John 12

Jesus Ilakumtaaghminilnguq Bethany‑mi

1Aghvinlegughtaquqlu aghneq Neqenghaghqellghanun Passover‑em, Jesus Bethany‑tkaq, Lazarus‑em kiyaghfiganun. (Taana Lazarus Jesus‑em unguvaghtekaqaa tuqulleghmeng). 2Tawani Jesus yataaghqutkaat neqenghaghqunnaluku enkaam Martha‑m ketfaghtuutkii aqelqat. Lazarus‑llu tawanlenguq maligulluni Jesus‑mun. 3Taagken Mary‑m tagitkakek akitupiglleghhiik tepengllaasik nard‑epigmeng ulimaaghek. Jesus‑em itegii kuuvikluki sangigtekii nuyamineng. Enkaam mangtegham ilunga tepengllaasighpagnighqwaakaq. 4Judas Iscariot‑lu tawanlenguq, Jesus‑em maligsaaghtenga. (Taakwangingani uveghpagusaghqaqngukanga Jesus). Judas pikaq, 5“Taakuk tepengllaasik 300 denarii‑em akikaak. Akiksaqlegestun, akinga taana aklumalghiinun tunqughnayaghtuq.” 6Tawaten pikaalghii megnukelghiistun aklumalghiit iwernga megnukepigtekanga mani. Aflengakistengulghii maligsaaghtet manilghutiitneng enkaam tugutkayugulghii ellminun katam atughqameng teglegniightengutmineng.

7Jesus‑em pikaa, “Avelghaghhu, aflengakumaak tepengllaasik aghneghmun whavek yataaghqennaluku llivelleghqaqa. 8Aklumalghiit quunpeng tamaantut. Whanga quunpeng elpesininnaanghitunga.”

Jews‑et Agghitkat Lazarus Tuqunnaluku

9Uglapiglleghhiit Jews‑et nagaqughluku Jesus Bethany‑menniluku esghaghyaghtuutkaat, tawaveklu Lazarus esghaghnaluku Jesus‑em unguvaghtekaa. 10-11Lazarus apalluqluku uglapiglleghhiit Jews‑et unilluki igleghutisteteng ugpeqegkaat Jesus. Enkaam taakut chief priest‑et agghitngwaaqat tuqunnaluku Jesus, enraghngam whaa agghitkegkaat Lazarus‑lu tuqunnaluku.

Yuget Usuqegkangat Jesus Jerusalem‑ellghii

12Unaamingani yulghuteghllaget Neqenghaghqellghanun Passover‑em tagilaghaatkat, nagaquqat Jesus tagiiqniluku Jerusalem‑emun. 13Enkaam kepuulluteng palm‑et uqfiget avayiitneng paasqaat Jesus akilghuumaghmeng,

“Usuqnaghhalek Kiyaghneq!

Kiyaghneghem quyasligu Umiilga Israel‑em tagilghii Aatghakun Atanghem!”

14Jesus‑em navghaghluku donkey‑ghaq qaayngakun aqumegkaq tawatengwaaq Akuzitet Igaqegkat pinaqnillghistun. Taakut Akuzitet whaten pikaagut,

15“Alingegpenasi, yugani Jerusalem‑em!

Esghaghteggu, umiilegsi tagiiquq aqumluni donkey‑ghaam qaayngakun.”

16Tawani pilleghmi Jesus‑em maligsaaghtengita liigikumangilkangat taana uuknaliqelleq. Wetku kingunganeng Jesus‑em unguvalghanllu, mayullghanllu qilagmun neqaatkaat taana uuknaliqelleq, neqaatkiitlu apeghiiqiit ellnganun.

17Yulghutet ungipaqngukangat esghapalleghteng Jesus‑em unguvaghtillgha Lazarus‑meng, aanesqellghallu lliveghmeng. 18Enkaam uglapiglleghhiim yugem paasqaat Jesus, qayughllak nagaquqaqegkangat taana allaaghlluwhaghtilleq. 19Taagken Pharisees‑et ilateng pikiit, “Sangwaa tamaghhaghmi anaggutnguuq whangkunnun. Esghaqaghtegguqun, iingunaghhaghmi yugem maligtengngwaa Jesus.”

Jesus‑em Akuzitkegkanga Tuqulleghqani

20Ilangillu Greek‑et Jerusalem‑etkaalghiit maniguunnaluteng Neqenghaghqellghani Passover‑em. 21Aglaghluteng Philip‑mun, pikaat, “Yuguniiq, esghaghyuwaqaghput Jesus.” (Philip Bethsaida‑meng pingulghii, Galilee‑melngughmeng.) 22Enkaam Philip‑em ungipaalluku Andrew, ungipaasaghtuqaak Jesus. 23Jesus‑em pikakek, “Aflu kaasimaaq Ighneghan Yugem quulvallengeghllalleghqaa. 24Ipa ungipaatamsi, wetkuqun piitun ifkaghlluni nunamun iteghluni tuqukumi piitesqughllagyaghqaaguq, aamtaam tuqunghilkumi taawa ataasighhaallequq piitun. 25Kitum alngunak piniqegkumigu unguvalleni iflayaghqaqaa. Iwernga kitum alngunak ugumikegkumigu unguvalleni whani nunami kenlengilngughmeng unguvallengyaghqaaguq. 26Kitum alngunak qepghaasukuminga maligsaghqaqaanga. Enkaam qepghaghteka whangamnisaghqaaguq naansaghngaaghma. Atama quulvaghyaghqaqaa kina alngunak qepghaatilghii whangamneng.”

