Popular Bible Verses from ရူဝ်းမႃႉ 8

Share

ႁဝ်း​ႁူႉ​လွင်ႈ​ဢၼ် လွင်ႈ​တၢင်း​ၵႃႈ​မီး​ၵူႈ​ၸိူဝ်ႉ​ၵူႈ​ပိူင်​ၽွမ်ႉ​ၵၼ်​ပွင်​ႁဵတ်း​ဢၵျူဝ်း​ၶဝ်​ၸိူဝ်း​ဢၼ်​ႁၵ်ႉ​ၽြႃး​ပဵၼ်​ၸဝ်ႈ​ဢၼ်​ဝႃႈ ၶဝ်​ၸိူဝ်း​ဢၼ်​မၼ်း​ၸဝ်ႈ​ႁွင်ႉ​ဢဝ် ၵႃႈ​ၼင်ႇ​တၢင်း​ဢၼ်​မၼ်း​ၸဝ်ႈ​ၵျၢမ်ႇ​ပွင်​ၼၼ်ႉ​ယူႇ​ဢေႃႈ။

လွင်ႈ​မၼ်း​ၸမ်ႉ တၢင်း​တၢႆ​သေ​ဢမ်ႇ​ဝႃႈ၊ တၢင်း​ဢၼ်​ဢသၢၵ်ႈ​လိပ်း​သေ​ဢမ်ႇ​ဝႃႈ၊ တမၢၼ်ႇ​ၵၢင်​ႁၢဝ်​သေ​ဢမ်ႇ​ဝႃႈ၊ ပၢႆ​ၸိၵ်း​ၸွမ်​ဢၼ်​မျၢတ်ႈ​သေ​ဢမ်ႇ​ဝႃႈ၊ ဢႃႇၼႃႇ​တၼ်း​ၶူဝ်း​သေ​ဢမ်ႇ​ဝႃႈ၊ ဢၼ်​သိုဝ်ႈ​ၼႃႈ​တႂ်ႈ​တႃ​သေ​ဢမ်ႇ​ဝႃႈ၊ ဢၼ်​တၵ်း​မႃး​ၵမ်း​လိုၼ်း​သေ​ဢမ်ႇ​ဝႃႈ၊- ဢၼ်​သုင်​သေ​ဢမ်ႇ​ဝႃႈ၊ ဢၼ်​တႅမ်ႇ​သေ​ဢမ်ႇ​ဝႃႈ၊ ၸႃႉ​ၸဵမ်​လွင်ႈ​တၢင်း​ၸိူဝ်း​ၼႆႉ​လႄႈ လွင်ႈ​တၢင်း​ၼီႉမိၵ်ႈ​တႃႉ​ဢၼ်​လႂ်​သေ​ဢမ်ႇ​ဝႃႈ၊ တၵ်း​ဢမ်ႇ​ႁႂ်ႈ​ႁဝ်း​ၽၢတ်ႇ​ယၢၼ်​ၵၼ်​တင်း တၢင်း​ႁၵ်ႉ​မႅတ်ႈ​တႃႇ​ၽြႃး​ပဵၼ်​ၸဝ်ႈ ဢၼ်​မီး​ယူႇ​ၼႂ်း​ၸဝ်ႈ​ႁဝ်း ယေႇသူႉ​ၶရိၸ်ႈ ​ၼၼ်ႉ​ဝႃႈ​ၼႆ ၵဝ်​တူၵ်း​ၵၢင်​ၸႂ်​ယူႇ​ဢေႃႈ။

လိူဝ်​သေ​ၼၼ်ႉ၊ ဝီႉၺိၺ်ႇ​ၸၢင်ႈ​ၸွႆႈ​ထႅမ်​မႃႉ​ၸႃႉ​ၼႂ်း​လွင်ႈ​တၢင်း​ဢၼ်​ႁဝ်း​ဢမ်ႇ​တၢတ်ႈ​ၼိူင်ႇ​လႆႈ​ၼၼ်ႉ​ယူႇ​ဢေႃႈ။ ၵႃႈ​ၼင်ႇ​ဢၼ်​ႁဝ်း​ထုၵ်ႇ​လီ​သူး​တွင်း​ၼၼ်ႉ တၵ်း​လႆႈ​ယွၼ်း​သူး​ၵႃႈ​သင်​ဝႃႈ​ၼႆ၊ ႁဝ်း​ဢမ်ႇ​ႁူႉ။ ၵူၺ်း​ၵႃႈ ဝီႉၺိၺ်ႇ​ၸဝ်ႈ​ဢဝ်​တင်း တၢင်း​ဢၼ်​ၶၢင်း​ၶီ​ၶၢင်း​ၽၢၼ်​ဢၼ်​ဢမ်ႇ​ဢွၵ်ႇ​သူပ်း​လႆႈ​ၼၼ်ႉ တွင်း​ပၢၼ်ႇ​ပုၼ်ႈ​ႁဝ်း​ဢေႃႈ။

