Luke 7
7
Jesus‑em Naallghuskanga Centurion‑em Qepghaghtenga
1Jesus‑em aleghquneghmeng apeghiighyamiki yuget aglaqaq Capernaum‑emun. 2Taawanguq centurion‑a qepghaghtelaalek, megnukumtaagha, enraqlu qinuyugllakaq repall tuquyaghtungestaghluni. 3Centurion‑em nagaqughluku Jesus, kevgaqegkii Jews‑et siivanlleghit naallghusaghtuqiisqelluku qepghaghtelaani. 4Jesus‑mun kaasameng nangllegsipiglluteng pikaat, “Centurion‑em kayutkesupigtaaten. Yuuk taana kevgaqiilghii pinighllagtuq kayusighyaghqapiguuq, 5qayughllak piniqepigtii yuput, synagogue‑engllaqaqiinkutlu.”
6Enkaam Jesus‑em maligtekii. Kaasaghtughaqutlu mangteghamun centurion‑em ilakumtaaghminun ungipaasaghtiisqegkaa whaten, “Ataneq, nagneghnaqegpenang qayughllak itagnanghitunga elpenun iteghviksaghqaalunga mangteghamnun. 7Tamaaken apalluqluku whangamneng takupagningitamken. Legan tawanlluten naallghutesqigu qepghaghteka enkaam naallghulli. 8Whangallu umiilelguunga qelghikayugmeng enkaam asinganitunga umiilegma. Pilluwaghtenka asimnitut, ataasiq qelqumkun, ‘Aghulaqi’ aga aghulaqellequq. Ilanga pikumkun, ‘Tagi’ tagillequq. Qepghaghteka qelqumkun, ‘Una piightigu’, aga pilleqaa.”
9Jesus‑em nagalluku tawaten pillgha, allaaghlluwaghyagutkaa enkaam yulghuteghllaget maligtilghiit ellmineng pikii, “Ungipaatamsi, nallaataghsigatunga kitumeng alngunak talwa Israel‑mi, uutun yugtun ugpeqilleghtutkalghiimeng.”
10Kevgat uteghnighluteng centurion‑emem mangteghaanun esghaqaat qepghaghtelaagha naallghutngwaaghluni.
Jesus‑em Unguvaghtekanga Ugingigham Ighnegha
11Unaamingani Jesus aglaqaq neghllagmun atilqelghii Nain, maligsaaghtengitallu yulghuteghllagetlu maligtekaat. 12Kaataquqlu iteghviganun neghllagem, yuget aanutaqeftaat tuqukaq yuuk lliveghnaluku. Ugingigham kezemaghhaaftuq ighnegha, enkaam neghllagem yulghutngan maliglleghaataqeftaat aghnaq. 13Atanghem esghaghluku aghnaq nangllegyagulluku pikaa, “Qiyagpenang.” 14Taagken takuluku saaftekakek kevgusik enkaam kevgistet aghuliiqat. Taagken tuqukaq pikaa, “Nukalpigaq, ungipaatamken, unguvaa!” 15Tuqukaq aqumluni akuzinginaamaghmi pikaq enkaam Jesus‑em pegtekaa naanganun. 16Qamaglluteng yulghuteghllaget tallughyuguteghllakat, usuqegkaatlu Kiyaghneq, pikat, “Uuknaliqisteghllagem kaasimiinkut!” Whatenllu pikat, “Kiyaghneghem kayusighyaghtughii yuni!” 17Taana ungipaq mingitkaat Judea‑lqaaghaghmi, uvitanganilngughnunllu nunanun.
John‑em Paaptaayestem Kevgaqegkek Yugek Jesus‑mun
18John‑em maligsaaghtengita ellnganun apeghteqiit qamaglluki Jesus‑em apeghiightuqii. 19Enkaam John‑em maalghuggiinaak maligsaaghtegni tagsighlukek kevgaqegkakek Ataneghmun, aaptesqelluku whaten, “Elpengwaa taginaqnikaat, nalighmeng sighimakeltegguu kina alla tagiyaghqaq?”
20Yugek kaallutek Jesus pikaak, “John‑em Paaptaayestem kevgaqiinkung aaptesqelluten whaten, ‘Elpengwaa taginaqnikaat, nalighmeng sighimakeltegguu kina alla tagiyaghqaq?’”
21Tawani pilleghmi Jesus‑em naallghuquqii yulghutet qinuyugitneng, aqnighneghitneng, tughneghaat yuget ilungitneng aanestaqluki, ayaakatlu esghaasagutestaqluki. 22Enkaam kevgak kiimsiqakek, “Aglaghlutek John‑mun ungipaategnegu esghapakaghpetegnengllu nagatkaghpetegnengllu. Ayaakat esghaasagutut, piyugigasalghiit piyugyagutut, leprosy‑lguyalghiit ukmangiightii, tuuslaghyalghiit nagaquusagutut, tuqukaayalghiit unguvaghtestut unguvalleghmun, aklumalghiinunllu Pinilghii Ungipaq ungipaquq. 23Quyastekaaguq kitum alngunak taaqenghilkuminga ugpeqneghmeng!”
24John‑em kevgakek aghulaqsayek, Jesus‑em akuzitkegkaa John yulghuteghllagnun; “Kilgaanun piiqngafsi, sangwaa esghaghesteggu? Vegaaq anuqem ufsuguskangaa? 25Sangwaa esghaghyaghtuqaqesteggu? Yuuk aarraghngalghii? Tawaten aarraghngalghiitlu, aklungiteghllagetlu kiyaghtaqut umiilget nengitni. 26Sangwaa esghaghyaghtuqaqesteggu? Uuknaliqistaa? Aa‑a, ungipaatamsi, esghaqaghsi uuknaliqisteneng aangataghaghtuq. 27John‑nguuq Akuzitet Igaqegkat aapqaat,
‘Kiyaghneq piiq, Sivugpeni kayaglleqaqa ungipaghteka yataaghqesqelluku tuumkaghqan.’
