ရူဝ်းမႃႉ 6

ဢသၢၵ်ႈမႂ်ႇၼႂ်းၸဝ်ႈၶရိၸ်ႈ

1ပေႃးပဵၼ်ၸိူဝ်ႉၼင်ႇၼႆၸိုင်၊ ႁဝ်းတၵ်းလႆႈဝႃႈၸိူဝ်ႉၼင်ႇႁိုဝ်။ ၼင်ႇႁိုဝ်ၵျေးၸူးၸဝ်ႈတၵ်းယႂ်ႇမႃးၼမ်မႃးၸိုင် တၵ်းလႆႈၵမ်ၵျၢင်ႉဢပႅတ်ႈတြႃးလႄႈယူႇႁိုဝ်။- 2ဢမ်ႇပဵၼ်ၸိူဝ်ႉၼင်ႇၼၼ်၊ ႁဝ်းၸိူဝ်းဢၼ်တၢႆသေၵႃႈတီႈဢပႅတ်ႈတြႃးၼၼ်ႉၼႆႉ တၵ်းလႆႈၶိုၼ်းလိပ်းၵႃႈၼႂ်းတြႃးၼၼ်ႉလူးၵွၼ်ႇၸိူဝ်ႉၼင်ႇႁိုဝ်။- 3သူဢမ်ႇႁူႉလွင်ႈဢၼ်ႁဝ်းၵႃႈဢၼ်ၶၢမ်ႇပပ်ႉတီႉၸမ်ႇ ၼႂ်းယေႇသူႉၶရိၸ်ႈၼၼ်ႉၼႆႉ ၶၢမ်ႇပပ်ႉတီႉၸမ်ႇၼႂ်းတၢင်းဢၼ်မၼ်းၸဝ်ႈ ၶၢမ်ႇတၢင်းတၢႆၼၼ်ႉႁိုဝ်။- 4ၵွပ်ႈႁွႆးၼႆႉ ပိူဝ်ႈဢၼ်လႆႈၶၢမ်ႇပပ်ႉတီႉၸမ်ႇၼႂ်းတၢင်းဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းမၼ်းၸဝ်ႈဢေႃႈ။ လွင်ႈမၼ်းၸမ်ႉ ၸိူဝ်ႉၼင်ႇဢၼ်ၸဝ်ႈၶရိၸ်ႈ လုၵ်ႉၵႃႈတၢင်းတၢႆၶိုၼ်းလိပ်း ၵွပ်ႈပိူဝ်ႈၽုင်းတၼ်းၶူဝ်းပေႃႈၸဝ်ႈၼၼ်ႉ၊ ႁဝ်းၵေႃႈလႆႈလႄႇၵႂႃႇလႄႇမႃးၵႃႈၼႂ်းဢသၢၵ်ႈဢၼ်မႂ်ႇဢေႃႈ။- 5ၼႄးၼိုင်ႈၸမ်ႉ၊ ပေႃးႁဝ်းဢဝ်ပုင်ႇႁၢင်ႈတၢင်းဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉလႄႈ ၽုၵ်ႇသွမ်ႈယူႇလူၺ်ႈၵၼ်တင်းမၼ်းၸဝ်ႈၸိုင်၊ ႁဝ်းတၵ်းဢဝ်ပုင်ႇႁၢင်ႈတၢင်းဢၼ်မၼ်းၸဝ်ႈလုၵ်ႉၶိုၼ်းၼၼ်ႉလႄႈ ၽုၵ်ႇသွမ်ႈယူႇဢေႃႈ။- 6လိူဝ်သေၼၼ်ႉ၊ ႁဝ်းႁူႉလွင်ႈဢၼ်ၵူၼ်းၵဝ်ႇႁဝ်းၼႆႉ လႆႈၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈလူၺ်ႈၵၼ်တင်း မၼ်းၸဝ်ႈယဝ်ႉၼၼ်ႉယူႇဢေႃႈ။ လွင်ႈမၼ်းၸမ်ႉ ၼင်ႇႁိုဝ်ႁဝ်းတၵ်းဢမ်ႇလႆႈၶၢမ်ႇတၢင်းၸႂ်ႉတၢင်းသွႆဢပႅတ်ႈတြႃးၵမ်းလိုၼ်းၸိုင်၊ ပဵၼ်လွင်ႈဢၼ်တၵ်းယႃႉပႅတ်ႈတူဝ်ဢပႅတ်ႈတြႃးဢေႃႈ။- 7ၵေႃႉဢၼ်တၢႆၼၼ်ႉ လႆႈၵၢင်းလွတ်ႈသေၵႃႈၼႂ်းမိုဝ်းဢပႅတ်ႈတြႃးဢေႃႈ။- 8ပေႃးႁဝ်းတၢႆလူၺ်ႈၵၼ်တင်းၸဝ်ႈၶရိၸ်ႈၸိုင်၊ ႁဝ်းယုမ်ႇလွင်ႈဢၼ်ႁဝ်းတၵ်းလႆႈၶိုၼ်းလိပ်း လူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။- 9လွင်ႈမၼ်းၸမ်ႉ ႁဝ်းႁူႉလွင်ႈဢၼ်ၸဝ်ႈၶရိၸ်ႈလုၵ်ႉၵႃႈတၢင်းတၢႆၶိုၼ်းလိပ်းသေယဝ်ႉ ၵၢင်းလွတ်ႈတင်းတၢင်းတၢႆယူႇတႃႇသေႇလႄႈ ၵမ်းလိုၼ်းၵေႃႈ တြႃးတၢင်းတၢႆ ဢမ်ႇလႆႈဢုပ်ႉပိူင်ႇမၼ်းၸဝ်ႈၼၼ်ႉယူႇဢေႃႈ။- 10ၼႂ်းလွင်ႈဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉ မၼ်းၸဝ်ႈၶၢမ်ႇၵႃႈတီႈဢပႅတ်ႈတြႃးပွၵ်ႈလဵဝ်ၵူၺ်းဢေႃႈ။ ၼႂ်းလွင်ႈဢၼ်မၼ်းၸဝ်ႈဢသၢၵ်ႈလိပ်းၼၼ်ႉ၊ မၼ်းၸဝ်ႈလိပ်းၵႃႈတီႈၽြႃးပဵၼ်ၸဝ်ႈဢေႃႈ။- 11မိူၼ်ၼင်ႇၼၼ် ၵႃႈတီႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းဢပႅတ်ႈတြႃးၸမ်ႉ၊ ပဵၼ်တၢင်းတၢႆဝႃႈၼႆလႄႈသင်၊ ၵႃႈတီႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၸမ်ႉ၊ ဢသၢၵ်ႈလိပ်းၼႂ်းယေႇသူႉၶရိၸ်ႈၼၼ်ႉဝႃႈၼႆလႄႈသင်၊ သူထၢင်ႇတီႈတူဝ်သူတႃႉ။