ပိူဝ်ႈ​ၼႆ​လႄႈ ၼႂ်း​လွင်ႈ​တၢင်း​ၸိူဝ်း​ၼႆႉ တၵ်း​မီး​တီႈ​လၢတ်ႈ​ၵႃႈ​သင်။ ပေႃး​ၽြႃး​ပဵၼ်​ၸဝ်ႈ​မီး​ယူႇ​ၽၢႆႇ​ႁဝ်း​ၸိုင် ၽူႈ​လႂ်​တၵ်း​ယူႇ​ၽၢႆႇ​ၼိုင်ႈ​သေ​လႄႈ ႁႄႉ​ၶႅၼ်​ႁဝ်း​လႆႈ။

ၵွပ်ႈ​ပိူဝ်ႈ​ၸိူဝ်ႉ​ၼင်ႇ​ၼၼ်​လႄႈ ၶဝ်​ၸိူဝ်း​ဢၼ်​တႄႇ​ယူႇ​ၼႂ်း​ ယေႇသူႉ​ၶရိၸ်ႈ ​ၼၼ်ႉ ၵၢင်း​လွတ်ႈ​တင်း​တၢင်း​ဢၼ်​ၸီႇ​ယၢင်ႇ​ဢပႅတ်ႈ​ဢေႃႈ။

ၸႂ်​သၽေႃး​ၸႃႇ​တီႉ​ပၵတီႉ​ၸိုင်၊ ပဵၼ်​လွင်ႈ​တၢင်း​တၢႆ​ဢေႃႈ။ ၸႂ်​သၽေႃး​ဝီႉၺိၺ်ႇ​ပၵတီႉ​ၸမ်ႉ ပဵၼ်​လွင်ႈ​တၢင်း​ဢၼ်​ဢသၢၵ်ႈ​လိပ်း ဢိၵ်ႇ​တင်း​တၢင်း​ဢၼ်​ၼိမ်​ဢေႃႈ။

ဢမ်ႇ​ႁႂ်ႈ​ၽၢတ်ႇ​ယၢၼ်​ၵၼ်​ဢမ်ႇ​ၵႃး၊ ၵွပ်ႈ​ပိူဝ်ႈ​ၵျေး​ၸူး​မၼ်း​ၸဝ်ႈ ဢၼ်​ႁၵ်ႉ​ႁဝ်း​ၼၼ်ႉ​လႄႈ ႁဝ်း​ယဵင်ႈ​ၶႅၼ်း​တၵ်း​ပႄႉ​ၼႅင်ႇ ၼႂ်း​လွင်ႈ​တၢင်း​တင်း​သဵင်ႈ​တင်း​လူင်​ၸိူဝ်း​ၼၼ်ႉ​ဢေႃႈ။

ပေႃး​ၶႆႈ​ၸႂ်​လူၺ်ႈ​လွင်ႈ​မုၼ်​ၽုင်း​ဢၼ်​တၵ်း​မႃး​တီႈ​ႁဝ်း​ၼၼ်ႉ​ၸိုင် တုၵ်ႉ​ၶႃႉ​တၢင်း​ၽၢၼ်​ဢၼ်​လႆႈ​ၶၢမ်ႇ​ၼႂ်း​ၶိင်ႇ​တေႃႈ​လဵဝ်​တႂ်ႈ​တႃ​ၼႆႉ​ဢမ်ႇ​ပွင်ႇ​လွင်ႈ​ၵႃႈ​သင်​ဝႃႈ​ၼႆ၊ ၵဝ်​မီး​သၽေႃး​ဢေႃႈ။

