ရူဝ်းမႃႉ 8
8
ဢသၢၵ်ႈၼႂ်းဝီႉၺိၺ်ႇၸဝ်ႈ
1ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ ၶဝ်ၸိူဝ်းဢၼ်တႄႇယူႇၼႂ်းယေႇသူႉၶရိၸ်ႈၼၼ်ႉ ၵၢင်းလွတ်ႈတင်းတၢင်းဢၼ်ၸီႇယၢင်ႇဢပႅတ်ႈဢေႃႈ။- 2တြႃးဝီႉၺိၺ်ႇၸဝ်ႈဢၼ်ႁႂ်ႈဢသၢၵ်ႈလိပ်းလႄႈ တႄႇယူႇၼႂ်းယေႇသူႉၶရိၸ်ႈၼၼ်ႉ ပွႆႇၵဝ်လွတ်ႈသေၵႃႈၼႂ်း မိုဝ်းဢပႅတ်ႈတြႃးဢိၵ်ႇတင်း ၵႃႈၼႂ်းမိုဝ်းတြႃးတၢင်းတၢႆယဝ်ႉ။- 3တၢင်းဢၼ်ပိင်းၺၢပ်ႈတြႃးႁႅင်းလဵၵ်ႉႁႅင်းၵေႇ ၵွပ်ႈပိူဝ်ႈၸႃႇတီႉပၵတီႉလႄႈ ဢမ်ႇတၢတ်ႈၼိူင်ႇလႆႈၼၼ်ႉ၊ ၽြႃးပဵၼ်ၸဝ်ႈပွႆႇၸႂ်ႉလုၵ်ႈမၼ်းၸဝ်ႈ ဢၼ်ဢဝ်ပုင်ႇႁၢင်ႈၸႃႇတီႉပၵတီႉဢၼ်ပျေႉၸုမ်ႇတင်းဢပႅတ်ႈၼၼ်ႉမႃး ႁႂ်ႈလႆႈပွင်လႆႈႁဵတ်းလႄႈ ပၼ်တၢမ်ႇဢပႅတ်ႈၵႃႈတီႈၼႂ်းၸႃႇတီႉပၵတီႉ ပုၼ်ႈဢၼ်တၵ်းၽေႇဢပႅတ်ႈဢေႃႈ။- 4လွင်ႈမၼ်းၸမ်ႉ ၼင်ႇႁိုဝ်ပိင်းၺၢပ်ႈၸိူဝ်းဢၼ်ပႃးၼႂ်းတြႃးၼၼ်ႉ တၵ်းပျေႉၸုမ်ႇၼႂ်းႁဝ်းၸိူဝ်းဢၼ်ဢမ်ႇၵမ်ဢမ်ႇၵျၢင်ႉ ၸွမ်းၼင်ႇၸႃႇတီႉပၵတီႉလႄႈ ၵမ်ၵျၢင်ႉၸွမ်းၼင်ႇဝီႉၺိၺ်ႇပၵတီႉၼႆႉၸိုင် ၸင်ႇပဵၼ်ဢေႃႈ။- 5ၶဝ်ၸိူဝ်းဢၼ်မီးၸႃႇတီႉပၵတီႉၼၼ်ႉ မီးၸႂ်သၽေႃးဢၼ်ၸွႆးဢၼ်ၸပ်းလူၺ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းၸႃႇတီႉပၵတီႉဢေႃႈ။ ၶဝ်ၸိူဝ်းဢၼ်မီးဝီႉၺိၺ်ႇပၵတီႉၸမ်ႉ မီးၸႂ်သၽေႃး ဢၼ်ၸွႆးဢၼ်ၸပ်းလူၺ်ႈလွင်ႈတၢင်းဢၼ် ၸၢပ်ႈသႅင်ႇၵၼ်တင်းဝီႉၺိၺ်ႇပၵတီႉဢေႃႈ။- 6ၸႂ်သၽေႃးၸႃႇတီႉပၵတီႉၸိုင်၊ ပဵၼ်လွင်ႈတၢင်းတၢႆဢေႃႈ။ ၸႂ်သၽေႃးဝီႉၺိၺ်ႇပၵတီႉၸမ်ႉ ပဵၼ်လွင်ႈတၢင်းဢၼ်ဢသၢၵ်ႈလိပ်း ဢိၵ်ႇတင်းတၢင်းဢၼ်ၼိမ်ဢေႃႈ။- 7ပဵၼ်လွင်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ ၸႂ်သၽေႃးၸႃႇတီႉပၵတီႉၸိုင် ပဵၼ်တၢင်းဢၼ်ၶတ်းၵၼ်တင်းၽြႃးပဵၼ်ၸဝ်ႈဢေႃႈ။ ဢမ်ႇၸၢင်ႈၸွမ်းဢလူဝ်ႇတြႃးၽြႃးပဵၼ်ၸဝ်ႈ။ လိူဝ်သေၼၼ်ႉဢမ်ႇၵႃးဢမ်ႇၸွမ်းလႆႈ။- 8ပိူဝ်ႈၼႆလႄႈ ၶဝ်ၸိူဝ်းဢၼ်ယူႇၼႂ်းၸႃႇတီႉပၵတီႉၼၼ်ႉ ဢမ်ႇထုၵ်ႇၸႂ်ၽြႃးပဵၼ်ၸဝ်ႈလႆႈ။
9ၼႂ်းဝႃႈၼၼ်သေၵေႃႈ ပေႃးဝီႉၺိၺ်ႇၽြႃးပဵၼ်ၸဝ်ႈယူႇၵႃႈၼႂ်းသူၸိုင်၊ သူမီးၽၢႆႇၸႃႇတီႉပၵတီႉဢမ်ႇၸႂ်ႈ၊ မီးၽၢႆႇဝီႉၺိၺ်ႇပၵတီႉဢေႃႈ။ ၵေႃႉဢၼ်ဢမ်ႇလႆႈဝီႉၺိၺ်ႇၸဝ်ႈၶရိၸ်ႈၼၼ်ႉၸမ်ႉ၊ ဢမ်ႇၸၢပ်ႈသႅင်ႇၵၼ်တင်းၸဝ်ႈၶရိၸ်ႈ။- 10ပေႃးၸဝ်ႈၶရိၸ်ႈမီးယူႇၵႃႈၼႂ်းသူၸိုင်၊ တူဝ်ၵႃႇယႃႉပဵၼ်ဢၼ်တၢႆၵွပ်ႈပိူဝ်ႈဢပႅတ်ႈဢေႃႈ။ ဝီႉၺိၺ်ႇၸမ်ႉ၊ ဢသၢၵ်ႈလိပ်းယူႇ ၵွပ်ႈပိူဝ်ႈတၢင်းသိုဝ်ႈတေႃႇဢေႃႈ။- 11လိူဝ်သေၼၼ်ႉဢမ်ႇၵႃး ပေႃးဝီႉၺိၺ်ႇမၼ်းၸဝ်ႈဢၼ်ႁႂ်ႈယေႇသူႉ လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ ၵိင်းဝၢပ်ႈယူႇၵႃႈၼႂ်းသူၸိုင် မၼ်းၸဝ်ႈဢၼ်ႁႂ်ႈၸဝ်ႈၶရိၸ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ တၵ်းႁႂ်ႈတူဝ်ၵႃႇယႃႉသူလိပ်း ၵွပ်ႈပိူဝ်ႈဝီႉၺိၺ်ႇမၼ်းၸဝ်ႈဢၼ်ၵိင်းဝၢပ်ႈယူႇၵႃႈၼႂ်းသူၼၼ်ႉဢေႃႈ။
