, 2ilangillu aghnat maligutkat. Aghnaneng aanesquqaqegkangi tughneghaat, naallghuquqaqegkangillu aqnighneghitneng. Taakunguftut Mary Magdala‑ghmii (ellnganeng aanestekaqegkangi maaraghvinlek tughneghaat), 3Joanna, Susanna, ilangillu aghnat. Taakut aghnat pitutalmeggneng kayusiitaqegkangit Jesus‑enkut maligsaaghtekullghiit. (Joanna‑m uginga Chuza, aflengakistenguftuq Herod‑em mangteghaaneng).

Jesus‑em Ungipaghaatkegkanga Piitesighaghta

4Neghllagneng tamaghhiitneng yulghuteghllaget tagilaghaatkat Jesus‑mun. Qerngughuteghllagyata ungipaghaatkii, 5“Piitesighaghta piitesighaghyaghtuqaq piitesighaghvigminun. Miluuqughyaqminiki piitutet ilangi tekitkat tumetgun enkaam yuget tutmaasghaqegkiit; taagken qawaaget tagiluteng neghegkiit. 6Ilangi piitutet tekitkat uyghagtuqakun naguyalghiimeng paliqat, qayughllak sunanga yukutanneghilnguq. 7Ilangi piitutet tekitkat sikughllugtuqakun, sikughlluget maligulluteng naguyalghiimeng piitfigiqiit. 8Enkaam ilangi piitutet tekitkat sunakegtakun, piitestikat pinilghiineng nunivagseghaghneng. Tamaghhaghmeng tamaakut 100‑kaghtaan piitutengaqut.” Jesus‑em akuzilleni taaqniqii, “Sigutelguusi, nagatek!”

Ungipaghaatet Apalliit

9Maligsaaghtengita aaptekaat Jesus sameng pisiitanga taana ungipaghaan. 10Kiimsiqii, “Kiyaghneghem nakmikumiisi liigikesqelluki talughngalghiit ipapillghi Ataneghpagulleghmi. Iwernga ilangitni yugni ungipaghaatnginaawaqut. Enkaam esghaateghngaaghmeng esghaasigatut, nagateghngaaghmeng liigikigatut.

Jesus‑em Liigikestekanga Ungipaghaatni Piitesighaghta

11“Taana ungipaghaan whaten pisiiguq: Piitutet Kiyaghneghem akuzitkii. 12Piitutet tekitkat tumetgun inglutngaat nagatkanun Kiyaghneghem akuzitanganeng. Taagken Tughneghaam tagiluni tugaaqii akuzitet ilungitneng ugpeqifqiitallu yugulillengefqiitallu pisqelluki. 13Piitutet tekitkat uyghagtuqakun usputngaat nagatkanun Kiyaghneghem akuzitanganeng. Nagalluki akuzitet quyakusiqluki tuguklighaqiit, iwernga qamaverugllak ilumeggnun iteghtesigatiit. Ugpeqiighlluteng, iwernga nanghiiqullengneghmeggni ugpeqinanighaqut. 14Piitutet tekitkat sikughllugtuqakun usputngaat nagatkanun Kiyaghneghem akuzitanganeng. Iwernga sumeghyalinkut, aklunginkut, teghignaanllu unguvallghem piitfigighaqii, enkaam piitestekiit angtaniisigatut. 15Enkaam piitutet tekitkat sunakegtakun usputngaat nagatkanun Kiyaghneghem akuzitanganeng. Neqamikaqiitlu pinilghiikun ipapighqengngalghiikun ilumegteggun. Nagneghaqut qaatkelluki akuzitangi enkaam piitestekastun ayuqut piitesqughllalghiit pinilghiineng.

Sagneghem Asingani Kenelghutak

16“Kitum alngunak kenelghutak kumaghllukek sagneghem asinganun llinaanghitaak, nalighmeng qavaghvigem asinganun. Itupill quulvaqun llilleqaak, itelghiinun nighuk esghiisqelluku. 17Qayughllak sangwaa alngunak iighngalghii Kiyaghneghem aliighsaghqaqaa, sangwaallu alngunak saapngalghii qaaynganun lliightesleqaa. 18Enkaam nagatngwaaghtek. Kitum alngunak liigikegkumiki apeghtuusanka liigikellengataghaghllequq. Iwernga kitum alngunak liigikenghilkumiki apeghtuusanka talwa liigiknikii iqilleqiit.”

