ရူဝ်းမႃႉ 11
11
ၸဝ်ႈၽြႃးဢဵတ်းလူၵူၼ်းမဵဝ်းဢီႉသရေႇလႃႉ
1ပေႃးပဵၼ်ၸိူဝ်ႉၼင်ႇၼႆၸိုင်၊ ၽြႃးပဵၼ်ၸဝ်ႈပႄႇပႅတ်ႈမဵဝ်းၵူၼ်းမၼ်းၸဝ်ႈယဝ်ႉႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်ႉ။ လွင်ႈမၼ်းၸမ်ႉ ၵဝ်ၼႆႉပဵၼ်ၵူၼ်းဢီႉသရေႇလႃႉဢေႃႈ။ ပဵၼ်မဵဝ်းဢႃႇပြႃႇႁၢမ်ႇ တင်းၸိူဝ်ႉၶိူဝ်းပိၼ်ႇယႃႇမိၼ်ႇဢေႃႈ။- 2ၽြႃးပဵၼ်ၸဝ်ႈဢမ်ႇပႄႇပႅတ်ႈမဵဝ်းၵူၼ်းမၼ်းၸဝ်ႈဢၼ်မၼ်းၸဝ်ႈႁူႉ ၸဵမ်မိူဝ်ႈဢွၼ်ၼႆႉၼၼ်ႉ။ သူဢမ်ႇႁူႉလွင်ႈဢၼ်ပႃးၼႂ်းၵျၢမ်းလိၵ်ႈလွင်ႈဢၼ်လၢတ်ႈလူၺ်ႈလွင်ႈ ဢေးလီႉယႃႉယူႇၽၢႆႇၼိုင်ႈ တင်းၵူၼ်းမဵဝ်းဢီႉသရေႇလႃႉသေလႄႈ လဝ်ႊလၢတ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈဝႃႈ၊- 3ဢူဝ်းထႃႇဝရႃႉၽြႃး၊ ၶဝ်ဢဝ်ပရေႃးၽႅတ်ႈၸဝ်ႈႁဝ်းတင်းလၢႆတၢႆယဝ်ႉတီႈၶႃႈ။ ယိတ်ႈပလၢင်ႇၸဝ်ႈႁဝ်းတင်းလၢႆၵေႃႈ ၶဝ်ၵိူၼ်ႇယႃႉပႅတ်ႈယဝ်ႉတီႈၶႃႈ။ ၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းလႄႈ တေႃႈၵႃႈဢသၢၵ်ႈၵဝ်ၶႃႈၵေႃႈ ၶဝ်ဢွၼ်ၵၼ်ႁႃယူႇတီႈၶႃႈ၊ ဝႃႈၼင်ႇၼႆၼၼ်ႉႁိုဝ်။- 4မိူဝ်ႈဢၼ်မၼ်းလဝ်ႊလၢတ်ႈၸိူဝ်ႉၼင်ႇၼၼ်ၼၼ်ႉ၊ မၼ်းၸဝ်ႈဝႆႉပျႃႇတိၵ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵူၼ်းၸဵတ်းႁဵင်ဢၼ်ဢမ်ႇၶုပ်ႉၶဝ်ႇၵႃႈတီႈၽၢႆႇၼႃႈၽြႃးပႃႇလႃႉၼၼ်ႉၸိုင် ၵဝ်ႁႂ်ႈၵိုတ်းၵျၢၼ်ႇဝႆႉပုၼ်ႈၵဝ်ယဝ်ႉ၊ ဝႃႈၼင်ႇၼႆဢေႃႈ။
