Juan 9

Jesusba ẽbẽra dau pãriu aribiabid̶a

1Wãaruud̶e Jesusba ẽbẽra chi naweba adaud̶ad̶eed̶ebena dau pãriu nii unusii. 2Maud̶e Jesús baara nibabadaurãba id̶isid̶au:

—Jaradeabarii, ¿kaiba kachirua wausiid̶eeba nau mukĩra jãka dau pãriu chi naweba adausma? ¿Ichi akõrerãba kachirua wausid̶aud̶eeba, maebʉrã ichiba kachirua waud̶ad̶eeba?

3Jesusba panausii:

—Ichiba kachirua wausiid̶eeba maebʉrã chi akõrerãba kachirua wau panasiid̶eeba, jãka adaubasii. Maumaarã dau pãriu adausii ichid̶eeba Dachi Akõreba ne wauruu ẽbẽrarãba unud̶amera. 4Maud̶eeba wabid̶a ãsaed̶e b̶uud̶e chi mʉ Bʉid̶aba waubi b̶uu mʉʉba waui b̶uu. Kiuruud̶e ab̶a bid̶a poyaa trajakau. 5Maamina nau iujãad̶e b̶uud̶e mʉ ẽbẽrarã baita ʉ̃d̶aa kĩra nii mʉ Chacha ʉ̃rʉbena kuitaabiai baita.

6Maka jaraped̶a Jesús iorod̶e id̶uped̶a ioro susua wausii. Mau ioro susuaba chi dau pãriu nii daucha purusii. 7Maabae Jesusba ichimaa jarasii:

—Chi Kuibadau Siloé abadaumaa jeraad̶e wãse. (Mau trʉ̃ jara b̶uu “bʉid̶a”).#Génesis 49:10; Isaías 8:5-8.

Ara makʉd̶e chi dau pãriu nii wãped̶a ichi dau jeraasiid̶e unu b̶eesii. Maabae deed̶aa wãsii. 8Ichi de kaita duanuurãba maud̶e ichiba od̶e ne kaebea id̶ibachii unuped̶aad̶arãba jara duanasid̶au: «¿Nau mauwãeka, chi akʉ b̶eeped̶a ne kaebea id̶ibarii?»

9Chi nureerãba maerã maubʉ abachid̶au. Maud̶e waabenarãba ichi kĩra b̶umina mauwãe abachid̶au. Maamina chi dau pãriu b̶uad̶aba jarasii: «Biawãra mʉʉbʉ».

10Maud̶e ichimaa id̶isid̶au:

—¿Sakaburu bichiba unu b̶eesma?

11Ichiba panausii:

—Ẽbẽra Jesús abadauba ioro susua wauped̶a mʉ daucha purusii. Maabae ichiba jarasii: “Kuibadau Siloé abadaumaa jeraad̶e wãse”. Wãped̶a mʉ dau jeraasiid̶e unu kob̶eesii.

12Maud̶e ãchiba id̶isid̶au:

—Mau ẽbẽra ¿sama b̶uma?

Ichiba panausii:

—Mʉʉba adua b̶uu.

Fariseorãba dau pãriu b̶uad̶amaa ãrea id̶iped̶aad̶a

13-14Jesusba ioro susua wauped̶a dau pãriu nii aribiabid̶a ewari, chi bari panabadau ewari basii. Maud̶eeba waabenarãba chi dau pãriu b̶uad̶a fariseorãmaa adoesid̶au. 15Maabae chi fariseorã bid̶a mau mukĩramaa id̶isid̶au saka unu b̶eesii. Maud̶e ichiba jarasii:

—Jesusba ioro susua wauped̶a mʉ daucha purusii. Maabae mʉʉba baniaba jeraaruud̶e unu kob̶eesii.

16Chi nureerã fariseorãba jarasid̶au: «Mau mukĩra Dachi Akõred̶ebena need̶awãe b̶uu, bari panabadau ewari wapeakaud̶eeba».

Maamina waabenarãba jarasid̶au: «¿Saka kachirua waubarii mukĩraba mau ẽbẽrarãba ne poyaa waud̶akau poyaa wausma?»

Maka chiya ãyaa jarasid̶au. 17Maka panuud̶e waya chi dau pãriu b̶uad̶amaa id̶isid̶au:

—Mau mukĩra, chi bichi dau aribiabid̶a ¿kãare kʉ̃risia b̶uma mau ʉ̃rʉbena?

Chi dau pãriu b̶uad̶aba panausii:

—Mʉʉmaarã, mau Dachi Akõre baita berreabariibʉ.

18Maamina chi judiorã mechiurãba ijãad̶awẽa panasid̶au mau ẽbẽra naed̶e dau pãriu b̶uasii. Maud̶eeba ichi akõrerã iubiasid̶au. 19Maabae maarãmaa id̶isid̶au:

—¿Jãu machi warr dau pãriu adaud̶aka? ¿Saka id̶ibae jãuba unu b̶uma?

20Ãchiba panausid̶au:

—Daiba kuitaa panuu jãu dai warr dau pãriu adaud̶abʉ. 21Maamina adua panuu saka id̶ibae unu b̶eesii, maud̶e adua panuu kaiba ichi aribiabisii. Jãu chõra baerã ichimaa id̶ísturu. Ara ichiba jaraika.

