John 16

1“Ungipaatamsi tamaaken iilqayufqaafsi pisqellusi amyuutkegkangisi. 2Yuget iqitesleqiisi synagogue‑meggneng. Aa‑a, pilleghqaq taginguuq, kitum alngunak tuquskumisi sumeghtaghaghyaghqaaguq qepghaatnguniluku Kiyaghneq. 3Tawaten piyaghqaqiisi qayughllak liisimangilkanginkung Atakullghiigni. 4Ungipaatamsi tamaaken maaten pilleghqaq kaaskan neqamikesqelluki aapqanka. Ungipaasimangitamsi tamaaken piinlighyuwhaalleghmi maligsaaghtengughtaqngafsi qayughllak elpesinilnguunga.

Qepghallgha Agleghnalghiim Taghnegham

5“Maaten uteghnighnaqnguunga Kayagtistemnun; iwernga nalighpesi aapneghitaghpesinga whaten, ‘Navek pinaqsin?’ 6Qivghughllaguusi qayughllak ungipaaskemsi tamaaken. 7Iwernga ungipaannaqamsi ipapigmeng: pinighataghaghyaghqaagusi aghulaqegkuma, qayughllak kayagfikelleqamsi Kayutkaghqagneng. Aghulaqenghilkuma Kayutkaghqak taginaanghituk elpesinun. 8Kayutek tagikumek liigilliighqelleqii nunam yugi seghleghqelleghmeng, elqughutngalleghmeng, nanqigtilleghmeng. 9Liigikesleqii seghleghqestengutangi, qayughllak whanga ugpeqigalkangatnga. 10Liigikesleqaa elqughutngalleq, qayughllak aglaghnaqelghiinga Atamun enkaam esghaghnanighlleqaghpesinga. 11Liigikesleqaa nanqigtelleq, qayughllak igleghutistenga nunam uum nanqigtellengwaaghluni ayuquq aghyuughyaghqaaluni.

12“Paninang apeghyaghqaghllaguunga elpesinun iwernga salin liigikepagningitasi. 13Iwernga Taghneghak apeghtughilghiik Kiyaghneghem ipapillghaneng, tagikumi maghyaghqughlleqiisi ipapilleperegwaaghmun. Akuzitkennaanghitii ellmi katam akuzitni, iwernga akuzillequq nagaquqaghhiinaghmineng. Enkaam ungipaalleqiisi sangwaa sayaghqaatanga taakwaningani. 14Quulvaghlleqaanga qayughllak tuguklighluki whanga akuzitenka apeghlleqii elpesinun. 15Qamagtengngwaaghluku Atam pinga whanga pikaqa. Tamaaken apalluqluku piinga, Taghnegham tuguklighluki tuunegkanka apeghlleqii elpesinun.

Qivghulleq Quyallghughsaghqaq

16“Qantaghaqun esghaghnanighlleqaghpesinga iwernga mulugpenasi esghanqiglleqaghpesinga.” 17Ilangita maligsaaghtet ilateng aaptekiit, “Sameng piinkut Jesus‑em whaten pilleghmikun, ‘Qantaghaqun esghaghnanighlleqaghpesinga iwernga mulugpenasi esghanqiglleqaghpesinga’? Taanallu sangaawa whaten pillgha, ‘Qayughllak aglaghnaqunga Atamun’?” 18Pikat, “Sameng pii tawaten pilleghmikun, ‘Qantaghaqun’? Nallukaghput sameng pisiitanga.” 19Jesus‑em liisimakegkangi aapsukangat enkaam pikii, “Elpesineng aapqughwaaghusiqestegguu sameng pitka whaten pillemkun, ‘Qantaghaqun esghaghnanighlleqaghpesinga iwernga mulugpenasi esghanqiglleqaghpesinga?’ 20Ipa ungipaatamsi, qiyayaghqaagusillu qivghuyaghqaagusillu iwernga nunam yugi quyayaghqaagut. Elpesi qivghuyaghqaagusi iwernga qivghullesi quyallghughsaghqaagut. 21Aghnaq ighniyuneghmini ikfiqaquq, qayughllak ighnilleghqaa kaallghii. Iwernga ighniyami puygaa ikfiqelleni, qayughllak quyakegkanga taghnughhaq allgelghii nunamun. 22Qivghunguusi maaten iwernga esghaghlleqamsi allameng enkaam quyallequsi. Kitum alngunak iqinnaanghitaa quyalleghsi.

23“Tawani aghneghmi aapnaanghitaghpesinga sameng alngunak. Ipa ungipaatamsi, Atama tuunelleqiisi sameng alngunak aaptekufsi Atemkun. 24Whavemun kenlanga aapsigatusi sameng alngunak Atemkun. Aaptek allgeghullequsi enkaam quyalleghsi iighwighllequq.

Kayaalqiilleq

25“Ungipaatkaqamsi tamaakuneng ungipaghaatetgun. Iwernga ungipaghaatneng atuqnanilleghqaqa kaallequq enkaam whateghlluwaaq apeghyagulleqaqa Ata elpesinun. 26Taana pilleghqaq kaaskan elpesineng katam aapleghhaasi Atemkun. Enkaam ungipaatamsi whanga aaptunnanighlleqamsi Atamun, 27qayughllak Atam ellmineng katam piniqiisi. Piniqiisi qayughllak piniqegkefsinga, ugpeqegkesillu Atameng tagikaatka. 28Atameng tagikaagunga nunamun. Maaten unilluku nuna aglaghnaqunga Atamun.”

29Maligsaaghtengita pikaat Jesus, “Taawa aleghqughaghpekut whateghlluwaaq atuqegpenaki ungipaghaatet! 30Whaa liitamken sangwaa tamaghhaan liisimakeftan. Liisimakaqaten yugem aapsaghqii talwa aaptestegpenaki enkaangam kitum alngunak aapneghiteghngaaghmiten sameng alngunak ayuquten. Tamaaken apalluqluku ugpeqamken Kiyaghneghmeng tagikaaten.” 31Jesus‑em pikii, “Qenwatlu ugpeghetsii? 32Mingitelleghqaghsi kaasaghtughtuq, talwa whaa kaalluni ayuquq. Qamagllusi negpesinun aglaghtuullequsi, unilleqaghpesinga ellnginaghhaghma. Iwernga paninang ellnginaghhaanaanghitunga qayughllak Ata whangamnilnguq. 33Ungipaatamsi tamaaken nekeggmellelgusqellusi whangamkun. Nunami whani seghleliighllequsi iwernga ilutulusi qayughllak kayaallqegkaqaqa nuna.”

Currently Selected:

John 16: ess

Highlight

Copy