5မိူၼ်ၼင်ႇၼၼ် ၼႂ်းၶိင်ႇၵႃႇလႃႉတေႃႈလဵဝ်ၼႆႉၵေႃႈ၊ တၢင်းဢၼ်ၵိုတ်းဢၼ်ၵျၢၼ်ႇဢၼ်မၼ်းၸဝ်ႈလိူၵ်ႈၵဵပ်းဢဝ် ၵႃႈၼင်ႇၵျေးၸူးၸဝ်ႈၼၼ်ႉယင်းမီးယူႇဢေႃႈ။- 6ပေႃးမီးၵွပ်ႈပိူဝ်ႈၵျေးၸူးၸဝ်ႈၸိုင်၊ ဢမ်ႇမီးၵွပ်ႈပိူဝ်ႈတၢင်းၵမ်တၢင်းၵျၢင်ႉဢၼ်တူဝ်ၸဝ်ႈၵဝ်ႇၵမ်ၵျၢင်ႉၼၼ်ႉ။ ပေႃးမီးၸိုင်၊ ၵျေးၸူးၸဝ်ႈၼၼ်ႉ ဢမ်ႇၸႂ်ႈၵျေးၸူးၸဝ်ႈ။ ပေႃးမီးၵွပ်ႈပိူဝ်ႈတၢင်းၵမ်တၢင်းၵျၢင်ႉဢၼ်တူဝ်ၸဝ်ႈၵဝ်ႇၵမ်ၵျၢင်ႉၸိုင်၊ ဢမ်ႇမီးၵွပ်ႈပိူဝ်ႈၵျေးၸူးၸဝ်ႈ။- 7ပေႃးမီးၸိုင်၊ တၢင်းၵမ်တၢင်းၵျၢင်ႉၼၼ်ႉ ဢမ်ႇၸႂ်ႈတၢင်းၵမ်တၢင်းၵျၢင်ႉ။ ပေႃးပဵၼ်ၸိူဝ်ႉၼင်ႇၼႆၸိုင်၊ ပဵၼ်ၸိူဝ်ႉၼင်ႇႁိုဝ်။ တၢင်းဢၼ် ၵူၼ်းဢီႉသရေႇလႃႉတင်းလၢႆႁႃၼၼ်ႉၸိုင်၊ ၶဝ်ဢမ်ႇထူပ်းဢမ်ႇလႆႈ။ ၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉၵူၺ်း လႆႈထူပ်းဢေႃႈ။ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၵေႃႈ ႁွတ်ႈထိုင်တၢင်းဢၼ်ၸႂ်ၵႅၼ်ႇၶႅင်ယူႇဢေႃႈ။- 8မိူၼ်ၼင်ႇၼၼ် ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၽြႃးပဵၼ်ၸဝ်ႈပၼ်ၸႂ်သၽေႃးဢၼ်ၶႂ်ႈလပ်းၶႂ်ႈၼွၼ်း၊ မၢၵ်ႇတႃဢၼ်ဢမ်ႇႁၼ်လႆႈ၊ ႁူဢၼ်ဢမ်ႇငိၼ်းလႆႈၼၼ်ႉတီႈၶဝ် ႁၢၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ ဝႃႈၼင်ႇၼႆဢေႃႈ။- 9ၵႂၢမ်းဢၼ်တႃႇဝိတ်ႈဝႃႈၸမ်ႉ၊ ႁႂ်ႈၶူင်ႇတီႈၵိၼ်ၶဝ်ၼၼ်ႉ ပဵၼ်ႁႅဝ်ႉၶိုမ်းပုၼ်ႈၶဝ်၊ ဢၼ်ၶတ်းႁၢဝ်ႇပုၼ်ႈၶဝ်၊ ႁိူၼ်းဢၼ်ၵၢင်ၶဝ်၊ ဢပႅတ်ႈဢၼ်ၶဝ်ထိူၵ်ႈၶၢမ်ႇၼၼ်ႉသေၵမ်းလူၺ်ႈ။- 10ႁႂ်ႈမၢၵ်ႇတႃၶဝ်လပ်းၵႂႃႇ ထၼ်ႈပေႃးဢမ်ႇႁၼ်လႆႈသေၵမ်းလူၺ်ႈ။ လင်ၶဝ်ၵေႃႈႁႂ်ႈၵွမ်းယူႇသေႇသေႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။
