ရူဝ်းမႃႉ 7

ၵႂၢမ်းဢူႉပမႃႇလွင်ႈၽူဝ်မေး

1ပီႈၼွင်ႉဢၼ်ႁူႉပိင်းၺၢပ်ႈတြႃးၶဝ်ဢိူၺ်း၊ သူဢမ်ႇႁူႉလွင်ႈဢၼ်ပိင်းၺၢပ်ႈတြႃးဢုပ်ႉပိူင်ႇၵူၼ်း တေႃႇထိုင်ႁွတ်ႈတီႈသုတ်းတီႈၵွႆ ဢသၢၵ်ႈၼၼ်ႉႁိုဝ်။- 2ဢူႉပမႃႇၸမ်ႉ၊ ၽူႈယိင်းဢၼ်မီးၽူဝ်ၼၼ်ႉ၊ ၸူဝ်ႈဢၼ်ၽူဝ်မၼ်းဢမ်ႇပႆႇတၢႆၼၼ်ႉၸိုင်၊ ၸွမ်းၼင်ႇပိင်းၺၢပ်ႈတြႃးလႄႈ မတ်ႉၽုၵ်ႇဝႆႉယူႇတီႈၽူဝ်မၼ်းဢေႃႈ။ ပေႃးၽူဝ်မၼ်းတၢႆၸမ်ႉ၊ မၼ်းၵၢင်းလွတ်ႈတင်း တၢင်းဢၼ်မတ်ႉဢၼ်ၽုၵ်ႇၽူဝ်မၼ်းဢေႃႈ။- 3ပိူဝ်ႈၼႆလႄႈ ၸူဝ်ႈဢၼ်ၽူဝ်မၼ်းဢမ်ႇပႆႇတၢႆၼၼ်ႉ၊ ပေႃးမၼ်းႁဵတ်းမေးၵူၼ်းတၢင်ႇၵေႃႉၸိုင်၊ မၼ်းတၵ်းလႆႈၶၢမ်ႇတၢင်းဢၼ် ႁွင်ႉမႄႈယိင်းဢၼ်လဵၼ်ႈၽူဝ်ဢွၼ်ႇဢေႃႈ။ ပေႃးၽူဝ်မၼ်းတၢႆၸမ်ႉ၊ ပိၵ်ႉသမ်ႉမၼ်းႁဵတ်းမေးၵူၼ်းတၢင်ႇၵေႃႉသေၵေႃႈ မၼ်းဢမ်ႇမီးလွင်ႈဢၼ်တၵ်းလႆႈႁွင်ႉ မႄႈယိင်းဢၼ်လဵၼ်ႈၽူဝ်ဢွၼ်ႇ။

4မိူၼ်ၼင်ႇၼႆ၊ ပီႈၼွင်ႉၶဝ်ဢိူၺ်း၊ သူတၢႆၵွပ်ႈတူဝ်ၶၼ်ႇထႃႇၸဝ်ႈၶရိၸ်ႈလႄႈ ၽၢတ်ႇယၢၼ်ၵၼ်တင်းပိင်းၺၢပ်ႈတြႃး ႁႂ်ႈလႆႈပဵၼ်မေးၵူၼ်းတၢင်ႇၵေႃႉဢၼ်ဝႃႈ ၸဝ်ႈဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉလႄႈ မၢၵ်ႇမၢၵ်ႇမႃးၸွမ်းၼင်ႇဢလူဝ်ႇၽြႃးပဵၼ်ၸဝ်ႈဢေႃႈ။- 5မိူဝ်ႈဢၼ်ႁဝ်းယင်းမီးယူႇၼႂ်းၸႃႇတီႉပၵတီႉၼၼ်ႉၸိုင် ၸႂ်ဢၼ်ၸၢပ်ႈသႅင်ႇၵၼ်တင်းဢပႅတ်ႈၼၼ်ႉ ဢွၵ်ႇမႃးၵွပ်ႈပိူဝ်ႈပိင်းၺၢပ်ႈတြႃးလႄႈ ပွင်ႁဵတ်းယူႇ ၵႃႈၼႂ်းဢၢင်ႇၵႃႇတူဝ်ႁဝ်းတင်းလၢႆ ႁႂ်ႈလႆႈမၢၵ်ႇမၢၵ်ႇမႃးၸွမ်းၼင်ႇဢလူဝ်ႇတြႃးတၢင်းတၢႆဢေႃႈ။- 6တေႃႈလဵဝ်ၼႆႉၸမ်ႉ၊ လွင်ႈၼင်ႇႁိုဝ် ႁဝ်းယင်းဢမ်ႇဢိင်တြႃးဢၼ်ၵဝ်ႇ ဢၼ်မႃးၼႂ်းၵျၢမ်းလိၵ်ႈၼၼ်ႉလႄႈ တၵ်းဢိင်ဝီႉၺိၺ်ႇတြႃးၸဝ်ႈဢၼ်မႂ်ႇယူႇသေလႄႈ ပွင်ႁဵတ်းဢမူႉၸဝ်ႈၸိုင် ႁဝ်းလႆႈတၢႆၵႃႈတီႈလွင်ႈတၢင်းဢၼ်ဢုပ်ႉပိူင်ႇႁဝ်းၼၼ်ႉသေယဝ်ႉ၊ လႆႈၵၢင်းလွတ်ႈသေၵႃႈၼႂ်းမိုဝ်းပိင်းၺၢပ်ႈတြႃးၼၼ်ႉဢေႃႈ။