ၽူႈ​လႂ်​တၵ်း​ႁႂ်ႈ​ႁဝ်း​ၽၢတ်ႇ​ယၢၼ်​ၵၼ်​တင်း တၢင်း​ႁၵ်ႉ​မႅတ်ႈ​တႃႇ​ၸဝ်ႈ​ၶရိၸ်ႈ။ တၢင်း​ဢၼ်​ယၢၵ်ႈ​ၸႂ်​ၽၢၼ်​ၸႂ်၊ တၢင်း​ဢၼ်​ၵိၼ်း​ၸႂ်​တိပ်ႇ​ၸႂ်၊ တၢင်း​ဢၼ်​ၼိၵ်ႈ​ၸၢၵ်ႈ​ငႅၼ်း​သႄး၊ တၢင်း​ဢၼ်​ဢိုပ်း​ဢၼ်​ယၢၵ်ႈ၊ တၢင်း​ဢၼ်​ဢမ်ႇ​မီး​ၶူဝ်း​မီး​လဵင်း၊ တၢင်း​ဢၼ်​လႆႈ​ထူပ်း​ၽေး​ထူပ်း​ရၢၼ်ႇ၊ တၢင်း​ဢၼ်​လႆႈ​ၶၢမ်ႇ​တၢင်း​တၢႆ​ၸိူဝ်း​ၼႆႉ ဢၼ်​လႂ်​တၵ်း​ႁႂ်ႈ​ၽၢတ်ႇ​ယၢၼ်​ၵၼ်​တင်း တၢင်း​ႁၵ်ႉ​မႅတ်ႈ​တႃႇ​ၸဝ်ႈ​ၶရိၸ်ႈ။

ၸဝ်ႈ​ဢၼ်​ၸႅတ်ႈ​ထၢမ်​ၸႅတ်ႈ​တူၺ်း​ႁူဝ်​ၸႂ်​ၼၼ်ႉ ႁူႉ​ၸႂ်​သၽေႃး​ဝီႉၺိၺ်ႇ​ၸဝ်ႈ​ယူႇ​ဢေႃႈ။ လွင်ႈ​မၼ်း​ၸမ်ႉ ဝီႉၺိၺ်ႇ​ၸဝ်ႈ​တွင်း​ပၢၼ်ႇ​ပုၼ်ႈ​ၶဝ်​ၸိူဝ်း​ဢၼ်​မူတ်း​ၸၢင်ႇ​ၼၼ်ႉ ၸွမ်း​ၼင်ႇ​ဢလူဝ်ႇ​ၽြႃး​ပဵၼ်​ၸဝ်ႈ​ဢေႃႈ။

ၶဝ်​ၸိူဝ်း​ဢၼ်​ဝီႉၺိၺ်ႇ​ၸဝ်ႈ ဢဝ်​ၵႂႃႇ​သူင်ႇ​ၵႃႈ​မီး​တင်း​သဵင်ႈ​တင်း​လူင်​ၼၼ်ႉ ပဵၼ်​လုၵ်ႈ​ၽြႃး​ပဵၼ်​ၸဝ်ႈ​ဢေႃႈ။

ၶဝ်​ၸိူဝ်း​ဢၼ်​မီး​ၸႃႇ​တီႉ​ပၵတီႉ​ၼၼ်ႉ မီး​ၸႂ်​သၽေႃး​ဢၼ်​ၸွႆး​ဢၼ်​ၸပ်း​လူၺ်ႈ​လွင်ႈ​တၢင်း​ဢၼ်​ၸၢပ်ႈ​သႅင်ႇ​ၵၼ်​တင်း​ၸႃႇ​တီႉ​ပၵတီႉ​ဢေႃႈ။ ၶဝ်​ၸိူဝ်း​ဢၼ်​မီး​ဝီႉၺိၺ်ႇ​ပၵတီႉ​ၸမ်ႉ မီး​ၸႂ်​သၽေႃး ဢၼ်​ၸွႆး​ဢၼ်​ၸပ်း​လူၺ်ႈ​လွင်ႈ​တၢင်း​ဢၼ် ၸၢပ်ႈ​သႅင်ႇ​ၵၼ်​တင်း​ဝီႉၺိၺ်ႇ​ပၵတီႉ​ဢေႃႈ။

မၼ်း​ၸဝ်ႈ​ဢၼ်​ဢမ်ႇ​သေ​လၢႆ​လုၵ်ႈ​ဢွၵ်ႇ​ၸဝ်ႈ​လႄႈ ၸုၼ်ႉ​ပႅတ်ႈ​ပုၼ်ႈ​ႁဝ်း​ၵႃႈ​မီး​တင်း​သဵင်ႈ​တင်း​လူင်​ၼႆႉ​ၼၼ်ႉ ယင်း​ဢမ်ႇ​ပၼ်​လွင်ႈ​တၢင်း​ၵႃႈ​မီး​တင်း​သဵင်ႈ​တင်း​လူင် ဢိၵ်ႇ​တင်း​လုၵ်ႈ​ၸဝ်ႈ​တီႈ​ႁဝ်း​လႄႈ​တၵ်း​ယူႇ​ၸိူဝ်ႉ​ၼင်ႇ​ႁိုဝ်။

