ရူဝ်းမႃႉ 10

1ပီႈၼွင်ႉၶဝ်ဢိူၺ်း၊ ၵဝ်မီးၸႂ်ၸေႇတၼႃႇ ဢိၵ်ႇတင်းတၢင်းဢၼ်သူးတွင်းၽြႃးပဵၼ်ၸဝ်ႈ ၶႂ်ႈႁႂ်ႈၶဝ်ၼၼ်ႉႁွတ်ႈထိုင်တၢင်းဢၼ်ၵႄႇၶျွတ်ႈယူႇဢေႃႈ။- 2ၶဝ်ၼၼ်ႉပိၵ်ႉသမ်ႉဢမ်ႇမီးပိင်ႇၺႃႇဢၼ်မၢၼ်ႇဢၼ်မႅၼ်ႈသေၵေႃႈ လွင်ႈဢၼ်ၸႂ်ႁႅင်းယႂ်ႇၽၢႆႇၽြႃးပဵၼ်ၸဝ်ႈၼၼ်ႉၸိုင်၊ ၵဝ်ၶၢမ်ႇသၢၵ်ႈသေႇပုၼ်ႈၶဝ်ဢေႃႈ။- 3ပိူဝ်ႈဢၼ်ၶဝ်ၼၼ်ႉ ယင်းဢမ်ႇႁူႉတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈလႄႈ ၵျၢမ်ႇႁႃႁႂ်ႈတၢင်းသိုဝ်ႈတေႃႇတူဝ်ၸဝ်ႈၵဝ်ႇတႄႇၼၼ်ႉလႄႈ၊ ၶဝ်ဢမ်ႇႁပ်ႉတုင်းဢဝ်တြႃးတၢင်းသိုဝ်ႈတေႃႇၽြႃးပဵၼ်ၸဝ်ႈ။- 4လွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၵႃႈမီးတင်းသဵင်ႈတင်းလူင် တၵ်းႁွတ်ႈထိုင်တၢင်းဢၼ်သိုဝ်ႈတေႃႇၸိုင်၊ ၸဝ်ႈၶရိၸ်ႈပဵၼ်တီႈသုတ်းတီႈၵွႆပိင်းၺၢပ်ႈတြႃးဢေႃႈ။