လွင်ႈပိင်းၺၢပ်ႈတြႃးလႄႈ ဢပႅတ်ႈတြႃး

7ပိူဝ်ႈၼႆလႄႈ တၵ်းလႆႈဝႃႈၸိူဝ်ႉၼင်ႇႁိုဝ်။ ၼႂ်းပိင်းၺၢပ်ႈတြႃးၼၼ်ႉမီးဢပႅတ်ႈႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။ ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈပိင်းၺၢပ်ႈတြႃးၵူၺ်းလႄႈ ၵဝ်လႆႈႁူႉသၽေႃးဢပႅတ်ႈဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ ယႃႇပေမီးၸႂ်လေႃးၽႃႉဝႃႈၼႆ ပေႃးပိင်းၺၢပ်ႈတြႃးဢမ်ႇဝႃႈၸိုင် ၵဝ်ဢမ်ႇႁူႉသၽေႃးလေႃးၽႃႉ။- 8ဢပႅတ်ႈတြႃးလႆႈဢၶႂၢင်ႉ ၵွပ်ႈပိူဝ်ႈပိင်းၺၢပ်ႈတြႃးလႄႈ ၸၢင်ႈႁဵတ်းပဵၼ်ၸႂ်လေႃးၽႃႉၵူႈၸိူဝ်ႉၵူႈပိူင်ၼႂ်းၵဝ်ဢေႃႈ။ ပေႃးပိင်းၺၢပ်ႈတြႃးဢမ်ႇမီးၸိုင် ဢပႅတ်ႈတြႃးတၢႆဢေႃႈ။

9မိူဝ်ႈဢွၼ်ၼႆႉၼၼ်ႉ ပိူဝ်ႈဢၼ်ပိင်းၺၢပ်ႈတြႃးဢမ်ႇမီးလႄႈ ၵဝ်ဢသၢၵ်ႈလိပ်းယူႇဢေႃႈ။ မိူဝ်ႈဢၼ်ပိင်းၺၢပ်ႈတြႃးပေႃႇမႃးၸိုင်၊ ဢပႅတ်ႈတြႃးသမ်ႉၶိုၼ်းလိပ်းဢေႃႈ။ ၵဝ်ၵေႃႈတၢႆဢေႃႈ။- 10ၵဝ်ထူပ်းလွင်ႈဢၼ် ပိင်းၺၢပ်ႈတြႃးဢၼ်ၸၢပ်ႈသႅင်ႇၵၼ်တင်းတၢင်းဢၼ်ဢသၢၵ်ႈလိပ်းၼၼ်ႉ ၸၢပ်ႈသႅင်ႇၵၼ်တင်းတၢင်းတၢႆဢေႃႈ။- 11ဢပႅတ်ႈတြႃးလႆႈဢၶႂၢင်ႉ ၵွပ်ႈပိူဝ်ႈပိင်းၺၢပ်ႈတြႃးယဝ်ႉၸင်ႇ ပႅတ်ႉလႅၼ်ၵဝ်လႄႈ ဢဝ်ၵဝ်တၢႆဢေႃႈ။