ႁဝ်း​ပဵၼ်​လုၵ်ႈ​ၽြႃး​ပဵၼ်​ၸဝ်ႈ​ဝႃႈ​ၼႆ ဝီႉၺိၺ်ႇ​ၸဝ်ႈ​ၶၢမ်ႇ​သၢၵ်ႈ​သေႇ​လူၺ်ႈ​ၵၼ်​တင်း​ဝီႉၺိၺ်ႇ​ႁဝ်း​ယူႇ​ဢေႃႈ။- ပေႃး​ပဵၼ်​လုၵ်ႈ​ၸိုင်၊ ပဵၼ်​ၵေႃႉ​ဢၼ်​ၶၢမ်ႇ​ဢမူၺ်ႇ​ဢေႃႈ။ ပဵၼ်​ၵေႃႉ​ဢၼ်​ၶၢမ်ႇ​ဢမူၺ်ႇ​ၽြႃး​ပဵၼ်​ၸဝ်ႈ​ဢေႃႈ။ ပေႃး​လႆႈ​ၶၢမ်ႇ​တုၵ်ႉ​ၶႃႉ​တၢင်း​ၽၢၼ်​ႁူမ်ႈ​လူၺ်ႈ​ၵၼ်​တင်း​ၸဝ်ႈ​ၼၼ်ႉ ႁႂ်ႈ​လႆႈ​ၸၢမ်ႇ​ၸႃး​မုၼ်​ၽုင်း​လူၺ်ႈ​ၵၼ်​တင်း​ၸဝ်ႈ​ၼၼ်ႉ​ၸိုင် ပဵၼ်​ၵေႃႉ​ဢၼ်​ၶၢမ်ႇ​ဢမူၺ်ႇ​ဢၼ်​သိူၵ်ႈ​သမ်ႇ​ၵၼ်​တင်း​ၸဝ်ႈ​ၼၼ်ႉ​ဢေႃႈ။

ပဵၼ်​လွင်ႈ​ၸိူဝ်ႉ​ၼင်ႇ​ႁိုဝ်​ဝႃႈ​ၼႆ​ၸမ်ႉ ၸႂ်​သၽေႃး​ၸႃႇ​တီႉ​ပၵတီႉ​ၸိုင် ပဵၼ်​တၢင်း​ဢၼ်​ၶတ်း​ၵၼ်​တင်း​ၽြႃး​ပဵၼ်​ၸဝ်ႈ​ဢေႃႈ။ ဢမ်ႇ​ၸၢင်ႈ​ၸွမ်း​ဢလူဝ်ႇ​တြႃး​ၽြႃး​ပဵၼ်​ၸဝ်ႈ။ လိူဝ်​သေ​ၼၼ်ႉ​ဢမ်ႇ​ၵႃး​ဢမ်ႇ​ၸွမ်း​လႆႈ။

တၢင်း​ဢၼ်​လေႃးၵႃႉ​မုင်ႈ​ထႃႈ​မွင်း​ထႃႈ​ၼၼ်ႉ ပႂ်ႉ​ထႃႈ​လွင်ႈ​တၢင်း​ဢၼ်​လုၵ်ႈ​ၽြႃး​ပဵၼ်​ၸဝ်ႈ​တင်း​လၢႆ တၵ်း​ပေႃႇ​မႃး​ၼၼ်ႉ​ယူႇ​ဢေႃႈ။

လေႃးၵႃႉ​ၼႆႉ​တင်း​သဵင်ႈ​တင်း​လူင် လႆႈ​ၶၢင်း​ၶီ​ၶၢင်း​ၽၢၼ်​လႄႈ ၶၢမ်ႇ​ဝူၺ်ႇတၼႃႇ​တုၵ်ႉ​ၶႃႉ​တၢင်း​ၽၢၼ်​တေႃႇ​ထိုင်​ႁွတ်ႈ​မိူဝ်ႈ​လဵဝ်​ၼႆႉ​ယူႇ​ဢေႃႈ။