12ပိူဝ်ႈၼႆလႄႈ ယႃႇပေႁႂ်ႈဢပႅတ်ႈတြႃးလႆႈဢုပ်ႉပိူင်ႇတူဝ်ၶၼ်ႇထႃႇသူ ႁႂ်ႈသူလႆႈၸွမ်းတၢင်းဢၼ်ၸွႆးၸပ်းဢလူဝ်ႇမၼ်းဢၼ်ၸၢင်ႈတၢႆ။- 13ယႃႇပေႁႂ်ႈဢၢင်ႇၵႃႇတူဝ်သူပဵၼ်လၢၵ်ႈၼၢၵ်ႈ #6:13 တူႉၸရိူၵ်ႈ - တၢင်းၵမ်ၵျၢင်ႉဢၼ်ဢမ်ႇလီဢမ်ႇငၢမ်းတူႉၸရိူၵ်ႈဢပႅတ်ႈလႄႈ သၢၵ်ႈၵၢပ်ႈတီႈဢပႅတ်ႈတြႃးၼၼ်ႉ၊ ဢဝ်တူဝ်ၸဝ်ႈၵဝ်ႇသၢၵ်ႈၵၢပ်ႈၵႃႈတီႈၽြႃးပဵၼ်ၸဝ်ႈမိူၼ်ၸိူဝ်ႉၼင်ႇ ၵေႃႉဢၼ်လုၵ်ႉသေၵႃႈတၢင်းတၢႆၶိုၼ်းလိပ်းၼၼ်ႉတႃႉ။ ဢၢင်ႇၵႃႇတူဝ်သူတင်းလၢႆၵေႃႈ ႁႂ်ႈပဵၼ်လၢၵ်ႈၼၢၵ်ႈ#6:13 သူႉၸရိူၵ်ႈ - တၢင်းၵမ်ၵျၢင်ႉဢၼ်လီဢၼ်ငၢမ်း သူႉၸရိူၵ်ႈလႄႈ သၢၵ်ႈၵၢပ်ႈတီႈၽြႃးပဵၼ်ၸဝ်ႈတႃႉ။- 14ပိူဝ်ႈဢၼ်သူဢမ်ႇမီးၼႂ်းမိုဝ်းပိင်းၺၢပ်ႈတြႃး၊ မီးၼႂ်းမိုဝ်းၵျေးၸူးတြႃးလႄႈ၊ ဢပႅတ်ႈတြႃးဢမ်ႇဢုပ်ႉဢမ်ႇပိူင်ႇသူ။