12ပိူဝ်ႈၼႆလႄႈ ပီႈၼွင်ႉၶဝ်ဢိူၺ်း၊ ႁဝ်းၸိူဝ်းၼႆႉပဵၼ်ၶႃႈၸႃႇတီႉပၵတီႉ ႁႂ်ႈလႆႈၵမ်ၵျၢင်ႉၸွမ်းၼင်ႇၸႃႇတီႉပၵတီႉဢမ်ႇၸႂ်ႈ။- 13ပေႃးသူဢသၢၵ်ႈလိပ်းၸွမ်းၼင်ႇၸႃႇတီႉပၵတီႉၸိုင် သူတၵ်းလႆႈတၢႆဢေႃႈ။ ပေႃးသူႁႂ်ႈတၢင်းၵမ်တၢင်းၵျၢင်ႉတူဝ်ၵႃႇယႃႉတၢႆၵွပ်ႈပိူဝ်ႈဝီႉၺိၺ်ႇၸဝ်ႈၸိုင် သူဢသၢၵ်ႈတၵ်းလိပ်းဢေႃႈ။- 14ၶဝ်ၸိူဝ်းဢၼ်ဝီႉၺိၺ်ႇၸဝ်ႈ ဢဝ်ၵႂႃႇသူင်ႇၵႃႈမီးတင်းသဵင်ႈတင်းလူင်ၼၼ်ႉ ပဵၼ်လုၵ်ႈၽြႃးပဵၼ်ၸဝ်ႈဢေႃႈ။- 15လွင်ႈမၼ်းၸမ်ႉ သူလႆႈသၽေႃးၶႃႈဢၼ်ၸၢင်ႈၶိုၼ်းၵူဝ်ၶိုၼ်းႁႄၼၼ်ႉဢမ်ႇၸႂ်ႈ။ သူလႆႈသၽေႃးတၢင်းဢၼ် ၶိုၼ်းပဵၼ်လုၵ်ႈ ဢိၵ်ႇတင်းဢၶႂၢင်ႉဢၼ်လႆႈႁွင်ႉဢပ်ႉပႃႉ ပေႃႈဢေႃႈ။- 16ႁဝ်းပဵၼ်လုၵ်ႈၽြႃးပဵၼ်ၸဝ်ႈဝႃႈၼႆ ဝီႉၺိၺ်ႇၸဝ်ႈၶၢမ်ႇသၢၵ်ႈသေႇလူၺ်ႈၵၼ်တင်းဝီႉၺိၺ်ႇႁဝ်းယူႇဢေႃႈ။- 17ပေႃးပဵၼ်လုၵ်ႈၸိုင်၊ ပဵၼ်ၵေႃႉဢၼ်ၶၢမ်ႇဢမူၺ်ႇဢေႃႈ။ ပဵၼ်ၵေႃႉဢၼ်ၶၢမ်ႇဢမူၺ်ႇၽြႃးပဵၼ်ၸဝ်ႈဢေႃႈ။ ပေႃးလႆႈၶၢမ်ႇတုၵ်ႉၶႃႉတၢင်းၽၢၼ်ႁူမ်ႈလူၺ်ႈၵၼ်တင်းၸဝ်ႈၼၼ်ႉ ႁႂ်ႈလႆႈၸၢမ်ႇၸႃးမုၼ်ၽုင်းလူၺ်ႈၵၼ်တင်းၸဝ်ႈၼၼ်ႉၸိုင် ပဵၼ်ၵေႃႉဢၼ်ၶၢမ်ႇဢမူၺ်ႇဢၼ်သိူၵ်ႈသမ်ႇၵၼ်တင်းၸဝ်ႈၼၼ်ႉဢေႃႈ။
မုၼ်ၽုင်းဢၼ်တၵ်းပဵၼ်မႃးမိူဝ်းၼႃႈ
18ပေႃးၶႆႈၸႂ်လူၺ်ႈလွင်ႈမုၼ်ၽုင်းဢၼ်တၵ်းမႃးတီႈႁဝ်းၼၼ်ႉၸိုင် တုၵ်ႉၶႃႉတၢင်းၽၢၼ်ဢၼ်လႆႈၶၢမ်ႇၼႂ်းၶိင်ႇတေႃႈလဵဝ်တႂ်ႈတႃၼႆႉဢမ်ႇပွင်ႇလွင်ႈၵႃႈသင်ဝႃႈၼႆ၊ ၵဝ်မီးသၽေႃးဢေႃႈ။- 19တၢင်းဢၼ်လေႃးၵႃႉမုင်ႈထႃႈမွင်းထႃႈၼၼ်ႉ ပႂ်ႉထႃႈလွင်ႈတၢင်းဢၼ်လုၵ်ႈၽြႃးပဵၼ်ၸဝ်ႈတင်းလၢႆ တၵ်းပေႃႇမႃးၼၼ်ႉယူႇဢေႃႈ။- 