John 13

Jesus‑em Ughvughtuqangi Maligsaaghtemi Itegiit

1Ataasiightekaq aghneq Passover‑em Neqenghaghqelleghqaanun. Jesus‑em liisimakegkanga qantaghaqun Atamun aglalleghqani unilluku una nuna. Quunpeng piniqegkaqii tamaakut ellmi pini nunamelnguut, piniqegkaqii kenlemun.

2Tawani ighivgaghmi Jesus‑enkut maligsaaghtekullghiit qerngughutkat neghnaluteng. Tughneghaam apeghiiqaa sumeghtaghaatkesqelleq Judas Iscariot‑mun uveghpagutesqelluku Jesus. (Judas ighneqegkanga Simon‑em.) 3Jesus‑em liisimakegkanga Atam tuunegkaqegkanga aghtughyaghqaanghilleghmeng samun tamaghhaanun. Liisimakegkangallu Kiyaghneghmeng pingutni, aglalleghqanillu Kiyaghneghmun. 4Neghuutnguluteng tawani Jesus nekevluni, qaasliit aatkani mataghqughluki, veglluk qukamikun qillghutkaa. 5Taagken aghmigusik meghmeng imighlukek maligsaaghtemi itegiit ughvughtuqii, qukaminilngughmeng vegllugmeng sangigtaqluki. 6Jesus‑em kaatkaa Simon Peter, Peter‑em aaptekaa, “Ataneq, iteganka ughvughnaqsikii?” 7Jesus‑em kiimsiqaa, “Liigiknaanghitan saaqutka maaten iwernga taakwaningani liigikellequten.” 8Peter‑em pikaa, “Iteganka ughvughnaanghitngwaaghaten.” Jesus‑em pikaa, “Ughvunghilkumki itegaghten, maligsaaghteknanighlleqamken.” 9Simon Peter‑em pikaa, “Ataneq, naqam iteganka ughvuneghmeng taaqegkufki iiggenkallu naasquqallu pinaketen.” 10Jesus‑em pikaa, “Yuuk ughvughqenneghmini iqangiitaqaa, itegaghhiinii ughvughyaghqaawaqut qagani igleghlluni iteneghmini. Qamagllusi iqangitusi, iwerngaqun kina ataasiq.” 11Jesus‑em liisimakegkanga kinangutanga uveghpagutiyaghqaq ellmineng. Tamaaken apalluqluku whaten pikaalghii, “Qamagllusi iqangitusi, iwerngaqun kina ataasiq.”

12Taaqsamiki itegiit ughvughtuneghmeng qaasliit aatkani aalluki aqumenqiglluni aaptekii, “Liigikenghistegguu taana ughvughtughilqa itegaghpesineng? 13Tuqlughaqaghpesinga Apeghtughistemengllu, Ataneghmengllu, elqughaghtaqaghpesinga, qayughllak tawatetunga. 14Whanga, Ataneghpesini, Apeghtughistegpesini ughvuumakumki itegasi elpesillu ughvughyaghqaqasi ilagpesi itegiit. 15Tawaten piinga usputaqesqelluku elpesinun. Enkaam elpesillu piiqitek whanga pillemtun elpesinun. 16Ipa ungipaatamsi, qepghaghta aangataghanghituq umiilegmineng, ungipaghtallu aangataghanghituq kayagtistemineng. 17Liisimakegkufsiki tamaakut quyallequsi tawaten pikufsi.

Jesus‑em Aapqanga Uveghpagutelleghqani

18“Akuzitkengngunghitamsi qamagllusi. Liisimakanka natetulangi nakmikegkanka. Iwernga apeghiighyaghqaaguq Akuzitnilnguq Igaqegkani whaten pilleq, ‘Yugem neghelgusighikam whangamneng uveghpagutkaqaanga’. 19Ungipaatamsi taana sivutghulluku, enkaam apeghiiqan ugpeqelleqaghpesinga whanga ellnganguunga. 20Ipa ungipaatamsi, kitum alngunak tugukliqumigu kayagtekaqa, whangallu tuguklighlleqaanga. Enkaam kitum alngunak tugukliquminga, tuguklighlleqaa Kayagtikaq whangamneng.”

21Jesus‑em apeghluku uveghpagutelleghqani elngaatall qaamggurugllak qivghughllakaq, pikii, “Ipa ungipaatamsi, nalighpesi uveghpagunnaqngwaanga.” 22Maligsaaghtet esghaqaqutkat ellmeggneng qayughllak nalluneqsukegkaat kina pitanga. 23Ataasiq maligsaaghta piniqegkaa Jesus‑em aqumgalghii saaghwani. 24Simon Peter‑em apaquluku taana maligsaaghta aaptesqegkaa kina piiqutanga. 25Taam maligsaaghtem mallegluni Jesus‑mun aaptekaa, “Ataneq, kinangaawa uveghpagutinaqelghii elpeneng?” 26Jesus‑em kiimsiqaa, “Nepluku neqekrangllaq qayuusimun tuunelleqaqa uveghpagutiyaghqamun whangamneng.” Enkaam Jesus‑em tuguluku neqekrangllaq, nepluku, tuunegkaa Judas Iscariot‑mun, ighneghanun Simon‑em. 27Legan Judas‑em tuwaa neqekrangllaq, Tughneghaam iitqaa Judas. Jesus‑em pikaa Judas, “Taana piyaghqan piighaghtigu.” 28Nalighhiiniita tawanlenguut liigikumangilkangat sameng Jesus‑em Judas pitanga. 29Judas‑em aflengakngukek manilghutak, enkaam sumeghtaghaatkegkaat sameng tukfighiyaghtiisqenniluku aklukegkameng neqenghaghqemmun, nalighmeng aklumalghiinun tuuniyaghtiisqenniluku. 30Enkaam Judas‑em neghluku neqekrangllaq aanegkaq. Unugulghii tawani.

31Judas aanyan Jesus pikaq, “Whaa maaten yuget esghaghaat naten Ighnegha Yugem quulvallengellgha, enkaam ellngakun Kiyaghneq quulvallenguq. 32Kiyaghneq quulvallengengukan Ighneghakun Yugem, Kiyaghneghem quulvaghyaghqaqaa ellmikun qantaghaghhaqun.

33“Taghnughhaghhamni, unisaghtungestaghamsi. Qaywa ivaghyaghngaaghpesinga, takukamnun pinaanghitusi. Jews‑et igleghutistengitlu ungipaatkaqanka tawaten. 34Ungipaannaqamsi nutaghameng qelghusameng: Piniqutullusi. Piniqutusaghqaagusi katam whanga piniqellemtun elpesi. 35Piniquskufsi tamaghhaghmi yugem liisimakelleqiisi whangamnun maligsaaghtekutsi.”

Jesus Peter‑mun Nallunqennaqnilghii

36Simon Peter‑em aaptekaa Jesus, “Ataneq, navek pinaqsin?” Jesus‑em kiimsiqaa, “Takuyaghqamnun maliggnaanghitaghpenga maaten iwernga taakwaningani maligullequten.” 37Peter‑em aaptekaa, “Ataneq, sangan maliggnaqenghisiken maaten? Tuqutkesaqlegwaamken whaa.” 38Jesus‑em kiimsiqaa, “Ipaa tuqutkelleqsingaa? Ipa ungipaatamken, pingayuneng nallunqelleqaghpenga rooster‑a qalghightestegpenaan.”

Currently Selected:

John 13: ess

Highlight

Copy