22Ichi akõrerãba maka jarasid̶au judiorã karrarã wapea panuud̶eeba. Biawãra mau judiorãba jarasid̶au ab̶auba Jesús chi Dachi Akõreba Dachi Karibabarii deai jarad̶a a jaraaruubʉrã chi judiorã araa ãbua imibadau ded̶ebena ãyaa bʉid̶ai asid̶au. 23Maud̶eeba chi akõrerãba jarasid̶au: «Jãu chõra baerã ichimaa id̶ísturu».

24Maud̶eeba chi judiorã karrarãba chi dau pãriu b̶uad̶a waya iud̶aped̶a jarasid̶au:

—Dachi Akõre trʉ̃d̶e daimaa mau ẽbẽra ʉ̃rʉbena biawãra jarase.#9:24 Griego bed̶ead̶e b̶ʉ kub̶uu: Dachi Akõre biꞌia kʉ̃riáse. Daiba kuitaa panuu mau kachirua waubarii.

25Chi dau pãriu b̶uad̶aba jarasii:

—Mʉʉba adua b̶uu mauba kachirua waubarii maebʉrã waukau. Ab̶aburu kuitaa b̶uu mʉ dau pãriu b̶uasii maamina jãabae unu b̶uu.

26Maud̶e ãchiba waya ichimaa id̶isid̶au:

—Jãuba ¿saka aribiabisma? ¿Kãare wausma bichi dau aribiabii baita?

27Ichiba panausii:

—Mʉʉba machimaa jarasii maamina ijãad̶aabasii. Mau ¿sakãe waya ũri kʉ̃ria panuma? ¿Machi sid̶a ichi baara niba kʉ̃ria panuka?

28Maud̶eeba ãchiba ichi naka iadaasid̶au:

—Bichi mau ẽbẽra ome nii, maamina dai Moisesba b̶ʉd̶ad̶eeba nibabadau. 29Daiba kuitaa panuu Dachi Akõreba Moisesmaa berreasii,#Éxodo 33:11. maamina mau ẽbẽra samabena adua panuu.

30Maud̶e chi dau pãriu b̶uad̶aba jarasii:

—¿Sakaburu? ¿Saka machiba ichi samabena adua panuu a panuma? ¿Mauba mʉ dau aribiabid̶awãeka? 31Dachiba kuitaa panuu chi kachirua waubadaurãba id̶iiduu Dachi Akõreba biꞌia ũrikau. Mau awara kuitaa panuu barikiuba Dachi Akõre wapea b̶uubʉrã maud̶e ichiba kʉ̃ria b̶uu wau b̶uubʉrã, mauba ʉtaa id̶iiruu Dachi Akõreba biꞌia ũribarii.#Salmos 66:18; Proverbios 15:29. 32Ewari ab̶ad̶e bid̶a dachiba ẽbẽra dau pãriu adaud̶a aribiabid̶a ũrid̶aka basii. 33Nau ẽbẽra Dachi Akõred̶ebenawãe basirã, poyaa waubai basii.

34Maud̶e judiorã mechiurãba ichi iadaasid̶au:

—Bichi adaud̶ad̶eed̶ebena kachirua waubarii. ¿Saka daimaa ne jaradeaima?

Maud̶eeba ichi chi judiorã araa ãbua imibadau ded̶ebena ãyaa bʉisid̶au.

Chi biawãra dau pãriu nuree

35Jesusba ũrisii chi dau pãriu b̶uad̶a ãyaa bʉiped̶aad̶a. Maud̶eeba ichi jʉrʉd̶e wãsii. Unuped̶a id̶isii:

—¿Bichiba chi Ẽbẽra Ba B̶uad̶ad̶e biawãra ijãa b̶uka?#9:35 Chi Ẽbẽra Ba B̶uad̶a. Griego bed̶ead̶e chi b̶ee kartad̶e b̶ʉ kub̶uu: Dachi Akõre Warr.

36Ichiba jarasii:

—¿Mau kaima? Mʉʉmaa jarase mʉʉba ichid̶e biawãra ijãai baita.

37Jesusba panausii:

—Bichiba mau unu b̶uu. Mʉ, chi bichi ome berrea b̶uu maubʉ.

38Ara makʉd̶e Jesús daad̶e õdarrd̶e kob̶eeped̶a jarasii:

—Mʉ Mechiu, mʉʉba ijãa b̶uu.

39Maud̶e Jesusba jarasii:

—Mʉ nau iujãad̶aa neesii ẽbẽrarã nebʉra dauchaai baita. Maka chi dau pãriu nuree kĩra nureeba unud̶ai maud̶e chi unu panuu a panuu dau pãriu nuree kĩra paneed̶ai.

40Chi nuree fariseorã Jesús kaita panuuba mau bed̶ea ũrisid̶aud̶e id̶isid̶au:

—Bichiba ¿sakãe maka jara b̶uma? ¿Dai dau pãriu nureka?

41Jesusba panausii:

—Machi biawãra dau pãriu nuread̶a basirã, kachirua waubadau kakua nebʉrad̶e panad̶aabai basii. Maamina machiba unu panuu a panuud̶eeba nebʉrad̶e panuu.

Currently Selected:

Juan 9: cmi

Highlight

Copy