12ပိူဝ်ႈၼႆလႄႈတြႃးၸဝ်ႈမူတ်းၸၢင်ႇဢေႃႈ။ ပိင်းၺၢပ်ႈတြႃးၵေႃႈမူတ်းၸၢင်ႇသိုဝ်ႈတေႃႇမျၢတ်ႈလီဢေႃႈ။

13ပေႃးပဵၼ်ၸိူဝ်ႉၼင်ႇၼၼ်ၸိုင်၊ ဢၼ်မျၢတ်ႈလီၼၼ်ႉ ပဵၼ်လွင်ႈတၢင်းတၢႆတီႈၵဝ်ႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။ ဢပႅတ်ႈတြႃးၼၼ်ႉ၊ ၼင်ႇႁိုဝ်လွင်ႈဢၼ်သၽေႃးမၼ်း တၵ်းလႆႈထၢင်ႇသႃးၸိုင်၊ ဢဝ်လွင်ႈတၢင်းဢၼ်မျၢတ်ႈလီမၼ်းၼၼ်ႉ ႁဵတ်းတၢင်းတၢႆတီႈၵဝ်လႄႈ ပဵၼ်လွင်ႈတၢင်းတၢႆဢေႃႈ။ ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ ဢပႅတ်ႈတြႃးမီးတၢင်းဢၼ်ပျေႉၸုမ်ႇ တင်းဢပႅတ်ႈၼႃႇလူင်လၢင်ၵွပ်ႈပိူဝ်ႈ ပိင်းၺၢပ်ႈၸဝ်ႈဢေႃႈ။

လွင်ႈတၢင်းဢၼ်တိုၵ်းတေႃးၵႃႈၼႂ်းၵူၼ်း

14လိူဝ်သေၼၼ်ႉ၊ ႁဝ်းႁူႉလွင်ႈဢၼ်ပိင်းၺၢပ်ႈတြႃး ၸၢပ်ႈသႅင်ႇၵၼ်တင်းဝီႉၺိၺ်ႇပၵတီႉၼၼ်ႉယူႇဢေႃႈ။ ၵဝ်ၸမ်ႉမီးၸႃႇတီႉပၵတီႉလႄႈ လႆႈၶၢမ်ႇတၢင်းဢၼ်ၶၢႆပႅတ်ႈၼႂ်းမိုဝ်းဢပႅတ်ႈတြႃးဢေႃႈ။- 15လွင်ႈမၼ်းၸမ်ႉ ၵဝ်ဢမ်ႇႁူႉဢၼ်ၵဝ်ၵမ်ၵျၢင်ႉၼၼ်ႉ၊ ဢၼ်ၵဝ်ၶႂ်ႈၵမ်ၵျၢင်ႉၸိုင် ၵဝ်ဢမ်ႇၵမ်ၵျၢင်ႉ။ ဢၼ်ၵဝ်လီႁင်ႈၸိုင် ၵဝ်ၵမ်ၵျၢင်ႉဢေႃႈ။- 16ပေႃးၵဝ်ၵမ်ၵျၢင်ႉဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉၸိုင် ပိင်းၺၢပ်ႈတြႃးသိုဝ်ႈတေႃႇဢေႃႈ ဝႃႈၼႆ၊ ၵဝ်ႁပ်ႉတုင်းဢဝ်ဢေႃႈ။- 17ပေႃးပဵၼ်ၸိူဝ်ႉၼင်ႇၼႆၸိုင် ၵဝ်ၵမ်ၵျၢင်ႉဢၼ်ဢမ်ႇလီၸိူဝ်းၼၼ်ႉ ဢမ်ႇၸႂ်ႈ။ ဢပႅတ်ႈတြႃးဢၼ်ယူႇၵႃႈၼႂ်းၵဝ်ၼႆႉၼၼ်ႉ ၵမ်ၵျၢင်ႉဢေႃႈ။