11ၵဝ်ဝႃႈၸမ်ႉ၊ ပေႃးပဵၼ်ၸိူဝ်ႉၼင်ႇၼႆၸိုင် ၵူၼ်းဢီႉသရေႇလႃႉတင်းလၢႆၼၼ်ႉ ၼင်ႇႁိုဝ်တၵ်းလူမ်ႉၸိုင် တိူဝ်ႉမႅၼ်ႈယဝ်ႉႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။ ၼင်ႇႁိုဝ်တၵ်းမီးလွင်ႈတၢင်းဢၼ်တိုၵ်းယူင်းၸႂ်ၶဝ်ၸိုင်၊ ၵွပ်ႈပိူဝ်ႈတၢင်းဢၼ်ၶဝ်လူမ်ႉၼၼ်ႉလႄႈ၊ ၵျေးၸူးတၢင်းဢၼ်ၵႄႇၶျွတ်ႈဢဝ် ႁွတ်ႈထိုင်ၵႃႈၼိူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။- 12ပေႃးတၢင်းဢၼ်ၶဝ်လူမ်ႉၼၼ်ႉ ပွင်ႁဵတ်းၸီးပႂႃးၵူၼ်းလေႃးၵီႇတင်းလၢႆလႄႈ တၢင်းဢၼ်ၶဝ်သုမ်းၼၼ်ႉ ပွင်ႁဵတ်းၸီးပႂႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၸိုင်၊ တၢင်းဢၼ်ၶဝ်ပျေႉၸုမ်ႇလိူင်ႇၸႂ်ၼၼ်ႉ ယဵင်ႈၶႅၼ်းတၵ်းပွင်ႁဵတ်းဢမ်ႇၸႂ်ႈႁိုဝ်။
တြႃးတၢင်းဢၼ်ၵႄႇၶျွတ်ႈပုၼ်ႈတၢင်ႇၸိူဝ်ႉတၢင်ႇၶိူဝ်းတင်းလၢႆ
13မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉၸိုင်၊ ၸွမ်းၼင်ႇဢၼ်ၵဝ်ပဵၼ်တမၢၼ်ႇၸဝ်ႈ ဢၼ်ၸၢပ်ႈသႅင်ႇၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉ၊ ၵဝ်ယွင်ႈယေႃးဢရႃႇတမၢၼ်ႇၸဝ်ႈၼၼ်ႉယူႇသေလႄႈ၊- 14ၼင်ႇႁိုဝ်တၵ်းလႆႈဢဝ်သေၸိူဝ်ႉသေဢၼ် တိုၵ်းယူင်းၸႂ်ၶဝ်ၸိူဝ်းဢၼ်ပဵၼ်ၸိူဝ်ႉၶိူဝ်းၵဝ်ၼၼ်ႉလႄႈ ၵႄႇၶျွတ်ႈဢဝ်ၵမ်ႈၽွင်ႈၸိုင်၊ ၵဝ်လႆႈဝႃႈတီႈသူၸိူဝ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။- 15ပေႃးတၢင်းဢၼ်မၼ်းၸဝ်ႈပႄႇပႅတ်ႈၶဝ်ၼၼ်ႉ ပဵၼ်လွင်ႈမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၵူၼ်းလေႃးၵီႇတင်းလၢႆၸိုင် တၢင်းဢၼ်မၼ်းၸဝ်ႈတၵ်းၶိုၼ်းသိမ်းဢဝ်ၶဝ်ၼၼ်ႉ တၵ်းပဵၼ်ၸိူဝ်ႉၼင်ႇတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ ဢမ်ႇၸႂ်ႈႁိုဝ်။- 16ပေႃးၶဝ်ႈမုၼ်းလိပ်းဢၼ်ၼူတ်ႈဢွၼ်တၢင်းၼၼ်ႉမူတ်းၸၢင်ႇၸိုင် တၵ်းမူတ်းၸၢင်ႇတင်းၵွင်ဢေႃႈ။ ပေႃးႁၢၵ်ႈမၼ်းမူတ်းၸၢင်ႇၸိုင် ၵိင်ႇမၼ်းၶႃႊမၼ်းတင်းလၢႆၵေႃႈ တၵ်းမူတ်းၸၢင်ႇဢေႃႈ။- 17ၵိင်ႇမၼ်းၶႃႊမၼ်းၵမ်ႈၽွင်ႈႁၵ်းယဝ်ႉၸင်ႇ၊ ပေႃးဢဝ်မႂ်းဢၼ်ဝႃႈ တူၼ်ႈသၢၼ်ႇလုၼ်ႇ ဢၼ်ပၵတီႉလိူင်းၵျၢမ်းၼႆႉ ၽုၵ်ႇသိုပ်ႇသႂ်ႇၵႃႈတီႈတေႃၵဝ်ႇၼၼ်ႉလႄႈ ႁႂ်ႈသိူၵ်ႈသမ်ႇၵၼ်တင်းမၼ်း #11:17 ဢေႃႇၸႃႇ - တၢင်းၵိၼ် ဢေႃႇၸႃႇႁၢၵ်ႈတူၼ်ႈသၢၼ်ႇလုၼ်ႇ လူၺ်ႈၵၼ်တင်းၵိင်ႇမၼ်းၶႃႊမၼ်းတင်းလၢႆၼၼ်ႉၸိုင်၊ ယႃႇပေသႄႉသွမ်းဢုပ်ႇဝၢဝ်းတီႈၵိင်ႇမၼ်းၶႃႊမၼ်း ဢၼ်ႁၵ်းပႅတ်ႈၸိူဝ်းၼၼ်ႉ။- 18ပေႃးဢုပ်ႇဝၢဝ်းၸမ်ႉ၊ မႂ်းဢမ်ႇပႃးႁၢၵ်ႈ၊ ႁၢၵ်ႈပႃးမႂ်းဢေႃႈ။ ပေႃးမႂ်းၶိုၼ်းလၢတ်ႈလႄႈဝႃႈ၊- 19ၵိင်ႇမၼ်းၶႃႊမၼ်းၸိူဝ်းၼၼ်ႉ ၶၢမ်ႇတၢင်းဢၼ်ႁၵ်းပႅတ်ႈ ႁႂ်ႈလႆႈဢဝ်ၵဝ်ၽုၵ်ႇသိုပ်ႇသႂ်ႇယဝ်ႉ၊ ဝႃႈၼင်ႇၼႆၸိုင်၊ ႁႂ်ႈၸႂ်ႈသေလူးၵွၼ်ႇတႃႉ။- 20ပိူဝ်ႈဢၼ်ၶဝ်ၼၼ်ႉဢမ်ႇမီးၸႂ်ဢၼ်ယုမ်ႇမၢတ်ႈလႄႈ၊ ၶဝ်လႆႈၶၢမ်ႇတၢင်းဢၼ်ႁၵ်းပႅတ်ႈဢေႃႈ။ မႂ်းၸမ်ႉ၊ တႄႇယူႇၵွပ်ႈပိူဝ်ႈတၢင်းယုမ်ႇမၢတ်ႈၵူၺ်းဢေႃႈ။ ယႃႇပေႁႂ်ႈမီးၸႂ်ဢၼ်သုင်။ ႁႂ်ႈမီးၸႂ်ဢၼ်ၵူဝ်ဢၼ်ႁႄတႃႉ။- 21လွင်ႈမၼ်းၸမ်ႉ ပေႃးၽြႃးပဵၼ်ၸဝ်ႈ ဢမ်ႇသေလၢႆၵိင်ႇပၵတီႉဢၼ်ၵဝ်ႇတင်းလၢႆၼၼ်ႉၸိုင်၊ မၼ်းၸဝ်ႈတၵ်းသေလၢႆမႂ်းလူးၵွၼ်ႇႁိုဝ်။
