Luke 5

Jesus‑em Maligsaaghteksuwhaaghi

1Ataasimi aghneghmi, Naayvam Gennesaret‑em esnengani, Jesus nekevghanguluku yuget kanglluqaghtekaat nagannaluki Kiyaghneghem Akuzitangi. 2Esghaqakek maalghuk angyak esnemi sayugngalghiik. Naqam yugit iqalleniightet aviiteftut, ughvughyaghtuumakangit negaghpateng. 3Uuglluni Simon‑em angyaanun, awavaghqaaghutesqegkaq esnemeng. Taagken aqumluni angyakun yuget apeghtuqii. 4Apeghtughineghmeng taaqsami, Simon pikaa, “Uusqallghanun awavaghluten negaghpagten ateghtiki naaptesqelluki.”

5Simon‑em pikaa, “Yuguniiq, unulqusiq iqalliniightaayaghtukut sakengellghitukut! Iwernga kayagtekevnga negaghpaget ateghnaqanka.” 6Legan ateghtiit naapqaghiighllakat repall piiguqestaghluteng lliiqat. 7Angyam aallghanilnguut ilateng apaqiit kayusighyaghtiisqelluteng. Kaasisteng angyak imiqagket esleqaghaghllukek repall kalefqaghtekat. 8Iwernga Simon Peter‑em esghaghyamigu allaaghlluwhaghtilleq, Jesus‑em sivungakun niinghulluni pikaa, “Ataneq, whangamnitegpenang qayughllak seghleghqestenguunga!”

9Simon‑enkut yukullghiit saghiighayukat naapqaghiilleghmeggneng, 10qepghalgutkeklu James‑enkuk John‑enkuk, Zebedee‑m ighneghqek.

Jesus‑em pikaa Simon, “Alingegpenang, whaken kenlekluku yugmeng naapsagunnaqnguuten.”

11Angyak quutmun sayuglukek, unitkiit sangwaat qamaglluki enkaam maligtekaat Jesus.

Jesus‑em Ukmangiqanga Yuuk Leper‑elek

12Jesus ilangitnisimaluku neghllaget, yuuk tamaanteftuq elngaatall leper‑eghllagngalghii. Esghaghyamigu Jesus, sivungakun niinghutkaq maniguutepiglluni pikaa, “Ataneq, piyukelqegkuvgu ukmangighnga.”

13Jesus‑em nengugluni saafsimaan pikaa, “Piyukelqaqa; ukmangiighten.” Tawaninginaq leprosy‑ngiitkaq. 14Jesus‑em ineghtengngwaaqaa, “Kina alngunak ungipaategpenaan, iwernga aglaa priest‑mun yuvghiighesqelluten. Taagken aghqerraaghhaaten Moses‑em qelghutellghatun ipapighqesqelluku ukmangiightellghen.”

15Iwernga Jesus wataqaaghaq ungipaqegkaat tamaghhaani, enkaam yulghuteghllaget takulaghaasimanginaqaat nagannaluku, naallghutesqellutengllu aqnighneghmeggneng. 16Iwernga kilgaanun awen aghulaqaqelghii yughaghnaluni.

Jesus‑em Naallghuskanga Uniiqaq Yuuk

17Ataasimi aghneghmi, Jesus apeghtughimaluku, tawani aqumgatnguftut Pharisees‑etlu apeghtughikaygetlu Liilightuusaneng. Taakut tagilaghaatkaaftut tamaghhiitneng Galilee‑m nengitneng, Judea‑m nengitneng, Jerusalem‑emengllu. Atanghem aghtughyaghqaanghillgha naallghutimun ellnganilguq. 18Ilangita yuget tagitkaat ellnganun uniiqaq yuuk allighaakun. Mangteghamun itghutfigkameng ivaghikat, Jesus‑em manungakun llinaluku. 19Iwernga itghunneghmeng aghtuqaat qayughllak yuget kanglluutngaghllagulghiit, enkaam mangtegham qaaynganun mayuutkaat. Tawani tile‑em ilangi iqiqughluki, reghighulluku ukigtekaat allighaakun akulngitnun yuget manunganilnguut Jesus‑em. 20Liisimakegkangi ugpeqillelgulghiit enkaam yuuk pikaa, “Seghevutanka seghleghqelleghten.”