Jesus‑em Naangallu Anglegutangillu

19Taagken Jesus‑em naanganllu anglegutangitallu takukaat, iwernga kaanneghmeng aghtuqaat qayughllak yulghuteghllaget kanglluqaghlluku ayuqegkangat. 20Kitum ungipaatkaa, “Naanllu anglegutetenllu qakma nekevghataaghutaqut, esghaghyugaqaaten.”

21Iwernga pikii, “Naakallu anglegutenkallu tamaakunguut nagallghiit akuzitanganeng Kiyaghneghem, qaatkegkangitlu.”

Jesus‑em Amsanaghtestekanga Naafteghllak

22Ataasimi aghneghmi Jesus‑em maligsaaghteni pikii, “Naayvam inglunganun aghviilta.” Angyamun uughquulluteng aghulaqegkat. 23Telaanangamaluki Jesus qavaqaq. Naayvami anuqliiteghllakii, angyaatlu meghem imighaataqegkaa enkaam yakughniighllakat. 24Maligsaaghtengita takuluku taghtughlluku pikaat, “Yuguniiq, Yuguniiq, tuqulaghaannaqukut!”

Jesus‑em makelluni ineghtekii anuqallu imaghllugetlu enkaam naangegkat, amsanaghtengnginaamaghmi pikaq. 25Aaptekii, “Sangama ugpeqenghitestengnga?” Iwernga alingengulghiitlu allaghlluwhaghyugulghiitlu enkaam ellmeggneng ilateng aapqughaaghutkiit, “Kinangaawa una yuuk, talwa ineghtekangi anuqallu imaghllugetlu enkaam legan qaatkegkangat?”

Jesus‑em Naallghuskanga Yuuk Ilumikun Tughneghalek

26Taagken kaatkat Gerasa‑ghmiit nunangitnun, naayvam inglunganilnguq Galilee‑meng. 27Legan Jesus quutmun uugtuq, nallaqaa yuuk ilumikun tughneghaghtuqaq, nemeng pinguftuq. Pilugugigalnguq qavngaghhaaneng, kiyaghsigalnguqlu mangteghani naqam lliveghnitaqelghii. 28-29Jesus‑em qelqaa tughneghaq ellnganeng aanesqelluku. Taagken yuuk araghaataghllagluni sikmuutkaq manungakun, maniguutepiglluni iglagtupiglluni pikaa, “Jesus, Ighnegha Qulighpigaghllagem Kiyaghneghem, sanaqsinga? Maniguutepigtunga ikfiqestefqaama pisqellunga.” Tawaten pikaa qayughllak Jesus‑em qelqanga yugmeng aanesqelluku tughneghaq. (Uglaghngaan tughneghaam tugughllagaqegkanga. Yuget kelengakaqsaqangat, qiipraghutnengllu asightaqsaqangit iiggillu itegiillu, iwernga sakequghaqegkangi. Enkaangam tughneghaam kilgaanun aghulaqestekaa.)

30Taagken Jesus‑em aaptekaa, “Kinanguzin?” Kiimsiqaa, “Aatqaqa, ‘Uglaghllak!’” qayughllak tughneghalghuteghllaget iteghukaqegkangat. 31Taakut tughneghaat Jesus‑mun aapuquusimanginaqat aglaghtestefqaameng Abyss‑mun pisqelluteng. 32Taawa qemim minglengani kurugalghuteghllaget neghuutaqeftut. Tughneghaat aapuquutkat Jesus‑mun kurugaghnun iteghtesqelluteng enkaam iteghaatestekii. 33Taagken tughneghaat yugmeng aanleghaalluteng iteghaatkat kurugaghnun. Kurughaat pennanun pangalgulluteng naayvamun ifkaqulluteng tuqulaghaatkat.