တြႃးတၢင်းဢၼ်ၵႄႇၶျွတ်ႈဢဝ်ပဵၼ်ပုၼ်ႈၵူၼ်းၵူႈၵေႃႉ

5 မူဝ်းသေႇတႅမ်ႈဝႆႉလူၺ်ႈလွင်ႈတြႃးတၢင်းသိုဝ်ႈတေႃႇ ဢၼ်ၸၢပ်ႈသႅင်ႇၵၼ်တင်းပိင်းၺၢပ်ႈတြႃးလႄႈဝႃႈ၊ ၵေႃႉဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉၼၼ်ႉ ၵွပ်ႈပိူဝ်ႈတၢင်းၵမ်တၢင်းၵျၢင်ႉၼၼ်ႉလႄႈ ဢသၢၵ်ႈတၵ်းလိပ်းဢေႃႈ၊ ဝႃႈၼင်ႇၼႆဢေႃႈ။- 6တြႃးတၢင်းသိုဝ်ႈတေႃႇဢၼ်ၸၢပ်ႈသႅင်ႇၵၼ်တင်း တၢင်းဢၼ်ယုမ်ႇမၢတ်ႈၼၼ်ႉဝႃႈၸမ်ႉ၊- 7ယႃႇပေၶႆႈၸႂ်လူၺ်ႈလွင်ႈဢၼ် ၽူႈလႂ်တၵ်းၶိုၼ်ႈၵႃႈၼိူဝ်ၵၢင်ႁၢဝ်ပုၼ်ႉ၊ ၽူႈလႂ်တၵ်းလူင်းၵႃႈတီႈဢၼ်လိုၵ်ႉဢၼ်လမ်ႇပုၼ်ႉၼၼ်ႉ၊ ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉ၊ ၽူႈလႂ်တၵ်းၶိုၼ်ႈၵႃႈၼိူဝ်ၵၢင်ႁၢဝ်ပုၼ်ႉ ႁႂ်ႈလႆႈဢဝ်ၸဝ်ႈၶရိၸ်ႈမႃး၊ ၽူႈလႂ်တၵ်းလူင်းၵႃႈတီႈဢၼ်လိုၵ်ႉဢၼ်လမ်ႇပုၼ်ႉ ႁႂ်ႈၸဝ်ႈၶရိၸ်ႈလုၵ်ႉသေၵႃႈတီႈတၢင်းတၢႆၶိုၼ်းမႃး၊ ၶႂ်ႈဝႃႈၼင်ႇၼႆဢေႃႈ။- 8ဢၼ်သမ်ႉလၢတ်ႈထႅင်ႈလႄႈဝႃႈၸမ်ႉ တြႃးၸဝ်ႈၸမ်ၵၼ်တင်းမႂ်းဢေႃႈ။ မီးယူႇၵႃႈၼႂ်းသူပ်းမႂ်း၊ ၵႃႈၼႂ်းႁူဝ်ၸႂ်မႂ်းဢေႃႈ၊ ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉ ၶႂ်းဝႃႈတြႃးတၢင်းယုမ်ႇမၢတ်ႈဢၼ်ႁဝ်းႁေႃးလၢတ်ႈၼႆႉဢေႃႈ။- 9ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ ပေႃးမႂ်းဢဝ်တင်းသူပ်းႁပ်ႉတုင်းဢဝ်ၸဝ်ႈၶရိၸ်ႈလႄႈ ယုမ်ႇမၢတ်ႈလွင်ႈဢၼ်ၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉသေၵႃႈတီႈတၢင်းတၢႆၶိုၼ်းမႃးၼၼ်ႉ ၵႃႈၼႂ်းႁူဝ်ၸႂ်မႂ်းၸိုင်၊ မႂ်းတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။- 10လႆႈဢဝ်တင်းႁူဝ်ၸႂ်ယုမ်ႇမၢတ်ႈ ႁႂ်ႈလႆႈႁွတ်ႈထိုင်တၢင်းဢၼ်သိုဝ်ႈတေႃႇဢေႃႈ။ လႆႈဢဝ်တင်းသူပ်းႁပ်ႉတုင်းဢဝ် ႁႂ်ႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။- 11ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ ၽူႈလႂ်သေဢမ်ႇဝႃႈ၊ ၵေႃႉဢၼ်ဢိင်ပိုင်ႈမၢၵ်ႇႁိၼ်ၼၼ်ႉၸမ်ႉ၊ ဢမ်ႇမီးတၢင်းဢၼ်လီဢူၵ်းလီဢၢႆလႆႈ၊ ဝႃႈၼင်ႇၼႆဢေႃႈ။- 12ၵူၼ်းမဵဝ်းယူႉတႃႉသေဢမ်ႇဝႃႈ၊ ၵူၼ်းမဵဝ်းႁေႇလသႃႉသေဢမ်ႇဝႃႈ၊ ယင်းဢမ်ႇပႅၵ်ႇဢမ်ႇပိူင်ႈၵၼ်လႄႈ၊ ၸဝ်ႈဢၼ်ဢုပ်ႉပိူင်ႇၵူၼ်းတင်းလၢႆၼၼ်ႉ မီးသူႇလဵဝ်ပႃးလဵဝ်ၵူၺ်းလႄႈ ပျေႉၸုမ်ႇတဵမ်ဝႆႉတင်းၵျေးၸူး တီႈၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈမၼ်းၸဝ်ႈ ၵႃႈမီးတင်းသဵင်ႈတင်းလူင်ၼၼ်ႉဢေႃႈ။- 13လွင်ႈမၼ်းၸမ်ႉ ၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၵႃႈမီးတင်းသဵင်ႈတင်းလူင်ၼၼ်ႉ တၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

14ၼႂ်းဝႃႈၼၼ်သေၵေႃႈ ပေႃးဢမ်ႇယုမ်ႇမၢတ်ႈၸိုင် တၵ်းႁဵတ်းသူးတွင်းပထၼႃႇလႆႈၸိူဝ်ႉၼင်ႇႁိုဝ်။ ပေႃးဢမ်ႇငိၼ်းသတၢင်းၸိုင် တၵ်းယုမ်ႇမၢတ်ႈလႆႈၸိူဝ်ႉၼင်ႇႁိုဝ်။ ပေႃးဢမ်ႇမီးၵေႃႉဢၼ်ႁေႃးလၢတ်ႈၸိုင် တၵ်းငိၼ်းလႆႈၸိူဝ်ႉၼင်ႇႁိုဝ်။- 15ပေႃးဢမ်ႇပွႆႇၸႂ်ႉၵူၼ်းၵႂႃႇၸိုင် တၵ်းႁေႃးလၢတ်ႈလႆႈၸိူဝ်ႉၼင်ႇႁိုဝ်။ မႅၼ်ႈၼင်ႇၼၼ် ၵျၢမ်းလိၵ်ႈမႃးလႄႈဝႃႈၸမ်ႉ တိၼ်ၶဝ်ၸိူဝ်းဢၼ်မွၵ်ႇလၢတ်ႈသတၢင်းသိူဝ်းပျေႃႇတၢင်းၼိမ်၊ သတၢင်းသိူဝ်းပျေႃႇၵတ်းယဵၼ်ၶျၢမ်းသႃႇတၢင်းလီၼၼ်ႉ ႁၢင်ႈလီၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။

