Juan 10

Oeja nubarii bia nii

1Mau ewarid̶e Jesusba jarasii:

«Mʉʉba biawãra jaraaruu: barikia oeja nubadaumare poraad̶e nub̶uare ed̶a wãwẽebʉrã, mau kãyabãra ãyare ed̶a wãaruubʉrã, mau oeja nechiruabariibʉ maud̶e ẽbẽra kachiruabʉ. 2Maamina chi oeja nubadaumare poraad̶e ed̶a wãbarii, chi oeja nubariibʉ. 3Mau oeja nubarii baita chi poraa nubariiba chi poraa ewabarii. Oejarãba ãchi nubarii bed̶ea kuitaa panuu. Ãchi ab̶aab̶aa trʉ̃ jarakuaped̶a awara adoebarii.#Ezequiel 34:11-31. 4Joma awara uad̶oped̶a ãchi naa wãbarii. Oeja ichi baara wãbadau ichi bed̶ea kuitaa panuud̶eeba. 5Maamina ãchiba chi ẽbẽra unud̶akau baara wãd̶akau, maumaarã mirubadau mau bed̶ea adua panuud̶eeba».

6Jesusba nebʉrʉʉruuba maka berreasii maamina judiorãba kuitaad̶aabasii kãare jara b̶uu. 7Maud̶eeba Jesusba naka jarasii: «Mʉʉba biawãra jaraaruu, mʉ chi oeja ed̶a wãbadau poraa. 8Mʉ neei naed̶e ãrea oeja nechiruabadaurã kĩra maud̶e ẽbẽrarã kachiruarã neebachid̶au. Maamina chi Dachi Akõred̶e ijãabadaurãba#10:8 Dachi Akõred̶e ijãabadaurãba. Griego bed̶ead̶e naka b̶ʉ kub̶uu: oejarãba. maarã bed̶ea ijãad̶aabasii.

9»Mʉ chi poraabʉ. Chi mʉʉd̶eeba ed̶a wãaruu kachiruad̶ebena karibai. Ãrea jirukaraayuwãe b̶uai, ichiba wãꞌãe b̶uu Dachi Akõreba joma deaid̶eeba.#10:9 Griego bed̶ead̶e naka b̶ʉ kub̶uu: Ichi ed̶a wãi, awara wãi maud̶e sirua unui. 10Nechiruabarii neebarii oeja chiruai baita, beai baita maud̶e baribai baita. Maamina mʉ neesii, ẽbẽrarã ãrea chokae nibad̶amera.

11»Mʉ oeja nubarii bia niibʉ. Chi oeja nubarii bia nii ichi oeja kakua biui b̶uu. 12Maamina ab̶aba chi nejarra kakua oeja nu b̶uaruubʉrã, usa kachirua neeruud̶e oeja duanuiped̶a miru wãi. Oeja ichid̶iwãed̶eeba biawãra nukau. Maud̶e usa kachiruaba oeja ab̶a kaa adauruud̶e waabenarã jĩichoabadau. 13Mau ẽbẽra miru wãbarii ab̶a chi nejarra kakúaburu oeja nubariid̶eeba. Ichiba kʉ̃risiakau oeja biꞌia panad̶amera.

14»Mʉ oeja nubarii biabʉ. Mʉʉd̶erã kuitaa b̶uu, chi oeja nubariiba ichi oeja kuitaa b̶uu kĩra. Maud̶e maarãba mʉ kuitaa panuu. 15Ara mau kĩra mʉ Chachaba mʉ kuitaa b̶uu maud̶e mʉʉba mʉ Chacha kuitaa b̶uu. Mʉ michi oeja kakua biui b̶uu. 16Mʉʉba oeja june ua b̶uu nau oeja nubadaumarebenawaẽ.#10:16 Mʉʉba oeja june ua b̶uu nau oeja nubadaumarebenawaẽ. Mau berread̶eeba Jesusba jara b̶uasii judiowãerã bid̶a ichid̶e ijãad̶ai. Maarã sid̶a mʉʉba ed̶a adooi. Ãchiba mʉ bed̶ea ijãad̶ai. Maka joma ãbua panad̶ai. Maud̶e ãchi nubarii ab̶a b̶uai.

17»Mʉ Chachaba mʉ kʉ̃ria b̶uu, ara mʉ ida beabiid̶eeba. Maabae waya chokae jiradui. 18Mʉʉba mʉ ida beabiwẽebʉrã ab̶au bid̶a mʉ poyaa bead̶aabai, maamina mʉ biui mʉʉba maka kʉ̃ria b̶uud̶eeba. Mʉ biuped̶a poyaa chokae jiradui. Mʉ Chachaba mʉʉmaa maka waubisii».

19Mau bed̶ea ũriiduud̶e judiorã waya chiya aꞌawaraa berrea kopaneesid̶au. 20Ãreaba jarasid̶au: «Jãu ẽbẽraba jai kachirua uru b̶uu. Jãu kĩrawãe b̶uu. ¿Sakãe jãu bed̶ea ũrid̶aima?»

21Maamina waabenarãba jarasid̶au: «¡Chi jai kachirua uru b̶uuba maka berreakau! Makarã ¿jai kachiruaba dau pãriu nuree aribiabibarika?»