22ၵွပ်ႈႁွႆးၼႆႉ ၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်ၽြႃးပဵၼ်ၸဝ်ႈၸီႇယၢင်ႇဢၼ်ႁႅင်းယႂ်ႇၼႃႇ ဢိၵ်ႇတင်းၵျေးၸူးမၼ်းၸဝ်ႈသွင်ပႃးၼၼ်ႉတႃႉ။ တီႈၶဝ်ၸိူဝ်းဢၼ်လူမ်ႉၼၼ်ႉ ပဵၼ်တၢင်းဢၼ်မၼ်းၸဝ်ႈၸီႇယၢင်ႇဢၼ်ႁႅင်းယႂ်ႇၼႃႇဢေႃႈ။ ပေႃးမႂ်းတႄႇယူႇၼႂ်းၵျေးၸူးၸဝ်ႈၸိုင်၊ တီႈမႂ်းၼႆႉပဵၼ်ၵျေးၸူးၸဝ်ႈဢေႃႈ။ ပေႃးဢမ်ႇတႄႇယူႇၼႂ်းၵျေးၸူးၸဝ်ႈၸိုင်၊ မႂ်းၵေႃႈတၵ်းလႆႈၶၢမ်ႇတၢင်းဢၼ်တႅပ်းၽၼ်းပႅတ်ႈဢေႃႈ။- 23ၶဝ်ၼၼ်ႉၸမ်ႉ၊ ပေႃးၸႂ်ဢၼ်ဢမ်ႇယုမ်ႇမၢတ်ႈၼၼ်ႉႁၢႆၸိုင် တၵ်းလႆႈဢၶႂၢင်ႉဢၼ်ၶိုၼ်းၽုၵ်ႇသိုပ်ႇသႂ်ႇၵႃႈတီႈတူၼ်ႈဢေႃႈ။ ၽြႃးပဵၼ်ၸဝ်ႈတၢတ်ႈၼိူင်ႇႁႂ်ႈလႆႈဢဝ်ၶဝ်ၶိုၼ်းၽုၵ်ႇသိုပ်ႇသႂ်ႇလႆႈယူႇဢေႃႈ။- 24ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ ပေႃးတႅပ်းၽၼ်းဢဝ်မႂ်းၵႃႈတီႈတူၼ်ႈသၢၼ်ႇလုၼ်ႇ ဢၼ်ပၵတီႉလိူင်းၵျၢမ်းၼၼ်ႉသေလႄႈ ယင်းဢမ်ႇၸွမ်းပၵတီႉမႂ်း ဢဝ်မႂ်းၽုၵ်ႇသိုပ်ႇသႂ်ႇၵႃႈတီႈတူၼ်ႈသၢၼ်ႇလုၼ်ႇဢၼ်လီၼၼ်ႉၸိုင် ၶဝ်ၸိူဝ်းဢၼ်ပဵၼ်ၵိင်ႇပၵတီႉဢၼ်လီၼၼ်ႉ ယဵင်ႈၶႅၼ်းတၵ်းလႆႈဢၶႂၢင်ႉဢၼ်ၽုၵ်ႇသိုပ်ႇသႂ်ႇ ၵႃႈတီႈတူၼ်ႈသၢၼ်ႇလုၼ်ႇတူဝ်ၸဝ်ႈၵဝ်ႇဢမ်ႇၸႂ်ႈႁိုဝ်။
ၵျေးၸူးၵရူႉၼႃႇၽြႃးပဵၼ်ၸဝ်ႈ
25ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်သူတၵ်းဢမ်ႇမီးၸႂ်ဢၼ်ၸၢင်ႈဢိင်ပိုင်ႈၺၢၼ်ႇတူဝ်ၸဝ်ႈၵဝ်ႇၸိုင် ၵဝ်ဢမ်ႇမီးဢလူဝ်ႇဢၼ်ၶႂ်ႈႁႂ်ႈသူဢမ်ႇႁူႉလွင်ႈတၢင်းဢၼ်လိုၵ်ႉဢၼ်လမ်ႇဢၼ်ဝႃႈ တၢင်းဢၼ်ၸႂ်ၵႅၼ်ႇၸႂ်ၶႅင်ႁွတ်ႈထိုင်ၵႃႈၼိူဝ် ၵူၼ်းဢီႉသရေႇလႃႉၵမ်ႈၽွင်ႈ တေႃႇထိုင်ႁွတ်ႈၸူဝ်ႈဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တၵ်းပျေႉၸုမ်ႇၼၼ်ႉလႄႈယူႇ။- 26ၼင်ႇၼၼ်လႄႈမႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉ၊ ၵူၼ်းဢီႉသရေႇလႃႉတင်းသဵင်ႈတင်းလူင် တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။ ဢၼ်မႃးၼႂ်းၵျၢမ်းလိၵ်ႈၼၼ်ႉလႄႈဝႃႈၸမ်ႉ ၸဝ်ႈဢၼ်ပွႆႇလွတ်ႈၼၼ်ႉ တၵ်းပေႃႇမႃးၵႃႈၼိူဝ်လွႆၸီႉဢုၼ်ႇလႄႈ ဢဝ်လွင်ႈတၢင်းဢၼ်ဢမ်ႇတြႃး ဝႄႈဢွၵ်ႇပႅတ်ႈသေၵႃႈၼႂ်းၵူၼ်းၸိူဝ်ႉၶိူဝ်းယႃႇၵုပ်ႈဢေႃႈ။- 27မိူဝ်ႈဢၼ်ၵဝ်ပႄႇပႅတ်ႈသေဢပႅတ်ႈၶဝ်ၼၼ်ႉၸိုင် ပတီႉၺိၺ်ႇတြႃးဢၼ်ၵဝ်ပၼ်တီႈၶဝ်ၼၼ်ႉ ပဵၼ်တြႃးၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။- 28ၵွပ်ႈပိူဝ်ႈတြႃးသတၢင်းသိူဝ်းပျေႃႇၸမ်ႉ ၶဝ်ၼၼ်ႉပဵၼ်ရၢၼ်ႇသူႇၵွပ်ႈပိူဝ်ႈလွင်ႈသူဢေႃႈ။ ၵွပ်ႈပိူဝ်ႈတၢင်းဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉၸမ်ႉ ပဵၼ်ၵေႃႉႁၵ်ႉၵွပ်ႈပိူဝ်ႈလွင်ႈပူႇမွၼ်ႇတင်းလၢႆဢေႃႈ။- 29ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ ၵျေးၸူးတၢင်းဢၼ်ၽြႃးပဵၼ်ၸဝ်ႈဢဵတ်းလူပၼ် ဢိၵ်ႇတင်းတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉ ဢမ်ႇမီးသၽေႃးဢၼ်ၶိုၼ်းၽွၵ်ႈၶိုၼ်းပျၢၼ်ႇ။- 30ၸိူဝ်ႉၼင်ႇဢၼ်သူမိူဝ်ႈၼၼ်ႉ ယင်းဢမ်ႇထွမ်ႇဢဝ်ၵႂၢမ်းၽြႃးပဵၼ်ၸဝ်ႈလႄႈယူႇသေၵေႃႈ၊ တေႃႈလဵဝ်ၼႆႉ လႆႈၶၢမ်ႇတၢင်းဢၼ်မၼ်းၸဝ်ႈဢဵတ်းလူ ၵွပ်ႈပိူဝ်ႈတၢင်းဢၼ်ၶဝ်ဢမ်ႇထွမ်ႇဢဝ်ၼၼ်ႉ။- 31မိူၼ်ၼင်ႇၼၼ် ၶဝ်ၵေႃႈၼင်ႇႁိုဝ်တၵ်းလႆႈၶၢမ်ႇတၢင်းဢၼ်မၼ်းၸဝ်ႈဢဵတ်းလူ ၵွပ်ႈပိူဝ်ႈတၢင်းဢၼ်သူလႆႈၶၢမ်ႇတၢင်းဢၼ် မၼ်းၸဝ်ႈဢဵတ်းလူၼၼ်ႉၸိုင်၊ ၶဝ်ဢမ်ႇထွမ်ႇဢဝ်လႄႈယူႇဢေႃႈ။- 32ၽြႃးပဵၼ်ၸဝ်ႈ ၼင်ႇႁိုဝ်တၵ်းမီးဢၶႂၢင်ႉတၢင်းဢၼ်ဢဵတ်းလူၵူၼ်းၵႃႈမီးတင်းသဵင်ႈတင်းလူင်ၸိုင် ၶျုၵ်ႈၵူၼ်းၵႃႈမီးတင်းသဵင်ႈတင်းလူင်ဝႆႉၼႂ်းတၢင်းဢၼ်ဢမ်ႇထွမ်ႇဢဝ်ဢေႃႈ။
ၵႂၢမ်းယွင်ႈယေႃးၸဝ်ႈၽြႃး
33ၺၢၼ်ႇတင်းပိင်ႇၺႃႇၽြႃးပဵၼ်ၸဝ်ႈ လိုၵ်ႉလမ်ႇယႂ်ႇၵႂၢင်ႈၼႃႇလူင်လၢင်လူင်ပႄႇ။ တၢင်းဢၼ်မၼ်းၸဝ်ႈၸီႇယၢင်ႇတင်းလၢႆၼၼ်ႉ၊ ၽူႈလႂ်သေၵေႃႉသေၵူၼ်း ၸႅတ်ႈထၢမ်လႄႈဢမ်ႇသဵင်ႈလႆႈ။ သဵၼ်ႈတၢင်းဢၼ်မၼ်းၸဝ်ႈၵႂႃႇတင်းလၢႆၼၼ်ႉၵေႃႈ ႁႃလႄႈဢမ်ႇထူပ်းဢမ်ႇၶိုတ်းလႆႈ။- 34ၽူႈလႂ်ႁူႉၸႂ်ထႃႇဝရႃႉၽြႃး။ ၽူႈလႂ်ယၢမ်ႈလႆႈႁဵတ်းၵေႃႉႁဵတ်းသေႈ ဢၼ်တိူင်ႇပၢင်ႇႁူမ်ႈၵၼ်တင်းမၼ်းၸဝ်ႈ။
35ၼင်ႇႁိုဝ်မၼ်းၸဝ်ႈတၵ်းလႆႈတွပ်ႇတႅၼ်းၶိုၼ်းၵျေးၸူးၸိုင်၊ ၽူႈလႂ်ယၢမ်ႈလႆႈႁဵတ်းၵျေးၸူးတီႈမၼ်းၸဝ်ႈ။ ၵႃႈဢၼ်မီးတင်းသဵင်ႈတင်းလူင် ပဵၼ်ၵႃႈၼႂ်းမၼ်းၸဝ်ႈ၊- 36ၵွပ်ႈပိူဝ်ႈမၼ်းၸဝ်ႈ၊ ပုၼ်ႈမၼ်းၸဝ်ႈဢေႃႈ။ ႁႂ်ႈမုၼ်ၽုင်းၸဝ်ႈယႂ်ႇၼႃႇ ၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်းသေၵမ်းလူၺ်ႈ။ ဢႃႇမိၼ်ႇ။
Currently Selected:
ရူဝ်းမႃႉ 11: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
