John 14

Jesus Tuumnguuq Atamun

1Jesus pilaataqaq, “Qaamnasi seghleliightestegpenaki, sighimakiteggu Kiyaghneq, sighimakitengnga whangallu. 2Uglaapigtuq nekaghqaq Atama mangteghaani enkaam yataaghqusaghtughnaqamsi nekaghqameng. Tawatenneghisaqan ungipaannayanghitamsi. 3Yataaghqunneghmeng apeghiiqumsi taginqigllunga tuguklighlleqamsi, whangamnitesqellusi kiyaghfimni. 4Liisimakaghsi tuma takunaqegkegka.” 5Thomas‑em pikaa Jesus, “Ataneq, nallukaghput navek pinaquten enkaam natenꞌngam liisimakelleqesteggu tuma?” 6Jesus‑em kiimsiqaa, “Whanga tuumnguunga, ipapillghuunga, unguvallghuunga. Kina alngunak Atamun aglaghnaanghituq wetqukun whangamkun. 7Liisimakngwaaghyaqufsinga, liisimaknayaghaghsi Atakallu. Iwernga whaken kenlanga liitaghsillu esghaghaghsillu.”

8Philip‑em pikaa, “Ataneq, kelgutigu Ata whangkunnun enkaam itagnaghilta.” 9Jesus‑em pikaa, “Philip, elpesinitunga qavngarugllaggaaneng, taawaa nallukaqsingaa? Kitum esghaamakuminga, esghaqaqaallu Ata. Enkaam sangavek pizin, ‘Kelgutigu Ata whangkunnun’? 10Ugpeqenghistengngaa Atam ilunganilnguunga, Ata whanga ilumni? Akuzitenka whanga katam akuzitkenghitanka. Ata ilumnilnguq qepghaghaquq whangamkun. 11Ugpeqitengnga Atam ilunganinnilunga pilghiinga, Atallu ilumninnikegka. Nalighmeng ugpeqitengnga allaaghlluwhaghtillghenka apalluqluki. 12Ipa ungipaatamsi, kitum ugpeqegkuminga, taakut ataasit qepghaqanka pilleqii. Talwa aangataghalghiit tamaakuneng pilleqii qayughllak aglaghnaqunga Atamun. 13Aaptekufsi sameng alngunak Atemkun legan pilleqaqa, Atam aangelleghllaga kelgutesqelluku Ighneghqun. 14Sameng alngunak aaptekufsinga Atemkun pilleqaqa.

Akequsaqegkak Agleghnalghiik Taghneghak

15“Piniqegkufsinga qaatkelleqasi qelghusanka. 16Aapleqaqa Ata tuunesqellusi allaneng Kayutkaghqameng, enkaam tuunelleqiisi Kayutkaghqameng elpesinisaghqameng quunperugllak. 17Taakuk Kayutek Taghneghaaguk apeghtughlleqiisi Kiyaghneghem ipapillghaneng. Nunam yugan tuguklighnaanghitaa qayughllak esghiigalkanga talwa nallukegkanga. Iwernga elpesi liisimakaghsi qayughllak elpesinituq, ilugpesinisaghqaaguqlu.

18“Uninnaanghitamsi ellnginaghhaghpesi yaywaalistun. Taginqigllequnga elpesinun. 19Maateqwaaqun nunam yugan esghaghnanighnaqaatnga, iwernga elpesi esghaghlleqaghpesinga, qayughllak unguvalghiinga, elpesillu unguvallequsi. 20Enkaam tawani aghneghmi unguvaghtellemni liilleqaghsi Atama ilunganitulka, elpesillu ilumnitelleghsi, whangallu ilugpesinitulka.

21“Kitum tugukliqumiki qelghusanka, qaatkegkumikillu, piniqistekaqa, Atamallu piniqelleqaa. Whangallu piniqelleqaqa, liiteslequngallu ellnganun.” 22Taagken Judas‑em pikaa, (Judas Iscariot‑ngunghilnguum) “Ataneq, sangavek liitesnaqsin whangkunnun, naqam nunam yuganun liitestegpenang?” 23Jesus‑em kiimsiqaa, “Kitum piniqegkuminga qaatkelleqii apeghtuusanka. Atama piniqelleqaa enkaam Atakullghiigni takuluku kiyaghfikelleqaghpung. 24Kitum piniqenghilkuminga qaatkennaanghitii apeghtuusanka. Apeghtuusat nagatkesi whangamneng pingunghitut, Atameng pinguut Kayagtistemneng.

25“Ungipaatamsi tamaaken elpesinillunga. 26Kayutem apeghtughlleqiisi sameng tamaghhaaneng. Neqaghtesleqii qamaglluki tamaakut aapqanka elpesinun. Taakuk Kayutek Agleghnalghiinguuk Taghneghak, Atam kayagsaghqakek Atemkun.

27“Univikamsi nekeggmelleghmeng. Nekeggmelqa tuunaqa elpesinun. Nunam tuunellghatun tuuneghitamsi. Enkaam ilusi seghleliightestegpenaki talwa alingegpenasi. 28Nagatkaqaghpesinga whaten pilghiinga, ‘Aghulaqnaqunga iwernga taginqigllequnga elpesinun.’ Piniqegkaqsaqufsinga quyanayaghtusi ungipaataqngamsi Atamun aglaghnaqnilunga, qayughllak aangeghllagtuq whangamneng. 29Whaa ungipaatamsi taagken sivutghulluku pilleghqaa enkaam apeghiiqan ugpeghllequsi. 30Aleghqughnanighyaghtungestaghamsi, qayughllak igleghutistenga nunam uum taginguuq. Aghtughyaghqaanghillghituq whangamnun, 31iwernga Atam qelghutkii pisqellghwaaghatun atuqaqanka nunam yuganun liitesqelluku piniqilqa Atamun. Nekevitek, aghulaqelta.”

Currently Selected:

John 14: ess

Highlight

Copy