Judiorãba Jesús ida b̶uped̶aad̶a

22Mau ewarid̶e judiorãba Jerusalend̶e kĩrajʉʉ bara b̶uabarii ewari waubachid̶au. Ãchiba kĩraba panasid̶au Dachi Akõre de mechiu ichi baita awara b̶uped̶aad̶a. Kũrasãa ewarid̶e,#10:22 Judiorãba mau ewari Janucá abadau. Añocha diciembred̶e waubadau. Kĩrababadau Judas Macabeo abadauba Dachi Akõre de mechiu waya biꞌia b̶ud̶a. Makasii 164 años Jesús b̶uai naed̶e. 23Jesús nibasii Dachi Akõre de mechiu ãbudare, Pórtico Salomón abachid̶aumare. 24Maka b̶uud̶e chi nuree judiorãba Jesús ad̶u orrod̶aped̶a id̶isid̶au:

—Ab̶a ¿sakaed̶aa bichiba dai kʉ̃risia adua ua b̶uaima? Bichi Dachi Akõreba Dachi Karibabarii deai jarad̶abʉrã, daimaa ab̶aed̶e jarase.

25Jesusba panausii:

—Mʉʉba machimaa jarasii maamina ijãad̶awẽa panuu. Joma mʉ Chacha trʉ̃d̶eeba waubarii mauba arakʉd̶e unubi b̶uu mʉ kai b̶uu. 26Maamina machiba ijãad̶akau, mʉ oejarãwãed̶eeba. 27Mʉ oejarãba mʉ mimi kauwa kuitaa panuu. Mʉʉba ãchi unubarii. Maud̶eeba ãchiba mʉ baara wãbadau. 28Mʉʉba jãarã Dachi Akõre ome ewaricha chokae b̶uabiabarii. Ewari ab̶a bid̶a wãꞌãed̶aabai maud̶e ab̶au bid̶a mʉ juad̶ebena poyaa juakaa adaud̶aabai. 29Mʉ Chachaba jãarã mʉʉmaa deasii. Ichi jomaurã audeara chi mechiu nii.#10:29 Mau griego bed̶ead̶e arakʉd̶e b̶uuwãe. Waabenarãmaarã naka jara b̶uu «Mʉ Chachaba mʉʉmaa dead̶a ne joma kãyabãra chi mechiu b̶uu». Ab̶au bid̶a ãchi mʉ Chacha juad̶ebena poyaa juakaa adaud̶aabai. 30Mʉ, mʉ Chacha ome arab̶au nid̶au.

31Maud̶eeba judiorãba waya mo adoesid̶au ichi b̶ata bead̶ai baita. 32Maud̶e Jesusba jarasii:

—Mʉ Chachad̶eeba ãrea ne bia machimaa unubiasii. ¿Sãu ne bia waud̶a kakua mʉ mooba b̶ata bead̶aima?

33Judiorãba panausid̶au:

—Daiba bichi mooba b̶atad̶aabai ne biꞌia wau b̶uu kakua, maumaarã b̶atad̶ai bichi ẽbẽra niikaud̶e ara Dachi Akõre a b̶uud̶eeba. Mauba bichiba Dachi Akõre ʉ̃rʉbena kachirua jara b̶uu.#Levítico 24:14-16.

34Jesusba jarasii:

—Machi Moisesba b̶ʉd̶ad̶e naka b̶ʉ kub̶uu: “Mʉʉba jarasii machi dachi akõrerã”.#Salmos 82:6. 35Dachiba kuitaa panuu Dachi Akõre bed̶ea ewaricha biawãrabʉ. Dachi Akõreba mau ẽbẽrarãmaa “Machi dachi akõrerãbʉ” asiid̶e 36¿sakãe mʉʉba ichi ʉ̃rʉbena kachirua jarasii a panuma, mʉʉba bari ichi Warr a b̶uasiid̶eeba? Dachi Akõreba mʉ ara ichi báitaburu awara b̶usii maud̶e nau iujãad̶aa bʉisii. 37Mʉ Chachaba wau b̶uu mʉʉba wauwẽa b̶uubʉrã, mʉ bed̶ea ijã́sturu. 38Maamina ichiba wau b̶uu mʉʉba wau b̶uubʉrã, mʉʉba jara b̶uu kakua machiba ijãad̶awẽa panumina mʉʉba wau b̶uu kakua ijã́sturu. Maka machiba biawãra kuitaad̶ai mʉ Chacha mʉ ome nii maud̶e mʉ, mʉ Chacha ome nii.

39Maud̶e ãchiba waya Jesús jidau adoed̶ai kʉ̃ria panasid̶au, maamina ãchi juakaa wãsii.

40Mau maad̶akare Jesús waya Jordán do kĩaraa wãsii Juan chi Boro Eabariiba naed̶e ẽbẽrarã boro ea b̶uad̶amaa.#Juan 1:28. Jesús aria b̶eesii. 41Maka b̶uud̶e ãrea ẽbẽrarã ichimaa wãbachid̶au. Ãchi chiya naka jarabachid̶au: «Juanba ẽbẽrarãba ne poyaa waud̶akau wauka basii maamina joma ichiba nau Jesús ʉ̃rʉbena jarad̶a biawãrabʉ».

42Aria ãreaba Jesusd̶e ijãasid̶au.

Currently Selected:

Juan 10: cmi

Highlight

Copy