Luke 10

Jesus‑em Kayagtekangi 72‑ghyaget Maligsaaghtet

1Taam kingunganeng, Atanghem maligsaaghtemineng nakmikegkii 72‑ghyaget yuget. Takuughaghyaghqaminun kayagtekii malghukaghtiita igleghtekestiisqelluki. 2Pikii, “Uglalghiim yugem ugpeqsugaqiit Pinilghiit Ungipat. Tamaakunguut usputngalghiit nunivagseghanun unataghyaqleggiinaaghtekat. Taawanginaq palapigtut qepghaghtet. Enkaangam yughaghtek Atanghanun unataghyaghqat kayagtisqelluku qepghaghtekaghqameng unataghyaghqaanun. 3Aghulaqitek! Taawa kayagtamsi penniighaghaastun ayuqlusi qungangitnun amaat. 4Kelqegpenasi manimeng, aqeftaghaaghmeng, simiitkaghqameng kamegmeng. Tumeni aghuliighlusi kimaawisightughpenasi aleghqughyaghqaaluki yuget. 5Iteneghpesini mangteghanun, sivuklusi whaten piiqiteki, ‘Kiyaghneghem nekeggmellelisilli!’ 6Mangtegham yugan upughaskangisi nekeggmellelighluni taawa Kiyaghneghem nekeggmellelilleqii. Iwernga upughanneghilkangisi, Kiyaghneghem nekeggmellelgusnaanghitii. 7Tawantaqitek ataasimi mangteghami, neghaqluki sangwaat upughatusiit. Tawaten piiqitek qayughllak qepghaghta akileghtuusangaquq qepghalleghminun. Tukughpesineng aanaqlusi kinkunun nuugtaataghpenasi. 8Kaanneghpesini nenun, tugukliqangisi upughatusiit neqet neghaqiteki. 9Naallghuqughteki qinuyugtiighit, whatenllu piiqluki, ‘Ataneghpagullgha Kiyaghneghem whaa maantuq.’ 10Iwernga kaanneghpesini nenun, tuguklinghilkangisi, tuumngitnun aglaghlusi yugtuqami whaten pilghaasi, 11‘Talwa nunagpesi pagulanga itegamteggun nevegkaq paallgaghput. Tawaten piikut kelguviknalusi anaggullghhiisi ighsakelleghpesigun Kiyaghneghem ungipaa. Iwernga neqamikiteggu Ataneghpagullgha Kiyaghneghem whaa maantuq!’ 12Ungipaatamsi, Nanqigtillghem Aghneghani Sodom‑eghmiit aghyuulleghqestaaghaayaghqaagut taam nem yuganeng.

Jesus‑em Kelengasaaqangi Ugpeqaanghilnguut

13“Seghleghwaaghunaqnguusi, Chorazin‑eghmiini! Seghleghwaaghunaqnguusi, Bethsaida‑ghmiini! Elpesini allaaghlluwaghtilleghllaget apeghiiqat pikaayaqata Tyre‑millu Sidon‑millu, yugit avuteghqegkaanayaghtut seghleghqennanighnayaghtut. Tamaaken apalluqluku aalluteng suvinalghiimeng qiipaghaghqameng aqumnayaghtut panetelleghteggun. 14Nanqigtillghem Aghneghani, Tyre‑ghmiitlu Sidon‑eghmiitlu aghyuulleghqestaaghaayaghqaagut elpesineng. 15Enkaam elpesi, Capernaum‑eghmiini! Qaywa anglisteghllagyaghngaaghpesi elpesineng katam, repall sumeghpesini usuqellengelleqnilusi qilagmi, yeghlegi ukiglleqiisi hell‑mun!”

16Maligsaaghteni Jesus‑em pikii, “Kitum alngunak nagaskumisi, nagalleqaatnga whanga. Kitum alngunak ighsakegkumisi, ighsakelleqaatnga whanga, enkaam kitum alngunak ighsakegkuminga, ighsakelleqaat kayagtisteka.”

Uteghnillghat 72‑ghyaget Maligsaaghtet

17Tagtalmi taakwani 72‑ghyaget maligsaaghtet uteghniqat quyaghllagumaghmeng. Jesus pikaat, “Ataneq, talwa tughneghaat qaatkaqiinkut ateghpegun qelenemteki!”

18Jesus‑em pikii, “Aa‑a, esghaamaaqa Tughneghaq, qilagmeng ifkalghii nighwaagpagtastun. 19Nagatek! Aghtughyaghqaanghillelisimaamsi tuutesqelluki nemeghyat, scorpion‑et, kayaalqesqellukillu qamaglluki aghtughyaghqaanghillghi anguyagem. Enkaam saam alngunak aqnighhnaanghitiisi. 20Itagnalghiinguuq quyalghiisi qayughllak tughneghaat qaatkegkangisi, iwernga quyaaghataghaghtek qayughllak atesi igaqelghiit qilagmi.”