27“Maaten unguvasigka seghleliighuuk. Sameng pilanga? Whaten pilangaa, ‘Ataay, yugulinga ikfiqelleghqamneng’? Nakaa, tawaten pinaanghitunga qayughllak tagikaagunga ikfiqnalunga. 28Ataay, aangelleghllaga ateghpek aliightigu.” Taagken ma qilagmeng pikaq, “Aangelleghllaga ateghma aliighsimaaqa, alla aliighlleqaqa.”

29Yulghutem nekevghallghiim tawani nagalluku taana ma pikat, “Kallugughtaa.” Iwernga ilangi pikat, “Yaqulgem aleghqughwaa Jesus.” 30Jesus‑em pikii, “Ma taana elpesinun ayuquq, whangamnun pingunghituq. 31Whaa maaten Kiyaghneghem nanqiggnaqaa nunam yuga, whaa maaten Kiyaghneghem eggnaqngwaa igleghutistenga uum nunam. 32Whanga kevellengegkuma nunameng, taaggun tagilaghaatesleqaqa qamaglluku yuuk whangamnun.” 33Jesus tawaten pikaq apeghnaluku naten tuqulleghqani. 34Yulghuteghllaget pikaat, “Nagaquqaqaghput Liilightuusaaneng Moses‑em, Christ‑anguq kiyaghsaghqaaguq quunperugllak. Enkaam sangavek pizin, ‘Ighnegha Yugem kevellengyaghqaaguq’? Kinangaawa taana, ‘Ighnegha Yugem’?” 35Taagken Jesus‑em pikii, “Nighuk elpesininnaqnguuq natengiighhaq. Enkaam igleghtek nighugaghluku, mamlegfagilgan. Kina alngunak igleghlleghhii mamlegmi nallukuq natmun piiqutni. 36Enkaam nighuk paninang elpesinilluku ugpeqiteggu, avaqutaliitesqellusi nighugmun.” Jesus tawaten piluni kagtaghtekaq ellngitneng.

Jews‑et Ugpeqenghilkangat Jesus

37Yuget esghapagyaghngaaghmegteggu Jesus uglapiglluku allaaghlluwhaghtilghii paninang ugpequmangilkangat. 38Ugpequmangitellghita apeghiightestekaa Isaiah‑m uuknaliqistem whaten pillgha:

“Ataneq, kitum ugpeqaki sangwaat aapqaput?

Atanghem aghtughyaghqaanghilleni kitumun esghaghtestagu?”

39Tamaaken apalluqluku ugpeghpagningitkaagut. Isaiah whatenllu uuknaliqegkaaguq, 40Kiyaghneq pikaaguq,

“Iiyngit ayaastekaqanka esghaannayukata.

Umyugiitlu liigiksaghqaananighqegkaqanka luuraq qiivnayukata whangamnun naallghutesqelluteng.”

41Isaiah tawaten pikaaguq esghaqaqutmineng Jesus‑em nighughqelleghqaa enkaam akuzitkegkaqegkanga.

42Qaywa uglapiglleghiit Jews‑et ugpeqenghisaghngaatgu Jesus, naqamenraq uglapighlleghhiit igleghutistengita ugpeqegkaat Jesus, Christ‑angutanga. Iwernga aapghumangilkangat alingluteng Pharisees‑et aanesnayukangisteng synagogue‑meng, 43qayughllak taakut igleghutistet usuqellengyugaqut yugneng pakiggulluku Kiyaghneghem usuqelleghqaaneng.

44Jesus akilghuukaq, “Kitum alngunak ugpeqegkuminga, whanganginaghma ugpeqegpenanga, ugpeqngwaa Kayagtisteka. 45Kitum alngunak esghaquminga, esghaangwaa Kayagtisteka. 46Tagikaagunga nunamun nighugulunga, kitum alngunak ugpeqegkanganga mamlegmennanighllequq. 47Kitum alngunak nagalluki akuzitenka qaatkenghilkaki, nanqiggnaanghitaqa aghyughyaghqaaniluku, qayughllak nanqigsaghtuunghitanka nunam yugi, yeghlegi yuguliyaghtuuwanka. 48Kitum alngunak ighsakegkangangallu tuguklinghilkakillu akuzitenka nanqigtistekaghqalguuq. Akuzitet akuzitkegkanka nanqiglleqaat kingulighmi aghneghmi, 49qayughllak akuzitenka whanga pikenghitanka. Atam Kayagtistema qelghutkaaneng akuziiqunga. 50Liisimakanka qelghusii kenlengilngughmeng unguvallengestikayuguut. Enkaam akuzitkaqegkenka Atam qelghusaqii whangamnun akuzitkesqelluki.”

Currently Selected:

John 12: ess

Highlight

Copy