လူႉၵႃႇ 16
16
ၽူႈပႂ်ႉထိင်းဢုၵ်ႉၸႃႇဢၼ်ဢမ်ႇသိုဝ်ႈတေႃႇ
1မၼ်းၸဝ်ႈသမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉထႅင်ႈလႄႈဝႃႈၸမ်ႉ၊ တီႈၵူၼ်းမၢၵ်ႈၵူၼ်းမီးၵေႃႉၼိုင်ႈ မီးၽၼ်ႇတႃႇၸူဝ်းဢေႃႈ။ မိူဝ်ႈဢၼ်ပိူၼ်ႈတၢင်ႇဢပႅတ်ႈလွင်ႈဢၼ်မၼ်းယႃႉဢုၵ်ႉၸႃႇၶူဝ်းလဵင်းၸဝ်ႈမၼ်းၼၼ်ႉ ၵႃႈတီႈၽၢႆႇၼႃႈၸဝ်ႈမၼ်းၸိုင်၊- 2ၸဝ်ႈမၼ်းႁွင်ႉဢဝ်မၼ်းၼၼ်ႉသေလႄႈလၢတ်ႈလႄႈဝႃႈ၊ ၵႂၢမ်းဢၼ်ၵဝ်ငိၼ်းလွင်ႈမႂ်းၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ပၼ်ၸရၢင်းဢၼ်ၸၢပ်ႈသႅင်ႇၵၼ်တင်းဢရႃႇၽၼ်ႇတႃႇၸူဝ်းၼၼ်ႉတႃႉ။ ၸႃႉၸဵမ်မိူဝ်ႈလဵဝ်ၼႆႉလႄႈ မႂ်းဢမ်ႇလႆႈႁဵတ်းၽၼ်ႇတႃႇၸူဝ်းယဝ်ႉ၊ ဝႃႈၼင်ႇၼႆဢေႃႈ။- 3မိူဝ်ႈၼၼ်ႉ ၽၼ်ႇတႃႇၸူဝ်းၼၼ်ႉၵေႃႈ ၵျၢမ်ႇပွင်ၼႂ်းၸႂ်လႄႈဝႃႈ၊ ၵဝ်တၵ်းႁဵတ်းၸိူဝ်ႉၼင်ႇႁိုဝ်။ ၸဝ်ႈၵဝ်တၵ်းၼုၵ်ႈဢဝ်ဢရႃႇတၢင်းဢၼ်ႁဵတ်းၽၼ်ႇတႃႇၸူဝ်းၼႆႉယဝ်ႉ။ ၵဝ်ဢမ်ႇမီးႁႅင်းႁႂ်ႈလႆႈႁဵတ်းၵူၼ်းဢၼ်ဝဵၵ်ႉလိၼ်ၶုတ်းလိၼ်။ ႁႂ်ႈလႆႈႁဵတ်းၵူၼ်းဢၼ်ယွၼ်းၵိၼ်ၵေႃႈၵဝ်လီဢၢႆပိူၼ်ႈဢေႃႈ။- 4ဝၢႆးဢၼ်ၵဝ်တူၵ်းသေၵႃႈတီႈဢရႃႇၽၼ်ႇတႃႇၸူဝ်းယဝ်ႉၼၼ်ႉ၊ ၼင်ႇႁိုဝ်ပိူၼ်ႈတၵ်းႁပ်ႉတုင်းဢဝ်ၵဝ်ၵႃႈၼႂ်းႁိူၼ်းၶဝ်ၸိုင်၊ ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ဝႃႈၼႆ၊ ၵဝ်ႁူႉယဝ်ႉ၊ ဝႃႈၼင်ႇၼႆသေယဝ်ႉ၊- 5ႁွင်ႉဢဝ်ၵူၼ်းဢၼ်ထုၵ်ႇၼီႈတီႈၸဝ်ႈမၼ်းၵူႈၵေႃႉၵူႈၵူၼ်းမႃးသေလႄႈ ထၢမ်ၵေႃႉၼိုင်ႈလႄႈဝႃႈ၊ ၼီႈဢၼ်မႂ်းတၵ်းလႆႈတႅၼ်းပၼ်တီႈၸဝ်ႈၵဝ်ၼၼ်ႉမီးၼမ်လႂ်၊ မိူဝ်ႈဢၼ်ဝႃႈၼင်ႇၼႆၸိုင်၊- 6ၵေႃႉၼၼ်ႉၵေႃႈလၢတ်ႈလႄႈဝႃႈ၊ ထုၵ်ႇလႆႈတႅၼ်းပၼ် ၼမ်ႉမၼ်းပၢၵ်ႇၼိုင်ႈၶႃႈဢေႃႈ၊ ဝႃႈၼင်ႇၼႆဢေႃႈ။ ၽၼ်ႇတႃႇၸူဝ်းၵေႃႈလၢတ်ႈလႄႈဝႃႈ၊ ဢဝ်ၸရၢင်းမႂ်းသေလႄႈ ၼင်ႈၶၼ်ၶၼ်ၽႂ်းၽႂ်းသေယဝ်ႉ၊ တႅမ်ႈဝႆႉႁႃႈသိပ်းၵူၺ်းတႃႉ၊ ဝႃႈၼင်ႇၼႆဢေႃႈ။- 7လိုၼ်းၼၼ်ႉ မၼ်းသမ်ႉႁွင်ႉဢဝ်တၢင်ႇၵေႃႉမႃးသေလႄႈထၢမ်လႄႈဝႃႈ၊ ၼီႈဢၼ်မႂ်းတၵ်းလႆႈတႅၼ်းပၼ်တီႈၸဝ်ႈၵဝ်ၼၼ်ႉမီးၼမ်လႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၵေႃႈလၢတ်ႈလႄႈဝႃႈ၊ ထုၵ်ႇလႆႈတႅၼ်းပၼ်ၶဝ်ႈၵျုင်ႇပၢၵ်ႇတၢင်ၶႃႈဢေႃႈ၊ ဝႃႈၼင်ႇၼႆဢေႃႈ။ ၽၼ်ႇတႃႇၸူဝ်းၵေႃႈလၢတ်ႈလႄႈဝႃႈ၊ ဢဝ်ၸရၢင်းမႂ်းသေလႄႈ တႅမ်ႈဝႆႉပႅတ်ႇသိပ်းတၢင်ၵူၺ်းတႃႉ၊ ဝႃႈၼင်ႇၼႆဢေႃႈ။- 8ၵွပ်ႈပိူဝ်ႈဢၼ်ၽၼ်ႇတႃႇၸူဝ်းဢၼ်ဢမ်ႇတြႃးၼၼ်ႉ ႁဵတ်းတၢင်းဢၼ်လၵ်းလႅမ်ၸိူဝ်ႉၼင်ႇၼႆၼၼ်ႉလႄႈ ၸဝ်ႈမၼ်းယွင်ႈယေႃးမၼ်းယူႇဢေႃႈ။ လွင်ႈမၼ်းၸမ်ႉ ၵူၼ်းလေႃးၵီႇတင်းလၢႆၵႃႈၼႂ်းမဵဝ်းၶဝ်ၼၼ်ႉ ယဵင်ႈၶႅၼ်းလၵ်းလႅမ်သေၵူၼ်းဢၼ်ႁွတ်ႈထိုင်ၵႃႈၼႂ်းဢၼ်လႅင်းတင်းလၢႆဢေႃႈ။
9ၵဝ်သမ်ႉဝႃႈထႅင်ႈၸမ်ႉ၊ မိူဝ်ႈဢၼ်ၸေးၸိမ်ႇလေႃးၵီႇဢၼ်ဢမ်ႇတြႃးသဵင်ႈသုတ်းၼၼ်ႉ၊ ၼင်ႇႁိုဝ်သူတၵ်းလႆႈမီးၵေႃႉသေႈဢၼ်တၵ်းႁပ်ႉတုင်းဢဝ်သူ ၵႃႈၼႂ်းသုမ်ႉထဵင်ဢၼ်တႄႇယူႇသေႇသေႇၼၼ်ႉၸိုင်၊ ဢဝ်ၸေးၸိမ်ႇလေႃးၵီႇဢၼ်ဢမ်ႇတြႃးၼၼ်ႉ ႁဵတ်းႁႂ်ႈပဵၼ်ၵေႃႉပဵၼ်သေႈဝႆႉတႃႉ။- 10ၵေႃႉဢၼ်မီးသဵတ်ႈၸႃႇၵႃႈတီႈလွင်ႈတၢင်းဢၼ်လဵၵ်ႉဢၼ်ၵေႇသေပိူၼ်ႈၼၼ်ႉ၊ ၵႃႈတီႈလွင်ႈတၢင်းဢၼ်ယႂ်ႇဢၼ်လူင်ၵေႃႈတၵ်းမီးသဵတ်ႈၸႃႇဢေႃႈ။ ၵေႃႉဢၼ်ဢမ်ႇမီးသဵတ်ႈၸႃႇၵႃႈတီႈလွင်ႈတၢင်းဢၼ်လဵၵ်ႉဢၼ်ၵေႇသေပိူၼ်ႈၼၼ်ႉ၊ ၵႃႈတီႈလွင်ႈတၢင်းဢၼ်ယႂ်ႇဢၼ်လူင်ၵေႃႈ တၵ်းဢမ်ႇမီးသဵတ်ႈၸႃႇ။- 11ပိူဝ်ႈၼႆလႄႈ ပေႃးသူဢမ်ႇမီးသဵတ်ႈၸႃႇၵႃႈတီႈၸေးၸိမ်ႇလေႃးၵီႇဢၼ်ဢမ်ႇတြႃးၼၼ်ႉၸိုင်၊ ၽူႈလႂ်တၵ်းဢဝ်ၸေးၸိမ်ႇ ဢၼ်ၸိုဝ်ႈဢၼ်ၸႂ်ႈၼၼ်ႉဢၢပ်ႈပၼ်တီႈသူ။- 12ပေႃးသူဢမ်ႇမီးသဵတ်ႈၸႃႇၵႃႈတီႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းပိူၼ်ႈတၢင်ႇၵေႃႉၼၼ်ႉၸိုင်၊ ၽူႈလႂ်တၵ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းသူၼၼ်ႉပၼ်တီႈသူ။- 13ၵူၼ်းၸႂ်ႉၵူၼ်းသွႆၵေႃႉလႂ်သေဢမ်ႇဝႃႈ၊ ဢမ်ႇၶၢမ်ႇတၢင်းဢၼ်ၸဝ်ႈသွင်ၵေႃႉ ၸႂ်ႉသွႆၼၼ်ႉလႆႈ။ တၵ်းၸင်းၸဝ်ႈၵေႃႉၼိုင်ႈလႄႈ ႁၵ်ႉၸဝ်ႈၵေႃႉၼိုင်ႈဢေႃႈ။ တၵ်းဢိင်ပိုင်ႈၸဝ်ႈၵေႃႉၼိုင်ႈလႄႈ ႁဵတ်းဢမ်ႇပေႃးၼင်ႇႁိုဝ်တီႈၸဝ်ႈၵေႃႉၼိုင်ႈဢေႃႈ။ သူဢမ်ႇၶၢမ်ႇတၢင်းဢၼ်ၽြႃးပဵၼ်ၸဝ်ႈၸႂ်ႉသွႆဢိၵ်ႇတင်းတၢင်းဢၼ်ၸေးၸိမ်ႇလေႃးၵီႇၸႂ်ႉသွႆၼၼ်ႉလႆႈ၊ ဝႃႈၼင်ႇၼႆဢေႃႈ။
ၵႂၢမ်းၸဝ်ႈယေႇသူႉသင်ႇသွၼ်
(တူၺ်း၊ မၢတ်ႈ 11:12-13။ မၢတ်ႈ 5:31-32။ မႃႇ 10:11-12)
14 ၽႃႇရီႉသႄး ဢၼ်ၸႂ်ၸပ်းၸႂ်ၸွႆးငိုၼ်းၸိူဝ်းၼၼ်ႉ၊ ငိၼ်းၵႂၢမ်းၼၼ်ႉသေယဝ်ႉ၊ ႁဵတ်းပျၢၵ်ႈၶူဝ်မၼ်းၸဝ်ႈဢေႃႈ။- 15မၼ်းၸဝ်ႈၵေႃႈလၢတ်ႈလႄႈဝႃႈ၊ ပိၵ်ႉသမ်ႉသူႁဵတ်းၸိူဝ်ႉၼင်ႇႁၢင်ႈသိုဝ်ႈတေႃႇၵႃႈတီႈၽၢႆႇၼႃႈၵူၼ်းတင်းလၢႆသေၵေႃႈ ၽြႃးပဵၼ်ၸဝ်ႈႁူႉႁၼ်ႁူဝ်ၸႂ်သူယူႇဢေႃႈ။ လွင်ႈတၢင်းဢၼ်ၸွမ်းၼင်ႇသၽေႃးၵူၼ်းႁဝ်းဝႃႈပဵၼ်ဢၼ်လီဢၼ်မျၢတ်ႈၼၼ်ႉ ပဵၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
