Luke 9

Jesus‑em Kayagtekangi Qula Maalghuk Siipneqluku Maligsaaghteni

1Jesus‑em tuqluqii qula maalghuk siipneqluku maligsaaghteni. Qerngughusata aghtughyaghqaanghilleliquqiillu pilleghqaliquqiillu yugneng aanestesqelluki qamaglluki tughneghaat, naallghutesqellukillu aqnighneghet. 2Taagken ungipaqiyaghtiisqegkii Ataneghpagullghaneng Kiyaghneghem, naallghuqiisqellukillu qinuyulghiit. 3Pikii, “Igleghalleghpesinun sameng alngunak kelqegpenasi. Ayaviingunasi, aqeftaghaangunasi, neqngunasi, maningunasi, talwa kelqefqaafsi simiitkaghqameng ggaatmeng. 4Kinkunun alngunak iteghlusi upughaskangisi tawanlleghhaasi kenlanga aghulaqelleghqaghpesinun. 5Enkaam kinkut upughanneghilkangisi, aghulaqneghpesini nemeng taagken, tukaataqiteki pagulangi itegaghpesi. Tawaten pikufsi liisimakelleqaat kelengasaaghilleghsi Kiyaghneghem aghyuulleghqaaneng.”

6Maligsaaghtet aghulaqluteng nengiighhaat takuughaqiit, ungipaqikat Pinilghiineng Ungipaneng, naallghuquqatlu tamaghhiitni.

Herod‑em Kukragyaguskanga Jesus

7Herod‑em igleghutistengan Galilee‑m, nagaqughluki Jesus‑em allaaghlluwhaghtillghi teggellghhiiqaq, qayughllak ilangita yuget pikangat John Paaptaayesta unguvaamaniluku tuqulleghmeng. 8Paninang ilangita pikaat Elijah‑nguniluku, enkaam ilangita pikaat naliq ayumightaq uuknaliqista unguvaamaniluku. 9Herod pikaq, “John naasqwightestekaqaqa, iwernga kinangaawaqa yuuk nagaqughaqegkegka tawaten piiqelghii?” Enkaam Herod‑em esghaghyukaa Jesus.

Jesus‑em Neghestillgha 5,000‑neng Siipngalghiineng Yugneng

10Apostle‑et uteghnighluteng, Jesus ungipaatkaat apeghiighutelleghmeggneng. Aghulaqutkii neghllagmun Bethsaida‑mun ellnginaanaluteng. 11Yulghutet naantulanga liigiksamegteggu maligtekaat. Kaasata quyakluki ellngitnun akuzitkegkaa Ataneghpagullgha Kiyaghneghem, naallghutesulghiitlu naallghuquqii.

12Whanikuyagu, qula maalghuk siipneqluku maligsaaghtengita takuluku pikaat, “Maana paaghqituq enkaam yulghutet aglaghtuutesqiki qantaghanlengughnun nengiighhaghnunllu piitesighaghtenunllu. Tamaani tukughqangnayaghtutlu neghyaghqangnayaghtutlu.”

13Iwernga Jesus‑em pikii, “Elpesi sameng neghyaghqaliteki.”

Pikaat, “Legan taawa tallimat neqekrangllat, iqallugeklu naamapagningitut whaten uglaghqakalghiinun yugnun. Wetkuqun navek neqengyaghtughtesukufkut taawa neghqennayaghaput qamaglluki.” 14Tawanlenguut entaqun 5,000‑nguut yuget, kesutkegpenaki aghnatlu taghnughhaatlu. Maligsaaghteni pikii, “Aqumuutesqiteki qerngaqaghtiita, fifty‑ngwaaqluki.” 15Maligsaaghtet pisqelleghmegestun qamaglluki aqumuutestekiit. 16Taagken Jesus‑em tuguluki tallimat neqekrangllat, iqallugeklu qilagmun sivuglluni, iqamsiqayugvikegkaa Kiyaghneq. Taagken iiggmineng aavghughluki tuunegkii maligsaaghteminun uyegtesqelluki yugnun. 17Qamaglluteng neghuutkat kepsuulluteng. Maligsaaghtet tugulaghluki siipneghit imightuqiit qula maalghuk siipneqluku pasketet.

Peter‑em Jesus Christ‑angunikanga

18Ataasimi aghneghmi Jesus ellnginaghmi yughalghii. Maligsaaghtengi qantaghanlenguut enkaam aaptekii, “Yuget kinangunilunga piiqatnga?” 19Kiimsiqaat, “John‑nguniiqaaten Paaptaayesta, iwernga ilangita Elijah‑nguniiqaaten. Enkaam ilangita piiqaaten naliit ayumightaq uuknaliqista unguvaqaq.”

20Aaptekii, “Elpesimi kinanguniiqestengnga?” Peter‑em kiimsiqaa, “Christ‑akaaten Kiyaghneghem.”

Jesus‑em Akuzitkegkanga Ikfiqelleghqanillu Tuqulleghqanillu

21Iwernga Jesus‑em ineghtengngwaaqii ungipaatefqaan kina alngunak pisqelluku. 22Pikii, “Ighnegha Yugem uglalghiimeng ikfiqepestaaghyaghqaaguq, ighsaksaghqaqaatlu siivanlleghet, chief priest‑et, apeghtughikayugetlu Liilightuusaneng. Taagken tuqulleqaat, iwernga pingayiitangani aghneghem unguvaghllequq.”

23Taagken qamaglluki pikii, “Kitum alngunak maligsukuminga, ellmi katam piyukelleni peglluki, aghhutanga tamaghhaan tuguluku qaquurani, maligllinga. 24Enkaam kitum alngunak peggneghilkumigu unguvalleni, iflayaghqaqaa. Iwernga kitum alngunak pegtekumigu unguvalleni whanga apalluqlunga, yugulilleqaa. 25Sangwaa yugem allgeghlleqagu iingunaan nuna piliilluku iflakumigu nalighmeng naafqegkumigu unguvalleni? 26Kitum alngunak kayngukegkanganga, akuzitenkallu, Ighneghan Yugem kayngukelleqaa tagikumi nighughqelleghmikun, nighughqengngallghitgunllu Atam, agleghnalghiitlu yaqulget. 27Iwernga ipa ungipaatamsi, ilasi nekevghallghiit whani tuquyaghqaanghitut kenlanga esghalleghmeggnun Ataneghpagullgha Kiyaghneghem.”

Jesus‑em Allangughnegha

28Tawaten Jesus akuziluni, pingayuneng inglulek aghneghet atughluki, kelqegkii Peter‑enkut John‑enkut James‑enkut. Mayuqat naayghamun yughaghnaluni. 29Yughaamaluku, gginaa allangughtekaq, aatkiillu qaterakguutkat nighugraketun. 30-31Taagken aliighaghtekak maalghuk yugek nighugullutek qilagem nighughqellghakun, Moses‑enkunguftuk Elijah‑nkuk. Aleghqughaqeftaak Jesus tuqulleghqaaneng Jerusalem‑emi; tawaten tuqukumi apeghiighlleqaa Kiyaghneghem uspeqellgha. 32Peter‑enkut qavanghaateghllakat, iwernga taghtughluteng esghaqaat Jesus‑em nighughqellgha, yugeklu nekevghalgutkek. 33Yugek unitaqaaklu Jesus, Peter‑em pikaa, “Yuguniiq, itagnapigtuq whaanlenguukut! Pingayut azigutat nekefnaqaput elpenunllu Moses‑munllu Elijah‑munllu.” (Peter akuzikaq nallukluku sameng piiqutni.)

34Salin akuzimaluku qilagwaaq aliighluni saapegkii. Maligsaaghtet alingegkat qilagwaaghem saapsisteng. 35Qilagwaaghmeng mem pikii, “Una Ighneqaqa, nakmikegkaqa! Nagataqiteggu!” 36Ma nepiighyalghiimi Jesus ellnginaaftuq. Maligsaaghtet sameng pimangilnguut, esghaqaghtengllu aapghumangilkangat kitumun alngunak.

Jesus‑em Naallghuskanga Mekelghiiq Ilumikun Tughneghalek

37Unaamingani naayghameng ukigyalghiimeng yulghuteghllaget Jesus utaqaaqeftaat. 38Yulghuteghllaget akulngitneng yuuk akilghuukaq, “Apeghtughista, maniguutunga elpenun ighneqa esghaqiisqelluku qayughllak kezemaghhaalghii avaqutaqa. 39Ilumikun tughneghalghuuq, tugupiggneghminigu araghaataghqaqaa, sayugpagtaghtesimaan kenlanga qaangha puuglliighqellghanun. Aqnighqeghllagaqaa, unitelqungigataallu. 40Maligsaaghtegpenun aanestaghtesqumayaghaqa iwernga pipagningitaat.”