16ၼႂ်းဝႃႈၼၼ်သေၵေႃႈ ၵူၼ်းတင်းသဵင်ႈတင်းလူင်ထွမ်ႇဢဝ်သတၢင်းသိူဝ်းပျေႃႇဢမ်ႇၸႂ်ႈ။ ၵႂၢမ်းဢၼ်ပရေႃးၽႅတ်ႈ ဢီႉသႃႇယႃႉႁေႃးလၢတ်ႈလႄႈဝႃႈၸမ်ႉ ဢူဝ်းထႃႇဝရႃႉၽြႃး၊ ၵႂၢမ်းသတၢင်းသဵင်ၶၢဝ်ႇ ဢၼ်ႁဝ်းၶႃႈႁေႃးလၢတ်ႈၼႆႉၸိုင် ၽူႈလႂ်ယုမ်ႇတီႈၶႃႈ၊ ဝႃႈၼင်ႇၼႆဢေႃႈ။- 17ပိူဝ်ႈၼႆလႄႈတၢင်းယုမ်ႇမၢတ်ႈပဵၼ်ၵွပ်ႈပိူဝ်ႈတၢင်းဢၼ်လႆႈထွမ်ႇလႆႈငိၼ်းဢေႃႈ။ ပဵၼ်ၵွပ်ႈပိူဝ်ႈၵႂၢမ်းၽြႃးပဵၼ်ၸဝ်ႈဢေႃႈ။

18ၼႂ်းဝႃႈၼၼ်သေၵေႃႈ ၵဝ်ဝႃႈၸမ်ႉ၊ ၶဝ်ဢမ်ႇလႆႈငိၼ်းယဝ်ႉႁိုဝ်။ လႆႈငိၼ်းဢမၢၼ်ႇၶၼ်ပဵၼ်ယဝ်ႉ။ သဵင်ၶဝ်ၸွတ်ႇတူဝ်ႈၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈ ၵႂၢမ်းၶဝ်ၽႅဝ်ၵႂႃႇတေႃႇထိုင်ႁွတ်ႈတီႈႁိမ်းလႅၼ်သုတ်းလိၼ်မိူင်းပုၼ်ႉယဝ်ႉ၊ ဝႃႈၼင်ႇၼႆဢေႃႈ။- 19ၵဝ်သမ်ႉဝႃႈထႅင်ႈၸမ်ႉ၊ ၵူၼ်း ဢီႉသရေႇလႃႉတင်းလၢႆ ဢမ်ႇႁူႉလွင်ႈၼႆႉႁိုဝ်။ မိူဝ်ႈဢွၼ်တၢင်းမူဝ်းသေႇလၢတ်ႈလႄႈဝႃႈ၊ ၵဝ်တၵ်းဢဝ် ၵူၼ်းမဵဝ်းဢၼ်ဢမ်ႇလႆႈလွင်ႈၼၼ်ႉ ႁဵတ်းႁႂ်ႈသူလႆႈမီးၸႂ်ဢၼ်သီႈၵေႉႁေႈတႃဢေႃႈ။ ၵဝ်တၵ်းဢဝ်ၵူၼ်းမဵဝ်းဢၼ်ဢမ်ႇမီးပိင်ႇၺႃႇၼၼ်ႉ ႁဵတ်းႁႂ်ႈၶဝ်ၸႂ်မႆႈၸႂ်ႁၢႆႉဢေႃႈ၊ ဝႃႈၼင်ႇၼႆဢေႃႈ။- 20ဢၼ်ဢီႉသႃႇယႃႉ ယဵင်ႈၶႅၼ်းလၢတ်ႈႁတ်းႁတ်းႁၢၼ်ႁၢၼ်လႄႈဝႃႈၸမ်ႉ၊ ၶဝ်ၸိူဝ်းဢၼ်ဢမ်ႇႁႃၵဝ်ၼၼ်ႉ လႆႈထူပ်းၵဝ်ယဝ်ႉ။ တီႈၶဝ်ၸိူဝ်းဢၼ်ဢမ်ႇထၢမ်ႁႃလွင်ႈၵဝ်ၼၼ်ႉ ၵဝ်လႆႈထၢင်ႇလႆႈသႃးယဝ်ႉ၊ ဝႃႈၼင်ႇၼႆဢေႃႈ။- 21ဢၼ်မၼ်းၸဝ်ႈဢဝ်လွင်ႈၵူၼ်းဢီႉသရေႇလႃႉတင်းလၢႆလႄႈ ဝႃႈထႅင်ႈၸမ်ႉ၊ ၵဝ်လႆႈၵီႈၽႃႇမိုဝ်းၵဝ် တေႃႇၵႃႈတီႈၵူၼ်းမဵဝ်းဢၼ်ဢမ်ႇထွမ်ႇဢဝ်လႄႈ ထဵင်ပႅတ်ႈၼၼ်ႉယူႇတင်းဝၼ်းဢေႃႈ၊ ဝႃႈၼင်ႇၼႆဢေႃႈ။

Currently Selected:

ရူဝ်းမႃႉ 10: CBMS

Highlight

Copy