John 15

Jesus Vine‑epik

1“Whanga vine‑epiguunga, Ataka piitesighaghtenguuq. 2Qamaglluki avayanka piitestingigalnguut ikughaqii. Qamaglluki avayat piitestikayuget kepughvikaqii piitestighataghiisqelluki. 3Elpesi ukmangighwaaghlusi ayuqusi akuzitetgun akuzitkegkamkun elpesinun. 4Whangamnitekestaghtek whanga elpesinitellemtun. Avayaraaghinaq piitestinaanghituq wetkuqun vine‑meskumi. Tawatetusi ellnginaghpesi piitestinaanghitusi wetkuqun whangamnitekestaqufsi.

5“Whanga vine‑nguunga, elpesi avayaagusi. Kina alngunak piitesqughllagyaghqaaguq whangamnitekestaqumi, whanga ellngani. Iwernga whangangunasi sanaanghitusi. 6Kina alngunak whangamninneghilkumi avayastun ayuquq eglluni paliqaq. Tawatelnguut avayat qerngughlluki paneghtaqiit. 7Whangamnitekestaqufsi, akuzitenka elpesinitestekufsiki aapleghhaasi sameng alngunak piyukegkaghpesineng enkaam allgeghullequsi. 8Ataka usuqellengellequq piitesqughllakufsi, liigikeslequsillu whangamnun maligsaaghtekutsi. 9Piniqamsi katam Atam piniqellghatun whanga. Piniqellemnitekestaghtek. 10Qaatkegkufsiki qelghusanka piniqellemnitekestaghllequsi tawateghpigaq Atama piniqellghanitellemtun qaatkutellemkun qelghusaanun.

11“Ungipaatamsi tamaaken quyamalqa elpesinitesqelluku, quyamalleghsi iighwiisqelluku. 12Unanguuq qelghusaqa elpesinun: piniqutullusi whanga piniqellemtun elpesi. 13Yugem tuqumatkegkumiki ilakumtaani piniqellgha aangepigtuq. Kina alla piniqellghituq taameng aangataghalghiimeng. 14Ilakumtaaqaghpesinga, qelghutkanka qaatkegkufsiki. 15Whaken kenlekluku qepghaghtengulusi atighnaanghitamsi, qayughllak qepghaghtem nallukaa umiileni saaqutanga. Iwernga maaten atighamsi ilakumtaaghmeng, qayughllak liitestekegka elpesinun qamaglluku nagatkaqa Atamneng. 16Elpesi nakmikumangitaghpesinga, whanga nakmikegkaqamsi, qepghaqalitamsillu. Enkaam aghulaqlusi piitesqughtek, piitesqulleghsi nagneghasqesuwaqa. Tawaten pikufsi Atam tuunelleqiisi sameng alngunak aaptekufsi Atemkun. 17Una qelghusaqaqa, piniqutullusi.”

Jesus‑em Kelengasaaqangi Maligsaaghteni

18“Nunam yugan ugumikegkangisi, neqamikluku whanga sivuklunga ugumikegkaqaatnga. 19Nunam piksaqumisi, yugan piniqnayaghiisi piniqututelleghmegestun. Iwernga whanga nakmikegkaqamsi whaken nunameng enkaam nunam pikenghitiisi. Tamaaken apalluqluku nunam yugan ugumikiisi. 20Neqamikluku aapqaqa elpesinun: Qepghaghta aangataghanghituq umiilegmineng. Amyuutkumakumegtengnga elpesillu amyuutkelleqiisi. Qaatkumakumegteki apeghtuusanka, elpesillu apeghtuusasi qaatkelleqiit. 21Tawaten pilleqiisi whanga apalluqlunga qayughllak nallukaat Kayagtisteka. 22Tagilunga aleghquumangisaqumki liinnayanghitut seghleghqestengutseng. Iwernga whaa anagniilqavigiitii seghleghqelleghmeggneng. 23Kitum ugumikegkuminga, ugumikaallu Ataka. 24Akulngitni allaaghlluwhaghtiighaataqaagunga kitum alngunak pingigalkanganeng. Esghapakaqeghngaaghmegteki allaaghlluwhaghtillghenka paninang ugpeqellghitaatnga, ugumikiinkung Atakullghiigni enkaam seghleghqestenguut nanqigtellengyaghqat. 25Tawaten pilleghmegteggun apeghiiqaqaat Akuzitet Igaqegkat whaten pillghat, ‘Ugumikaatnga apallungunaan.’

26“Kayutek kayaglleqagka elpesinun, Atameng pinguuk. Taghneghaaguk apeghtughiyaghqak Kiyaghneghem ipapillghaneng. Tagikumi ungipaqelleqaanga. 27Elpesillu ungipaqelleqaghpesinga yugnun, qayughllak whangamnitkaalghiisi qepghaghyuwhaallghaneng ima.

Currently Selected:

John 15: ess

Highlight

Copy