41Jesus‑em pikii, “Kii, elpesi yugni ugpellghitusillu seghleghwaaghuusillu! Naten tagkaan elpesininnaqsinga ugpeqesqellunga?” Taagken yuuk pikaa, “Ighneghen tagitigu whavek.”

42Tagimaluku tughneghaam ulleghlluku sayugpagtaghtestekaa. Iwernga Jesus‑em qelqaa tughneghaq aanesqelluku, enkaam naallghulluku mekelghiiq atanganun tuunegkaa. 43Qamaglluteng yuget saghiighayagutkaat aghtughyaghqaanghitelleghllaga Kiyaghneghem.

Jesus‑em Akuzitkellaataqanga Tuqulleghqani

Paninang yuget saghiighayugumaluki tamaghhaaneng Jesus‑em apeghiillghaneng, maligsaaghteni pikii, 44“Nagatngwaaghtek, puygugpenaan una: Ighnegha Yugem uveghpagutellengnaqnguuq taagken yuget tugulleqaat.” 45Iwernga liigikumangilkangat tawaten pillgha qayughllak umyugiit liigiksaghqaananighqegkaalghiit. Tetukaat aapneghmeng sangami tawaten akuzillghaneng.

Kina Angelleghpigaawa?

46Taam kingunaneng maligsaaghtet aaghtiiraaghutkat nalighteng angelleghpigaayaghqaatanga. 47Iwernga Jesus‑em liisimakegkii sumeghtaghallghit. Enkaam tuguluku taghnughhaq saaghwmikun nekevestekaa. 48Pikii, “Kitum alngunak atemkun tugukliqumigu una taghnughhaq, tuguklighlleqaanga. Enkaam kitum alngunak tugukliquminga, tuguklighlleqaa kayagtisteka. Kina alngunak ukalighpigaq akulegpesinilnguq, angelleghpigaaguq.”

Elpesinun Kipullginaanghilnguq Elpesinun Ayuquq

49John‑em pikaa, “Yuguniiq, esghaamaghput yuuk ateghpegun aanesqulghii tughneghaghneng. Enkaam ineghsimaaghput qayughllak whangkunnun ilatnganghilnguq.”

50Jesus‑em pikaa, “Ineghtegpenaan qayughllak kina alngunak elpesinun kipullgginaanghilnguq elpesinun ayuquq.”

Samaria‑ghmiit Tuguklighyunghilkangat Jesus

51Tughaaghyan Jesus‑em qilagmun mayulleghqani, qakiqniqepigtekaq Jerusalem‑ennaluni. 52Kayagtekii ilangi ungipaghtet igleghtekestiisqelluki sivumini. Samaria‑mun pikat nekaghqangusaghtughnaluku. 53Iwernga Samaria‑ghmiit upughanneghitkaat qayughllak Jerusalem‑emun maniguusaghtuulghii. 54Maligsaaghtegkenka, James‑enkuk John‑enkuk esghapagluki yuget ighsakegkangat Jesus, aaptekaak, “Ataneq, Kiyaghneghmun tungsiiteltekii‑i qilagmeng ukigtesqelluku keneq paneghtesqelluki?”

55Jesus‑em qiivlukek aghyuuqakek. 56Taagken ilanganun nem aglaqat.

Jesus‑mun Maligsaaghtengughsulghiit

57Tumetgun igleghsimaluki yugem Jesus pikaa, “Maliglleqamken navek alngunak pikuvek.”

58Jesus‑em pikaa, “Kaviighet riigtelguut, qawaaget unglutelguut, iwernga Ighnegha Yugem nekaghqiituq.” 59Taagken ilanga yuuk Jesus‑em pikaa, “Maligtinga.”

Iwernga yugem pikaa, “Ataneq, maliglleqamken iwernga sivukluku ataka qungughyaghtughnaqaqa.”

60Jesus‑em pikaa, “Tamaakut tuqukat qungughlitki tuqumasliiteng. Iwernga elpek, aghulaqluten ungipaqsaghtughhu Ataneghpagullgha Kiyaghneghem.”

61Ilangan yugem pikaa, “Ataneq, maliglleqamken iwernga sivukluki nemiinka ungipaasaghtuqaghnaqanka.”

62Jesus‑em pikaa, “Kina alngunak piitesighaghvigmini peksighqimaluni nunameng qiivaataqumi uteghmun itagnaghnaanghituq Ataneghpagullghanun Kiyaghneghem.”

Currently Selected:

Luke 9: ess

Highlight

Copy