18ၵဝ်ႁူႉလွင်ႈဢၼ် ဢၼ်လီဢၼ်ငၢမ်းသေၸိူဝ်ႉသေပိူင် ဢမ်ႇတႄႇဢမ်ႇမီးၵႃႈၼႂ်းၵဝ် ဢၼ်ဝႃႈၸႃႇတီႉပၵတီႉၵဝ်ၼႆႉၼၼ်ႉယူႇဢေႃႈ။ လွင်ႈမၼ်းၸမ်ႉ ပိၵ်ႉသမ်ႉၵဝ်မီးၸႂ်ဢၼ်ၶႂ်ႈၵမ်ၵျၢင်ႉသေၵေႃႈ ၵဝ်ႁႃဢၶႂၢင်ႉဢၼ်ၸၢင်ႈၵမ်ၵျၢင်ႉလွင်ႈဢၼ်လီဢၼ်ငၢမ်းၼၼ်ႉလႄႈ ဢမ်ႇထူပ်းဢမ်ႇလႆႈ။- 19ဢၼ်လီဢၼ်ငၢမ်းဢၼ်ၵဝ်ၶႂ်ႈၵမ်ၵျၢင်ႉၼၼ်ႉၸိုင်၊ ၵဝ်ဢမ်ႇၵမ်ၵျၢင်ႉ။ ဢၼ်ႁၢႆႉဢၼ်မိူၵ်ႈဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉၸိုင် ၵဝ်ၵမ်ၵျၢင်ႉဢေႃႈ။- 20ပေႃးၵဝ်ၵမ်ၵျၢင်ႉဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉၸိုင် ၵဝ်ၵမ်ၵျၢင်ႉဢမ်ႇၸႂ်ႈ။ ဢပႅတ်ႈတြႃးဢၼ်ယူႇၵႃႈၼႂ်းၵဝ်ၼႆႉၼၼ်ႉ ၵမ်ၵျၢင်ႉဢေႃႈ။

21မိူဝ်ႈဢၼ်ၵဝ်ၶႂ်ႈၵမ်ၵျၢင်ႉဢၼ်လီဢၼ်ငၢမ်းၼၼ်ႉၸိုင်၊ ၵဝ်ထူပ်းတြႃးဢၼ် ၸၢင်ႈႁႂ်ႈၵမ်ၵျၢင်ႉဢၼ်ႁၢႆႉဢၼ်မိူၵ်ႈဢေႃႈ။- 22ၸွမ်းၼင်ႇၵူၼ်းၵႃႈၼႂ်းၸိုင် ၵဝ်ၸၢင်ႈမူၼ်ႈပျေႃႇၼႂ်းပိင်းၺၢပ်ႈတြႃးၽြႃးပဵၼ်ၸဝ်ႈဢေႃႈ။- 23ၵူၺ်းၵႃႈ ၵဝ်ႁၼ်လွင်ႈဢၼ်တြႃးပႃးၼိုင်ႈ ဢၼ်မီးၼႂ်းတူဝ်ဢၢင်ႇၵႃႇၵဝ်ၸိူဝ်းၼႆႉ တိုၵ်းၵၼ်တင်းၸႂ်ဝီႉၺိၺ်ႇတြႃးလႄႈ တီႉဢဝ်ၵဝ်ၵႂႃႇဢၢပ်ႈပၼ်ၵႃႈၼႂ်းမိုဝ်းဢပႅတ်ႈတြႃးဢၼ်မီးၼႂ်းတူဝ်ဢၢင်ႇၵႃႇၵဝ်ၸိူဝ်းၼႆႉၼၼ်ႉဢေႃႈ။- 24ၵဝ်ၼႆႉပဵၼ်ၵေႃႉဢၼ် မႆႈၸႂ်ယၢပ်ႇၸႂ်ၼႃႇလူင်လၢင်ဢေႃႈ။ ၽူႈလႂ်တၵ်းၵႄႇၵဝ်လွတ်ႈသေၵႃႈတီႈတူဝ်တၢႆၼႆႉ။- 25ၵျေးၸူးၽြႃးပဵၼ်ၸဝ်ႈဢၼ်ၵႄႇလွတ်ႈပၼ် ၵွပ်ႈပိူဝ်ႈၸဝ်ႈႁဝ်းယေႇသူႉၶရိၸ်ႈၼၼ်ႉ ယႂ်ႇၼႃႇလူင်လၢင်ဢေႃႈ။ ၼင်ႇၼၼ်လႄႈ ၵဝ်ဢဝ်တင်းၸႂ်ဝီႉၺိၺ်ႇၸွမ်းတြႃးၽြႃးပဵၼ်ၸဝ်ႈဢေႃႈ။ ၵဝ်ဢဝ်တင်းၸႃႇတီႉပၵတီႉၸွမ်းဢပႅတ်ႈတြႃးဢေႃႈ။

Currently Selected:

ရူဝ်းမႃႉ 7: CBMS

Highlight

Copy