28Ungipaatamsi, yugyaggaghneng allgeghaqelghiineng John aangelleghpigaaguq. Iwernga kina alngunak ukalighpigaq Ataneghpagullghani Kiyaghneghem John‑meng aangataghaghtuq.”
29(Qamaglluteng tamaakut yuget, talwa tax‑meng qerngughtistet, nagasamegteki Jesus‑em apeghtughillghi tuguklighiit Kiyaghneghem qelghusii elqughutnganiluki. Tawaten pikaagut qayughllak sivunghani tugukliqaqegkangit John‑em apeghtughillghi. Enkaam John‑mun paaptaayestekaalghiit. 30Iwernga Pharisees‑etlu apeghtughikayugetlu Liilightuusaneng tugukliimangitiit John‑em apeghtughillghi, enkaam ellnganun paaptaayesugumangitut. Tawaten pilleghmegteggun ighsakegkaqaat Kiyaghneghem uspeqellgha ellmeggnun.) 31Jesus‑em pikii, “Maaten kiyaghlleghhiit yuget tuguklighinghilnguut apeghtughillemnun, samun inglunnaqsingi? Natetat? 32Taghnughhaghestun ayuqut aqumuulluteng akilpegaghvigni, ilateng akilghuukangit whaten, ‘Qalghightaatamsi, tukaleganghitusi! Qiyiqutukut, qiyiqenghitusi!’ 33Elpesi maaten kiyaghlleghhiini taakustun taghnughhaghestun ayuqusi. John Paaptaayesta tagiiqngami neqekrangllaghtuumangituqlu meghumangituqlu wine‑meng enkaam pikaagusi, ‘Tughneghalguuq.’ 34Ighnegha Yugem tagiluni, neghelgusighiiqlu meghelgusighiiqlu yugneng enkaam pikaagusi, ‘Yuukqun taana esghaqaghteggu! Neghevalluuguq, meghevalluuguq, ilakumtaaqaatlu tax‑meng qerngughtistet, seghleghqestetlu!’ 35Naqamllu tamaakut apeghtuusamneng tuguklighilghiit kiyaghllequt pinitun. Tawaten pillghem ipapighqelleqaa apeghtuutkegkaqa Kiyaghneghem peghqinelqaa!”
Jesus Simon‑enkunilnguq Pharisee‑mi
36Ataasim Pharisee‑m Jesus neghyaghtiisqegkaa ellmeggnun. Enkaam Pharisee‑nkunun aglaghluni aqumegkaq neghnaluni. 37Tamaanteftuq neghllagmi aghnaq seghleghqesta. Nagaqughyamigu Jesus neghaqniluku Pharisee‑nkuni, kelqegkakek alabaster‑ek aqimleghutak akitupiglleghhiimeng tepengllaasimeng imalgek. 38Iteghluni nekevegkaq tunutangakun Jesus‑em itegaan. Qiyatkelluku qunimineng aghistekii itegii, enkaam nuyamineng sangighquqii. Taagken naaghaqluki, angighhegkii tepengllaasimeng. 39Neghyaghtiisqikam Pharisee‑m esghapagluku sumeghtaghaqaq, “Una yuuk uuknaliqistenguyaqumi, liisimaknayaghaa aghnaq kinangutanga, sastengutangallu saafqughaalghii ellnganeng, qayughllak seghleghqestenguuq.”
40Jesus‑em pikaa, “Simon, ungipaataghsugamken sameng.” Simon‑em aaptekaa, “Apeghtughista, sameng?”
41Jesus‑em pikaa, “Maalghuk yugek navghaamalghiik manimeng navghitikayugmeng. Aallgha navghaqaq 500 denarii‑meng, ilanga 50 denarii‑meng. 42Nalighhiinaagkenka llivikepagningitkiik navghatek enkaam navghitikam puygusqegkiik navghallghik. Naligkenka yugek piniqataghaghlleqagnegu?”
43Simon‑em kiimsiqaa, “Entaqun aangluku navghitkaan.” Jesus‑em pikaa, “Elqughaghtan.” 44Taagken qiivluku aghnaq Simon pikaa, “Esghaghsiguu una aghnaq? Iitghaqngama whavek meghmeng tuunellghitaghpenga iteganka ughviisqelluki. Iwernga uum aghnam iteganka ughvughii qunimineng, sangigtaqluki nuyamineng. 45Upughasimangitaghpenga naaghmeng, iwernga iitghutmineng aghnam aghuliighunneghitii naaghmineghmeng iteganka. 46Naasquqa mesiighmeng kuuvikellghitan, iwernga ellngan iteganka kuuvikii tepenglaasimeng. 47Ungipaatamken, seghevutellengut seghleghqellelghuteghllagi, tamaaken apalluqluku piniqellelegllaguuq. Tawateghpigaq kina alngunak seghevutellengevleghaqaq piniqellevleghallgaaguq.”
48Taagken Jesus‑em aghnaq pikaa, “Seghleghqelleghten seghevutellengumaat.”
49Taagken tipelegni ellnganeng aqumgalgusighilghiit aapqughaghutkat, “Kinangaawa una seghevutiiqelghii seghleghqelleghneng?”
50Jesus‑em aghnaq pikaa, “Ugpeqilleghpek yugulillengestaaten, aglaa nekeggmellelighluten.”
Currently Selected:
Luke 7: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