ၶႃႈၵူၼ်းၸႂ်ႉလွင်ႈတၢင်းဢၼ်သိုဝ်ႈတေႃႇ

15ၵွပ်ႈႁွႆးၼႆႉတၵ်းပဵၼ်ၸိူဝ်ႉၼင်ႇႁိုဝ်။ ႁဝ်းၼႆႉပိူဝ်ႈဢၼ်ဢမ်ႇမီးၼႂ်းမိုဝ်းပိင်းၺၢပ်ႈတြႃး မီးၼႂ်းမိုဝ်းၵျေးၸူးတြႃးလႄႈ၊ တၵ်းလႆႈႁဵတ်းဢပႅတ်ႈတူႉၸရိူၵ်ႈႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။- 16ပေႃးသူၶဝ်ႈလႄႈ ႁဵတ်းၶႃႈတီႈၽူႈလႂ်သေဢမ်ႇဝႃႈ ၵႃႈတီႈဢပႅတ်ႈတြႃး ဢၼ်ၸၢပ်ႈသႅင်ႇၵၼ်တင်းတၢင်းတၢႆသေဢမ်ႇဝႃႈ၊ ၵႃႈတီႈတြႃးတၢင်းဢၼ်ထွမ်ႇဢဝ် ဢၼ်ၸၢပ်ႈသႅင်ႇၵၼ်တင်းတၢင်းဢၼ်ႁွတ်ႈထိုင်တၢင်းသိုဝ်ႈတေႃႇသေဢမ်ႇဝႃႈ၊ ႁႂ်ႈလႆႈထွမ်ႇဢဝ်ၸိုင်၊ သူဢမ်ႇႁူႉလွင်ႈဢၼ် ၵေႃႉၼၼ်ႉပဵၼ်ၸဝ်ႈသူၼၼ်ႉႁိုဝ်။- 17ပိၵ်ႉသမ်ႉသူယၢမ်ႈပဵၼ်ၶႃႈဢပႅတ်ႈတြႃးသေၵေႃႈ၊ ပိူဝ်ႈဢၼ်သူဢဝ်တင်းၸႂ်ၸေႇတၼႃႇထွမ်ႇဢဝ်ၵႂၢမ်းၼႄးဢူႉပတေႇတင်းလၢႆ ဢၼ်လႆႈၶၢမ်ႇမႃးယဝ်ႉၼၼ်ႉလႄႈ ၵျေးၸူးၽြႃးပဵၼ်ၸဝ်ႈယႂ်ႇၼႃႇဢေႃႈ။- 18ပိူဝ်ႈဢၼ်သူလႆႈၵၢင်းလွတ်ႈသေၵႃႈၼႂ်းမိုဝ်းဢပႅတ်ႈတြႃးယဝ်ႉလႄႈ၊ သူပဵၼ်ၶႃႈတြႃးတၢင်းသိုဝ်ႈတေႃႇဢေႃႈ။

19မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼႆၼၼ်ႉ၊ ၸွမ်းၼင်ႇၸႃႇတီႉပၵတီႉ ပိူဝ်ႈဢၼ်သူၺၢၼ်ႇၵေႇၼႃႇလႄႈ၊ ၵဝ်ဢဝ်လေႃးၵီႇ #6:19 ဝေႃးႁႃႇရႃႉ - ၶေႃႈၵႂၢမ်း ဝေႃးႁႃႇရႃႉ ဝႃႈဢေႃႈ။ ၸိူဝ်ႉၼင်ႇဢၼ် သူဢဝ်ဢၢင်ႇၵႃႇသူတင်းလၢႆသႂၢင်းၶဝ်ႈၼႂ်းတြႃးတၢင်းဢၼ်ၵူဝ်ႈၵိူၵ်ႇဢိၵ်ႇတင်း ဢႃႉထမ်ႇမႃႉတြႃးႁႂ်ႈပဵၼ်ပုၼ်ႈဢႃႉထမ်ႇမႃႉၼၼ်ႉလႄႈ ၶၢမ်ႇႁဵတ်းၶႃႈၼၼ်ႉ၊ တေႃႈလဵဝ်ၼႆႉဢဝ်ဢၢင်ႇၵႃႇတူဝ်သူတင်းလၢႆ သႂၢင်းၶဝ်ႈၼႂ်းတြႃးတၢင်းသိုဝ်ႈတေႃႇ ႁႂ်ႈပဵၼ်ပုၼ်ႈတၢင်းဢၼ်မူတ်းၸၢင်ႇၼၼ်ႉလႄႈၶၢမ်ႇႁဵတ်းၶႃႈတႃႉ။- 20ၼႂ်းၶိင်ႇမိူဝ်ႈဢၼ်သူပဵၼ်ၶႃႈဢပႅတ်ႈတြႃးယူႇၼၼ်ႉၸိုင် သူၵၢင်းလွတ်ႈသေၵႃႈၼႂ်းမိုဝ်းတြႃးတၢင်းသိုဝ်ႈတေႃႇဢေႃႈ။- 21ၼႂ်းမိူဝ်ႈဢၼ်သူၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်သူလီဢၢႆတေႃႈလဵဝ်ၼႆႉၼၼ်ႉယူႇၼၼ်ႉၸိုင်၊ သူလႆႈဢၵျူဝ်းၵႃႈသင်။ တၢင်းၵမ်တၢင်းၵျၢင်ႉၸိူဝ်ႉၼင်ႇၼၼ်ၼၼ်ႉ ၸၢင်ႈသုတ်းတိူၵ်ႈၵႃႈၼႂ်းတၢင်းတၢႆဢေႃႈ။- 22တေႃႈလဵဝ်ၼႆႉၸမ်ႉ၊ ၵႃႈၼင်ႇဢၼ်သူၵၢင်းလွတ်ႈသေၵႃႈၼႂ်းမိုဝ်းဢပႅတ်ႈတြႃးလႄႈ ပဵၼ်ၶႃႈၽြႃးပဵၼ်ၸဝ်ႈၼၼ်ႉ၊ သူလႆႈဢၵျူဝ်းတၢင်းဢၼ်မူတ်းၸၢင်ႇဢေႃႈ။ ၼႂ်းတီႈသုတ်းတီႈၵွႆပုၼ်ႉၵေႃႈ သူတၵ်းလႆႈထႃႇဝရႃႉဢသၢၵ်ႈဢေႃႈ။- 23ၵႃႈၶၼ်ဢပႅတ်ႈတြႃးၸမ်ႉ ပဵၼ်တၢင်းတၢႆဢေႃႈ။ သူႉၵျေးၸူးဢၼ်ၽြႃးပဵၼ်ၸဝ်ႈပၼ်ၼၼ်ႉၸမ်ႉ ပဵၼ်ထႃႇဝရႃႉဢသၢၵ်ႈ ၼႂ်းၸဝ်ႈႁဝ်းယေႇသူႉၶရိၸ်ႈဢေႃႈ။

Currently Selected:

ရူဝ်းမႃႉ 6: CBMS

Highlight

Copy