34Kurugaat aflengakistengita esghapagluku tawaten pilleq, qimaguulluteng ungipaqegkaat neghllagmi, uvitanganilngughnillu nunani. 35Taagken yuget esghaghyaghtuutkaat sangwaa samatanga. Kaalluteng Jesus‑mun esghaqaat yuuk tughneghiighulluni. Aqumgaftuq Jesus‑em manungani pilugugwaaghluni, umyugakeklu naallghutngwaaghlutek enkaam alingruughuteghllakat. 36Tamaakut esghapakat ungipaqegkaat yuuk ilumikun tughneghaghtughllagyalghii naten naallghutkaatanga. 37Taagken qamaglluteng yuget Gerasa‑ghmiit nunangitnilnguut aghulaqeskegkaat Jesus, qayughllak alingruughuteghllagulghiit. Enkaam Jesus‑enkut angyamun uuglleghaalluteng aghulaqegkat. 38Yuuk tughneghaghtughllagyalghii aapuquutkaayalghii Jesus‑mun maligunnaluni, iwernga Jesus‑em aghulaqesqegkaa. Pikaa, 39“Uteghnighluten negpenun, aapghhu naten angkaan Kiyaghneghem apeghiillgha elpenun.” Enkaam ellmeggnun aglaghluni tamaghhaani neghllagem aapqaa Jesus‑em apeghillgha ellminun.

Aghnaghaamllu Unguvaghtellgha Aghnamllu Naallghutellgha

40Jesus uteghnighyan yulghuteghllaget upughatkaat qayughllak utaqangukangat. 41Taagken yuuk atelek Jairus‑meng tagikaq, igleghutistenga synagogue‑em. Jesus‑em manungakun niinghulluni maniguutkaq ellmeggnun piightesqelluku, 42qayughllak kezemaghhaq paniga, qula maalghuk siipneqluku uksughtutkalghii, tuqunaqnguftuq.

Aglaamaluku yulghuteghllaget kanglluqaghtekaat Jesus. 43Akulngitniteftuq aghnaq aagtuqaataaftuq qula maalghuk siipngaan ayumiqulleghni. Maningiitkaq llivikuusaqneghmeng aghallegtanun, naqamllu kitum alngunak naallghutepagningitkaa. 44Tunutanganeng Jesus takuluku atkuyaaghan keniin esnengakun saaftekaa, enkaam kiitnginaamaghmi pikaq. 45Jesus‑em aaptekii, “Kitum saaftanga?” Qamaglluteng mesighaghyata, Peter‑em pikaa, “Yuguniiq, yulghuteghllaget kanglluqaghlluten ayuqaaten.” 46Iwernga Jesus‑em pikii, “Kitum saaftaanga, qayughllak elpekaqa aghtughyaghqaanghilleq aanelghii whangamneng.” 47Aghnaq piyalghiimi aksaqfigiteftuq enkaam ungelegsimaghmi tagikaq. Jesus‑em sivungakun niinghulluni, yulghutet nagasimanghitni ungipaatkaa sangan saaftelleghmineng, tawaninginaqlu naallghutelleghmineng. 48Jesus‑em pikaa, “Panimni, ugpeqilleghpek naallghutestaaten, aglaa nekeggmellelighluten.”

49Salin Jesus akuzimaluku, igleghutistenkuneng yuuk tagiluni Jairus pikaa, “Panigen tuqumaaq, Apeghtughista qinuyugtegpenaanꞌngam.”

50Iwernga Jesus‑em nagalluku, pikaa Jairus, “Alingegpenang. Taawanginaghhaq ugpeghi, piniighhnaaghaa.”

51Jesus mangteghamun kaasami kitumun alngunak itelgusightesimangilnguq. Iwerngaqun iteghtestekii Peter‑enkut John‑enkut James‑enkut, taghnughaamllu atanga, naangallu. 52Qamaglluteng yuget qiyaaghuuteghllagulghiit aghnaghaghhaghmun tuqulghiimun. Iwernga Jesus‑em pikii, “Qiyagpenasi qayughllak tuqullghituq, qavaghaquq.”

53Nenglaqegkaat liisimakluku tuqukaatanga. 54Iwernga tuguluku iiggakun tuqluumaan pikaa, “Taghnughhaq, maketen.” 55Aghnaghaghhaq unguvaghluni, nekevegkaq. Jesus‑em kayagutkaa sameng neghestesqelluku. 56Angayuqakek saghiighayukak, iwernga ineghtekakek kina alngunak ungipaatefqaan pisqelluku tawaten pilleghmeng.

Currently Selected:

Luke 8: ess

Highlight

Copy