21Apeghtughikayuget Liilightuusaneng, Pharisees‑etlu umyugamegteggun aapqughaaghutkat, “Kingangaawa una yuuk Kiyaghneghukallghuughunilghii? Kiyaghneghhiinaaguq seghevutiyaghqaq seghleghqelleghneng.”

22Jesus‑em liisimakegkangi sumeghtaghallghit enkaam aaptekii, “Sangan tawaten sumeghtaghaghetsi? 23Nalikek whaten pillghek piyaqniitak, ‘Seghleghqelleghten seghevutut’, nalighmeng, ‘Makelluten piyugi’? 24Iwernga elpesinun liisimakesugaqa Ighnegha Yugem aghtughyaghqaanghillelguuq nunami seghevutiyaghqaaluni seghleghqelleghneng.” Taagken pikaa uniiqaayalghii yuuk, “Ungipaatamken, maketen, tuguluku allighan, elpesinun aglaa!”

25Yulghutet esghaamanghitni tawaninginaq yuuk makelluni, allighani tuguluku ellmeggnun aglaqaq, usuqumaan Kiyaghneq. 26Qamaglluteng yulghutet saghiighayugllakat, usuqegkaatlu Kiyaghneq, pikat, “Aghneghmi whani elngaatall esghapagtukut allaaghlluwhaghmeng!”

Jesus Maligtesqelghii Levi‑mun

27Tawaten pillghet kingungitneng, Jesus navek piluni esghaqaa tax‑meng qerngughtista, aatgha Levi. Aqumgaftuq tax‑meng qerngughtivigmini, pikaa, “Maligtinga.” 28Nekevluni sangwaa qamaglluku unilluku maligtekaa.

29Taagken mulunghituq Levi‑m ellmeggni neqenghaghquteghllakaa Jesus. Tawanteftut tax‑meng qerngughtistelghutetlu ilangitlu yuget, aqumelgusiqiit tipelegni. 30Pharisees‑etlu apeghtughistengitlu Liilightuusat qikeghqukat maligsaaghtenganun, “Sangan neghelgusighaqestekillu meghelgusighaqestekillu tax‑meng qerngughtistetlu seghleghqestetlu?”

31Jesus‑em pikii, “Yugunqegtat aghallegtaghsughniitut iwerngaqun tamaakut qinuyulghiit. 32Tagingunghitunga tagsiqlighnaluki elqughutngalghiit yuget. Iwernga taginguunga seghleghqestet avuteghqelluki seghleghqennaniisqelluki.”

Jesus‑em Apeghtuusaqegkanga Fast‑elleq

33Ilangita yuget Jesus pikaat, “John‑em maligsaaghtengi awen fast‑aaqutlu yughaghaqutlu. Pharisees‑etlu maligsaaghtengit tawaten piiqut. Iwernga elpek maligsaaghteten neghaqutlu meghaqutlu.”

34Jesus‑em aaptekii, “Nengughhnaqelghiik aqelqiik fast‑elleqaat nulightughnaqelghii ellngitnilluku? 35Iwernga pilleghqaq kaallequq nulightughnaqelghii ellngitneng iqilleqaat, elngaatall tawani fast‑ellequt.”

36Enkaamllu Jesus‑em ungipaghaatkii, “Kitum alngunak ikuviknaanghitaak qaaslighraghaak, ilaaghnalukek qaaslilugek. Tawaten pikumikek piiglleqaak qaaslighraghaak enkaam nutaghaq ilaaghutkaa allangumighullequq. 37Nalighmeng kitum alngunak awataghpaluget imighnaanghitii wine‑eghraghaghmeng. Imiqumiki awataghpaluget quupaghllequt enkaam wine‑eghraghaq sakusiiqellequq. Awataghpalugetlu atuuyaghqaananighllequt. 38Itupill wine‑eghraghaq kuuvyaghqaaguq awataghpagraghaghmun! 39Kina alngunak wine‑elugmeng meghluni, meghyugnaanghituq wine‑eghraghaghmeng qayughllak whaten piyaghqaaguq, ‘Wine‑eluk neqnighataghaghtuq wine‑eghraghaghmeng.’”

Currently Selected:

Luke 5: ess

Highlight

Copy