20လေႃးၵႃႉၼႆႉယူႇဢလူဝ်ႇလူဝ်ႇလႄႈ ၸွမ်းၵႂႃႇၵႃႈၼႂ်းမိူင်းဢၼိၵ်ႈၸႃႉၵူၺ်းမၼ်းဢမ်ႇၸႂ်ႈ။ ၸွမ်းၵႂႃႇၵွပ်ႈပိူဝ်ႈဢလူဝ်ႇမၼ်းၸဝ်ႈ ဢၼ်ႁႂ်ႈၸွမ်းၵႂႃႇၼၼ်ႉလႄႈ၊- 21ပၼ်ဢၶႂၢင်ႉဢၼ်လႆႈမုင်ႈထႃႈမွင်းထႃႈလွင်ႈဢၼ်လေႃးၵႃႉၼႆႉ တူဝ်ၸဝ်ႈၵဝ်ႇတၵ်းမီးတၢင်းဢၼ် ၵႄႈလွတ်ႈသေၵႃႈၼႂ်းတီႈတၢင်းဢၼ်မတ်ႉၽုၵ်ႇဝႆႉ ၵႃႈၼႂ်းတၢင်းဢၼ်ၽွၵ်ႈပျၢၼ်ႇလူႉလႅဝ်ၼၼ်ႉသေလႄႈ ႁွတ်ႈထိုင်ၵႃႈၼႂ်းတၢင်းဢၼ်လွတ်ႈဢၼ်ၸၢပ်ႈသႅင်ႇၵၼ်တင်း မုၼ်ၽုင်းလုၵ်ႈၽြႃးပဵၼ်ၸဝ်ႈတင်းလၢႆၼၼ်ႉယူႇဢေႃႈ။- 22လေႃးၵႃႉၼႆႉတင်းသဵင်ႈတင်းလူင် လႆႈၶၢင်းၶီၶၢင်းၽၢၼ်လႄႈ ၶၢမ်ႇဝူၺ်ႇတၼႃႇတုၵ်ႉၶႃႉတၢင်းၽၢၼ်တေႃႇထိုင်ႁွတ်ႈမိူဝ်ႈလဵဝ်ၼႆႉယူႇဢေႃႈ။- 23လိူဝ်သေၼၼ်ႉဢမ်ႇၵႃး ႁဝ်းၵေႃႈလႆႈၶၢမ်ႇငဝ်ႈႁၢၵ်ႈသူႉၵျေးၸူးၸဝ်ႈသေယဝ်ႉ မုင်ႈထႃႈမွင်းထႃႈတၢင်းဢၼ်ယွင်ႈဝႆႉၼႂ်းဢရႃႇလုၵ်ႈဢၼ်ဝႃႈ ၶျၢမ်းသႃႇတၢင်းဢၼ် ထုတ်ႇဢဝ်တူဝ်ၶၼ်ႇထႃႇႁဝ်းၼႆႉၼၼ်ႉၵူၺ်းလႄႈ ၶၢင်းၶီၶၢင်းၽၢၼ်ယူႇၵႃႈၼႂ်းႁူဝ်ၸႂ်ဢေႃႈ။
24ႁဝ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ် ၵွပ်ႈပိူဝ်ႈတၢင်းဢၼ် မုင်ႈထႃႈမွင်းထႃႈဢေႃႈ။ ပေႃးထူပ်းႁၼ်တၢင်းဢၼ်မုင်ႈထႃႈမွင်းထႃႈၼၼ်ႉယဝ်ႉၸိုင် လွင်ႈဢၼ်တၵ်းလႆႈမုင်ႈထႃႈမွင်းထႃႈယူႇဢမ်ႇမီး။ ႁဵတ်းသင်လႄႈ မုင်ႈထႃႈမွင်းထႃႈလွင်ႈဢၼ်ထူပ်းႁၼ်ယဝ်ႉၼၼ်ႉၼင်ႇႁိုဝ်။- 25ပေႃးႁဝ်းမုင်ႈထႃႈမွင်းထႃႈလွင်ႈတၢင်းဢၼ်ဢမ်ႇထူပ်းဢမ်ႇႁၼ်ၼၼ်ႉၸမ်ႉ၊ ႁဝ်းပႃးတင်းၸႂ်ဢၼ်ယိူၼ်ႉၶၢမ်ႇလႄႈ ပႂ်ႉထႃႈယူႇဢေႃႈ။- 26လိူဝ်သေၼၼ်ႉ၊ ဝီႉၺိၺ်ႇၸၢင်ႈၸွႆႈထႅမ်မႃႉၸႃႉၼႂ်းလွင်ႈတၢင်းဢၼ်ႁဝ်းဢမ်ႇတၢတ်ႈၼိူင်ႇလႆႈၼၼ်ႉယူႇဢေႃႈ။ ၵႃႈၼင်ႇဢၼ်ႁဝ်းထုၵ်ႇလီသူးတွင်းၼၼ်ႉ တၵ်းလႆႈယွၼ်းသူးၵႃႈသင်ဝႃႈၼႆ၊ ႁဝ်းဢမ်ႇႁူႉ။ ၵူၺ်းၵႃႈ ဝီႉၺိၺ်ႇၸဝ်ႈဢဝ်တင်း တၢင်းဢၼ်ၶၢင်းၶီၶၢင်းၽၢၼ်ဢၼ်ဢမ်ႇဢွၵ်ႇသူပ်းလႆႈၼၼ်ႉ တွင်းပၢၼ်ႇပုၼ်ႈႁဝ်းဢေႃႈ။- 27ၸဝ်ႈဢၼ်ၸႅတ်ႈထၢမ်ၸႅတ်ႈတူၺ်းႁူဝ်ၸႂ်ၼၼ်ႉ ႁူႉၸႂ်သၽေႃးဝီႉၺိၺ်ႇၸဝ်ႈယူႇဢေႃႈ။ လွင်ႈမၼ်းၸမ်ႉ ဝီႉၺိၺ်ႇၸဝ်ႈတွင်းပၢၼ်ႇပုၼ်ႈၶဝ်ၸိူဝ်းဢၼ်မူတ်းၸၢင်ႇၼၼ်ႉ ၸွမ်းၼင်ႇဢလူဝ်ႇၽြႃးပဵၼ်ၸဝ်ႈဢေႃႈ။
28ႁဝ်းႁူႉလွင်ႈဢၼ် လွင်ႈတၢင်းၵႃႈမီးၵူႈၸိူဝ်ႉၵူႈပိူင်ၽွမ်ႉၵၼ်ပွင်ႁဵတ်းဢၵျူဝ်းၶဝ်ၸိူဝ်းဢၼ်ႁၵ်ႉၽြႃးပဵၼ်ၸဝ်ႈဢၼ်ဝႃႈ ၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ် ၵႃႈၼင်ႇတၢင်းဢၼ်မၼ်းၸဝ်ႈၵျၢမ်ႇပွင်ၼၼ်ႉယူႇဢေႃႈ။- 29ၼင်ႇႁိုဝ်လုၵ်ႈၸဝ်ႈတၵ်းပဵၼ်လုၵ်ႈတူၼ်ႈၼႂ်းၼွင်ႉမၼ်းၸဝ်ႈၼမ်ၼႃႇၸိုင် ၸႃႉၸဵမ်မိူဝ်ႈဢွၼ်ၼႆႉၼၼ်ႉလႄႈ ၽြႃးပဵၼ်ၸဝ်ႈမၵ်းၶၢၼ်းၶဝ်ၸိူဝ်းဢၼ်မၼ်းၸဝ်ႈႁူႉၸႃႉၸဵမ်မိူဝ်ႈဢွၼ်ၼႆႉၼၼ်ႉဝႆႉ ႁႂ်ႈလႆႈပဵၼ်ၸိူဝ်ႉၼင်ႇပုင်ႇႁၢင်ႈလုၵ်ႈၸဝ်ႈဢေႃႈ။- 30ၶဝ်ၸိူဝ်းဢၼ်မၼ်းၸဝ်ႈမၵ်းၶၢၼ်းဝႆႉၼၼ်ႉၵေႃႈ၊ မၼ်းၸဝ်ႈႁွင်ႉဢဝ်ဢေႃႈ။ ၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ်ၼၼ်ႉၵေႃႈ မၼ်းၸဝ်ႈႁႂ်ႈတႄႇယူႇၼႂ်းတၢင်းဢၼ်သိုဝ်ႈတေႃႇဢေႃႈ။ ၶဝ်ၸိူဝ်းဢၼ်မၼ်းၸဝ်ႈႁႂ်ႈတႄႇယူႇၼႂ်းတၢင်းဢၼ်သိုဝ်ႈတေႃႇၼၼ်ႉၵေႃႈ မၼ်းၸဝ်ႈယွင်ႈယေႃးဢေႃႈ။
တၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈ
31ပိူဝ်ႈၼႆလႄႈ ၼႂ်းလွင်ႈတၢင်းၸိူဝ်းၼႆႉ တၵ်းမီးတီႈလၢတ်ႈၵႃႈသင်။ ပေႃးၽြႃးပဵၼ်ၸဝ်ႈမီးယူႇၽၢႆႇႁဝ်းၸိုင် ၽူႈလႂ်တၵ်းယူႇၽၢႆႇၼိုင်ႈသေလႄႈ ႁႄႉၶႅၼ်ႁဝ်းလႆႈ။- 32မၼ်းၸဝ်ႈဢၼ်ဢမ်ႇသေလၢႆလုၵ်ႈဢွၵ်ႇၸဝ်ႈလႄႈ ၸုၼ်ႉပႅတ်ႈပုၼ်ႈႁဝ်းၵႃႈမီးတင်းသဵင်ႈတင်းလူင်ၼႆႉၼၼ်ႉ ယင်းဢမ်ႇပၼ်လွင်ႈတၢင်းၵႃႈမီးတင်းသဵင်ႈတင်းလူင် ဢိၵ်ႇတင်းလုၵ်ႈၸဝ်ႈတီႈႁဝ်းလႄႈတၵ်းယူႇၸိူဝ်ႉၼင်ႇႁိုဝ်။- 33ၽူႈလႂ်တၵ်းတၢင်ႇဢပႅတ်ႈတီႈၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၼၼ်ႉ။ ၵေႃႉဢၼ်ႁႂ်ႈတႄႇယူႇၼႂ်းတၢင်းဢၼ်သိုဝ်ႈတေႃႇၼၼ်ႉၸမ်ႉ ပဵၼ်ၽြႃးပဵၼ်ၸဝ်ႈဢေႃႈ။- 34ၵေႃႉဢၼ်ၸီႇယၢင်ႇဢပႅတ်ႈၸမ်ႉ ပဵၼ်ၽူႈလႂ်။ ၵေႃႉဢၼ်ၶၢမ်ႇတၢင်းတၢႆလႄႈၶၢမ်ႇယဝ်ႉဢမ်ႇၵႃး၊ လုၵ်ႉၵႃႈတၢင်းတၢႆၶိုၼ်းလိပ်းသေယဝ်ႉ မီးယူႇၽၢႆႇၶႂႃၽြႃးပဵၼ်ၸဝ်ႈလႄႈ သူးတွင်းပုၼ်ႈႁဝ်းယူႇၼၼ်ႉၸမ်ႉ၊ ပဵၼ်ၸဝ်ႈၶရိၸ်ႈဢေႃႈ။- 35ၽူႈလႂ်တၵ်းႁႂ်ႈႁဝ်းၽၢတ်ႇယၢၼ်ၵၼ်တင်း တၢင်းႁၵ်ႉမႅတ်ႈတႃႇၸဝ်ႈၶရိၸ်ႈ။ တၢင်းဢၼ်ယၢၵ်ႈၸႂ်ၽၢၼ်ၸႂ်၊ တၢင်းဢၼ်ၵိၼ်းၸႂ်တိပ်ႇၸႂ်၊ တၢင်းဢၼ်ၼိၵ်ႈၸၢၵ်ႈငႅၼ်းသႄး၊ တၢင်းဢၼ်ဢိုပ်းဢၼ်ယၢၵ်ႈ၊ တၢင်းဢၼ်ဢမ်ႇမီးၶူဝ်းမီးလဵင်း၊ တၢင်းဢၼ်လႆႈထူပ်းၽေးထူပ်းရၢၼ်ႇ၊ တၢင်းဢၼ်လႆႈၶၢမ်ႇတၢင်းတၢႆၸိူဝ်းၼႆႉ ဢၼ်လႂ်တၵ်းႁႂ်ႈၽၢတ်ႇယၢၼ်ၵၼ်တင်း တၢင်းႁၵ်ႉမႅတ်ႈတႃႇၸဝ်ႈၶရိၸ်ႈ။- 36ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ ၵွပ်ႈပိူဝ်ႈၸဝ်ႈႁဝ်းလႄႈ ႁဝ်းၶႃႈလႆႈၶၢမ်ႇတၢင်းဢၼ်ဢဝ်တၢႆတႃႇသေႇဢမ်ႇထၢတ်ႇၶႃႈဢေႃႈ။ ပိူၼ်ႈၸၢင်ႈမၢတ်ႈႁဝ်းၶႃႈပဵၼ်ၸိူဝ်ႉၼင်ႇသူဝ်းဢၼ်ၶၢၼ်းဝႆႉ ပုၼ်ႈဢၼ်တၵ်းဢဝ်တၢႆတင်းလၢႆၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။
37ဢမ်ႇႁႂ်ႈၽၢတ်ႇယၢၼ်ၵၼ်ဢမ်ႇၵႃး၊ ၵွပ်ႈပိူဝ်ႈၵျေးၸူးမၼ်းၸဝ်ႈ ဢၼ်ႁၵ်ႉႁဝ်းၼၼ်ႉလႄႈ ႁဝ်းယဵင်ႈၶႅၼ်းတၵ်းပႄႉၼႅင်ႇ ၼႂ်းလွင်ႈတၢင်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။- 38လွင်ႈမၼ်းၸမ်ႉ တၢင်းတၢႆသေဢမ်ႇဝႃႈ၊ တၢင်းဢၼ်ဢသၢၵ်ႈလိပ်းသေဢမ်ႇဝႃႈ၊ တမၢၼ်ႇၵၢင်ႁၢဝ်သေဢမ်ႇဝႃႈ၊ ပၢႆၸိၵ်းၸွမ်ဢၼ်မျၢတ်ႈသေဢမ်ႇဝႃႈ၊ ဢႃႇၼႃႇတၼ်းၶူဝ်းသေဢမ်ႇဝႃႈ၊ ဢၼ်သိုဝ်ႈၼႃႈတႂ်ႈတႃသေဢမ်ႇဝႃႈ၊ ဢၼ်တၵ်းမႃးၵမ်းလိုၼ်းသေဢမ်ႇဝႃႈ၊- 39ဢၼ်သုင်သေဢမ်ႇဝႃႈ၊ ဢၼ်တႅမ်ႇသေဢမ်ႇဝႃႈ၊ ၸႃႉၸဵမ်လွင်ႈတၢင်းၸိူဝ်းၼႆႉလႄႈ လွင်ႈတၢင်းၼီႉမိၵ်ႈတႃႉဢၼ်လႂ်သေဢမ်ႇဝႃႈ၊ တၵ်းဢမ်ႇႁႂ်ႈႁဝ်းၽၢတ်ႇယၢၼ်ၵၼ်တင်း တၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈ ဢၼ်မီးယူႇၼႂ်းၸဝ်ႈႁဝ်း ယေႇသူႉၶရိၸ်ႈၼၼ်ႉဝႃႈၼႆ ၵဝ်တူၵ်းၵၢင်ၸႂ်ယူႇဢေႃႈ။
Currently Selected:
ရူဝ်းမႃႉ 8: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