16ၸူဝ်ႈဢၼ်ယူဝ်းႁၢၼ်ႇဢမ်ႇပႆႇၽႅဝ်မႃးၼၼ်ႉၸိုင်၊ မီးၵျၢမ်းပိင်းၺၢပ်ႈတီႉ တင်းၵျၢမ်းဢၼႃႇၵၢတ်ႈတီႉယူႇဢေႃႈ။ ၸႃႉၸဵမ်ၸူဝ်ႈပၢၼ်မၼ်းၼၼ်ႉလႄႈ ႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈလႄႈယူႇဢေႃႈ။ ၵူၼ်းတင်းလၢႆၵေႃႈႁဵတ်းပႄႉႁဵတ်းၼႅင်ႇသေလႄႈ ၶဝ်ႈၵႃႈၼႂ်းမိူင်းၸဝ်ႈဢေႃႈ။- 17ၵၢင်ႁၢဝ်တင်းလိၼ်မိူင်းယဵင်ႈၶႅၼ်းလူႉလႅဝ်ငၢႆႈသေ ၸမ်ႈမၼ်းပဵင်ႇတူႉဢၼ်လဵၵ်ႉသေပိူၼ်ႈၼႂ်းၵျၢမ်းပိင်းၺၢပ်ႈတီႉလူႉလႅဝ်ၼၼ်ႉဢေႃႈ။
18ၽူႈလႂ်သေဢမ်ႇဝႃႈ၊ ၵေႃႉဢၼ်ပႅတ်ႈမေးမၼ်းသေလႄႈ သမ်ႉဢဝ်မႄႈယိင်းတၢင်ႇၵေႃႉထႅင်ႈၼၼ်ႉ၊ ၵေႃႉၼၼ်ႉၽိတ်းပိူင်ႈမေးမၼ်းဢေႃႈ။- ၵေႃႉဢၼ်ဢဝ်မႄႈယိင်းဢၼ်ၽူဝ်ပႅတ်ႈၼၼ်ႉၵေႃႈ ၽိတ်းပိူင်ႈမေးပိူၼ်ႈဢေႃႈ၊ ဝႃႈၼင်ႇၼႆဢေႃႈ။
သထေးလူင်တင်းလႃႇၸရူႉ
19မၼ်းၸဝ်ႈသမ်ႉဝႃႈထႅင်ႈၸမ်ႉ၊ မီးသထေးၵေႃႉၼိုင်ႈဢေႃႈ။ မၼ်းၼၼ်ႉၼုင်ႈမႆၶူဝ်းၼုင်ႈဢၼ်လႅင်ၵမ်ႇဢိၵ်ႇတင်းပိၵ်ႈၶျေႃးသေလႄႈ မူၼ်ႈပျေႃႇယူႇၵႃႈၼႂ်းၵႃႇမၵုင်ႇၵူႈဝၼ်းဢေႃႈ။- 20ၵူၼ်းၽၢၼ်ၵေႃႉၼိုင်ႈ ဢၼ်လႆႈၸိုဝ်ႈလႃႇၸရူႉၼၼ်ႉ ပဵၼ်တုမ်ႇၸဵပ်းတင်းတူဝ်လႄႈ၊- 21မီးၸႂ်ဢၼ်ၶႂ်ႈၵိၼ်ဢၼ်ယွႆႈဢၼ်ယႅမ်း ဢၼ်တူၵ်းၵႃႈတီႈၶူင်ႇတီႈၵိၼ်သထေးၼၼ်ႉယူႇသေလႄႈ ၼွၼ်းၶူတ်းယူႇၵႃႈတီႈၽၢႆႇၼႃႈၽၵ်းတူႁိူၼ်းသထေးၼၼ်ႉဢေႃႈ။ မႃတင်းလၢႆၵေႃႈမႃးလႄႈ လေးၵိၼ်တုမ်ႇၸဵပ်းမၼ်းယူႇဢေႃႈ။- 22ဝၼ်းၼိုင်ႈၵူၼ်းၽၢၼ်ၼၼ်ႉတၢႆလႄႈ တမၢၼ်ႇၵၢင်ႁၢဝ်တင်းလၢႆ ဢဝ်မၼ်းၵႂႃႇသူင်ႇၵႃႈတီႈၼႂ်းဝၢင်ႈႁူဝ်ဢူၵ်း ဢႃႇပြႃႇႁၢမ်ႇပုၼ်ႉဢေႃႈ။ သထေးၼၼ်ႉၵေႃႈတၢႆလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇဢေႃႈ။- 23မၼ်းၼၼ်ႉလႆႈၶၢမ်ႇဝူၺ်ႇတၼႃႇၼမ်ၼႃႇလူင်လၢင် ၵႃႈၼႂ်းမိူင်းမရၼႃႉပုၼ်ႉယူႇသေလႄႈ မုင်ႈတူၺ်းလႄႈလႆႈႁၼ်ဢႃႇပြႃႇႁၢမ်ႇ မီးယူႇတီႈဢၼ်ၵႆၼႃႇ ဢိၵ်ႇတင်း လႃႇၸရူႉ ၵႃႈၼႂ်းဝၢင်ႈႁူဝ်ဢူၵ်းမၼ်းၼၼ်ႉသေယဝ်ႉ၊- 24ႁွင်ႉသႅၼ်ႇလႄႈဝႃႈ၊ ပေႃႈဢႃႇပြႃႇႁၢမ်ႇၶႃႈဢိူၺ်း၊ ဢဵတ်းလူၵဝ်ၶႃႈသေၵမ်းၶႃႈ။ ပိူဝ်ႈဢၼ်ၵဝ်ၶႃႈလႆႈၶၢမ်ႇၼမ်ၼႃႇလူင်လၢင်ၵႃႈၼႂ်းၽႆးလုၵ်ႉၼႆႉလႄႈ၊ ၼင်ႇႁိုဝ် လႃႇၸရူႉ တၵ်းဢဝ်ပၢႆမိုဝ်းမၼ်းသႂ်ႇၼႂ်းၼမ်ႉလႄႈ ႁႂ်ႈလိၼ်ႉၵဝ်ၶႃႈၵတ်းမႃးၸိုင်၊ ၶႅၼ်းတေႃႈပွႆႇမၼ်းမႃးၵႃႈတီႈဢၼ်ၵဝ်ၶႃႈမီးၼႆႉသေၵမ်းၶႃႈ၊ ဝႃႈၼင်ႇၼႆဢေႃႈ။- 25ဢႃႇပြႃႇႁၢမ်ႇၵေႃႈလၢတ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်မႂ်းၵတ်းယဵၼ်ၶျၢမ်းသႃႇၼႂ်းမိူဝ်ႈဢၼ်ဢသၢၵ်ႈမႂ်းယင်းလိပ်းယူႇၼၼ်ႉ ဢိၵ်ႇတင်းလွင်ႈဢၼ် လႃႇၸရူႉလႆႈၶၢမ်ႇတၢင်းယၢၵ်ႈတၢင်းၽၢၼ်ၼၼ်ႉတႃႉ။ တေႃႈလဵဝ်ၼႆႉၸမ်ႉ၊ မၼ်းမီးလွင်ႈတၢင်းဢၼ်သၢၵ်ႈသႃႇၵႃႈတီႈၼႆႈဢေႃႈ။ မႂ်းလႆႈၶၢမ်ႇတုၵ်ႉၶႃႉဝူၺ်ႇတၼႃႇဢေႃႈ။- 26လိူဝ်သေၼၼ်ႉဢမ်ႇၵႃး၊ ၼႂ်းဝူင်ႈၵၢင်ႁဝ်းတင်းသူ မီးႁိုၵ်းလူင်ဢၼ်လိုၵ်ႉၼႃႇဢေႃႈ။ ပိူဝ်ႈၼႆလႄႈ ၶဝ်ၸိူဝ်းဢၼ် ၶႂ်ႈလုၵ်ႉသေၵႃႈတီႈၼႆႈ ၶၢမ်ႈၵႂႃႇၸူးၵႃႈတီႈဢၼ်သူမီးပုၼ်ႉၼၼ်ႉဢမ်ႇၶၢမ်ႈၵႂႃႇလႆႈ။ ၶဝ်ၸိူဝ်းဢၼ်ၶႂ်ႈလုၵ်ႉသေၵႃႈတီႈၼၼ်ႈ ၶၢမ်ႈမႃးၵႃႈတီႈဢၼ်ႁဝ်းမီးၼႆႉၵေႃႈ၊ ဢမ်ႇၶၢမ်ႈမႃးလႆႈ၊ ဝႃႈၼင်ႇၼႆဢေႃႈ။- 27သထေးၵေႃႈလၢတ်ႈလႄႈဝႃႈ၊ ပေႃႈဢိူၺ်း၊- 28ပေႃးပဵၼ်ၸိူဝ်ႉၼင်ႇၼႆၸိုင်၊ ပိူဝ်ႈဢၼ်ၵဝ်ၶႃႈမီးၼွင်ႉၸၢႆးႁႃႈၵေႃႉလႄႈ ၼင်ႇႁိုဝ်ၶဝ်ၼၼ်ႉတၵ်းဢမ်ႇႁွတ်ႈထိုင်ၵႃႈတီႈဢၼ်လႆႈၶၢမ်ႇၼမ်ၼႃႇလူင်လၢင်ၼႆႉၸိုင်၊ ၶႅၼ်းတေႃႈ ၸဝ်ႈႁဝ်းပွႆႇလႃႇၸရူႉ ၵႂႃႇၵႃႈတီႈႁိူၼ်းပေႃႈၵဝ်ၶႃႈပုၼ်ႉ ႁႂ်ႈလႆႈၶၢမ်ႇသၢၵ်ႈသေႇတီႈၶဝ်ၼၼ်ႉသေၵမ်းၶႃႈ၊ ၵဝ်ၶႃႈတွင်းပၢၼ်ႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 29ဢႃႇပြႃႇႁၢမ်ႇၵေႃႈလၢတ်ႈလႄႈဝႃႈ၊ တီႈၼွင်ႉၸၢႆးမႂ်းၸိူဝ်းၼၼ်ႉ မီးၸႃႉၸဵမ်မူဝ်းသေႇ ဢိၵ်ႇတင်းပရေႃးၽႅတ်ႈတင်းလၢႆယူႇဢေႃႈ။ ႁႂ်ႈၶဝ်ထွမ်ႇဢဝ်ၵႂၢမ်းပရေႃးၽႅတ်ႈၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။- 30မၼ်းၵေႃႈလၢတ်ႈလႄႈဝႃႈ၊ ဢမ်ႇၸႂ်ႈၶႃႈ၊ ပေႃႈဢႃႇပြႃႇႁၢမ်ႇၶႃႈဢိူၺ်း၊ ၼႂ်းၵူၼ်းဢၼ်တၢႆယဝ်ႉတင်းလၢႆၸိူဝ်းၼၼ်ႉ၊ ပေႃးသေၵေႃႉသေၵူၼ်းလုၵ်ႉၶိုၼ်းလႄႈ ၵႂႃႇၵႃႈတီႈဢၼ်ၶဝ်မီးၼၼ်ႉၸိုင်၊ ၶဝ်တၵ်းၶုၵ်းၸႂ်လႆႈမႆႈၸႂ်ၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 31ဢႃႇပြႃႇႁၢမ်ႇၵေႃႈလၢတ်ႈလႄႈဝႃႈ၊ ပေႃးၶဝ်ဢမ်ႇထွမ်ႇဢဝ်ၵႂၢမ်းမူဝ်းသေႇတင်းၵႂၢမ်းပရေႃးၽႅတ်ႈတင်းလၢႆၸိူဝ်းၼၼ်ႉၸိုင်၊ ပိၵ်ႉသမ်ႉသေၵေႃႉသေၵူၼ်း လုၵ်ႉၵႃႈတၢင်းတၢႆၶိုၼ်းလိပ်းသေၵေႃႈ၊ ၶဝ်တၵ်းဢမ်ႇယုမ်ႇမၢတ်ႈၵူၺ်ႉ ဝႃႈၼႆ၊ မၼ်းၸဝ်ႈ၊ ဝႃႈၼင်ႇၼႆဢေႃႈ။
Currently Selected:
လူႉၵႃႇ 16: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