Jesus Quyaghllalghii

21Tawani pilleghmi Agleghnalghiim Taghnegham Jesus quyastekaa. Pikaq, “Ataay, Atangha qilagemllu nunamllu, iqamsiqayugvikamken! Elpek tamaakut talughtaten peghqinelghiinengllu liitkanengllu, naqam liitestaten taghnughhaghestun ayuqelghiinun. Aa‑a, Ataay, taananguuq piyukellghen.”

22Taagken Jesus‑em pikii yuget, “Atama tuunumaanga sameng tamaghhaaneng. Kitum alngunak nallukaa Ighneq kinangutanga, iwerngaqun Atam. Kitum alngunak nallukaa Ata kinangutanga, iwerngaqun Ighneghem. Ighneghemllu liitesleqaa Ata kitumun alngunak nakmikegkaminun.” 23Taagken qiivluki maligsaaghteni, ellnginiit pikii, “Quyastekaagusi esghaallghiisi sameng esghaqaghpesineng! 24Ungipaatamsi, uuknaliqistelghutetlu umiilgetlu esghaghyukiit esghaghasi, esghaamangilkangit. Nagaqughyukiit nagaqughasi, nagaquumangilkangit.”

Ungipaghaan Nangllegtalghii Samaria‑ghmii

25Apeghtughikayugem Liilightuusaneng takuluku anagvigighnaluku aaptekaa, “Apeghtughista, naten salunga allgeghhnayaghsikun kenlengilnguq unguvalleq?”

26Jesus‑em kiimsiqaa, “Sangwaa Liilightuusani igaqngaa? Naten liigikaqsiki atightuneghpeki?”

27Yugem kiimsiqaa, “ ‘Piniqsaghqaqan Ataneq Kiyaghneghen, qamaglluku ilugpegun, qamaglluku unguvasighpegun, qamaglluku iknaqelleghpegun, qamaglluku umyugaghpegun.’ Enkaam, ‘Piniqsaghqaqan yulguten elpeneng katam piniqelleghpetun.’”

28Jesus‑em pikaa, “Elqughaghtan. Tawaten pi enkaam kenlengilngughmeng unguvallengellequten.”

29Iwernga apeghtughikayuk Liilightuusaneng liigikesukaq Jesus‑mun qaatkutngwaaghluni ayuqniluni Liilightuusanun, enkaam aaptekaa, “Kinangaawa yulgutka?”

30Jesus‑em kiimsiqaa, “Taawanguq yuuk Jerusalem‑emeng ukikaq Jericho‑mun. Wayaghniightet sughugluku, qesugughluki aatkii, anagulqaat. Taagken tuqutevzighluku unitkaat. 31Enraqlu priest‑a taakwagun tumetgun igleghtekaq. Iwernga esghaghyamigu yuuk naghughtekaa tumet inglungitgun. 32Mulugpenani Levite‑a kaalluni, esghaghluku, ellnganllu naghughtekaa tumet inglungitgun. 33Iwernga Samaria‑ghmii, taakwagun tumetgun igleghangulghii. Kaalluku esghaghyamigu nanglegyagutkaa. 34Takuluku kiingi mesiighmengllu wine‑mengllu ughvughteghluki, qantaghtuqii. Taagken donkey‑minun qaakluku aglaatkaa aqelqalghutamun, tawani aflengakegkaa. 35Unaamingani tugulukek maalghuk denarii‑ek, tuunutkellukek aqelqalghutam aflengakistenganun pikaa, ‘Aflengakaghtigu. Kayusiitaghaamakuvgu uteghniquma llivikelleqamken.’”

36Taagken Jesus‑em aaptekaa, “Sumeghpeni taakuneng pingayuneng naliit yulgutepiigufta yugmun wayaghniightet amyuutkegkiitnun?”

37Apeghtughikayugem Liilightuusaneng kiimsiqaa, “Taananguuq nangllekikaq yugmun.” Jesus‑em pikaa, “Aghulaqluten, elpeklu tawaten pi.”

Jesus‑em Laalighfikegkek Martha‑nkuk Mary‑nkuk

38Jesus‑enkut maligsaaghtekullghiit igleghutkelluku kaatkat nengiighhaghmun. Tamaanteftuq aghnaq, aatgha Martha, Jesus‑enkut maligsaaghtekullghiit upughatkii ellmeggnitesqelluki. 39Anglegutangan aatgha Mary‑nguftuq; aqumluni Jesus‑em itegaan manungakun nagatkaa apeghtughilghii. 40Iwernga Martha‑m yataaghquteghllagukangi aqelqani neghyaghqameng, enkaam Jesus takuluku pikaa, “Ataneq, waakenghisiguu anglegutma ellnginaghma qepghaghtestekanganga? Kayusiitesqaghtinga!”

41Atanghem pikaa, “Martha, Martha, uglalghiimeng sumeghyaliiqutenllu seghleliighaqutenllu 42iwernga ataasighhaaguq aklunalghii. Mary‑m nakmikumaa taana pinillgha, ellnganeng iqisaghqaanghituq.”

Currently Selected:

Luke 10: ess

Highlight

Copy