Juan 11

Lázaro biud̶a

1-2Mau ewarid̶e ẽbẽra Lázaro abadau ãrea ẽpermo b̶uasii. Mau Lázaro Betania puurud̶ebena basii. Ara mau puurud̶e ichi neekaurã María maud̶e Marta panasid̶au. Mau Mariaba Dachi Mechiu jʉ̃rʉd̶e kera eaped̶a ichi bud̶aba poabisii.#Juan 12:3. 3Maud̶e Lázaro neekaurãba Jesusmaa jarad̶e bʉisid̶au:

—Dai Mechiu, bichi kõpaero ãrea ẽpermo b̶uu.

4Mau ũrisiid̶e Jesusba jarasii:

—Mau ẽpermo b̶uuba Lázaro biubai. Maumaarã mauba ẽbẽrarãba kuitaad̶ai Dachi Akõre maud̶e ichi Warr ome chi mechiurã.

5Jesusba Lázaro maud̶e chi neekaurã ãrea kʉ̃ria b̶uasmina, 6Lázaro ãrea ẽpermo b̶uu kuitaasiid̶e maucha ewari ome b̶eesii ichi b̶uad̶amaa. 7Mau maad̶akare ichi baara nibabadaurãmaa naka jarasii:

—Wãuríduru waya Judead̶aa.

8Maud̶eeba ichi baara nibabadaurãba jarasid̶au:

—Jaradeabarii, ewari ãrea bawẽe Judead̶ebenarãba bichi mooba b̶ata bea kʉ̃ria panad̶a. ¿Bichi waya mamaa wãaruka?

9Jesusba jarasii:

—¿Ewari ab̶a 12 hora b̶uuwãeka? Ãyadaa niid̶e jʉ̃rʉ drʉkau, ichiba ʉ̃d̶aa nau iujãad̶ebena unu b̶uud̶eeba. 10Maamina ẽsabud̶e nii jʉ̃rʉ drʉbarii, ʉ̃d̶aawãe b̶uud̶eeba.

11Maka jaraped̶a Jesusba waya jarasii:

—Dachi kõpaero Lázaro kãi nub̶uu maamina mʉʉba mau ʉ̃rʉmad̶e wãaruu.

12Maud̶e Jesús baara nibabadaurãba ichimaa jarasid̶au:

—Dai Mechiu, mau kãi nub̶uubʉrã aribiai.

13Jesusba mau jarad̶aba Lázaro biud̶a ʉ̃rʉbena berrea b̶uasii, maamina ichi baara nibabadaurãba kʉ̃risiasid̶au Lázaro kãi nub̶uu ʉ̃rʉbena berrea b̶uu. 14Maabae Jesusba arakʉd̶e jarasii:

—Lázaro biusii. 15Mʉ aria b̶uabasiid̶eeba mʉ kĩrajʉʉ b̶uu, mau kakua machiba mʉ biꞌia ijãad̶aid̶eeba. Waya ichimaa wã́duru.

16Maud̶e Tomás, Mikisu abadau b̶uasii.#11:16 Mikisu. Griego trʉ̃ Dídimo jara b̶uu «mikisu». Mauba waabenarã Jesús baara nibabadaurãmaa jarasii:

—Judead̶aa wãd̶ai dachi sid̶a bead̶amera.

Biud̶arã Jesusba chokae jiradubiai

17Betania puurud̶e neesiid̶e Jesusba kuitaasii Lázaro jau b̶uped̶aad̶a ewari kimare basii. 18Betania puuru Jerusalend̶eeba ara kaita b̶uasii.#11:18 Ara kaita b̶uasii. Griego bed̶ead̶e b̶ʉ kub̶uu: 15 estadia. Mau kilómetro õbea kĩra b̶uu. 19Maud̶eeba judiorã ãrea imisid̶au Marta maud̶e María kĩra chuburiad̶ai baita, ãchi neewau biusiid̶eeba. 20Maka panuud̶e Martaba kuitaasii Jesús neeruu. Ara makʉd̶e mau irsibid̶e wãsii. Maud̶e María ded̶e b̶eesii. 21Martaba Jesús unusiid̶e jarasii:

—Mʉ Mechiu, bichi nama b̶uad̶a basirã mʉ ãba biubai basii. 22Maamina mʉʉba kuitaa b̶uu joma bichiba Dachi Akõremaa id̶iiruu ichiba waui.

23Jesusba ichimaa jarasii:

—Bichi ãba chokae jiradui.

24Maud̶e Martaba jarasii:

—Maerã, mʉʉba kuitaa b̶uu mau kaad̶ebena ewarid̶e biud̶arã chokae jiraduuduud̶e, mau sid̶a chokae jiradui.#Isaías 26:19; Daniel 12:1-3.

25Jesusba jarasii:

—Mʉ biud̶arã chokae jiradubiabarii maud̶e chokae b̶uai deabarii. Barikiuba mʉʉd̶e ijãaruubʉrã, biurumina ewaricha Dachi Akõre ome chokae nibai. 26Chi mʉʉd̶e ijãa nii, mʉ kakua chokae b̶uud̶eeba biukaraa nibai. ¿Bichiba mau ijãa b̶uka?

27Maud̶e Martaba panausii:

—Maerã mʉ Mechiu, mʉʉba ijãa b̶uu bichi Dachi Akõre Warr, Dachi Akõreba Dachi Karibabarii deai jarad̶a, nau iujãad̶e neei b̶uad̶a.

Jesús Lázaro kakua jẽad̶a

28Makaped̶a Marta wãsii ichi neekaumaa. Maabae chũpea jarasii:

—Chi Jaradeabarii nama b̶uu. Ichiba bichimaa ne jara kʉ̃ria b̶uu.

29Mau ũrisiid̶e María jiraduped̶a Jesús b̶uumaa isa wãsii. 30Jesús puurud̶e wãwẽa b̶uasii. Wabid̶a Marta chi Jesús ome unud̶amare b̶uasii. 31Judiorã María ded̶e panasid̶au ichi kĩra chuburiad̶ai baita. Maud̶e ichi isa jiraduped̶a awara wãaruu unusid̶au. Lázaro jau b̶uped̶aad̶amaa jẽad̶e wãaruu a kʉ̃risiasid̶aud̶eeba, kaad̶e wãsid̶au.

32María Jesús b̶uumaa neesiid̶e maud̶e ichi unusiid̶e jʉ̃rʉ kaita õdarrd̶e kob̶eesii. Maud̶e jarasii:

—Mʉ Mechiu, bichi nama b̶uad̶a basirã, mʉ neewau biubai basii.

33Jesusba María jẽaruu maud̶e judiorã chi mau ome neeped̶aad̶a sid̶a jẽaduu unusiid̶e ãchi kakua ãrea jirukaraa, kĩru kub̶uuba ĩyaabasii.#11:33 Ãchi kakua. Waabenarãmaarã Jesús jirukaraasii ãchiba ijãad̶aabasiid̶eeba ichiba Lázaro chokae jiradubii. Waabenarãmaarã Jesús jirukaraasii nau druad̶e ẽbẽrarã biubadau, kakua kachirua nureabadau maud̶e kachirua waubadaud̶eeba. 34Maabae id̶isii:

—Mau ¿sama jau b̶usid̶ama?

Ãchiba panausid̶au:

—Dai mechiu, ichiad̶e wãd̶a.

35Jesús jẽasii. 36Maka b̶uud̶e judiorã aria panuuba jarasid̶au:

—Ichiásturu jãuba Lázaro saka kʉ̃ria b̶uasii.

37Maamina waabenarã chi nureeba jarasid̶au:

—Nau dau pãriu nuree aribiabid̶aba ¿sakãe poyaa karibaabasma Lázaro biubiimaaba?

Jesusba Lázaro chokae jiradubid̶a

38Jesús wabid̶a kĩru b̶uud̶e Lázaro mo chob̶ead̶e nub̶uped̶aad̶amaa neesii. Chi ed̶a wãbadau mooba jʉ̃a kub̶uasii. 39Maud̶e Jesusba jarasii:

—Jãu mo ãyaa bʉrásturu.

Marta, chi biud̶a neekauba Jesusmaa jarasii:

—Mʉ Mechiu, jãu biud̶a ewari kimare baaruud̶eeba mikia kub̶uẽka.

40Maamina Jesusba jarasii:

—¿Mʉʉba jaraabaska bichiba biawãra ijãaruubʉrã, Dachi Akõre chi mechiu nii unui?

41Maka b̶uud̶e ẽbẽrarãba chi mo ãyaa bʉraasid̶au. Maabae Jesusba ʉtaa ichiaped̶a jarasii:

—Chacha, mʉʉba bichimaa biꞌia jarai mʉʉba ʉtaa id̶id̶a ũrisiid̶eeba. 42Mʉʉba kuitaa b̶uu bichiba mʉ bed̶ea ũri b̶uabarii, maamina mʉʉba nau jarasii naarã ẽbẽrarãba kuitaad̶amera bichiaburu mʉ bʉisii.

43Maka jaraped̶a Jesusba jĩwa jarasii:

—¡Lázaro, awara neese!

44Ara makʉd̶e Lázaro biu b̶uad̶a awara neesii. Ichi jua, chi jʉ̃rʉ wabid̶a paruba bʉra b̶uasii. Maud̶e ichi kĩedarr paruba bʉra b̶uasii. Maud̶e Jesusba jarasii:

—Enad̶aped̶a ida bʉ́isturu.

Judiorãba Jesús bead̶ai jʉrʉped̶aad̶a

Mateo 26:1-5; Marcos 14:1-2; Lucas 22:1-2

45Ãrea judiorã María baara wãped̶aad̶arãba unusid̶au Jesusba waud̶a. Maud̶eeba ãchiba ijãasid̶au. 46Maamina chi Jesusba waud̶a chi nuree fariseorãmaa jarad̶e wãsid̶au. 47Maud̶eeba fariseorã maud̶e paare mechiurã ome araa ãbua imid̶ai jarasid̶au.#11:47 Araa ãbua imid̶ai jarasid̶au. Kajuma bed̶ead̶e b̶ʉ kub̶uu: Concilio maebʉrã Consejo. Naka jarasid̶au:

—Dachiba ¿saka waud̶aima? Mauba ẽbẽrarãba ne poyaa waud̶akau ãrea wau b̶uu. 48Ichi ida nibabiiduubʉrã jomaurãba ichid̶e ijãad̶ai. Maka Romad̶ebena kokoroarã imid̶aped̶a, ãchiba Dachi Akõre de mechiu ãrid̶ai maud̶e joma dachi judiorã sid̶a kenad̶ai.

49Aria ab̶a Caifás abadau b̶uasii. Mau nau añod̶e paare mechiu basii. Mau Caifasba jarasii:

—¡Machi kʉ̃risiaswãe nuree! 50Romad̶ebenarãba joma dachi judiorã bead̶ai kãyabãra biꞌia b̶uu ẽbẽra ab̶a jomaurã kakua biui.

51Caifasba ara ichi kʉ̃risiad̶eeba maka jarawẽa b̶uasii. Maumaarã ichi paare mechiu niid̶eeba Dachi Akõréburu ichimaa jarabisii Jesús joma judiorã kakua biui b̶uu. 52Maamina ab̶aburu judiorã baita biubai basii, maumaarã joma Dachi Akõre warrarã nau iujãad̶e drua didiwaraacha nuree, ara puuru ab̶aud̶e duanui baita.#Isaías 11:12; Jeremías 23:3; Miqueas 2:12. 53Paare mechiurãba bed̶ea deasid̶au mau ewarid̶eeba Jesús saka bead̶ai jʉrʉd̶ai.

54Maud̶eeba Jesús judiorã tãed̶e ãrea nibaka basii, maumaarã Judead̶ebena ãyaa wãsii. Efraín puurud̶e ichi baara nibabadaurã baara b̶uad̶e wãsii. Mau puuru drua sirua wãꞌãe b̶uu kaita b̶uu.#11:54 Efraín puuru Jerusalend̶eeba ewari ab̶a b̶uasii.

55Judiorã Pascua ewari ʉ̃rʉ ba b̶uasii. Mau bari panabadau ewarid̶eeba puuruchad̶ebenarã Jerusalend̶aa wãsid̶au ãchiba waubadau kĩra wau panuud̶eeba Dachi Akõre daad̶e biꞌia nuread̶ai baita.#11:55 Bari panabadau ewari waud̶ai naed̶e judiorãba ne waubachid̶au Dachi Akõre daad̶e biꞌia nuread̶ai baita. Ab̶a bid̶a ẽbẽra biud̶a wauruubʉrã, 7 ewari Dachi Akõre daad̶e kachirua b̶eebachii. Maud̶eeba ne waui b̶uasii. Maka wauwẽebʉrã bari panabadau ewari waukau b̶uasii. Números 19:16-22; 2 Crónicas 30:13-21. 56Mau ewarid̶e ẽbẽrarãba Jesús jʉrʉ nibasid̶au. Dachi Akõre de mechiu dud̶a ãbua panuud̶e id̶ibachid̶au: «Machimaarã ¿ichi nau kĩrajʉʉ bara b̶uabarii ewari waubadaud̶e neeibaaka?»

57Maamina paare mechiurãba maud̶e fariseorãba jarasid̶au barikiuba Jesús neesii kuitaaduubʉrã jarad̶ai b̶uu ichi jidaud̶amera.

Currently Selected:

Juan 11: cmi

Highlight

Copy